نور على نور بقلم مال الشام

34 5٬720

نور على نور بقلم مال الشام

نور_على_نور _بقلم_مال الشام

نور على نور بقلم مال الشام

نور على نور بقلم مال الشام , معكم صديقة زاكي الشيف الموهوبة ,

لك يا بنتي شبك شو عم يصير معك لا عم تاكلي و لا عم تقعدي معنا و الك فترة بتتهربي من دوام الجامعه لك امي قليلي في حدا عم يدايئك في شي صاير معك؟؟؟

إيمان: لأ مافي شي امي اتركيني ع راحتي

ام محمد: لا ماني تاركتك..الك شهرين ع هالحالة

من ايمت بتخبي على امك وليه؟ مو نحنا رفقات؟ برضاي عليكي احكيلي شبك

إيمان: ازا قلتلك ما رح يعجبك الحكي لهيك خليني ساكته

ام محمد: لا رح يعجبني بس احكي… يلا احكي

ايمان: بصراااحة؟؟ … انا تعبت و مليت و ما بئى فيني اتحمل

ام محمد: خير اللهم مجعلو خير من شو لك امي؟

ايمان: من… من..

من النقاب!!

ام محمد: النقاب؟؟؟ وشو دخلو بحالتك هي؟

ايمان: لك امي كيف شو دخلو كيييف يعني

كل رفقاتي بيلبسو تياب ملونه… بيلبسو شي لعمرهن

كلهن انخطبوو انحبو…. كلهن عايشين برياحة و انا شوووو؟؟ لك كلهن بحكولي انن قبل ما يشوفووشي كانو متخيليني مو حلوة بس تنصدمو بجمالي و انا حرام خبي هيك جمال

ام محمد: هن هيك بقلولك؟ بعدين امي انا ايمت حرمتك من شي؟

لك في وحده منن عندا متل خزانتك و تيابك؟ كلو عالموضه ومن كل الالوان….و لا فاترينتك كأنها تسريحة عروس مافي شي مو عندك مكياجات و عطورو كريمات و هلا بتقليلي رفقاتي بيلبسو؟

بعدين مو انتي جيتي و قلتيلي بدي البس نقاب.. هلا شو صار!!

ايمان: ايه بس محدا بشوفني فيهن بس بلبسهن بغرفتي شو فايدتهن!!

و انا كنت صف تاسع كان لازم تنبهيني بس انتي شجعتيني و فوراً خليتيني البسو!!

ام محمد: لك يا بنتي شو صايرلك من وين طلعت براسك هالافكار؟؟؟

ايمان: مشان الله يا امي انا اختنئت مو مبسوطه بشي رح جن ماعم تعرف ادرس و لا اضحك حاسه حالي تعقدت

ام محمد: طيب حبيبتي صلي عالنبي…. شو رأيك نروح ع مزرعة عمك اسبوع زمان متل كل شهر و بنعمل سيران بدون نقاب لترتاحي اتفقنا؟

ايمان: لا امي مابدي

ام محمد: لا حول ولا قوة الا بالله لكن شو بدك يا امي

ايمان: مو مهم لان ما رح يصير الي بدي ياه

ام محمد: له يا امون هلا هيك؟ يلا قولي امي شو بدك

ايمان: انا

انا بدي… بدي…. بدي اشلح النقاب

ام محمد: شووووووووو

-2-

ام محمد حست انو داق نفسها و داخت بس تماسكت

ما كان مخوفها تردد بنتها بالنقاب لان هي شهوات و رغبات لكل بنت بعمرها، بس كانت خايفه من تفكير بنتها و تغيرها المفاجئ….!

ايمان: شوفي كيف سكتي!! كنت بعرف مافي نتيجة من الحكي

بعرف ما رح اوصل لحل معكن

رب العالمين ما اجبرني بالنقاب و انتو بدكن تجبروني فيه

ام محمد: مين قلك رح نجبرك فيه!

