قصة كناين ام لطفي حلقة 3 + 4

103 8٬320

قصة كناين ام لطفي حلقة 3 + 4
نقدم لكم في قسم المنوعاات في زاكي, هذه القصة الاجتماعية الهادفة, نتمنى أن تنال على إعجابكم, من يُنهي قراءتهاا يكتب كلمة “تم” في التعليقات, ويخبرنا رأيه في القصة, ليصلك باقي الحلقات.

قصة كناين ام لطفي حلقة 3 + 4
قصة كناين ام لطفي حلقة 3 + 4

…………………،
#كناين_ام_لطفي
الحلقة التالتة
(يا نحاح وينك يا نجاح )
نجاح (ها جيت هيني هيني احكيلي شو جبتو لبيت لطفي )
ام لطفي( اخ والله ما يخلص هالعرس الا وهو مكسور ظهري من هالمصاريف
اشتريناله غرفة نوم وطقم فراش عربي مستخدم بس والله ما تقولي عنه الا جديد وكم كاسة على كم صحن وهسا
روحي يا نجاح الله يرضى عليكي جيبلي سطل مي حطيلي فيه شوية ملح احط رجلي فيه والله ما انا حاسة فيهم )
نجاح ( شو هالصوت كانه في صوت حدا ببكي وبصرخ )
ام لطفي ( خير اللهم اجعله خير يا رب قومي يا نجاح قومي نشوف شو في شكله الصوت جاي من عند دار ابو بكر )
نزلنا انا وامي عند دار ابو بكر وكانت خالتي ام بكر قاعدة بتسوح وبتنوح وبتبكي وحالتها حالة
وعرفنا بعد هيك انه عمتها لصباح يعني اخت عمي ابو بكر الي بالضفة اتوفت قبل ساعة دعسها بيكب محمل خواريف مسكينة على هالموتة
رجعنا انا وامي عالبيت لبسنا عبايات سود وامي شالت كل المزهريات وكل الورد الي معلقته قدام البيت قال عيب بصيريش جيرانا عندهم عزا واحنا ناشرين هالوردات
رحنا عند خالتي ام بكر لانه عملوه بيت الاجر عندهم وانا ما قعدت وانا اقدم قهوة سادة ومي وامي وخالتي ام اسماعيل وخالتي ام يونس ما تركوها ولا لحظة لخالتي ام بكر وهم يواسو فيها
المسا لما رجعنا عالبيت لقينا ابوي قاعد وخبر امي تحكي مع نسايبنا وتعتذر منهم عن حفلة العرس
نجاح ( بس احنا صرنا حاجزين الصالة والكوفيرة وكل شي وهيك رح يروحو علينا )
ابو لطفي ( بهمش يابا تروح كل مصاري الدنيا ولا اعمل فرح وفي عنا حزن بالحارة هو انا كاين قليل اصل
وجهزي حالك يا ام لطفي بكرة ببعتلك لحمة بدنا نعمل مناسف لبيت الاجر )
ام لطفي( من وين جبت حق اللحمة )
ابو لطفي( رح نتشارك انا وابو اسماعيل وابو يونس فيهم )
وهديك الليلة مرقت متل السم على اخواني يا حرام طول الوقت بعدو بالايام والثواني حتى يتزوجو بس خلص الي ما اله حظ شو يعمل
تاني نهار صحينا من الصبح والتمو عنا الجارات عملنا غدا وودينا للزلام سبع صدور رز وللنسوان تلاتة
والحمد لله الكل اكل يلا نور وبخور ينزل عل قبرها
وهيك ظليت تلت ايام ما اقعد ما خلص بيت الاجر الا وانا اجري منفخين وكل اصبع لون متل اشارة المرور
المسا كنت بعمل بعجة لحتى نتعشى ولا هو الباب بدق كان عمي ابو بكر وعمي ابو اسماعيل ونص رجال الحارة جايين عنا
قعدهم ابوي بالحوش ونادى علينا نعمل للجماعة قهوة
كانو جايبن حتى يطلبو من ابوي ما يلغي العرس
وهون عمي ابو بكر حلف يمين طلاق بالتلاتة الا العرس يتم وكل شي يظل على حاله
