خلينا نتسلى شوي

18 5٬675
 

خلينا نتسلى شوي

خلينا نتسلى شوي😉😉

خلينا نتسلى شوي

خلينا نتسلى شوي , معكم صديقة زاكي الشيف الموهوبة ,

السلام عليكم كيفكم

التصنيف: اليوم تصنيفنا كوميدي

مرة كنت قاعد بأمان الله بحاول انام إلّا ويرن تلفوني زي المجنون طبعا انا من الصبح وانا بتمنى يرن هالمسخمط بس بدون فايدة وبس قررت انام انصرع الباشا، المهم فتحت خط حكالي صاحبي تعال عندي ضروري حكتلو خليها لبعدين انا بحاول انام اتركني بحالي حكالي لا والله ما بصير انا من الصبح بحضر وبجهز وحالتي حالة وبست ايد الماما مليون مرة عشان ترضى وبالاخير رضيت بعد ما انفرت معدتي، طبعا انا نفش ريشي زي الطاووس وزبطت قعدتي وحكيت اكيد محضرلي اشي محرز فحكتلو خمس دقايق وبكون عندك وما كذبت خبر وبس وصلت دخلت انا حكيت بلاقي سدر منسف ومش عارف شو، طلع حاططلي صحن بوشار بقاعو، لويت بوزي ستين شبر، حكالي تعال اقعد شو مالك بوزك ستين شبر بتعرقل فيه الماشي حكتلو ولا اشي شوفتك قلبت معدتي ايش هو الاشي الضروري اللي خلاك تجيبني لهون؟ حكالي في فيلم هندي حلو حبيت نحضرو مع بعض، طبعا انا لو يصحلي افجروا بحكيش لأ المهم قعدنا نحضر هالفيلم وانا اجيت بدي احط هالحبة بثمي إلا والصحن فاضي طبعا الدبابة اللي جنبي كانت تحشي في ثمها حشي كأنها محرومة، كنا متابعين طبعا انا اول مرة بحضر هندي إلا وييجي البطل يحكي للبطلة انا بحبك طبعا انا من الخجل والحيا صارت حرارتي بالاربعين يعني بتقدروا تقلوا عليّة بيضة، المهم حكيت للباشا اللي جنبي طول الفلم قتل وطخطخة وهسه قلب رومانسية يا شيخ منت عارف اني مش تبع هيك شغلات، راح حكالي انت اهبل وفاهم الحياة غلط عمرك ما حكيت مع بنت صح؟ حكتلو لا والله انت عارف انو طول وقتي مع ابوي وفي الدار يعني ما في مجال وغير هيك عيلتنا كلها رجال زي اللي عنجد، حكالي يعني انت عمرك ما سمعت صوت بنت يا خسارة اسمع عندي خيار الك، حكتلو صراحة انا ما بحب الخيار لحالو اما مع البندورة ليصير سلطة او خيار مخلل، راح دفشني وحكالي يا غبي انت عقلك في الاكل قصدي عندي حل لمشكلتك حكتلو هات تفلسف حكا بعطيك رقم وحدة وبتتعرف عليها شو رأيك؟ حكتلو يا زلمة انت بتحكي من عقلك، حكالي اكيد مش من مناخيري يعني، حكتلو انت بتعرف انو انا عمري ما جاملت حدا فكيف بدك اياني احكي مع بنت؟ حكالي اسمع انت حسسها انها هي كل اشي حسسها انها ملكة، حكتلو كيف ما فهمت؟ حكالي مخك مسكر انت ولا شو، حكتلو اكيد فكرت اني معزوم ع سدر منسف بس راحت علي، حكالي انت واحد غبي والحكي ما رح ينفع اسمع وتعلم تطبيق عملي مباشر ايش رأيك؟ قلتلو ماشي ما عندي مشكلة.

