سيطلع من عتمتي قمرا بقلم هلا غرابلي 

33 6٬721
 

سيطلع من عتمتي قمرا بقلم هلا غرابلي

سيطلع من عتمتي قمرا بقلم هلا غرابلي

سيطلع من عتمتي قمرا بقلم هلا غرابلي

سيطلع من عتمتي قمرا بقلم هلا غرابلي , معكم صديقة زاكي الشيف الموهوبة ,

#سيطلع_من_عتمتي_قمرا_بقلم_هلاغرابلي

الجز الاول:

انت بنت ..جملة كتير بيسمعوها البنات اذا بدك تطلعي تسهري ممنوع لانك انت بنت او اذا بدك تسافري لحالك او اذا بدك تنامي عند رفيقتك ممنوع لانك انت بنت و دائما الممنوع للبنت هو مسموح للشب مع اني انا بشوف انو لازم الشي الممنوع يكون ممنوع للطرفين لانو الشي يلي بيوقع على البنت نفسه بيوقع على الشب مع نفس الاضرار و التأثير النفسي و الجسدي ممكن الشاب يصير مدمن مخدرات او كحول او شاذ جنسيا او ….و شغلات كتير لا تعد و لا تحصى بس مجتمعنا الشرقي لانو ذكوري بامتياز بشوف ضرر البنت اقوى و ابعد المدى مع انه يمكن البنت تكون ضحية هالمجتمع نفسه ضحية افكاره و عاداته و افراده الذكور ……

اسمي يارا عمري 23سنة متخرجة من كلية الحقوق ساكنة عند بيت جدي من تسع سنين و كبرت و بلغت و درست و تخرجت عند بيت جدي لانو ابي و امي منفصلين ابي طلق امي و تزوج بعدها فورا و امي تزوجت بعد طلاقها منه بسنة حاولت عيش عند امي بس زوجها تحرش فيني كذا مرة و انا ما قدرت خبرها حتى ما كون سبب لطلاقها التاني لهيك طلعت من عندها و رحت لعيش عند ابي بس مرة ابي شغلتني خدامة الها و لاولادها حتى لدرجة حسيت حالي سندريلا لهيك رجعت و استقريت عند بيت جدي من طرف امي يلي كانو بحبوني و بعاملوني منيح و براعو مشاعري و احساسي باليتم و الوحدة……

كنت مفكرة حالي ضحية طلاق ابي و امي بس لاني بنت بنيت حالي بشخصية قوية و عقل منفتح قدرت تابع حياتي و ما خليت هالشي عائق بطريقي و كونت رفقات و عالم خاص فيني و افكار فريدة من نوعها كنت ببساطة ما بشبه اي حدا كنت قمر بكل هالعتمة لان فعلا ظروفي و يلي شفته بحياتي ما مر على حدا بس فكرت الدنيا اعطتني من الالم و الوجع يكفيني عن العمر كله و هلا لازم تكافئني و تبرم وجهها لعندي و تبتسملي بس لاا لااا الدنيا كان الها رأي مختلف و لسا ما صفت حسابها معي …..#hla_gharabli

قصتي بدأت يوم الخميس الساعة 12:30 ليلا

يارا خلص هاي اخر غنية منرقص عليها و بعدين بخليكي تروحي….

يالله منك صارت الساعة 12تاخر الوقت كتير لازم روح عالبيت ….

خلص خليكي نامي عندي و بكرا الصبح بتروحي …

ما بقدر نام عندك ما قلتلها للتاتا و هلا بينشغل بالها علي ….

