img
الرئيسة / أطباق رئيسية / رز بخاري ولا أروع من سلسلة وصفات حول العالم 10 ملكة الأكلات الخليجية

رز بخاري ولا أروع من سلسلة وصفات حول العالم 10 ملكة الأكلات الخليجية

/
/
/
2552 مشاهدات

رز بخاري ولا أروع من سلسلة وصفات حول العالم 10 ملكة الأكلات الخليجية

بخاري ولا أروع من "سلسلة وصفات حول العالم" ♡10♡ ملكة الأكلات الخليجية

رز بخاري ولا أروع من سلسلة وصفات حول العالم 10 ملكة الأكلات الخليجيةالخليجية

رز بخاري ولا أروع من سلسلة وصفات حول العالم 10 ملكة الأكلات الخليجية , معكم صديقة زاكي الشيف الموهوبة , البخاريييي وما أدراكم ما البخاري يفرفح نهاري ويطالع أشعاري ههههههه عنجد أكلة من أسهل وألذ الأكلات حبيت قدملكم طريقتها البسيطة لتستمتعو فيها انتو وحبايبكم مابخفيكم اني اندوخت بأصولها شي بقولو أفغانية وشي من تركمانستان وشي خليجية وأغلب الظن انو كانت الأكلة المفضلة لدى البخاريين لهيك سموها الأرز البخاري وكمان بقول البعض انو سبب تسميتها بخاري هو لأنو بتنطبخ عالبخار متل مو شايفين المهم تعددت الأقوال والطعم واحد ههههه تركونا من الأقوال وتعو معي للأفعال ههههه خلونا نشوف المقادير

المقادير

  • أول شي لتتبيلة الجاج منحتاج:
  • نصف كوب لبن
  • ملعقتين كبار خل
  • ملعقتين كبار عصير ليمون
  • 3 سنون ثوم مهروس
  • ملعقة دبس بندورة
  • بهارات جاج متل مابتحبو
  • رح نحطها على وش الجاج:
  • شوية زيت
  • أما للأرز فمنحتاج:
  • رز طبعاً هههه مغسول ومنقوع شوي ومصفى وقت الطبخ حوالي نصف كيلو
  • زيت
  • سمنة
  • مكعبين ماجي
  • كم حبة فلفل أسود (الفلفل خياري بس طعمو ناري ههههه)
  • بصلتين وسط مقطعين جوانح
  • سنين ثوم مهروس
  • برش جزرتين أو تلاتة حسب حجم الجزر
  • ملح
  • ملعقة كبيرة كمون (حاولو تقدرو قديه بتحتاجو نكهة لأنو قوة نكهة الكمون بتختلف حسب جودتو وحسب المدة اللي الو عايش فيها عندكم ههههه)

الخطوات

☆بسم الله الرحمن الرحيم☆

يلا يا حلوات كل وحدة تنطلق لمطبخها وتشمر وتبلش استمتاع بطبخ هالأكلة السهلة وبعدها طبعاً الاستمتاع بالافتراس ههههه

أول شي رح نخلط مكونات تتبيلة الجاج ببساطة ومنكون منضفين الجاج وعاملين فيه شقوق لتدخل فيها التتبيلة وبعدها رح نحط الجاج بالتتبيلة ونعملو مساج لهالكتكوت قبل ماينتقل لمثواه الأخير بالفرن

منحط شوية مي بأرضية صينية أو بايركس ومنحط قطع الجاج ومنحط فوقهم شوية زيت ومنغطيهم بالقصدير وعالفرن شي ساعتين زمن ليتنهنه الجاج ياعمري عليه على هالآخرة

وهلأ منلتفت للرز

منحط أول شي الزيت والسمنة وكترولي هالدسمات شوي هههههه ومنحط معهم حبات الفلفل أسود لنحمصها والماجي رح نحمسهم شوي وبعدين نضيف جوانح البصل ونحركها لتتفرفد عن بعضا وبدنا نحمسها لحتى يصير لونها ذهبي وبعدا منضيف التوم ومنحركو ليتحمس معهم وبعدها منضيف برش الجزر والكمون والملح

مابدي احكيلكم عن الريحة لأنها يا هومالالي وبمنتهى الجمالي (الياء للضرورة الشعرية ههههههه)

هلأ بعد مايدبل الجزر شوي منضيف المي اللي منحتاجها لطبخ الرز وبس تغلي منضيف الرز منخليه يغلي حوالي 8 دقايق على نار عالية وبعدين منوطي النار ومنحط عالطنجرة ورق القصدير والغطا متل مو شايفين بالصورة ومنتركها على اهدى نار لتستوي براحتها ونحنا نتحرئص براحتنا