لبستيه بارادتك و فيكي تشيليه بارادتك كمان…

قامت بدها تطلع منالغرفة نطت ايمان و قالتلها بتحكي جد؟؟ طيبو بابا و اخواتي؟؟؟

ام محمد: انا رح احكي معهم… من بكرا بتقدري تطلعي من البيت بلا نقاب

وقفت ام محمد و فتحت خزانة بنتها و طلعت النقاب و اخئتو معها

ايمان: وين ماخدتيهم؟

ام محمد: بدي اتبرع فيهم لشي بنت مشتهيه تتنقب.. بدي اهديهن لبنت غيرك

ايمان: خليلي النقاب الي لبستو اول مره لو سمحتي

ام محمد: لا…. رح اخدهن كلهن…

طلعت امها و راحت لعند ابوها لتخبرو بقرار بنتهم انصدم كتير لان من ست سنين متعود ع بنتو بنقاب بفتخر فيها و ما بشيل همها و عطول بتفائل انها طريقو للجنة…. حاولت امها تهديه و تحاكيه بحكمة و طلبت منو يخبر اخوتها بهل تغيير الي رح يصير و يضبط الوضع مشان ما تصير مشاكل…

وافق على مضض و لانهم بعمرهم ما اجبرو ولادهم على شي ما قدر يعمل شي…

تاني نهار الصبح فاتت ام محمد لعند بنتها و صحتها و قالتلها يلا ع دوامك… اليوم اول يوم الك بدون نقاب

و ازا انتي بكل جرأة قلتيلي الله ما فرض النقاب فانا جايه قلك انو عز وجل فرض مواصفات للبس المؤمنه العفيفه

و ممنوع تستخدمي اي مكياج ممنوع لبسك يكون ديق او شفاف او مغري…. رح اخد من غرفتك العطور و المكياجات و قبل ما تطلعي بتمري لعندي اتاكد من لبسك

ايمان: يعني بدك تمارسي علي الضغط النفسي كعقاب لاني شلت النقاب؟

ام محمد: طاعة رب العالمين مو ضغط نفسي و لا عقاب… الجنة الها ثمنها… و انتي و كل بنات المسلمين بتحملو مسؤولية عكس اخلاق البنت المؤمنه الفاضله

انا قبلت طلبك و هي شروطي البسيطه جداً… يلا تفضلي…

قامت ايمان فتحت خزانتها و كانت حابه تلبسي شي فاتح

لبست مانطو لونو بيج مع حجاب ابيض…. و جهزت حالها و كانت فرحانه كتير بس ما كانت عرفانه شو ناطرها بهاد اليوم!

-3-

طلعت ايمان من البيت و كانت فرحانه كتيرررر

و عم تفكر بردة فعل رفقاتها و مبسوطة انها حاسه بخفه و سهولة…

طلعت بباص الجامعه و قعدت و كانت واثقه من حالها كتير لان ايمان فعلا جميلة جداً..

سمعت اسمها عم ينذكر ورا كان صوت تنتين بنات عم يحكو

الاولى: لك هي مو كانت تلبس نقااااب؟؟؟

التانيه: ييه ايه والله هي ايمان ليكي مو انفها كبيررر؟

الاولى: ييي كبير كتيرررر

حطت ايمان ايدها على انفها و صارت تفكر العمى انا انفي كبيررر؟

الاولى: ينعن ديبا مو حاطة ميك اب شكلها ما بتفهم بالموضه

التانيه: و لا المانطو تبعها بلبس وحده تانيه معها ههههه

وصارو يضحكو و ايمان عصبت و حكيهن ما هز ثقتها بنفسها لانها بتعرف انها حلوة بشهادة الكل

نزلت من الباص و هي معصبه و عم تحاكي حالها: لك تضربي منك الها يا شرشوحة ، نقيتو عالنقاب و شلحتو

هلا عم تنقو عالمانطو لاشلحو فشرتو

لا وشو كمان بدهن حط مكياج مشان اعجبهن

لك انا انفي كبيرررر اناااا

و مرق شب و صار يغازلها و يقلها ليش الحلو معصب… شو هالعيون هي

شو هالبياض…. ملاك ماشي عالارض

تزكرت ايمان انها مو حاطة نقاب يعني مافيها تحاكي حالها ع راحتها… وحست بخجل كبير

اول مرة حدا بغازلني هيك غزل استغفر الله ياربي الله يحميني من ولاد الحرام

صرت ماشيه و حاسه العالم كلها عم تطلع فيني

حسيت بدي خبيوشي من الناس

خجلانه كتير خجلانه مع اني ماعم اعصي ربي لبسي مستور و مو حاطة مكياج بس مو متعوده انكشف ع الرجال

