بين الطنة والرنة ضعت بين الحماية والكنة الحلقة 10

126 15٬599

بين الطنة والرنة ضعت بين الحماية والكنة الحلقة 10
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

بين الطنة والرنة ضعت بين الحماية والكنة الحلقة 10
بين الطنة والرنة ضعت بين الحماية والكنة الحلقة 10

#بين_الطنة_والرنة_ضعت_بين_الحماية_والكنة

الحلقة العاشرة بعنوان( سلفتي المكيودة )

(ولك اصحي يا هند اصحي مش ظايل الا ساعة لاذان الفجر بدنا نلحق نتسحر )
( صباح الخير عمتي بتعرفي اني مسطلة لساعة حداش لحتى نمت الليلة ما عرفت انام قلقت )
( والله ما حدا حكالك تسهري جيبي قمر الدين الي نقعتيه والحقيني )
صحيت سامي ونزلت وهو لحقني سلم على عمي وعلى اخوه وقعدوه هم بحوش الدار وانا وعمتي فتنا قلينا بيض وعملنا قلاية بندورة وعملنا صحن سلطة مع بصل ونعنع واكيد مع كاسة شاي
خلصنا السحور وبلشنا شرب مي حتى اذن الفجر صلينا ورحنا نامنا ساعتين زمن ما هو النهار طويل وما بنقدر نصحى بكير
المهم صارت الساعة تمنية وصحينا كلنا عمي وسامي وسلفي اتيسرو عشغلهم وانا وعمتي قعدنا نفكر شو نطبخ
( شو رأيك يا عمتي نعمل اليوم مفتول حرام سالم بكون مشتهي هاي الطبخات )
( والله جبتيها يا هند بس هسا متى بدنا نلحق نفتل ونخلص )
( هي انا واياكي وبنادي على ام رفعت تساعدنا هالمرة محترمة وما بتقصر )
( خلص معناتو روحي نادي عليها بتلاقوني محضرة كل شي وبنبلش نفتل )
لبست ورحت ناديت على خالتي ام رفعت حكتلي اسبقيني يا هند عشر دقايق وبلحقك
بلشنا نفتل ونفتل راسي قد ما فتلنا والعصر روح عمي جايبلنا معه قطايف وعصير ليمون وتمر هندي من عند ابو احمد بالزرقا
وعملنا كمان شوربة عدس مع الاكل حتى الواحد يعرف يبلع وحطينا هالاكل بالحوش وهسا باذن وكمان بأذن والله تخيت من كتر الجوع لحتى اذن
وبلشنا بهالشوربات وبالعصاير لحتى ما حدا فينا قدر بعد هيك يوكل
جلينا الجليات وبوجهي عبيتي هسا وقت راحتي بدي اتفرج عالتلفزيون اشوف شو منزلين مسلسلات حلوة
لقيتهم جايبين مسلسل ابو الهنا فتحته وقعدت اضحك عليه
ولا بعد شوي جاييني سامي
( هند بدلتي جاهزة)
( ليش لوين بدك تروح )
( امي ماخدة موعد من ام سميح وبدنا نروح نطلبها من عمامها )
( ايوا طيب هسا بجهزلك اياه )
هييييي من الصبح وجهي بوجهها ما حكتلي بدهم يروحو يخطبوها اليوم لكوثر
( مالك قالبة بوزك )
( مش قالبة بوزي بس وقت الطبيخ والنفيخ انزلي يا هند ووقت الروحة والجية ما حدا بسأل فيي )
( كيف انا هسا سألت امي وهي حكتلي انك انتي ما بدك تروحي )
( ييييي والله ما حكتلي معقول انا جاهة يلفي ما اروح عليها )
( معناتو البسي وجهزي حالك وانا نازلة اخبرهم اني رح اخدك معي )
لبست وتجهزت ونزلت عصوت حماتي شكله ما عجبها انه سامي بده يوخدني بس والله طلع زلمة هالسامي واصر اني اروح معه
طبعا بيت ابو سميح بعيد خطوتين عنا الباب بالباب يعني دخلنا ولو تشوفو هالام سميح ما اقواها قد ما حكت حكي حلو لسالم خلص بدها تلبسه اياها لكوثر وعمامها يرحبو ويسهلو اكيد حكو لحالهم هاد كان بالخليج واكيد جيبته مليانة
بعد شوي فاتت كوثر لعنا بدكو الصراحة حلوة بتشبه كساندار نفس الطول والبياض بس كساندرا عيونها اوسع شوي
لابسة هالجاكيت الاخضر وهالشالة البنية يا عمي مرتبة مش متل رباب دخلت عاملة قوس قزح
يييييي ما اقواها قاعدة وبتحكي وبتوخد وبتعطي انا وقت جاهتي استحيت اطلع فيه لسامي