مسك تلفونو واتصل على الرقم وبلش:

مرحبا كيفك حياتي انا ورد.(ورد مين يا حبيب امك والله جعفر قليل عليك)

بتعرفي انا بدونك مثل الشارع بدون انارة، مثل السواق بدون سيارة، مثل العاشق بدون جميلة، انا الرومانسية وانت الاثارة، انا القلب وانت اوصاله.( طبعا هون قلبلكم نزار قباني)

قعد بجوز حوالي نص ساعة وانا زي السطل قاعد جنبو بعدين اجا حكالي خذ هالرقم واتصل من تلفونك اجا دورك، طبعا انا نفشت مناخيري، اتصلت ولا اسمعلكم صوت يعني شو بغاية الأنثوية وحسيت انو السوائل اللي بأنفي بلشت تتسحول من حالها،حاولت اقلب لكاظم الساهر ولا لتيم حسن، حكيت اااااااااالو بابا فين؟ إلا واشوف هالشبشب بنص وجهي، حكتلها كيفك حبي؟ انا بدونك مثل السلطة بدون خيارة، مثل الحمار بدون حمارة،مثل الشباك بدون حماية ومثل الكيبورد بدون فارة، انا السيجارة وانت الولّاعة انا البنزين وانت الحفارة، طبعا ولا اسمع *طوط طوووووط طوووووووووط* فصلت بوجهي، حكالي ايوا شو صار، حكتلو ووولا اشي بس التلفون مشغول، إلا وينزل فيي قتل، روحت على الدار وجهي الوان اشي اصفر واشي احمر واشي نهدي، وصلت على غرفتي طميت حالي علشان انام قبل ما اهلي يشوفوا الخبيصة اللي على وجهي، ولما اجيت اغفى رن التلفون فتحت خط وعيني ملزقة بالثانية حكيت الوو، سمعت نفس الصوت الأنثوي الوووووو، انت اللي رنيت علي قبل ساعة صح؟ حكتلها اه انا معلش بس بتعرفي صحاب السوء، حكتلي لا عادي ما في مشكلة، شو بتعمل؟ حكتلها ولا اشي بدي انام، حكتلي انت بتنام بالليل؟ حكتلها ولا شو؟ حكتلي انا بنام في النهار وبصحى باليل، حكتلها ليش ما تعرفنا على الانسة بومة، حكتلي لا يا فهمان انت مش عارف انو هاض هو وقت الرومانسية، حكتلها يا بنت حلي عني نعسان وعندي شغل بكرة، حكت انت شو بتشتغل؟ بعدين ما عرفتني عن حالك انا اسمي سوسو، شو اسم حسابك عالفيس؟ حكتلها انا ما عندي فيس، حكتلي ييييي في حدا في هالزمن ما عندو فيس؟ طيب انستقرام او سناب او اي اشي، حكتلها يا بنت الحلال انا ما عندي ولا اي نوع طبعا هي تسألني ١٠٠ سؤال وانا يادوب اجاوب ع سؤال واحد قرفتني عيشتي، وفجأة ييجيني زعيم الغابة………..، ولك انت مع مين بتحكي في هالساعة؟ حكتلو يا بابا ما بتعرف انو البوم بيصحا بالليل وبنام في النهار؟ طبعا انا لسا ما خلصت هالكلمة إلا هالكفوف على وجهي و المسبات والتلفون انكسر، ضليت طول الليل وانا بتوجع ما كفتني القتلة اللي اكلتها عند الزفت لا اجا ابوي يكمل علي، سبيت البنات والفيس والواتس وكل اشي وكرهت الساعة اللي فكرت فيها اتعرف على بنت لو ضليت بكرامتي وخجلي ما صار اللي صار.

طبعا البنت كانت تعمل كل هالعمل عشان تنتقم منو يا هيك البنات يا بلاش

# انتهت

انشالله انها عجبتكم وأنكم ضحكتم شوي، طبعا هاض الاشي ما صار معي بس حبيت نتسلى ونضحك مع بعض شوي يا أمامير

عرض التعليقات (18)