حكايا زاهي للكاتبة حنين طه

94 9٬613

حكايا زاهي للكاتبة حنين طه
هذه القصة تأتيكم من قسم المنوعات في زاكي

حكايا زاهي للكاتبة حنين طه

#حكايا_زاهي
الحلقة الاولى

انا انسان بسيط وبحالي
ما بتدخل بالناس كتير بس اذا شفت غلط لازم اعدله مع انه كل ما حدا بشوفوني بحكولي انت غلط من فوق لتحت
والدي توفى وانا عمري خمس سنين وربتني امي
واخوي جعفر انا اصلا ما الي بالدنيا غيرهم
امي بتشتغل عمكينة خياطة وانا دايما قاعد عندها يعني بعرف اخبار الحارة كلها الي تزوجت والي اترملت والي حابة تتطلق كله عندي
وعقولة امي بداوي للحبل من فترة امي زوجت جعفر اخوي وسكنته بالغرفة الجوانية والشهادة لله مرته بنت حلال ومحترمة بس لولا هالالف خصلة الغلط الي فيها
ولولا الفستان الاحمر الي دايما لابسته اي صحيح انا كنت صغير بس هالفستان بالذات كبرني الف سنة
بدكو الصراحة الي حكى الصغير ما بنسى ما كذب
اي انا صرت اتخيل حالي متزوج ومرتي بتدور بهالبيت بهيك فستان عالعموم الله يستر عليها ويقص لسانها شوي

…ولك يا زاهي تعال كب سطل هالزبالة
هاد هو اسمي زاهي اساسا انا بشبهو كتير
شعري مفروق من النص وبلبس نظارات اكبر من حجم عيوني واكتر ايشي بميزني بنطلوني لاني دايما رافعه لحلقي ما هي امي الله يهديها كل ما تروح تشتريلي لبسة بتجيبها اكبر بنمرتين
عشان اقدر البسها السنة والسنة الجاي والسنة الي بعدها والي بعد بعدها واخيرا امي بتاخد اللبسة وبتقسمها شرايط
كل اولاد الحارة كانو يتخوتو علي من تحت لتحت بس انا كانت شخصيتي قوية ما بنهز خاصة انهم كلهم امهاتهم بيجو بخيطو عند امي يعني بعرف كل اسرارهم
وكانت امي كل ما تخلص قطعة اروح انا اوديها لصاحبتها يعني سرفيس على اجري
امي ( تعال يا زاهي ودي هاد الفستان لافتكار عرفتها الي ساكنة بنهاية الشارع عاليمين )
اخدت الفستان بكيس ورككضت لعند افتكار
هاي افتكار كل ما بروح عندها بتعطيني عشر قروش اشتري اشي اتسلى فيه وانا مروح
اكتر ايشي كنت اتسلى فيه ( براد على بيبسي ) اقضي الطريق وانا باكل فيه
وانا مروح شفت ام مروان جارتنا حكتلها تروح عند امي بدها اياها بموضوع ضروري
هو الصحيح امي ما كانت بدها اياها بس قلت لحالي بتلتهي فيها امي شوي لحتى العب بالشارع من ولاد زكية
بالبسكليت
ويا ريتني لا رحت ولا لعبت معهم لسا اخدت اول شوط وتقاتلنا مين يركب وهداك خالد ابنها تنح قال البسكليت اله وهو حر ما بده يركب حدا عليه
وحرق دمي هالغضيب لما حكالي زاهي ابو بنطلون مرفوع
هون بطلت قادر امسك حالي
كريت كل شي بعرفه عنه
( كيف لو انه هالبسكليت مو جاييك صدقة من دار ابو سمير هسا صار الك لسان وتحكي )
خالد( بتعايرني بالفقر يا زاهي انا بفرجيك )
زاهي( عقولة امي الفقر من الله والوساخة من مين )
انا وقتها ما كنت اعرف شو معناها بس هيك كنت اسمع الجارات بيحكو لامي عن زكية
اي مرة سمعت خالتي ام مروان بتحكي انهاا بتقرف تشرب كاسة المي عند زكية
ولا سمية دايما بسمعها بتحكي لاني لولا العيب والخيا الا هي تقوم وتنظف البيت لزكية
فش ربع ساعة بالزبط واجت زكية لامي تخبط وتصرخ انا من الخوف سحلت جوا بنطلوني الواسع
ما انا عارف العواقب اكلت يومها قتلة من جعفر اخوي وفرقت عالحارة هو يضرب وانا ماسك بايد بنطلوني خوف يسحل وبالايد التانية نظاراتي
بس بدكو الصراحة فشيت قلبها لامي
من زمان كانت نفسها تطقع زكية هالاسفين واجا عن طريقي
طبعا ما انا دايما بوز المدفع بس خلص توبة بعد اليوم ما رح اتدخل باي ايشي اي فخار يكسر بعضه
بس احلى ايشي لما قعدت انتصت على جعفر ومرته باخر الليل وسمعتها بتحكيله
( حرام عليك يا جعفر تضرب اخوك هيك عشان زكية
اي والله كل الي حكاه صحيح )
بعد هالموقف خليها تلبس احمر واخضر واصفر
الي بتحبه
هي صحيح لسانها طولها بس صاحبة حق
وصحيح انا ما كنت بدي اتدخل باي ايشي ما الي فيه
بس بدي ارد المعروف لصفاء مرت اخوي واحكيلها عن شادن بنت عمي الي بتلف على جعفر من تحت لتحت وعن نوال بنت جيرانا الي بعتتله رسالة قبل فترة وعن تقوى بنت خالة امي الي كانت امي بدها تخطبها لجعفر
بس بعدين تفركشت الخطبة ليش جعفر طلب منها تبوس ايد امي ،،،،،، ما هم بنات هالايام لا عندهم بوسة ايد ولا غيره بوستين من هون وبوستين من هون وخلص كانها الوحدة بتسلم عصاحبتها
عالعموم قررت احكي لصفاء عن كل شي
والله يستر من الي جاي