ياربي شووووو اعممممملللل

صارت ايمان متوترة كتيرررر….فاتت ع الجامعه و تزكرت ايهاب، شب هي معجبه فيه كتيرررر و كان هو واحد من اهم الاسباب لانها تشيل النقاب لان تأملت خير انو بس يشوفا يعجب فيها و يخطبها…

نسيت توترها و خوفها و مشت بثقة بالممرات.. و من بعيد لمحت ايهاب مع رفقاتو

انبسطت كتيررر و قررت تلفت انتباها…. مرقت قدامهن ببطئ ووقعت كتبهاو نزلت تاخدهن

وهون انتبهت كيف ايهاب و رفقاتو رح ياكلوها بعيونن و صارو يسئلو بعض مين هي؟؟؟؟

ايمان حست انو في شي غلط!

حست انها عرضت حالها لاهانة كبيرة لملمت حالها و انسحبت بسرعه ولقت رفقاتها مجتمعات

هجمو عليها و تفاجئو فيها و قالولها بتجنني و بتاخدي العقل بس هي كانت عم ترجف و حاسة بشي كتير سيء و بشعور بشع

و هن قاعدين البنات صارو يتفرجو ع صور عالموبايل و يضحكو قالتلهن ايمان شو في ع شو عم تتفرجو؟

مي: لك ما دريتي؟؟؟؟ صور سهام انتشرو على موبايلات طلاب الجامعه كلهن و انفضحت البنت ليكي شوفي الصور

ايمان: يييييي استغفر الله…. كيف هيك صاااار؟؟

رؤى: هي يا ستي ايهاب و خليل كانو يحبوها و هي لعبت عالتنين وكانت تحكي معن و تخون كل واحد مع التاني و بالصدفه اكتشفو و مشان ينتقمو منها وزعو صورها الي كانت تبعتلن ياهن ع الموبايلات للشباب قبل البنات…شي بوطي الراس وفي صورة الها و هي بدون حجاب

ايمان انصدمت كتيرررر…. صارت تفكر بحال هي البنت كيف انفضحت و اتدمرت حياتها

و ايهاب! ما عندو خوات؟ مافكر بمستقبل هي البنت؟

مين هو ليحاسبها.. كيف بيعمل هيييييك

نزلت دمعتها و قامت مشان محدا ينتبه عليها و سمعت صوت ضحكة ايهاب و رفقاتو واصله اخر الجامعه!

حست انها قرفانه من الكل

فاتت ع التواليت غسلت وشها و صارت تبكي… تطلعت بالمرايه… تأملت حالها

وقررت ترجع عالبيت فورا

طلعت من الجامعه و ركبت الباص و كانت تعبانه و مخنوقه..

قعدت جنب الشباك و صارت تفكر بعدين قررت انها رح ترجع للنقاب…

بدون ما تحس ع حالها نامت…

كانت الشمس قوية و ضاربه ع وش ايمان…بس فجأة حست بفيه ع وشها

فكرت انو الباص مرق بنفق بس الظل طولت

فتحت عيونها لتشوف شو في

وهون كانت الصدمه!!!

-4-

فتحت عيونها و شافت ايد عم تحمي وشها من الشمس

نئزت و اتطلعت جنبا كان شب…

انتفضت و صارت تعيط عليه لك انت كيف قعدت هوووون

جمال: عفواً..

سحب ايدو و نزل راسو

ايمان: ولك شو اسسسسف يخرب بيتك شو قعدك جنبي

جمال: انا كنت واقف و في بنت نزلت من جنبك ف انا قعدت

و الشمس ضاربه على وشك ف انا

ايمان: لك انت شوووو انت شووو بعدلي من هووون بعدددد

قامت ايمان وقفت الباص و نزلت و الشب كان بدو ينزل وراها بس خاف..