حزينة خالتي ام بكر قد ما زوجها بحلف طلاقات يمكن صارت مطلقة الف مرة وهالمرة ابوي ما فشلهم حتى عمي ابو بكر حكى انه رح يبعت مرته وبنته عالحفلة
بعد بيومين اجو شباب الحارة وركبو عسطح البيت شادر عشان حفلة الحنا ونزلو صفو بالشارع كراسي وزينو الحارة بالضواو اخضر واحمر واصفر
المهم مع كل هالتعب وصلنا ليوم الحنا لبست هالفستان الاحمر وناديت على صباح كوتلي شعري وحطتلي مكياج
نجاح ( وك كتري يا صباح كل ما كترت كل ما كان احلى )
صباح ( خلصت العلبة يا نجاح وانا بحط خلص )
طلعنا عالسطح وانا سكرت الغرف لانه هسا كل وحدة جاي عالحفلة بدها تفوت تتمكيج ووتتزبط عنا بس امي نادت علي وسمعتني بهدلة غير شكل عشان تسكيرة الغرف وحكتلي يلعن الدور كلها المهم الناس يكونو مبسوطين
بلشو الجارات بهالطبلة
وبلشو يغنو ( يا تفاحنا ياحامل على امه يا تفاحنا يا ميمتي يمو )
وكل ما اقرب جهة المسجل تطلع فيي امي تطليعة ارجع مكاني ولا ما هي ام عريس بدها تظل تهز ام لطفي وهي لابسة هالدشداشة الخرز ومطلعة هالسنسال الحلبي مبسوطة عليه
بعد ساعة اجت الباصات واخدو النسوان لعند سناء وهناء وانا والبنات ظلينا نتفرج عحفلة الشباب عن السطح وهم بيكدبكو والله كان جاي عبالي انزل ادبك معهم بس خفت ابوي واخواني يدبكو على راسي 😂
بعدين اجت صباح حطت شريط فيه اغنية شك شاك شوك وكل وحدة حطت عخصرها اشار وبلشنا هز لحتى تفكفكت خواصرنا بس صباح مسكينة ما بتعرف ترقص طول الوقت تلوح بايدها متل الي بتبعت سلامات
رجعت امي والجارات وبلشو النسوان يروحو عبيوتهم
وانا وصباح وبنات الجيران ظلينا ننظف ونشطف
وما شفنا الا خالتي ام اسماعيل جايبة عشا وجاي تعشينا وحمدنا الله ونمنا
تاني يوم تجهزو اخواني للحمام ببيت الجيران لانه عمي ابو اسماعيل حلف على مصطفى يتحمم عنده وعمي ابو يونس اصر على لطفي يلبس عنده
وانا لبست الطقم الي من عند صباح وخليتها تحطيلي مكياج بس خفيف لاني بدي انزل واطلع بالباصات بلاش حدا يشوفني
وامي جهزت والنسوان اجو لعنا يستنو الباصات
وبس وصلو الباصات الكل صار يركض بده يلاقي مكان وانا طالعة عالباص دعست صباح عطرف الطقم من ورا مزعته كان نفسي اخليها ترجع عالبيت وما تحضر العرس بس يلا بتظل مسكينة مش فالحة الا بشغل البيت راحت جابت ابرة وخيط وطول الطريق وهي تخيطلي بهالطقم
وصلنا الصالة وبعد شوي دخلو العرسان بعد ما زفوهم فرقة فلسطينية بتجنن
الصراحة سناء مرت مصطفى طالعة احلى واهيب من مرت لطفي وقلبوه الحفلة معركة هالعقربتين كل ما تعمل سناء ايشي هديك هناء تغز لطفي بخصرته قضت الحفلة تغزز لطفي عليم الله ما روح لطفي الا وامعائه بترقص قد ما غزته فيها هالهناء
بس بدكو الصراحة معها حق تنقهر اي سناء بدلتها نفاش وحلوة مو متل هناء بدلتها سحب وهي ضعيفة ما بينت والي زاد الطين بلة لما دخلو اهل سناء ونقطها ابوها سوارة ليرات عريضة وتقيلة مش متل هناء اهلها لبسوها سنسال متل قشرة السيجارة بطق بالايد
يعني امي من كتر ما حزنت عليها عشوي شلحت هالسنسال الحلبي ولبستها اياه