..يتبع في الحلقة القادمة
#حنين_طه

 

#حكايا_زاهي
الحلقة التانية

اصبحنا واصبح الملك لله
احلى ايشي تقوم من النوم عصوت امك وهي بتزيح وبتعزل بهالبيت وكل هاد الشغل وعندها ام مروان وام محمود بشربو كاسة شاي تحت الدالية
ترا عادي امي تكون تشتغل والجارات قاعدات ما هم من اهل البيت
ومن اول ما صحيت وخالتي ام مروان تتطلب ساعة سخنلينا الشاي يا زاهي وساعة حطلنا صحن بزر يا زاهي
ترا انا اسمي زاهي مو زاهية ،،،، بس حرام بظلو نسوان كبار
جبت هالشايات وفردت الحصيرة وقعدت جنب امي اسمع شو في سواليف جديدة وشوي ولا خالتي ام محمود انفجرت بكا وامي وام صفاء وام مروان يحاولو يهدوها بس عبس تبكي من هون وتمسح بكمها من هون
ام مروان ( اي وحدي الله يا ام محمود مالك )
ام محمود ( اااااخ شو بدي احكي لاحكي صرلي سنتين بدور لمحمود على عروس ولما لقيتله وحدة قال طلبت هي واهلها انا ما اروح عالجاهة
مستحيين في وانا عشان ما انكد على محمود ما حكتله شو قالت العروس واهلها )
ام زاهي( طيب ما سالك ليش ما بدك تروحي على جاهته )
ام محمود( كيف لعاد سالني بس انا حكتله اني تعبانة وبيت العروس بالطابق الرابع وانا اجري ما بحملوني اطلع للطابق للرابع)
بصراحة انا لما شفتها كيف بتبكي حرقت قلبي يعني هالام بتتعب وبتربي وبالاخير بتيجي هالكنة بتوخد هالشب عالبارد المستريح
وقد ما بكيت حلفت امي عليها تتغدى عنا وبعدها وصلتها عالبيت ورحت جبت صفاء مرت جعفر من عند اهلها ما انا سرفيس الحارة
وقعدت افكر كيف بدي افرجي صفاء رسالة نوال بنت جيرانا
حطتلها اياها عالطاولة بعرفها اذا شافت ايشي وما قراته بتموت وسبحان الله عدوري صارت امينة ما مسكت الرسالة ولا فتحتها
رجعت حطيتها عالتخت بغرفتها ،، فش خمس دقايق ولا هي فتحتها لا وبتقرا بصوت عالي
اكتب لك بالمقلوب كي يبقى الحب بالقلوب
اكتب لك بالازرق كي يبقى الحب اعمق
وبلشت تصرخ يعدمني اياها كنت بدي افرجيها الرسالة فرجت علينا الحارة وهي تصرخ والا بدها تروح عبيت نوال
يهديكي يرضيكي يا بنت الناس اقعدي واهدي لا تخربي بيتك بايدك وابدا متنحة احتى اجا جعفر اخدها على جنب ضحك عليها بكلمتين ,,, واجا حملني من ديناي
ولك انت مش ناوي تهدا ،،،، جننتني ومسكني وزتني على امي ( ترا ابنك هاد بطلت قادر اتحمله اخرتني بايعه بالحارة )
ول على شو الحق علي الي كنت بدي اعمل خير بس جد جد بعد هالموقف اتاكدت انه النسوان ما بنحكالهم ايشي بس انا خلص تبت بدي اضب لساني وما بدي اعمل خير مع حدا خلص تبت
حملت حالي وطلعت عالحارة شفت الشباب كلها متجمعة قدام دكانة ابو زهدي ومحمود ابن جيرانا قاعد سيجارة ورا سيجارة مدايق ليش امه ما بدها تروح على جاهته
زاهي( بدك الصراحة انا ما كنت بدي احكي بس حزنت عليك ولك يا هبيلة امك نفسها تيجي على جاهتك بس عروستك منعتها)
محمود( امي حكت هالحكي )
زاهي( اه والعروس مستحية بامك)
محمود( يعني امي اجريها ما بوجعها )
زاهي( اه هي العروس مستحية بامك )
محمود( يعني امي شكت للجارات الله يسامحك يما وانا متل الاهبل)
زاهي( ولك ااااه ما هي العروس مستحية بامك )
محمود( ولك فهمت فهمت )
زاهي( اي الحق علي الي حكتلك يا عيب الشوم بس الواحد في اغلى من امه عشو شوفة الحال كلنا اولاد تسعة اي ببيع الدنيا كلها ولا بفرط امي طز بالنسوان كلها وانت هسا جاي معصب علي لاني قلتلك انه العروس مستحية بامك )
رجعت عالبيت وتلقائيا لحالي طلعت عالسطح تخبيت لانه لما يعرف جعفر رح يتبرع فيي مش رح يبعيني
واذا كنت اشوف بعيني اليمين شوي وبعيني الشمال شوي هسا رح ابطل اشوف بلمرة
من الخوف قرات سورة الفاتحة عشر مرات
والي شفعلي وقتها انه امي انشغل بالها وهم يدورو علي لحتى اجا ببال جعفر يطلع ويدور علي عالسطح ولاقاني متخبي جوا التنكات
( وعامل حالك خايف ابو بنطلون مرفوع انزل انزل لولا امي بس )
نزلت عند امي حضنتها ووعدتها اتوب واقص لساني بس الي فيه سوسة ما بغيرها😂😂😂
والاحلى من هاد كله انه محمود فركش الخطبة وتقدم لاخت صفاء مرت جعفر
بدكو الصراحة هاد اكتر خبر كسر قلبي لاني طول عمري بتخيل حالي متزوج وصال اخت صفاء مع انها اكبر مني بعشر سنين بس لانها صفاء اكيد رح تدلها عالبياع الي اشترت من عنده الفستان الاحمر وتلبسلي فستان متله بس
بدي لون اخضر انا
احسن ايشي الله يستر عليها
…… يتبع في الحلقة القادمة
#حنين_طه