بس وبعدين؟ آخرتها بعد ماحرئصتنا تنزل عالكروشة المنفوشة هههههه

بس تستوي منطفي ومنترك الرز يتهدى كم دقيقة وبعدا منفرفشو بهالجاط ومنصف عليه حبايبنا قطع الجاج وقولو الله يارجال هههههه

ملاحظة

طبعا فيكم تستبدلو الجاج بقطع من اللحم وفيكم تضيفو للأكلة زبيب إذا حبيتو وفيكم تعزموني اذا حبيتو

واذا ماحبيتو كمان عزموني وميل ياغزيل وياغزيل ميل ههههههه

يارب تجربوها وتحبوها وتدعولي بالبركة وبكل شي بيطلع من خاطركم♡

بحبكم انتو والبخاري وأستودعكم الله

137 تعليقاً

  1. 😂 😂 😂 طلعي اشعارك وكمان اسعارك جميل الله يبارك فيك 🌹… بس على الجروب كني سامعتك تتكلمي عن الرجيم وين راح مع هذه الوجبة الدسمة او تٓبخر مع تُبخر البخاري 😂

  2. لك ياريتو صحتييين وهنااا على ❤ ربي يسلمهم ديااااتك ياعسل نفس طريقتي وسبحان الله كنت بدي انزل طريقتها بس سبقتيني ياقمر 😘😘🌹💞

  3. الو الو الو حول ياهدهد
    شفتي بدها ياايانا نعمل رجيم واحنا بدنا نعتمد طريقتها بهالبخاري الناري
    نوووور لك اي رجيم تتحدتي عنه يااختاه
    بخاريكي دماااااار
    سبحان الله عكس بخارينا نحنا الاردنيه والفلسطينيه الي روحو التوم الحب والبصل والحمص الحب واللحمه ولا الليه الي بتشر شر ع الرزات
    ..
    ياستي بما انو جوزي بموت بشي اسمو خضار رح اعملها هالاكله الناريه لانها كتير طالعه طيبه من تحت دياتك

  4. يا سلام تبارك الرحمان شي مغري والله فكرتها طبق قش فلسطيني مزخرف باجمل الالوان ربنا يسلم هالايدين الحلوين ما بطلع منهم الا الجمال تسلم ايدك حبيبتي شي فاخر من الاخر لازم درستي هندسة ديكور يا ورده ربنا يحميك ماشاء الله عنك

  5. يا سلام على الفن والذوق الرفيع والترتيب
    صحتين والف عافية على قلبك حبيبتي
    والاحلى من هاد كلو اسلوبك المرح والحلو بالحكي الله يسعدك سعادة ما الها نهاية

  6. الله يعطيكي العافيه بيشهي زمان نفسي اجربها بس مو متشجعه لكن بعد مشفتها من تحت ايدين نور النواره لازم اجربها طالعه بتجنن

  7. يا سلااام سلم عليكي يا نواره وعلى هالبخاري الروعه وهالمنظر يلي اكتر من رائع
    بخاااري من الاخر وبشهييي
    ويااا هموالالي عالقولتك ههههههه
    صحه وعافيه

  8. ماشاءالله اللهم بارك
    الوصفه روووعة
    والباقي أحلا
    ههههههههههههههههههههههههه
    هههههههههههههه
    ما أحلاكي وأنتي تشعري أستمري
    الله يوفقك ويسعدك .

  9. ما ماذا سأتحدث عن جمال الوصفه ولا خفه دم صحبيتها للوصفه ولا عن قلبي إلي تبخر ههههه ولك ربي يسعدك سعاده ما بتنوصف ويجعل كل ايامك عسل والضحكه ما تفارق وجهك ويكرمك بالجنه ومحبه الناس تزيد إلك كمان وكمان أللهم بارك أللهم بارك 🌷😍
    وبححححبك أنااااا❤😙

    • يؤبشني قلبوشك العسل المصفى انتي اي
      قولي اي😠
      يخليلي ياكي ومايحرمني من رقتك ومحبتك ودعواتك اللي متل البلسم
      ربي يسعدك سعادة فوق الوصف ويكرمك كرم مالو حدود وافرحلك بأحلى كتاكيت بيشبهوكي ياعمري😘😍

      بحبك قد مافي رز بكل الكرة الأرضية😂

  10. يسلملي المعدل والمذوق 😍😚
    شواعمل فيكي يانور بدك يانا نعمل ريجيم
    اي الله وكيلك الريجيم اتبخر مع هالبخاري يلي بيشهي وبيفتح النفس😉
    الله يسلم ايديكي ياعسل
    ويعطيكي الف عافية ياقلبي😊
    مبددددعة كل العادة😘

  11. الله يسلم هالديات يا وردة باين عليها كتيييييير طيبة من قبل ما أقرأ ولا شي كانت بالمفضلة 😂😂😂

