أروع وأسهل عشاء شتوي دافي ممكن تجربوه

106 8٬793
 

أروع وأسهل عشاء شتوي دافي ممكن تجربوه

أروع وأسهل عشاء شتوي دافي ممكن تجربوه

أروع وأسهل عشاء شتوي دافي ممكن تجربوه

أروع وأسهل عشاء شتوي دافي ممكن تجربوه, معكم صديقة زاكي الشيف الموهوبة , مرحبا يا أميرات زاكي اشتقتلكن كتير وبتمنى تكونو بأحسن حال ومربربات ودفيانات بالشحمات والدهنات هههه
وصفة اليوم سهلة وسريعة وطعمها تحفة والله وخصوصا بالسهرة مع عيلتكم غير شكل
نطو معي نشوف المقادير

المقادير

  • فطر
  • فليفلة خضرا
  • بطاطا
  • قشقوان
  • درة
  • شرائح زيتون أسود
  • رشة ملح وفلفل أسود (بالإضافة لرشة بابريكا للبطاطا)
  • شوية زبدة أو زيت
  • لمسة ايدي السحرية على قولة عبورة الأمورة

الخطوات

&بسم الله الرحمن الرحيم&

* أول شي منجهز البطاطا

حاولو تختارو حبات صغنوتة وكيوت متلكن

منغسلهم منييييح لأنو رح نتركهم بالقشرة ومنغلفهم بالقصدير ومنلحشهم على شبك الفرن ينشوو لحتى يستوو

بصراحة مابعرف البطاطا شو عاملة بحياتها لحتى منجرب فيها كل ألوان التعذيب (اللي بتعرف تقلي هههه)

بأثناء شوي البطاطا بالفرن منجهز باقي المكونات

* بعد مانغسل الفليفلة ونفضيها من البذور منحشيها شرائح زيتون مع قشقوان طعم الزيتون معها رهييييييب ومنغلفها بقصدير كمان

* والفطر منقيم الساق تبعو ومنحط مربع قشقوان وعليه درة متل مو موضح بالصور

* بس تموت البطاطا قصدي تستوي منيح منطالعها ومنحط الفطر والفليفلة بالفرن لبين مانشتغل بالبطاطا

* منفتح القصدير عن البطبوطات ومنقسم بالنص بس مو عالأخير

بحيث نعمل مكان نحط فيه القشقوان

مندهن قلبها بشوية زبدة ومنرش من البهارات ومنحط قشقوان

انا خليت شي بس بقشقوان ووحدة ضفتلا درة ووحدة ضفتلا زيتون والتلاتة اطيب من بعض هههه

* المهم منطالع اللي بالفرن ومنفتح عالفليفلة مشان تتحمر من فوق ومندهنها بشوية زبدة ومنحط البطاطا معها هية والفطر ومنرجعهم ليسيح القشقوان وياخدو نتفة تحميرة حلوة

ومنطالعهم عالنم نم

ماتشوفو الحكي كتير بس مافي اسهل من تطبيقها

بعملة تاك تاك بتكون خالصة

ان شاء الله تجربوها وتعجبكن حبيباتي وماتنسونا من دعواتكن الحلوة..

عرض التعليقات (106)