ليش الزوج يتزوج على زوجته؟

115 19٬335

ليش الزوج يتزوج على زوجته؟
يا هلا يا هلا في شلة الأنس بكل الاعضاء والعضوات, اليوم الموضوع اجتماعي ويهم كل امرأة, قراءة ممتعة نتمناها  لكم.

ليش الزوج يتزوج على زوجته؟
ليش الزوج يتزوج على زوجته؟

اكيد ما فيه زوجة تتمنى انه زوجها يتزوج عليها واذا سمعت عن زوج تزوج على زوجته تسعى جاهدة لمعرفة السبب، وانا وحده من اللي كنت اتحرى وابحث وراء كل رجل معدد عن الاسباب اللي تخيلة يتزوج ، وبحكم اختلاطي الكثير بالحريم لاني موظفه كان اكثر الحديث يدور حول التعدد وان فلان تزوج وليه تزوج ،زوجته ماشاء الله جمال وسنع واخلاق ودين كاملة والكامل الله ليه يتزوج عليها وهكذا ….سؤال يحتاج اجابة مقنعة

وانا مع طول بحثي وسؤالي عرفت الاجابة، انا طبعا اشتغل في مدرسة تعرفت على وحده من المدرسات من حارتنا وزوجها صديق زوجي في عمله هذي الحرمة ماشاء الله اخلاق وسنع ودين وهدوء يعني فيها كل المواصفات اللي يتمناها اي رجل بالاضافة انها ما تقصر مع زوجها راتبها تحت تصرف زوجها بطاقتها الصراف مع زوجها يتصرف في فلوسها زي ما يبغى ولا تسأله عن شي وهذي الحرمه عندها اربع عيال المهم بعد فترة جاني زوجي وقال فلان تزوج اللي هو زوج صديقتي المعلمة قمت انا اتحسب عليه قال زوجي ليه تتحسبين على الرجال حقه يتزوج اربع قلت حقه اذا زوجته مقصره معه ،وزوجته مافيه مثلها وما بيلاقي احسن منها قال زوجي الله يوفقه ادعيله بالتوفيق ،انا قعدت على اعصابي لين خرج زوجي ورحت اتصلت فيها ابغى اشوف عندها خبر ومع السوالف وطول الكلام قالتلي عن زواج زوجها وكانت تدعيله انا بصراحه استغربت من برودها وهدوء اعصابها ماشاء الله ، المهم بعد فترة تعرفت على الزوجة الثانية كانت في الشكل في نفس درجة جمال الاولى يعني مافيه فرق كبير وكانت برضو طيبه وخلوقه ومع مرور الوقت سمعت من زوجي ومن بعض الحريم المقربات لهذا الزوج انه طاير بالثانية وانها ملكة قلبه وعقله وما على لسانه الا فلانه فبدات اكرر زياراتي لها عشان اعرف السبب ومع الكلام والسوالف عرفت بعض الاسرار اللي تملكها وما لقاها زوجها عند زوجته الاولى

من هذي الاسرار انها تتعامل مع زوجها كصديق بتقولون كيف، الثانية خفيفة دم وهذي الصفه اللي كانت تفقدها الزوجة الاولى ،يعني كانت تكلم زوجها باستمرار وتضحك وتمزح معه مره قالتلي انها تسوي مقالب في زوجها

الصفة الثانية ذكية تعرف وش يحب زوجها ووش يكره

ثالثا .. تسولف مع زوجها دائما الزوجة الاولى قليلة كلام

رابعا..تقدر نفسها وما تقدم زوجها على نفسها يعني اذا مرضت تجلس في الفراش وهو يجيبلها الاكل للفراش وتروح المستشفى على اهون مرض الزوجة الاولى تمرض وتظغط على نفسها وتقوم عشان ترضي زوجها وما تطلب المستشفى حتى لو تتقكع من الالم واذا قال زوجها اوديك المستشفى ترفض وتقول لا باستخدم مسكن وبيروح الالم ،

رابعا، الزوجه الثانية اذا ما عجبها وضع زوجها او اي شي ما يدخل مزاجها تناقش وتحوار وتطلع بنتيجه مرضيه، اما الزوجة الاولى لا اي شي يقوله زوجها حتى لو ما يعجبها تقول صادق وبعض الاحيان تخطي نفسها وهي الصح عشان ما يزعل

خامسا، الزوجة الثانية طبخها حلو وتنوع في الاكل،الاولى ما تنوع كثير في الاكل

سادسا: الزوجة الثانية تحب التغيير في كل شي شكلها بيتها تغير صبغة شعرها كل يمكن 4شهور تعتني بشكلها مره تلاقينها متينه مره نحيفه يعني تتعب على نفسها ، شفت لها في الانستقرام بعض الوجبات مغيره في اشكال الصحون طريقة تقديمها في الاكل مختلفة في كل مره ماشاء الله عليها ،الزوجة الاولى لا تهتم بنظافة البيت وترتيبة ونظافة عيالها لكن مافيه تغيير لا في الشكل ولا الجسم ولا اللبس ما تشكل في اللبس ولا الاكل لبسها متقارب الوان غامقه ومرات كثيره عزمتني في بيتها ونفس الاكلات تحضرها ما تنوع وتقول ابو فلان يحب الايدام والكبسه والمسكينه تفكر انها تسوي اللي يعجبه واكثر من مره جابت في المدرسة حلى ما غيرته هو نفس الصنف وتقول اغراض الحلى غاليه تبغى توفر على زوجها

الزوجة الثانية: ما تبذر لكن تطلب بالمعقول حتى انها مره قالت مافيه شي ينكب عندي كل اكله اسويها احاول انها تكفيني انا وزوجي بحيث انه ما ينكب منها شي،

الزوجة الاولى ما تبعد عنه يعني تروح لاهلها زياره وترجع اليوم الثاني هو كذا معودها الثانيه لا تطول يعني من ثلاثة ايام الى اسبوع

ومن الاشياء اللي كانت تسويها الزوجة الثانية كانت توفر لزوجها الراحة في البيت تقول اذا شفته يقرأ اجيبله قطعة حلى وحاجة يشربها واخليه يقرا في هدوء ما احاول ازعجه, تحطلة منديل معطر بعطرها في جيب الثوب وتجهز ملابسة اللي يداوم فيها وتلمع جزمته ويلاقي كل شي جاهز وتستقبله اذا جاء من الدوام عند الباب وترحب فيه وتبوس ايده
ومن خلال كلام الزوجة الثانية احاول اعرف وش الشي اللي لقاه زوحها عندها ما لقاه عند الاولى ويعلم الله انه ماهو حب للفضول او اني ابغى اطلع اسرارهم لا والله بس ابغى استفيد وافيد كل زوجة تحرص ان زوجها ما يتزوج

اهم شي استنتجته هو التغيير الرجال ما يحبون الروتين ،
، الروتين يقتلهم ويدمر الحياة الزوجية .. والشي الثاني الفرفشه والضحك الرجال ما يحبون النكدية الشكايه الشي الثالث ..قوة الشخصية في الشي الصح وفي الحق الرجال ما يحبون الضعيفه.. الشي الرابع الدلع الرجال يحبون الزوجة الدلوعه بس ما تكون ماصخه ويحبون اللي تدلعهم وتعاملهم زي الاطفال يعني تقربله المنشفه وتنشفه تلبسه الشراب تمشط شعره تكون قريبه منه بس ما تلزق فيه
ان شاء الله تستفيدون من هذا اللي اخذ مني وقت طويل في البحث وراء المعددين وزوجاتهم

عرض التعليقات (115)