فليفلة محشية بشكل وطعم ولا أحلى

111 5٬107
 

فليفلة محشية بشكل وطعم ولا أحلى

فليفلة محشية بشكل وطعم ولا أحلى

فليفلة محشية بشكل وطعم ولا أحلى

فليفلة محشية بشكل وطعم ولا أحلى, معكم صديقة زاكي الشيف الموهوبة , السلااام عليكم ورحمة الله حبايب قلبي اشتقتلكن كتييير والله طمنوني عنكن شو اخباركن يارب تكونو بخير وعافية والله يرفع عنا وعنكم البلاء ويعف عنا
مقصرة معكن كتييير بس صدقا ماعم لاقي وقت أبدا أعتقد جربتو قعدة الحجيات بالبيت مافي داعي اشرح هههه رح حاول قدر الامكان ماضل غيب لأنو مقدرش على بعدكم والله
بالنسبة للوصفات بهالوضع ما أعتقد اتفنن لأنو في ناس محتاجة نوقف معها بهيك أزمة بس الحمد لله عندي شوية وصفات ومو منزلتن اجى وقتن هلأ فأغلب الوصفات اللي رح تنزل هية وصفات عاملتها الفترة الماضية ومافضيت نزلها،، مارح طول عليكن اكتر تعالو نشوف المقادير:

المقادير

  • نصف كيلو صدور دجاج مقطعة مكعبات صغيرة
  • فليفلة خضراء مربعة مغسولة ومقطوعة نصفين (يفضل تكون كبيرة مشان توسع الدسم)
  • شرائح بصل أخضر
  • بصل أبيض
  • ملعقة كبيرة شطة (فيكم تنسفوها)
  • نصف كوب درة
  • قشقوان
  • البهارات:
  • بهار دجاج مشكل
  • ملح
  • فلفل أسود
  • رشة هيل
  • توم بودرة

الخطوات

“بسم الله الرحمن الرحيم”

* أول شي رح نقلي البصل الأخضر والأبيض بشوية الزيت

* بس يدبل البصل منضيف عليه الجاج ومنقلب

* لما يصير لون الجاج أبيض منضيف البهارات والشطة ومنخلط

* بس يستوي الجاج تماماً منضيف الدرة ومنقلب تقليبتين ومنطفي

* منحط الفليفلة على صينية بعد ماندهنها دهنة خفيفة بالزيت ومنحشيها بحشوة الدجاج ومنحط بالنص قشقوان ومنرجع منحط من خليط الدجاج

* مندخل الفليفلة على فرن حامي وبس تدبل شوي منطالعها (طبعاً فيكم تتحكمو باستواءها وقرشتها حسب مابتحبو) ومنحط عالوش قشقوان من حلقات البصل الاخضر وكم حبة درة للمنظر ومنرجع مندخل الصينية عالفرن ليسيح القشقوان ومنطالعها

* خلص صارت جاهزة لتدخل لكروشنا الكبير

بتمنى تجربوها وتعجبكن انتو وأهلكن وتدعوووولي كمشات

والأهم من هيك ديرو بالكم على حالكم ولا تنسو التعقييييم وخليكم بالبييييت

الناس اللي عم تضحي بنفسها وتعرض حالها للخطر الهم علينا حق واهلنا وحبايبنا الهم علينا حق

فكل حدا لازم يتحمل مسؤوليتو

وماتنسو الناس اللي قعدت بدون شغل ووضعها مابيعلم فيه إلا رب العالمين

وقفو جنبهم حسب الاستطاعة

هاد واجب ومو فضل أبدا

الله يعافيكن ويبعد عنكن كل مكروه..

عرض التعليقات (111)