معمولاتي ملكة الحلويات الشامية

192 11٬030

معمولاتي ملكة الحلويات الشامية

معمولاتيييي - ملكة الحلويات الشامية

معمولاتي ملكة الحلويات الشامية

معمولاتي ملكة الحلويات الشامية , معكم صديقة زاكي الشيف الموهوبة , يلا بعرف هلأ لازم تقولولي الحمد لله عالسلامة أو نعيما منيح تذكرتي المعمول ههههه والله حقكن بس قلتلكم انو ماما سافرت قبل العيد بيومين لهيك مافضيت ولا كنت رايقة نزل شي للأسف بس يلا ملحوقة العيد الجاية بيجي وبتجربولي هالمعمولات ههههه بتعرفو شو السنة الماضية نزلتلكم المعمول ووقتها كل اللي داقوه كيفو عليه فهي السنة كل اللي بعرفهم هون عملوه بهالطريقة ههههه جربوووووه ومش هتقدرو تغمضو عينيكم طراوة ولا أروع وطعم بياخد العقل وقد ماطول عندكم بضل ما أحلاه لهيك عنجد حابتكم تجربوه وشو كمانة يا ديموزيل نور
اي انا رح اكتبلكم المقادير هون والطريقة وخطوات الصور بتلاقوهم بملفي مع معمولات السنة الماضية مشان ما ارجع عيدهم نفسهم بس رح اكتب المقادير هون بالكوب

المقادير

  • مقادير المعمول:
  • كيلو طحين
  • نصف كيلو سمنة باردة
  • ثلاث أرباع كوب سكر
  • ثلاث أرباع كوب ماء
  • نصف كوب قطر وسط
  • كيلو عجوة “تمر مطحون”
  • بالنسبة لحشوة جوز الهند منخلط جوز هند مع نسله ليصيرو متماسكين مع بعض شوي

الخطوات

☆بسم الله الرحمن الرحيم☆

المعمول معروف عنا بالدول العربية بس حسيت انو عنا بالشام معتمد على معمول الطحين اكتر

انا بسوريا ما بتذكر معمول السميد كتير بالشام

حتى المخابز ومحلات الحلويات بتبيع معمول الطحين فحكولي شو الوضع عندكن؟؟

وكمان كل وحدة تعترف كم معمولة افترست خلال العيد هههههه

حبيت شارككم بمعمولات هالعيد ولو انو أكل عليهم الدهر وشرب بركي حبيتوهم وحبيتو تجربوهم بالعيد الجاية اذا رب العالمين خلانا طيبين

وبدي اتشكر من كل قلبيييييي ريحانة الغالية على الكعك الأساور الرائع اللي نزلتو وهاد الكعك اللي شايفينو بالصور عملتو على طريقتها وطلع اكتر من رائع ومميز كتير تبارك الرحمن

وأهم شي انو الحجي حبو ههههههه

تسلم ايديكي يا مبدعة وماننحرم من جمال وجودك وجمال وصفاتك♡

وآخر شي أوصيكم بتقوى الله وتجربة هالمعمولات ههههههه

دعولي بالبركة وبكل شي حلو متلكم وكل عام وانتو أحلى وردات مزينين حياة كل اللي حواليكم♡

أصلا عادي

أن تأتي متأخراً خير من أن لا تأتي أبداً

وأصلا عادي إذا قلتو إني بحكي كتير

وأصلا عادي اذا ورجيتونا سنانكن مننبسط يعني هههههه

وأصلا أنا نعست تصبحو على خير ومحبة وهنا وأنا ههههه

عرض التعليقات (192)