نزلت ايمان وضلت تبكي وهي ماشيه بالطريق لوقت ما وصلت عالبيت دقت الباب و فتحتلها امها…

فاتت ايمان ع غرفتها و لحقتها امها و هي مرعوووبه و تسالها شووو فيييي

رمت حالها بحضن امها و صارت تحكيلها كل شي صار معها من الصبح و صارت تعتزر لامها كتيرررر… هيك لخلصت حكي و امها تهديها

ايمان: ماما رجعيلي النقاب انا كتير ندمانه… انا تعودت عليه و كنت غلطانه لما فكرت انو النقاب عم يعزبني بالعكس طلع امانه و فرحة…. كنت خايفه من كل الناس

الي بيسوا و الي ما بيسوا كان يتطلع فيني

والله كتير تعبانه يا امي و عقلي رح ينفجرررر

ضلت ام محمد تقرأ قرآن ع بنتها لنامت…

و هيك ضلت ايمان كم يوم متوترة و ملبكة… و بعدا رجعت داومت و رجعت للنقاب… مرت فترة اسبوع بهدوء و رجعت ايمان لطبيعتها و ارتاحت نفسيتها و تجاوزت الازمة الي مرت فيها

بس كان في شي شاغل بالها كتير…. (( جمال))

ما كان عم يروح من بالها الموقف الي عملو

كيف كان مغطيها من الشمس!

شوي تفرح وشوي تعصب انو كيف سمح لحالو يقعد جنبها..

بيوم من الايام طلعت بالباص و شافتو…. كان واضح انو محترم كتيررررر و مهذب

ابتسمت من تحت نقابها

للحظة خطرلها ترفع النقاب ليعرفها

رجعت استغفرت ربها… و تذكرت ايهاب و كيف طلع شخص سيء كتيررررر … و هالتجربة خوفتها…

ضلت قاعده عم تتاملو من تحت النقاب وهو مو عارفها و عيونو بالارض…

وصلت لبيتها و نزلت و قلبها عم يدق بسررررعه

وهيك صارت كل يوم و هي راجعه تشوفو بالباص و صارت تسمع مكالماتو و تسمع حكيو مع الي جنبو و فهمت انو موظف بشركة استيراد و تصدير…. و صارت تستمتع بحكيو و بشوفتو و قلبها يرقص من الفررررح بس تشوفو و تتزكر كيف كان حامي وشها من الشمس!!

بس شو الفايده! مستحييييل يعرفها مستحيل..

وهي مستحيل ترفع نقابها شو ما صارررر

صار تفكير ايمان كلو بهاد الشب و مع الوقت صارت تحلم فيييه و تبكي بالليل و تفكر فيه كتير

و بيوم من الايام..

ام محمد: ماما ايمان

ايمان: ايه امي أمريني

ام محمد: حبيبتي البسي و رتبي حالك جاينا ضيووف

ايمان: خير مين؟

ام محمد: خطابين تئبريني… و هالمره مافي ترفضي بدك تقعدي مع امو وخواتو و بعدا بتقرري… يلا ساعه و بيوصلو

ايمان صارت تفور و تغلي و كتير ادايئت و صارت تبكي

لبست و فاتت عالضيوف

مدحو فيها كتير و حبوها كتيرررر و طلبو موعد ليجي الشب يشوفها ام محمد كانت كتير حابه الجماعه لانن من عيله معروفه و سمعتهن متل المسك… و قالتلن خليه يجي بكرا ليشوفو بعض انتو مو بحاجه الواحد يسأل عنكن ما شاء الله عليكن سمعتكن سابقتكن…

و ايمان رح تنفجررر عقلها كلوووو عند جمال…

بس و بعدين؟ ما الها اي امل تلتقي فيه و ازا اهلها رايدين الجماعه ما رح تكسر كلمتهن… بالنهايه كلو قسمه و نصيب

-5-

اجا موعد الشوفه وكان لازم تفوت بدون نقاب بس اتفقت مع امها انو ازا عجبها العريس ترفع النقاب ازا ما عجبا تخليه…

جهزت القهوة و فاتت… و اول ما وصلت لعند العريس و اتطلعت فيه رجفت ايدها و اندلقت القهوة بالصينيه و لغوصت الدنيا…

قعدتها حماتها و صارو يضحكو ليلطفو الجو

الشي الي متل الحلم كان انو العريس هو جمااال!!