 

#حكايا_زاهي
الحلقة التالتة
يعني المرة الماضية الله سترها معي ،،،،،مرضي والحمد لله
ومن هداك اليوم حاولت ما اتدخل بايشي الي بتتزوج واحد متزوج تتزوج انا شو دخلني
والي ما بدها حماتها تيجي على جاهتها كمان هي حرة انا شو دخلني يا اخي شو دخلني
ليش بحشر حالي باشياء ما الي فيها
المهم سمعت من ولاد الحارة انه جيهان بنت جيرانا قربت تتزوج وهاي كانت الصدمة التانية بحياتي لانه جيهان كنت ناوي اتزوجها التانية بعد وصال وهيك طارت وصال وطارت معها جيهان بس مش هاي المشكلة انحرق دمي لما سمعت سمير ابن الجيران بحكيلي انها مرت ابوها لجيهان ماكلة نص المهر عليها وبدها تخليها تتزوج باواعي وشراشيح قديمة
وبوجهي طيارة لعند امي حكتلها كل شي سمعته وطبعا امي عملت اجتماع طارق لخالتي ام محمود وخالتي ام مروان وقررو كل وحدة تتبرع بلي فيه النصيب حتى يشترولها كم شغلة تبيض وجهها فيه قدام دار حماها
وخالتي ام مروان الله يسعدها عن مية زلمة راحت لمرت ابوها وبهدلتها بهدلة غير شكل حتى كاينة مقررة تطلع جيهان من الصالون لبيت زوجها بس الجارات اصرو انها تطلع من بيت ابوها قال احلى واوجه
وبعد ما اشترو الجارات لجيهان كل شي بتتمناه اجو كل النسوان واتفرجو عجهاز جيهان حتى انا روحت معهم وبالعلامة شفت شغلات كتيرة احلى من فستان صفاء مرت جعفر الاحمر
طلع الواحد مش عايش بالدنيا
استغفر الله بس استغفر الله
امي( تعال يا زاهي يا حبيبي لانك عملت خير مع جيهان بدي اكافئك واجبلك بدلة غير شكل عالعيد )
جعفر ( هسا زاهي افندي صار يعمل خير والله وبطلع منك ابو بنطلون مرفوع )
زاهي( اموت واعرف انت ليش بتغار مني اذا بحياة امي هيك بتحكي معي شو رح تعمل فيي بعد عمر طويل اذا امي صرلها ايشي
يا رب اكون متزوج من هون لوقتها يا رب اكون متزوج ومرتي تلبسلي من هدولاك الاشياء)
جعفر( شو حكيت زاهي افندي)
زاهي( ما حكيت ايشي عم بحكي الله لا يحكمك بولايا )
نزلت انا واني عالسوق وقست كل البدلات وامي كل بياع بتفوت لعنده بتفاصله عالنتفة لو يصحلها تاخدها ببلاش ما بتاخر لحتى بالاخير لقينا بدلة محترمة وكويسة
بس طبعا بتلبسني وبتلبس اخوي جعفر معي
وامي كل شوي تطلع فيي وتحكيلي لا تخاف شو نسيت انه امك خياطة بكرة بصغرلك اياها على قدك