بس يلا الحمد لله الي امي ما تهورت
بالاخير نادينا المصورة وصورتنا صور عائلية مع العرسان احنا ودار اعمامي واخوالي وجيرانا والحارة وروح كل واحد عبيته
ولطفي ماشي ورا هناء
وحاطط ايده على خصرته حتى يروح على بيته
ومصطفى مشلبك بايد هناء وبده يروح ينام هاي الليلة ببيت اسماعيل
هيك حلف عليه يمين
وبكرة بذوب التلج ووبين الي تحته وبنشوف خير هالكناين من شرهم
…..يتبع في الحلقة القادمة
#حنين_طه
#كناين_ام_لطفي

الحلقة الرابعة
مممممم شو هاد ريحة مسخن
نجاح ( صباح الخير يما
صباح الخير خالتي ام اسماعيل
صباح الخير خالتي ام يونس
صباح الخير خالتي ام بكر
شو بتعملو مسخن )
ام لطفي ( اه ما هو اليوم صبحية اخوانك وبدنا نطبخ )
نجاح ( عاد يما لما فدوى بنت ابو عامر تزوجت اهلها هم الي طبخو وجابو )
اطلعت في امي نظرة فهمت معناها وما كملت حكي
قمت ضبيت البيت شوي وفتت اساعدهم بالمسخن ما هو ما شاء الله اهلي عاملين كمية
بعد شوي وصلو اهل سناء واهل هناء وبلشت المقارنات مين جبلها اهلها اكتر
سناء كانو اهلها جايبنلها تلفزيون ما شاء الله كبير كتير بصير اتفرج عندها على العلم نور
اما هناء اهلها جابولها لحافين وشوال رز شكلها امبارح بالعرس قبل ما تروح اعطت اهلها يجبولها هدية وروحت
بس ما بحط بذمتي
وطول القعدة وكل وحدة فيهم حاطة راسها براس امها ونازلات حكي كانو بياخدو الوصايا العشرة
وبس روحو اهاليهم كل وحدة فيهم انضبت بغرفتها وما حدا ساعد بالشغل والتنظيف لولا صباح وذهب بنت خالتي ام يونس بس طبعا ما بقدر احكي لانه امي بتصير تحكيلي لساهم عرايس
المسا اجت كل وحدة مع زوجها سهرو ولعب ابوي ومصطفى ولطفي شدة وابوي مسك مصطفى بغش بالشدة وهو قال انحرج لانه ابوي فضحه قدام الكل
وهديك هناء قعدت وفردت حالها عاساس انه زوجها الفارس الامين
بعد شوي طلع لطفي عبيته ومصطفى فات عغرفته وانا رحت سهرت عالتلفزيون الجديد صورته طبع والصوت بتحسي حالك كانك جوا التلفزيون ومن قناة لقناة ومن مسلسل لمسلسل ظليت سهرانة للساعة 12 بالليل وامي كل شوي تطل علي وتدعي على الي اخترعه لهلتلفزيون
والله وتاني يوم ما قدرت اصحى من كتر النعس وحلفت هاي اخر مرة بسهر فيها
خلصنا شغل عبكير انا وامي فتنا عالمطبخ نعمل فاصوليا ورز
نجاح ( هاد الرز لسا بقرط شو اعمل )
ام لطفي ( لا تظلك تفتحي عليه وحطي فوقه كيس وسكري الطنجرة بستوي لحاله )
نجاح ( طيب حاضر )
هالاكلة مع ليمون وقرن فلفل بتشهي
الظهر امي مدت حالها عالفرشة بالحوش ونادت علي بس تغفى احط عليها شرشف اغطيها
امي نامت وانا عالتلفزيون من قناة عمان لسوريا حكيت لحالي انادي على صباح حرام بتكون زهقانة ونسوان اخوانها مجنناتها
اجت عندي صباح واجت معها خالتي ام بكر وام اسماعيل
وخالتي ام اسماعيل جايبة كيس بزر بطيخ تتسلى فيهم
ام لطفي ( قومي يا نجاح جيبلنا صحنين بلاستك مش تجيبي قزاز وتكسريهم وجيبي من النملية كيس القضامة )
