سيارة جديدة بقلم مال الشام

35 6٬819
 

سيارة جديدة بقلم مال الشام

سيارة_جديدة_بقلم_مال_الشام 

سيارة جديدة بقلم مال الشام

سيارة جديدة بقلم مال الشام , معكم صديقة زاكي الشيف الموهوبة ,

جوزي عدنان اشترى سيارة جديدة

و انا سمعت عالاخبار انو نسبة النساء الي بيسوقو سيارات قد نصف عدد الرجال … طيب ليش ما كون انا وحده منهن

#مال_الشام

الها شهرين عندنا…. ضليت مستلمته و نق فوق راسو بدي يعلمني سواقه لدرجة صرت نام و امثل اني عم بحلم سوق سيارة و صير طلع صوت ( عننننن عننننن بيييييببببب عنننن)

لوقت ما زعل علي و حن قلبو وخاف شي مرة افعسو و انا نايمة و قرر يعلمني

اول يوم جربت سوق وهو كان قاعد جنبي….كانت حماتي هي و سلفتي عم يتمشو بالشارع…قلت يلا يا فتحية سوقي جنبهم و اضربيلهم زمور ليشوفوكي و انتي مشخصه

بس مابعرف كيف صرت الحقهم… هم يركضو و يصرخو و انا بدل ما دوس فرام دوس بينزين

اخر شي وقعت حماتي و صارت تدحرج متل القنفذ… و سلفتي هربت على بيتها تخبت حلف جوزها مية يمين انو طلعها من تحت المجلى

و عدنان نزل عالارض داس عالفارامات بايدو وطلع سحبني من شعري و فوتني عالبيت… وضل اربع ايام يكوبس انو دعستلو امو و يقوم يلحقني و انا اهرب منو و اتخبى تحت التخت …

بعد شهرين رجع جلدي يحكني لاتعلم السواقه

و رجعت بلشت اعمل حالي عم احلم و اطلع صوت ( بييييبببب… عنننننننن… عننننن…. بيييببب)

بس الحيوان صحاني و قلي فتحية ما خلص بنزينك؟

#مال_الشام

قلتلو لا اخدت من جيبتك خمس مية ليرة و عبيت بنزين من الكازية

و رجعت نمت بكل براءة وهو صار ينتف شعراتو و يعد مصراياتو… وخباهن بجراباتو و نام

بعد اسبوع اقتنع يرجع يعلمني سوق السياره

بس مشان ما سودلو وشو قدام اهلو … و مشان ما يروح ضحايا … قرر يعلمني نظري و يفهمني الاساسيات تبعون السواقه و بعدها بخليني اتعلم عملي و سوقها لهل غزاله

بلشت الدروس المكثفه…. ضليت شهر اتعلم… ايه بذمتي لو درست هيك لما كنت بكلوريا كنت طلعت الاولى عالجمهورية ….

صرت عنجد نام و هلوس انو سايقه سيارة وقول ( عننننن… بيييييب… بييييب)

هيك لوقت ما تأهلت … عقبال عندكن حبيباتي الله يبارك فيكن ميرسي…

شخصت و تأنقت و انصمدت ورا الدركسيون ( مقود السيارة)

جيت لشغل السيارة ومسك عدنان ايدي…

فتحية: شوووو؟

عدنان: استني بس خليني راجعلك كم شغله قبل ما نمشي..

فتحية: خليني امشي على الهدا شوي شوي و انت بتسألني

#مال_الشام

عدنان: طيب يلا قولي يارب…

شغلت السيارة و اعطيتها بينزين

عدنان: الضو الاحمر عالاشارة شو يعني؟

فتحية: ايه سهلة… الاحمر يعني انقبري مكانك… البرتقالي يعني استني الله لا يوفقك… و الاخضر يعني انقلعي امشي

عدنان خبط راسو بالشباك

فتحية: شووو غلط!!

عدنان: لا صح حبيبتي صح… طيب ازا كنتي ماشيه بالشارع عاليمين… و بدك تغيري مكانك و تروحي عاليسار.. شو بتعملي؟

فتحية ضحكت و حطت ايدها على تمها و استحت

عدنان: لك شبك

فتحية: هلأ انت لما بدك الحقك عالغرفة بدون ما يشتلقو الاولاد شو بتعمل؟

عدنان : بغمزلك!!!

فتحية: ايه و انا بشغل غمزة قبل ما غير المسرب و الاتجاه ☺☺☺

عدنان: فتحية فتحييييية انتبهي… انتبهييييي قدامك شجرة

فتحية تكركبت و خافت : شو اعمل شو اعمل

عدنان: ولك فهمتك مية مرة

فتحية: شو هو شو هو والله نسيانتو

عدنان فكر و قرر يشرحلها بطريقتها

عدنان: طيب طيب… هلأ ازا كنتي عم تسوقي و كان على يمينك ابوكي و على يسارك جوزك الي هو انا… شو بتدوووسييييي

فتحية : ها!!! ابي!!! و انته!! شو بدوس!!!

عدنااان انت ابو ولادي و بحبك كتيرررر بس انت ازا متت بقدر اتجوز غيرك… بس ابي ما في غيرو

عدنان: فتحية شو بتدوسي شووو بتدوسي

فتحية: بدوسك الك يا ابو عيالي يا هني يا حنون

عدنان: فراااام يا حمارة… فراااااامممممممممممم

طااااااااخ… طخخخخخخخخخ……..طااااااااااخ

فتت انا و عدنان بالشجرة… قصدي هي فاتت فينا

ضلينا اربع شهور بالفرشة مجبرين و العالم تجي تشق علينا …

و بعدين راح اشترى بسكليته و صار يروح و يجي فيها على شغلو متل عدنان و لينا

انا بس بدي افهم شغله وحده…. هدول الرجال ليش ما بيعرفو يسوقو

ليش مخهن سميك يعني لو قلي دوسي فرام من الاول

لا حول ولا قوة الا بالله…. الله يهديه

المهم امبارح سمعت انو باميركا النسوان كلهن بيسوقو بسكليتات… يا ترى بيرضى يعلمني؟

#مال_الشام

#النهاية

عرض التعليقات (35)