طريقة البقلاوة من الألف إلى الياء طريقة 2 ملكة رمضان

84 8٬791
 

طريقة البقلاوة من الألف إلى الياء طريقة 2 ملكة رمضان

بقلاوة من الألف إلى الياء طريقة 2 ملكة رمضان

طريقة البقلاوة من الألف إلى الياء طريقة 2 ملكة رمضان

طريقة البقلاوة من الألف إلى الياء طريقة 2 ملكة رمضان , معكم صديقة زاكي الشيف الموهوبة ,

المقادير

  • 6 كوب طحين ابيض
  • م.ص ملح
  • 2 —3 كوب كبير ماء مثلج
  • كاسة شاي سكر
  • ربع كوب قطر
  • م.ك سمنة للتنعيم
  • سمنة مذابة لرقائق البقلاوة
  • نشا للفرد
  • للحشوة نصف كيلو مكسرات مع كوب قطر ثقيل
  • قطر البقلاوة
  • 2 كوب سكر
  • كوب ماء
  • عصرة ليمونة

الخطوات

السلام عليكم ورحمة الله وبركاته

بعد ما عملت البقلاوة الأولى حبيت اجربها بعجينة ثانية، جنون اخر الليل بلشت فيها عالعشرة وكملت ع 12 وطلعت روووعة شكلا ومضموناً.

أولاً/ العجينة

بنخلط الطحين والملح والسكر والقطر مع بعض وبنبلش نضيف ماء مثلج بالتدريج لكل كيلو طحين نصف لتر ماء ، رح تطلع عجينة طرية بس ما بتطلع ناعمه ضيفيلها بالاخر ملعقة سمنة طرية وردي اعجنيها شوي لتنعم.

—بتغلفيها على شكل اسطواني وبتريحيها نص ساعة عالأقل .

ثانياً/ تشكيل الرقائق

—بنقطع العجينة ل 24 قطعة متساوية وبنكورهم وبنفرد كل وحدة باليد يعني بحجم صحن قهوة مش اكثر مبدئيا.

— بنبلش نفرد بالنشابة ( الشوبك) كل قطعه بحجم رغيف الخبز وبنحطه عجنب وبنرش فوقه كمية وفيرة من النشا ضرووووري جدا يكون نشا كثير.

— كل 12 رغيف فوق بعض.

— بنبدا نفرد كل مجموعة من 12 رغيف مع بعض وهمه فوق بعض بنفرد بكل الاتجاهات لحتى تطلع معنا دائرية وبنضل نفرد لحتى تتوسع بتنفرد بمنتهى السهولة هيه وبصير حجمها بقطر حوالي 70 سم . ولكن لازم خلال الفرد كل ماتتوسع معك شوي تفتحي الرقاقات عن بعض وتزيدي النشا بينهم ، مش تفصليهم فصل كامل لاء بس افتحي طرفها رشي نشا ورجعيها ومن الجهه الثانية نفس الشيء عشان تضمني ما يلزقوا ببعض.

— بس بدك تستخدميهم بتفصلي كل طبقة رقاقة عن الثانيه بتطلع شفافة ورووووووعة عنجد بس بتفصليها بلطف لانها رقيقة وحساسة ولو تقطعت معك وحدة او ثنتين عادي بتحطيهم ترقيع ما ببينوا.

— وممكن تخليهم بدون فصل كمان بصير بس بالفصل احسن بطلع التوريق.

ثالثاً/ تشكيل صواني البقلاوة

عملت شكلين شكل البقلاوة اللي زي الالماسه المعروف

بنحط 12 طبقة من تحت بالصينية المدهونة سمنة وبنتخلص من اي نشا زيادة وبندهن كل طبقة بسمنة مذابة اذا قدرتي عشان تتورّق معك بالفرن. وإذا كان فصلهم صعب الطبقات مش مشكله خليهم بدون فصل بس بدك تنزلي عليهم بسمنة سخنة عشان يتشربوها.

—استخدمت اقل من 12 رقاقة عشان عملت شكل ثاني واحتجت عجينة.

— وبتحطي الحشوة اللي هيه اي نوع مكسرات بتحبيه مع قطر ثقيل تتماسك معك الحشوة شوي.

وفوقهم كمان 12 رقاقة وبينهم دهن سمنة.

ملاحظة/

كمية الرقائق اللي من فوق أهم من اللي تحت ممكن تعملي اللي تحت 6 او 7 بس لانها على كل الاحوال ما بتتورّق لإنه فوقها وزن المكسرات.

أما الرقائق اللي من فوق بتتورّق وبتبين عشان هيك لازم يكونوا كثار.

— بتقطعيه قبل الخبز لانه بعد الخبز بتكسر وما بتقطع.

الشكل الثاني/

عملته بقلاوة اصابع باللوز

بتاخدي رقاقه بتقصي اطرافها وبتعمليها مستطيل وبتحطي اللوز المطحون عالطرف وبمساعدة عصا اسطوانيه بتلفي البقلاوة عليها وبالاخر بتضغطيها من الاطراف للوسط عشان تعطي شكل حلو للبقلاوة .

—بتصفيهم بالصينية وبتقطعيهم اصابع وبتدهني سمنة.

رابعاً/ الخبز

بتدخلي البقلاوة على فرن محمي على 160 في الرف الأول من تحت بدها حوالي نص ساعة بالفرن بس تشوفي الاطراف تحمرت واشقرت خلص عالتحمير على طول وقبل التحمير ادهني الوجه سمنة كمان مرة.

— بعد الشوي مباشرة بتصبي قطر ثقيل سخن بيغلي .

خامساً/التقديم

قدميه باااارد مع فنجان قهوة بعد الفطور بالسهرة شي خرافي ، حلو مفتخر وزاكي جدا وصحة وهنا.

عرض التعليقات (84)