قعدنا احنا والجارات حكينا وتسلينا وخالتي ام بكر قضتها تشكي من مرت بلال قال ما بتصيب معها ايشي من شغل البيت وطول اليوم قاعدة تطق حنك عالتلفون مع اهلها وبس تيجي فاتورة التلفون زوجها ولا بدفع ايشي كله على عمي ابو بكر فانا اقترحت عليها تشيل الصفر
ام لطفي ( قومي قومي ام الاقتراحات انتي في كم حبة تفاح وكم قرن موز جيبهم خلينا نقطهم ونوكلهم )
يباي امي لازم تفنسني اي بدي اعلم خالتي ام بكر كيف تقدر على كناينها بدال ما هم مستقويات عليها
كل هاد ونسوان اخواني مدسوسات جوا ما بنشوفهم الا باخر الليل بس يجو زواجهم وامي بتسكت وبتحكي معلش لساتهم عرايس وانا بسكت ما بدي ازعل امي
المسا اجت هناء وبس سمعت صوتها سناء طلعت تقعد معنا
هناء( نجاح جوعانة وفش عنا خبز وصيت لطفي على خبز ونسي يجيب الله يسعدك قومي اعمليلي سندويشة )
نجاح ( وانتي مالك ما تقومي تعملي لحالك )
سناء( خلص خلص انا بعمللها سندويشة عنا زيت وزعتر يا نجاح )
نجاح ( ما هو لو بتقومي وبتفوتي عالمطبخ بتعرفي شو عنا وشو ما عنا )
سناء( خلص قايمة ادور لحالي)
فاتت سناء عالمطبخ وبعد شوي رجعت بسندويشتين على اساس سندوش زيت وسكر بس بدل ما تحط سكر حطت ملح قال مخربطة بينهم مش عارفة كيف مخربطة وامي مازعة ورقة كبيرة وكاتبة عليها بقلم حبر سكر وملزقتها على علبة السكر وهديك هناء من اول ما حطت الاكل بتمها وهي بتقح طلعت روحها ورجعت وعيونها صارو حمر
بدكو الصراحة عجبتني هالسناء بطلع منها شفتلي غليلي من هالعقربة هناء
تاني يوم قمنا انا وامي نضب البيت وطلعت اشطف الدرج
ودقيت علباب عغرفة سناء تطلع تشطف معي وفهمتهم انه الشطف بده يكون عالدور واليوم هاد الشطف عسناء
هيك بدهم ما بيجو الا بالعين الحمرا
نجاح ( كتري يا نجاح سيرف عشان الدرج يصير يلمع )
سناء( طيب يا نجاح هيني بكتر )
طلعت سناء سطل المي والي حاطة نص باكيت السيرف فيه ورجعت توخد المكنسة والقشاطة وهديك هناء بس شافت سناء دخلت راحت حطت نص كاسة زيت بالمي
طلعت سناء وصارت تدير بالهمي وتشطف وحزينة اجريها صارو يروحو ويجو مسكينة اجريها ما حملوها وظلت تروح وتيجي تروح وتيجي لحتى بالاخير زحلقت ووقعت على وجهها اخر شاحط الدرج
نجاح ( يا صباح يا صباح )
صباح( شو بدك يا نجاح )
نجاح ( البسي عراسك اشار وتعالي معي بدي اوصل عالصيدلية )
صباح ( يييي مالكم في ايشي طمنيني )
نجاح ( البسي واطلعي بدي اروح اشتري كريم للمفاصل لسناء مرت مصطفى وقعت على الدرج )
ولما سمعتني خالتي ام بكر حكتلي ما اروح ولا اجي هاي الكريمات كلها كذب هسا هي رح تلحقني وبتدهن سناء بزيت زيتون مع حبة وجع راس بترجع متل الحصان
وهاي سناء كان بدها حجة حتى تقعد وما تقوم على حيلها
وما في غير روحي يا نجاح اعملي وتعالي يا نجاح ساوي
والله ما انا عارفة هو انا زوجت اخواني لحتى ارتاح ولا اظل متل الدولاب
بس لا لسا الطريق باولها وانا وراهم وراهم وانا نجاح
……يتبع في الحلقة القادمة
#حنين_طه

عرض التعليقات (103)