ألذ تريليتشا سلسلة الوصفات التركية 14

64 31٬729
 

ألذ تريليتشا سلسلة الوصفات التركية 14

ألذ تيرليتشا من "سلسلة الوصفات التركية" ♡14♡

ألذ تريليتشا سلسلة الوصفات التركية 14

ألذ تريليتشا سلسلة الوصفات التركية 14 , معكم صديقة زاكي الشيف الموهوبة , التيرليتشا وصفة تركية شعبية ومشهورة كتير وطعمها مميز عن غير أكلات ولذيذ كتيييير عدا عن انو عملها سهل بالبيت رغم سعرها العالي بالمحلات بقى شمرو ولحقوني عالمطبخ نعملها سوا يا أحلى وردات

المقادير

  • للكيكة الاسفنجية:
  • 5 بيضات
  • كوب وربع سكر
  • باكيتين فانيليا
  • ربع كوب ماء دافئ
  • باكيت بيكينغ باودر
  • ملعقة كبيرة نشا
  • كوب طحين
  • رشة ملح
  • لتسقية الكيك:
  • حوالي 800 مل حليب يعني 3 كوب وشوي
  • ملعقتين كبار سكر
  • كوب كريمة سائلة وبحال عدم توفر الكريمة السائلة مندوب باكيتين كريمة بودرة بالحليب بدون ما نخفقهم
  • كريما شانتيه مخفوقة بالحليب تكون سميكة شوي
  • لصلصة الكراميل:
  • كوب سكر
  • ثلاث ارباع الكوب ماء
  • ملعقتين زبدة
  • نصف كوب حليب مدوب فيه ملعقتين ك نشا

الخطوات

☆بسم الله الرحمن الرحيم☆

اول شي للكيكة:

منخفق بياض البيض لحالو بجاط لينفش ويصير ابيض ومتل قوام الكريما

بجاط تاني منخفق الصفار مع الفانيليا والسكر منيح وبعدا منضيف المي ومنخلطهم وبعدا مننخل المكونات الجافة ومنضيفهم عليهم ومنخفقهم سوا

هلا بقى باستخدام السباتيولا أو ملعقة خشب منضيف قسم من بياض البيض المخفوق ومنحرك من تحت لفوق بخفة لحتى مايهبط عنا ومنضيف باقي البياض ومنعمل نفس الحركة ليختفي بالمزيج ومنصب الخليط بالصينية ومندخلو الفرن المحمى مسبقاً على درجة حرارة 180 لحتى يستوي تقريبا

بياخد حوالي نص ساعة أو حسب الفرن ومنختبرو بعود خشبي وبس يستوي منطالعو ومنتركو يبرد تمااااما

منعمل خليط التسقية للكيك

منخلط الحليب مع السكر ليدوب السكر ومنضيفهم عالكريما السائلة ومنحرك كل شي مع بعض وطبعاً كلو بارد

وبعد ماتبرد الكيكة تماما منجيب عود خشب ومنغرزو بأنحاء الكيكة لحتى تتشرب منيح ومنسقيها بخليط الحليب والكريما

هلا بقى منفرد فوقها طبقة خفيفة من الكريما الشانتيه ومنحطها بالبراد لبين مانعمل صلصة الكراميل

لصلصة الكراميل منحط السكر بطنجرة جافة تماما ومنشغل تحتو الغاز لحتى يدوووب تماما منضيف كوب الماء والزبدة وطبعا رح تلاحظو السكر أول شي بجمع على بعضو فماتخافو وضلو حركوهم مع بعض ليرجع يفك ويدوب واذا بقيت شقفة صغيرة معاندتكم وضاق خلقكم بلاها شيلوها مابتأثر هههه

هلا بقى مندوب النشا بالحليب ومنضيفهم فوق خليط السكر مع الاستمراااار بالتحريك لحتى يبلش الصوص يغلي ويتماسك مع بعضو منطفي تحتو ومنخليه ليفتر منضيفو فوق الكريمة ومنعمل خطوط بالكريما وبعود خشبي منعمل خط لفوق وخط لتحت لنحصل عهالشكل

ماحدا يسألني ليش خطوطي مفشكلة

عملتن خلال 3 ثواني يمكن هههه

كان عندي ضيوف والولاد الصغار بين ايديي ماعرفت ركز ابدا هههه

المهم رجعو حطوها شوي بالبراد وبعدا بتصير جاهزة للهجوم وصحة وألف هنا

ادعولي بالبركة يا أميرات♡

عرض التعليقات (64)