كيف بدك ترجعي بهالليل ما بتخافي وليه …

لا مابخاف طبعا باخد تكسي فورا يلا سلام بشوفك بكرا…

طلعت من بيت رفيقتي سارة يلي كانت عاملة حفلة تخرج و عازمة كل رفقات دفعتنا كانت الشوارع فاضية مشيت شوي لوصلت للشارع الرئيسي و وقفت انطر تكسي و انا واقفة اجت سيارة من بعيد و واضح يلي عم يسوقها ما بوعيه عم ياخدها يمين و شمال مرت من جنبي السيارة و كان فيها شباب على ما يبدو سكرانين عم يضحكو و يحكو بصوت عالي طلعو فيني و قلولي شو الحلو بدو توصيلة؟؟ انا طلعت فين و زورتن و برمت وجهي عنن تابعو بسيارتن بحدود المية متر لقدام و فجأة شحطت السيارة و لفت و رجعت باتجاهي انا ما اعطيت اي انتباه وقفت السيارة و نزل منها 4شباب و اجو لعندي و حاصروني حسيت حالي متل الغزالة و حواليها اسود بدن ينقضو عليها و يفترسوها قلتلن بعدو عني احسن ما صرخ و لم الناس عليكن صارو يضحكو و يقلولي ليش وين الناس؟؟طالعت موبايلي من جزداني و بدي دق للبابا بسرعة و انا متوترة هجم علي واحد منن و اخد الموبايل مني و اعطاهن اشارة للشباب التلاتة بانو يتحركو فورا هجمو علي و حملوني و انا عم صرخ و ابكي و سبن و قلن نزلوني …. يا ناس الحقوني …طلعوني بالسيارة و مشيو فورا و واحد منن حط ايدو على تمي حتى ما صرخ و التاني مسك ايدي و حطن ورا ضهري حتى يشل حركتي …..يتبع

الجزء التاني:

كنت عم ابكي و هن عم يضحكو كنت خايفة و هن مبسوطين بخوفي وبعد ربع ساعة نزلوني من السيارة و فوتوني على شقة صغيرة فيها غرفة نوم و غرفة قعدة و ضمنها مطبخ حملني واحد منن و فوتني على غرفة النوم و زتني عالتخت و قلن جيبو الحبل يلي بالدرج التاني و االلاصق العريض راح واحد منن على المطبخ و شبين ثبتوني عالتخت و التالت قلن انا رح بلش لاني انا صاحب الفكرة قلوله ما منختلف عالترتيب الكل رح يلحقه دور انا قلتلن بشو بدك تبلشو يا كلاب اتركوني ولله لخليكن تخو بالحبوس صارو يضحكو تابعت حكي و انا عم ابكي بتعرفو شو عقوبتكن ؟؟صارو يضحكو لا ما منعرف و لا بدنا نعرف و قبل ما كمل حديثي اجا الشب من المطبخ و حطلي لاصق على تمي و ربطوني بالتخت و طلعو الباقي و بقي الشب يلي صاحب الفكرة قرب علي و بلش يشلحني تيابي و انا عم حاول اتحرك و فك الحبل متل الشخص يلي عم يطالع بالروح و حاولت صرخ بس صرختي و وجعي كانو مكموتين و ما مسموعين كانت دقايق معدودة بس انا حسيتن دهر باكمله هالدقايق كانت بتغلب بكفتها كل شي بشع شفته بحياتي قبل هاللحظة عرفت شو يعني انا بنت و شو يعني ضلع قاصر و عرفت انو انا صرت رقم من ارقام ضحايا الاغتصاب يلي كل يوم بتزيد نسبتها بكل انحاء العالم…..#hla_gharabli

بعد ما خلص الشب الاول طلع لعند الباقي و قلن دور مين هلا؟فات عندي الشب التاني و بعدا التالت و بعدا الرابع وصلت لمرحلة ما قدرت ميز فيها الوجوه و استسلمت عالاخير و ايقنت انو انا ميتة لا محالة نمت او غبت عن الوعي ما بعرف وقت رجعت فتحت عيوني اول شي شفته قدامي صبية قربت علي و قلتلي سامعتيني انا رايحة نادي الدكتور و بعد شوي رجعت و اجا معها الدكتور قرب علي ليحكي معي و انا صرت صرخ و قله بعد عني بعد عني صابتني حالة هيستيريا و فورا عطوني ابرة مهدئ اعصاب و ارتخيت و ما عاد حسيت على شي

فقت بعد ساعتين او تاني يوم ما بعرف كنت عايشة خارج نطاق الوقت و اول ما فقت جابولي دكتورة نفسية قلتلي انا هون لساعدك انت هو بامان ما تخافي انت بالمشفى رح اسالك شوية اسئلة و اذا ما بتحبي مناجلها قلتلها تفضلي قلتلي شو اسمك قلتلها يارا قلتلي اعطيني رقم اهلك صفنت بالسقف اهلي رقم ابي ولا رقم امي ولا رقم بيت جدي اعطيتها رقم امي و رقم رفيقتي سارة قلتلي هلا رح نحكين لنطمنن ونقلن انك انت هون و راحت و رجعت بعد شوي قلتلي انت بتتذكري شو صار معك الليلة الماضية ؟؟قلتلها مستحيل انسى قلتلي تمام هلا رح اتركك ترتاحي و النا حديث طويل بعدين …..

