عش البلبل باللحم وصفة سورية بطعم مابينتسى سلسلة وصفات حول العالم 14

119 7٬659
 

عش البلبل باللحم وصفة سورية بطعم مابينتسى سلسلة وصفات حول العالم 14

عش البلبل باللحم وصفة سورية بطعم مابينتسى من سلسلة "وصفات حول العالم" #14

عش البلبل باللحم وصفة سورية بطعم مابينتسى سلسلة وصفات حول العالم 14

عش البلبل باللحم وصفة سورية بطعم مابينتسى سلسلة وصفات حول العالم 14 , معكم صديقة زاكي الشيف الموهوبة ,  مرحباااا ياحلوات بتمنى تكونو بأحسن حال جبتلكن وصفة تنافس القنابل الذرية من حيث الخطر ههههه وصفة مميزة واللي لاحظتو انها مو منتشرة او معروفة لهيك عملتلكم ياها بدون تردد لتجربوها وتفتخرو قدام كل مين رح يدوقها ويسألكم فورا ((من أين لك هذا؟؟)) هههههه
هي الوصفة كنا نجيب عجينتها زمان من محافظة تانية (حماة الأبية) وبعد الأحداث ماعاد قدرنا طبعاً لهيك عملت عجينتي الباف بيستري وعملتها انا من فترة وطبعا علامات الانبهار عند مامتي حسستني بكمشات من السعادة ومن الذكريات الحلوة لهالأكلة مابدي طول عليكن اكتر قررررربو معايا وجربو ههههههه

المقادير

  • عجينة باف بيستري موجودة بملفي
  • نصف كيلو لحمة مفرومة
  • بصلتين وسط مفرومين ناعم
  • شوية زيت
  • ملعقتين ونصف لبن
  • ملعقتين ونصف دبس رمان
  • ملعقتين ونصف طحينة
  • اي مكسرات عالوش اذا بتحبو والاصل صنوبر بس الصنوبر سعرو شرير بصراحة هههههه
  • ملح
  • رشة فلفل أسود
  • قرفة مطحونة

الخطوات

“بسم الله الرحمن الرحيم”

أوووول شي شو منعمل يا ست ام عبود؟

* منطالع العجينة من الفريزر لتفك شوي او اذا كانت تازة منحطا بالبراد المهم نشتغل فيها وهية باردة،، بقى بلشي يلا حبيبتي عملي همة

وانتي ام حسن العجعوجة تعي جنبي اشرحلك تحضير الحشوة

* مندبل البصل بشوية زيت ومننزل عليه اللحمة ومنقلبها عنار عالية لتنشف ميتها كم تقليبة بس مابدنا ياها تستوي لأنها رح تكمل استواء بالفرن فيادوب يبلش يتغير لونها منطفي

ناوليني لقلك وحاج تاكلي من الحشوة هههه

* منحط اللحمة عجنب لتبرد شوي ومنضيف عليها باقي المكونات ومنخلطهن منيح ليمتزجو مع بعض

رح تلاحظو الخليط سائل شوي فلا تخافوا يامو كم دقيقة بتلاقوه كلو لامم على بعضو بسبب الطحينة

* منفرد أقراص العجينة بشكل دائري ومنلف الأطراف لجوا لنحصل على شكل العش

ومنعبي جواتو من حشوتنا اللذيذة ومنحط اي مكسرات واذا مابدكن عادي هية بتجنن بدون شي

* مندخلها فرن محمى عدرجة حرارة 200 لتتشقر من فوق ومن تحت واستمتعوووووو بالقرمشة والنكهة الخرافية اللي بتدوب القلب نم نم نم

# ملااااااااااحظة

بإمكانكن تعملوها بالباف بيستري الجاهزة لكن بهالوصفة بالذات المنزلية اللي عملتها أروع بكتير

وصحي فيكن تحزرو انو الأعشاش اللي مو انا عملتهن؟ هههههههههه

يارب تجربوها وتعجبكن وتدعولي بالبركة وبكل شي حلو وعسل متلكن ((وام سليم عليكي بالجليات هههه))

بحبكن انا
رابط عجينة الباف بيستوري من صفحة نور
(بتمنى الأدمن تمار الغالية تحط رابطها هون لسهولة الوصول)

عرض التعليقات (119)