طيب كيييييييف!!

ما حكت ايمان و لاحرف… قالت حماتها لامها انو يتركوهن شوي مع بعص و ترفع النقاب ليشوفها!

طلعو و تركوهن سوا…

جمال: عفوا انسه ايمان انتي خرسه؟

ايمان: عفواً استاز جمال ماني خرسه بس ما توقغت العريس يكون حضرتك!!

جمال: ليييش!! من وين بتعرفيني

ايمان: بقلك بس بالاول احكيلي، امك قالت انو انت دليتهن على بيتنا انت من وين بتعرفني انا منقبه يعني شو خلاك تبعت اهلك لعنا!

جمال: ايييييه والله هي قصه طويله…

يا بنت الحلال انا طول عمري بدعي الله يرزقني بنت بتخاف ربها… يعني اكيد متل اي شب عندي مطالب للجمال لهيك ما كان عندي رغبه اخطب منقبة العفو منك لان ما رح شوفها الا ببيتهن و وقتا رح اخجل قول ما عجبتني

ايمان: بالله!! وشو غير رأيك!!

جمال: طيب ليش معصبه؟

يا ستي انا من 3 شهور عم صلي على نية تيسير زواجي و انو الله يبعتلي بنت الحلال

و من 11 يوم بالضبظ و انا كل ليلة كل يوووووم بشوف بمنامي بنت منقبة…. بتكون قاعدة بين ياسمين ابيض

و كلها نور على نور رغم سواد نقابها…

ايمان: سبحان الله…

جمال: مرة شفت بنت متل المواصفات الي بدي ياها تماما صار موقف فيه سوء تفاهم و كنت بقدر اعرف وين ساكنه هي البنت بس بتعرفي غصيت لما تزكرت الحلم

و انو الله اختارلي زوجتي تكون منقبة و ما شوف وشها الا ببيت ابوها…. و هيك صرت لاحظ وجودك بالباص اول شي لفتني هو نقابك… تاني شي هو هدوئك و استقامتك… لهيك اندليت ع بيتك وبعتت اهلي و بس رجعت امي من عندكن ك العادة صليت و نمت بس ما شفت البنت المنقبة…

حسيت انها بطلت حلم و صارت واقع

لهيك انا على استعداد تام اتزوجك حتى لو ما رفعتي النقاب و شفتك!

ايمان: بتعرف شو الي جابك على هاد البيت؟

جمال: شو؟

ايمان: انا طلبتك من ربي…. هاد سبب جيتك لهون

جمال: عفواً ؟

رفعت ايمان النقاب و قالتلو بتعرفني شي؟

وقف جمال و قلها هاد انتي!!!!

ايمان: بتعرف انو حلمك من 11 يوم يعني صار بالليله الي انا قررت فيها اشلح النقاب…وتاني نهار شفتك فيه كان اول يوم الي بدون نقاب و لما رجعت ع البيت ندمت و لبستو مره تانيه

جمال: يا الله دخيلك معقول هالحكي!! لك انا خفت عليكي من الشمس و انا ما بعرفك!! شي حرك ايدي بدون وعي مني و خلاني اتاملك و انتي نايمه… حسيتك قطعه مني… لك يا الله

ايمان: دايما الي بكون مع رب العالمين…. ربنا بكون معو

و انا هاد الي صار فيني

و انت هديتي لالتزامي بنقابي…. انت هديه الي

جمال: انتي الي هديه الي…. انتي ما بتتخيلي شو كنت فكر فيكس بملامحك و بردة فعلك لما فتحتي عيونك

ايمان انتي كلك نور على نور… انتي لما انخلقتي ربنا كتبك. زوجه الي…. الحمدلله

#تمت

عرض التعليقات (34)