( يمسيكي بالخير يا اخوي يا ابو رجب ( هاد بكون عمها لكوثر عنده ولد خلص توجيهي وطلع يدرس بروسيا وصرله عشر سنين ولهسا بعده بدرس )
المهم ما علينا انا بديش انم ولا اجيب سيرة حدا
( احنا طالبين القرب منكم وانت عارف ما بتنطلب الا بنت الاصل شو قلت يا اخوي بعدين احنا جيران فش داعي نسأل عبعض )
(وهي اجتك يا اخوي يا ابو سامي واكيد احنا عشرة عمرة ما بدها الشغلة سؤال
بالنسبة لمهر البنت احنا حابين انها تكون ليرة ذهب )
عاملين حالهم ما بدهم يطلبو وهم بطلبو ليرة ذهب عشان بعد هيك يسطلوه طلبات
اتفقنا انه ينزلو تاني يوم يكتبو الكتاب وبعد رمضان حفلة العرس وما بدهم يعملو خطبة وحلف عليهم عمي يمين انه تاني يوم فطورهم عنا
روحت عالبيت بغلي ول ما لحقتش تصير كنتكم صرتو بدكم تعزموها وتعزمو اهلها وانا قديش الي متزوجة ما حدا فكر يعزم اهلي خلص انا لازم اعمل لحالي قيمة بديش انزل لا اساعدهم بكرة ولا احضر الفطور بقعد ببيتي باكل خبزة وبصلة
بس انا اذا ما عرفت كل شي رح يصير تحت بموت خلص بنزل وبشوف الوضع

نزلت عبيت عمي بعد ما نام سامي قطعت الخط من تحت لاني بدي احكي مع امي بديش اياهم يفتحو خط علي وانا بحكي معها
ورن رن على امي ما ردت ما هي امي بتنام قبل سامي
روحت رنيت عخالتي ام حسين
( ها يا هندطمنيني ولك ليكون صاير معك ايشي وما بدك تحكيلي )
( بصراحة اه سلفي خطب اليوم وهاي خطبيته شكلها داهية )
( اوعي يا هند تخليها تكون الكل بالكل ديري بالك انتي مرت الكبير )
( خلص يا خالتي ولا يهمك هاليومين انا بمر عند امي وعشان اروح انا واياكي عند هاد الدكتور الي عنده تلفزيون وبشوف انا حامل بولد ولا ببنت ،،، تصبحي على خير )
شلت هالغطا وحطيت حالي جنب سامي وغفيت
وهاي الليلة ما صحيت الا قبل الاذان بخمس دقايق ونطي يا هند اشربي مي وشربي سامي بلموت لحقنا وما حسيت الا صوت عمتي وعمي طالعين لانه عمي اذا ما اكل عالسحور بتعكر كل مزاجه
وطول الوقت يحكي ( الله يمضي هالنهار على خير )

سالم وكوثر وامها وعمتي راحو يكتبو الكتاب وانا وحورية ونجاة ظلينا بالبيت نعمل منسف
ما هو طبعا الغالي للغالي لكوثر واهلها عملو لحمة ومناسف بس شو الواحد بده يحكي
وعمتي روحت ضحكتها من الدان للدان
بلشنا نجهز بهالسفرة والعروس واهلها اجو قبل الاذان بخمس دقايق خايفة تساعد بايشي
وبعد هالتعب طلعت العروس ما بتوكل لحمة هو يعني عشان معها شامل تشوف حالها ما كلنا ولاد تسعة
بس انا ما قهرني الا سالم كيف نازل يدللها ويحط بصحنها والادهى من هيك لما فتت عالحمام سالم جايب من هاي الصابون الي بتنطس طس هاي السائلة قال شايفها عند اهلها لما رحنا نخطبها فحكى لحاله اكيد متعودة عليها
ونبهو علينا ما حدا يغسل فيها الا كوثر ليش هو احنا ما بلبقلنا بس بسيطة
فتت عالحمام ودرت الصابونة الي بالطساسة وحطيت بدالها صمغ وخليني اشوف يا ست كوثر كيف بدك تغسلي ايديكي وقعدت اراقب فيها لما بتفوت
بعد شوي ما سمعت الاصوت عمي بصرخ ما اجت السرقة على قد ايد الحرامي مو اتاريه عمي فايت يغسل وحاطط منها على حد علمي ما بغسل الا بصابونة فلقات وما بتحمم الا بصابونة نابلسية هسا صار يستخدم الطساسة
ولزقو ايده ببعض وقعده يحاولو يفكولو فيهم وانا تسللت متل الحرامية وطلعت عبيتي بلاش اسمعلي كلمة من حدا
خليهم يتهنو بكوثر وبامها فعلا الي ما اله حظ لا يتعب ولا يشقى
…….يتبع في الحلقة القادمة

#حنين_طه

عرض التعليقات (126)