    وصفات نور النوارة لازم كلهم بالمفضلة دون استثناء ربي يسلم دياتك يا عمري ويخليكي ربي ويباركلك بزوجك وبحياتك ويطعمك الذرية الصالحة عاجلآ غير اجل

    وبحبك كووووووووووووومياااااااااااات ♥️♥️♥️

    • ياحياتي انا 😀
      ربي يباركلي فيكي ويفرح قلبك متل مابتفرحيني دايماً يا أميرة انتي😍😍
      ممنونتك من قلبي على ثقتك ومحبتك والله
      الله يجزيكي كل خير ياعمري😘

      انا اللي بحبببببببك هههههه😙

  12. الله يسلم هالايدين الحلويين شهيتنا البخاري وضبخو ربي يجبرك وينولك مرادك يارب
    الف صحه وهنا لوحه فنيه طالع من تحت ايديكي 🌹😍

  13. زهرة البيلسان

    آهٍ لوْ يَعْلَمُ طعامك ما حَالِي
    آهٍ لوْ قَلْبُكِ بي يدري
    لَذَبَحْتِ طُيورَكِ أَجْمَعَها
    وطَهَوْتِ من النَّعِمِ الحُمُرِ

    إني جوعان سيدتي
    والجوع سَيُفْقِدُنِي صَبِري
    وضاع رجيم في وصفاتك
    ربي ينولك مرادك ويرضى عنك يانوارة زاكي كله

  14. نور الله يرضى عليكي بدي منك خدمة
    .. أول شي تسلم ايدك شي بشهي
    بدي تعطيني رأيك بشو اطبخ لعزيمة لدار سلفي
    .. سلفتي وسلفي وبناتهم 2 صغار وعمي وعمتي وعيلتي
    يعني شو اشي بشهي وزاكي اعمله مناسب لعزومة مع المقبلات والضيافة كمان

    • الله يسلمك ويجزيكي كل خير حبيبتي لأنك وثقتي تسأليني هالسؤال واهتميتي برأيي😄
      بقترح تعملي أكلة بلحمة وأكلة بجاج مبدئياً
      عملي هاد البخاري هههههه
      انا عملتو من فترة قريبة بعزيمة والكل حبوه كتير الحمد لله
      وممكن تعملي البرياني اللي نزلتو كمان كتير مميز وتغيير عن الكبسة والمندي

      وبالنسبة لطبق اللحمة عندك اللحمة بالصينية سريعة كتير وسهلة وعندك الفريكة أو صينية كفتة بالخضار بتلاقيها بملفي أو ششبرك

      وكمان بنصحك بالدولماااااااا اذا جربتيها رح تدعيلي
      وبيت حماكي رح يحبوكي اكتر واكتر😁😂
      وممكن تعملي بيتزا بما انو في صغار

      وبالنسبة للمقبلات عندك جيبة التاجر تحفة وعندك الكبة التركية النية وعندك البطاطا المشوية بالفرن مع قشقوان وبرك طبعاً كلهم موجودين بملفي مع خيارت تانية

      وأكيد ملفات الصبايا اللي معنا ولا أروع😍 بس عم احكيلك شو بعمل انا عادة😄

    • الكبة النية طعمتها روعة وفيكي تجهزيها قبل بوقت وتحطيها بالفريزر بتطلع ما احلاها يوم العزيمة
      والبرك كمان بتقدري تجهزيها وتفرزيها😄

      اذا حابة تعملي حلو بنصحك تجربي شي من الأكلات التركية متل التيراليتشا
      انا قدمتها لضيوف وانبهرو فيها وبطعمها
      وإذا حبيتي شي تاتي ففي خيارات كتير
      وشو مابدك انا جاهزة ياقلبي😄
      وان شاء الله بتطلع عزيمتك ولا احلى من هيك😙
      ايمت العزيمة صحي ههههه

    • ههههه يا حبيبة ألبي يا نور يا ريتك تيجي واعزمك .. العزيمة تالت يوم العيد .. عيد الأضحى الجاي ان شاء الله
      .. والله اكلات بتشهي كتير والله ساعدتيني ونورتي بصيرتي ههههه
      ان شاء الله لاعمل اكلات بتسطل
      .. وعسيرة ملفي كل يوم بفوت عهالملف بشمشم باكلات وبتعلم وبوخد بفكرة 😅

    • ههههههه ياحبيبة قلبي فيكي الخير والبركة واكيد كلو رح يطلع من تحت ايديكي بشهي😍😍
      الله يهونها عليكي وتصير العزيمة متل مابدك واحلى يا حلوة😄
      قديه عمرك انتي؟؟

    • انا نفسها ماما هههههه حذفت تطبيق زاكي عشان أحدثه قال وطلع عراسي وخرب وراح ملفي انا صفاء كان اسمي بالانجليزي بعدين حطيت ماما هيك لاجرب وثبت الاسم وما قبل يتغير
      رجعت حذفته وسجلت اسمي الحلو ههههههه
      يسعدك يا نور
      انا صفاء من عمان الأردن متزوجة من 6 سنين ونص عمري 30