بعد نص ساعة اجت امي و رفيقتي سارة فاتو عندي و كانو عم يبكو سالوني شو صاير معك ؟وين كنت ؟ خربنا الدنيا عليكي فاتت بعدها الدكتورة و طلبت من امي تحكيها على انفراد و خبرتها انو التقرير الطبي بين انو انا تعرضت لاغتصاب من اكتر من شخص واحد و صار عندي نزيف حاد بس اسعفوني فورا و وقفولي النزيف و اعطوني ابرة حتى ما يصير حمل عندي خلال ال24ساعة انصدمت امي من الشي يلي سمعته و سالتها وين لقتوها قلتلها اسعفها لعنا شب شافها مرمية عالارض بالشارع فاتت عندي امي و حضنتني و قلتلي سلامتك امي اهم شي انك بخير و طلعت دقت لابي يلي اجا فورا و خبرته امي بالشي يلي صار و علقو مع بعض بالمشفى كل واحد منن يحط الذنب و اللوم على التاني قلتلها لسارة تعي ساعديني بدي قوم قلتلي خليكي مرتاحة قلتلها بدي قوم حكين ما شايفة اصواتن طالعة بالمشفى قومتني سارة و طلعت برا الغرفة طلعت فين و قلتلن انتو حتى بالمصايب ما بتتفقو انا بهالحالة و مزتوتة على التخت تعبانة نفسيا اكتر من جسديا و انتو قاعدين عم تعلقو هون روحو ما بدي شوف حدا منكن جنبي طول عمركن كنتو ما موجودين هلا جاين تمثلو خوفكن و اهتمامكن ركضو علي و قلولي خلص فوتي ارتاحي قلتلن كل بنت بالحفلة اجو اهلها اخدوها الا انا الا انا لانو امي عايشة حياتها مع زوجها و اولاده و ابي عايشة حياته مع مرته و اولادها و قاعدين تربو باولاد الناس و انا تاركيني للدنيا قلي ابي خلص فوتي ارتاحي بابا نحن رح ننزل نشرب قهوة بكافتريا المشفى فوتتني سارة على الغرفة و قلتلي خلص ما تحطي شي على بالك هلا اهمتي بصحتك حتى نطلع من المشفى فورا ….

بعد ساعة اجو شابين ليفتحو محضر معي و يسالوني عن كل شي صار معي بهديك الليلة و عن اشكال الشباب يلي اغتصبوني بس انا رفضت احكي شي لانو كنت بحالة نفسية سيئة و ما حابة ارجع اتذكر و عيش تفاصيل هديك الليلة ابدا لهيك طلبت منن الدكتورة انو ياجلو حديثن معي لوقت انا اقرر الوقت يلي بكون فيه مستعدة نفسيا لاحكي…..

الجزء التالت:

طلعت تاني يوم من المشفى و نزلت عند بيت جدي و اهلي و رفيقتي سارة ما تركوني ابدا مريت بحالات نفسية سيئة كنت كل ما تغفل عيني فيق عم صرخ و ابكي تعذبت كتير و يلي زاد عذابي اكتر وقت سمعت ابي عم يقول لامي ما رح نحكي لحدا او حتى نروح على مركز الشرطة لازم نستر على الموضوع كرمال سمعة يارا ما بدنا فضايح فتحت الباب و طلعو فيني قلتلن سمعت كل شي ما حدا بياخد قرار عني انا واعية و انا يلي بقرر شو لازم اعمل اذا ما بلغت عنن رح يرجعو يعيدو يلي عملوه مع بنت تانية و تالتة لهيك لازم يتربو و ينالو عقابن و انا مستحيل اسكت ابدا و كون ما بس ضحية وساختن و ضحية خوفي و صمتي و انا صرت منيحة فيكن ترجعو لحياتكن الطبيعية و لا كانو صار شي مع بنتكن….

بعد 3ايام رحت انا و سارة على عيادة الدكتورة النفسية شفاء يلي كانت متابعة حالتي بالمشفى و كانت اسم على مسمى و بلشت علاج عندها و بعد اسبوعين رحت على مركز الشرطة و اخدت معي التقرير الطبي و فتت عندن و قلتلن بدي بلغ عن حالة اغتصاب لوين بروح؟؟ قلولي اطلعي على الطابق التالت تالت غرفة عاليسار غرفة المحقق ماهر طلعت و دقيت على الباب اجا صوته من جوا تفضل فتت و تفاجأ المحقق بانو بنت قلي تفضلي كيف فيني ساعدك؟؟ قلتلو انت المحقق ماهر؟قلي ايه قلتلو بدي بلغ عن حالة اغتصاب قلي تفضلي ارتاحي لنادي للشب ايمن ليفتح محضر و بعد شوي اجا الشب ايمن قلي المحقق ماهر تفضلي خلينا نبلش مين تعرض للاغتصاب؟قلتلو انا قلي عفوا قلتلو انا من فترة اسبوعين صارت معي الحادثة و اجو شبين من مركزكن بس انا ما حكيت شي و اجلت الموضوع لكون مرتاحة و قادرة احكي و هلا انا حاسة حالي منيحة لهيك جيت قلي برافو كملي حكتلو عن الحادثة بالتفصيل و بكيت كذا مرة

و قلي اذا بتحبي منوقف الحكي قلتلو لا بدي نتابع و تابعت حكايتي للاخير و ختمتها بانو انا لازم لاقين بسرعة قبل ما توقع بنت تانية بايدن و انا يلي رح زتن بالسجن بايدي سالني اذا عرفت اسم حدا فين او اذا بتذكر وين موقع البيت يلي اخدوني عليه قلتلو كانت الدنيا ليل و انا كنت عم ابكي و منهارة يعني ما بتذكر منيح قلي طيب رح ناديلك للشب رضا انت رح توصفيله اشكالن و ملامحن و هو رح يرسمن لنحاول نوصل لشكلن و نعمم صورن بالمنطقة و بعدين منروح انا و اياكي للمحل يلي اخدوكي منه و انت حاولي تتذكري الطرق يلي اخدوكي منها لنوصل للبيت و اذا وصلنا للبيت منكون لقيناهن قلتلو تمام انطلقنا انا و المحقق ماهر لنتعرف على طريق البيت و قلي على الطريق انا متفاجئ بانو في بنت هيك بهالشخصية القوية انا بحييكي على قوتك و اصرارك بس ليش جيتي لحالك ليش ما اجا معك حدا من اهلك ؟؟؟قلتلو اهلي منفصلين و انا متعودة من زمان اعمل كل شي لحالي وصلنا على الشارع الرئيسي يلي كنت ناطرة فيه تكسي هديك الليلة و من هالنقطة فتلنا شوارع و حارات كتير بس ما قدرنا نلاقي البيت و على ما يبدو حتى ذاكرتي خانتني و كانت متآمرة معن علي رجعنا على المركز و اعطيته رقمي و اعطاني رقمه بحال اذا تذكرت شي تفصيل من الحادثة …….#hla_gharabli

تاني يوم انا رجعت للشارع و حاولت كتير انو اتذكر طريق االبيت بس للاسف ما تذكرت شي و كان المحقق ماهر يدقلي كل يومين ليطمن علي و يسالني اذا تذكرت شي بعد اسبوعين دقلي المحقق ماهر ليقلي تعرفنا على اسم واحد منن و هلا طالعين لبيته لنعتقله بس نرجع رح دقلك لتجي تتعرفي عليه بعد ساعتين و انا عم ادعي لربي يلاقوه و قاعدة على اعصابي دقلي المحقق ماهر و قلي تعي تاكدي اذا هو الا لا و رحت فورا و اول ما فتت عند المحقق قلي تفضلي ارتاحي لنبعت نجيبه و اول شفته هجمت عليه اضربه و بزقت عليه بس بعدني المحقق و قلن خدوه قلتلو كيف لقيتوه قلي لانو قلتيلي انو كانو سكرانين معناتا يا طالعين من بار يا اما شارين مشروب من محل قريب من المنطقة لهيك رجعنا سالنا بالمنطقة و طلع في محل بار فتنا على المحل و معنا صورن و سالنا الشب يلي بشتغل و طلع بيعرف واحد بس منن بحكم انو مداوم عندن و هو اعطانا اسمه و طلعنا على بيته بس ما كان موجود لهيك نطرناه ليجي و شحطناه و جينا قلتلو يعطيكن العافية و باقي رفقاته قلي هلا رح ياكل اتل ليستوي عالاخر و رح يعترف لحاله عن رفقاته و عن موقع البيت و بعدين…قلتلو ما في داعي تكفي لانو انا بعرف انو ملفن رح يطلع للمحكمة و يوكلو محامي دفاع و انا رح وكل محامي كمان قلي انا رح ساعدك بهالموضوع صديق ابي محامي و شاطر كتير بقضايا الاغتصاب و ما في قضية الا ربحها قلتلو تمام اعطيني عنوانه قلي منروح سوا شو رايك الساعة خمسة قلتلو تمام …#hla_gharabli