    • ياقلبي انتي طيب تواصلي مع الادمن لتحللك المشكلة

      تشرفت بمعرفتك كتييييير والله انتي وكل أهل الأردن وان شاء الله العمر كلو ياعسل 😍😀
      وعاشت الأسامي اسمك كتير حلو ماشاء الله هههههههه

  15. يا سلام عليكي يا نور شو هالابداع والأناقة والترتيب اشي بفتح النفس على المفضلة ع طول 👏👏👏👍👍
    يسلم ايديكي وصحتين وعافية يارب ❤❤❤❤❤❤

  16. ربي يسلم هلديات ومايحرمنا من هلطله الحلوه والمقدمه ذات الوزن الواحد ولي تفرفش الروح وتريحها 😘 والوصفات الي يوم عن يوم ابداع واناقه وفخامه بنفس الوقت صدقي بالله اول ماشفت صورة الوصفه قلت هاي النور ربي يزيد ويبارك وينرلك الي بالك ويعطيك العافيه يارب 😍☺😊

    • آمين ياعمري واياكي
      الله يسعدك متل ما بتدخلي لقلبي السعادة ولوشي البسمة دايما بكلامك الرقيق ومشاعرك الحلوة😘😄
      الحمد لله انها عجبتك ياعسل وممنونتك على دعمك المستمر وثقتك ولطفك😍

  17. ئي يي ئي من ورررراااااااي …اخخخ قلبي قلبي ..غضبان عليكي 😞😞😞😞

    بتوكلي من وراي وبتحشي وانا بروسيا 😂😂😂😂 ما بتقولي اعزم صاحبيتي حبيبتي ام ادم الموجبه المقدره القمر. ههههههههه 😂😂

    بس عند الله ما بيضيع اشي 😂😂😂

    تسلم ايدك ياعمري بتششششهي منك 😘😘

  18. تبارك الله!!!
    سبحان الله العظيم!!
    أسأل الله العظيم رب العرش العظيم أن يحفظ عليك الصحة والعافية وأن يبارك لك في رزقك وفيما آتاك من فضل ونعمة يا نوارة زاكي الراااائعة
    فنانة ومتألقة ومبدعة.. اللهم بارك
    صنعت لوحة فنية من طبق سهل وبسيط!
    وصفاتك فرصة ثمينة نتعلم فيها أساليب تقديم الأطباق بشكل يبهر عائلتنا وضيوفنا ويسعدهم ويجعلها من أجمل وأفخم الأطباق
    ربي يبارك لزوجك وأحبابك فيك ويديم عليك نعمه ظاهرة وباطنة ويحميك من كل شر يا صديقتي💖
    دمت في رعاية الله وحفظه 🌷

    • ياعمري انتي
      الله يرفع قدرك ويجزيكي عني كل خير ياغالية ويرزقك أضعاف هالسعادة اللي بتغمريني فيها بكلماتك ودعواتك الصافية😘
      أنا من بعدك يا مبدعة وببعتبر كلامك ورأيك فيني وبوصفاتي تاج بحطو على راسي وبفتخر فيه ❤

  19. لولو

    ماشاءالله نور
    مبدعة ياقمر تسلم ايديكي الي طبخو الطبخات وعيونك الي قدرو العيارات وتفكيرك الي خطط لهل ابداعات
    😂😂😂😂😂😂

    ماعلقت من العصر لان نشغلت بولادي 😓
    بعد ماجاوبت الصبية

  20. يا سلام شو هالابداع والزوووق ما شاء الله منظر خيالي وتزيينك فخامة ربي يهني اهل بيتك فيكي ويباركلك يا نوارة زاكي وصفاتك تجاوزت الخيال ، الف صحة وهنا ويعطيكي العافيه

  21. يسعدك يا نور .. انا نفسها ماما يلي سألتك عن العزيمة
    .. ما انا جيت أحدث تطبيق زاكي وطلع عراسي حذفته وخرب راح ملفي كان اسمي safaa
    رجعت دخلت اجرب باسم ماما وما رضي يغير الاسم رجعت حذفته ورجعت اسمي الحلو ههههههه
    سألتيني عن عمري انا عمري 30 من الأردن عمان متزوجة من 7 سنين

  22. ياسلام المنضر لحاله حكايه يسلم اديكي ياقلبوشتي الحلوه ههههه
    ولا ازكى من هيك روعه
    صحتين وعافيه ع كرشك ههههه
    الله يديم عليكي الصحه وعافيه يارب مانحرم منك يا🍯🍯🍯🍯🍯🍯

اترك تعليقاً

لن يتم نشر عنوان بريدك الإلكتروني.