رحنا عند المحامي وفيق انا و المحقق ماهر و حكتلو عن قصتي قلي وجود التقرير الطبي يلي مكتوب فيه اثار الاغتصاب و تحليل السائل المنوي رح يخلينا نربح القضية بسهولة وقت بحللو الحمض المنوي عندن و تطلع نتيجة التطابق و رح نستدعي الشاب يلي اسعفك و الطاقم بالمشفى يلي اشرف على علاجك و الدكتورة النفسية يلي بدورها كمان رح تقدم تقرير عن حالتك النفسية السيئة نتيجة الاغتصاب وانشالله رح تربحي الدعوة و ينالو عقابن …..

انتقل الملف للمحكمة و بلشت احضر الجلسات يلي رفضت تكون سرية بالعكس حبيت كل الناس تعرف شو صار معي لشجع اي بنت تعرضت للاغتصاب ما تسكت عن الظلم بالعكس دافع عن حقها و تزت المغتصب بالسجن حتى يكون عبرة للباقي كانت رفيقتي سارة و اهلي معي بكل جلسة و خاصة وقت رجعت عدت تفاصيل الحادثة قدام القاضي كانت لحظات صعبة بس مو اصعب من اني ااتركن يتابعو حياتن بشكل طبيعي بدون حساب حاولو يكذبو و يقولو انو انا رحت بارادتي معن بس كانت الاثباتات يلي بايدي اقوى بكتير من ادعائن الباطل …..

صدر الحكم علين بخمس سنوات سجن مع الاعمال الشاقة للشباب الاربعة و وقت نطق القاضي بالحكم بلشو يبكو قربت علين ورا القضبان الحديدية و قلتلن انا جيت لقلكن شو عقوبتكن بهديك الليلة بس انتو سكتوني و ما حبيتو تعرفو بتمنالكن اجازة ممتعة بالسجن و بزقت علين و مشيت……#hla_gharabli

بقيت سنة كاملة داوم عند دكتورتي النفسية شفاء و خلال هالسنة بلشت اتمرن عند المحامي وفيق لانو رهنت حالي لقضايا الاغتصاب اما المحقق ماهر يلي كان يجي عالمكتب بحجة زيارة صديق ابوه صارحني باعجابه فيني و انا رفضت و قلتلو انا ما بقبل شفقة حدا قلي ما شفقة و انا فعلا انعجبت فيك و بشخصيتك القوية و حابب انو اطلبك من اهلك حتى اثبتلك حسن نيتي و طلبني من اهلي يلي رفضو اولا لانو من غير طائفتي بس قبلو بعدين لانو انا كنت موافقة عليه و تزوجنا بعد 6شهور و بعد سنة فتحت مكتبي الخاص فيني و صرت من الاسماء اللامعة بهالمجال و عملت ندوات كتير لوعي مجتمع باكمله و خاصة البنات المغتصبات بانو اذا تعرضو لاغتصاب يقاومو المغتصب حتى لو ضربن و عنفن لانو اثار الضرب بتفيد بالقضية ويحفظو شكله منيح و يتوجهو فورا متل ما هنا بتيابن و قبل ما يتحممو لاقرب مركز طبي ليفحصن فحص نسائي و يكتب تقرير بحالتن و تعاقدت مع مشافي و دكاترة نفسيين بانو اي حالة اغتصاب بتجين يوجهون لعندي حتى لو ما كان في امكانية لدفع التكاليف يعني باختصار حولت قصتي من نقطة ضعف لنقطة قوة بحياتي و قدرت اتجاوزها بالناس يلي ساعدوني و دعموني نفسيا و بارادتي القويالكاتبة هلا غرابلي /Hla gharabligharabli3987995/

انتهت.

#hla_gharabliبقلمي

عرض التعليقات (33)