بعدين القطعة الكبيرة بتكبر صاحبها
والقطعة الممسوخة بتمسخ صاحبها ،،،،، انا اساسا ما جاب اخرتي غير هالجملة
روحنا عالبيت وفتت اقيس البدلة حتى افرجيها لجعفر اخوي ومرته
مش عارف وقتها شو خطرلي قلت لحالي كونه الدنيا برد وانا لابس بنطلونين بدي امزح مع جعفر واعمل حالي نهفة وانه سحل بنطلون البدلة
طلعت من الغرفة وانا ماسك بنطلوني بايدي وجعفر ميت ضحك علي
زاهي( بدي افرجيكم ايشي غير شكل )
فلتت البنطلون من ايدي على اساس امزح معهم ما انا متطمن في بنطلون تحته بس فجأة كمية الضحك زادت
عليم الله جعفر قلب عظهره من كتر الضحك
حتى صفاء كانت تشرب بعصير دمعة تشردقت فيه وطلع العصير من منخارها
وانا مبسوط يا عمي انا نغش بس بعدين شكيت انه الوضع مو طبيعي اي انا صرت اضحك على ضحكهم
ااااخ مو اتاري البنطلون الداخلي مخزوق يعني فضيحة وعليها شهود
جعفر ( رروح روح بطلت ابو بنطلون مرفوع صرت ابو بنطلون مخزوق )
ركضت عالغرفة وزعلت عحالي وزعلت من جعفر كمان
بس امي الله يسعدها لحقتني وصارت تدلع فيي وتضحكني ووعدتني تعملي يوم العيد الصبح فسيخ
غير المعلاق واللحمة تبعون الغدا
بدكو الصراحة مسكينة جيهان لانه عندها مرت اب ما عندها ام يا رب امي ما يصرلها ايشي اي لانه بعد الام احفر وطم
……. يتبع في الحلقة القادمة
#حنين_طه

#حكايا_زاهي
الحلقة الرابعة

من احلى ايام حياتي هو يوم العيد ويوم الوقفة لما اجتمعو عنا الجارات يعملو كعك ومعمول العيد
وامي تحكي لخالتي ام مروان لا تحطي جوزة الطيب بحكو انها حرام
ام مروان ( من متى صارت حرام طول عمرنا نحط وما احلانا حطي حطي )
الله يهديها خالتي ام مروان حلال حرام كله بيمشي معها
عايشة عالسبحانية
خلصو شغل بالكعك وانا رايح جاي اطول كمشة
وتنط خالتي ام محمود ( اي خلص يا زاهي هسا بتروح بركتهم )مش عارف انا بدها تروح بركتهم مني اما هي الي قضتها توكل عادي
ام محمود( حكيت ايشي يا خالتي يا زاهي)
زاهي( لا بحكي كلي كلي عشان تزيد البركة )
تركت النسوان بالبيت وطلعت عالحارة كل الناس صاحيين وفوق بعض ما هو سبحان الله ما بتذكرو يشترو اواعي العيد الا ليلة الوقفة
لعبت شوي مع الولاد وفقعتلي فتشتين بعدها دخلت عالبيت نمت ونيمت بدلتي جنبي وكل شوي افيق اطلع عليها الاقيها جنبي ارجع احط راسي وانام ولا يا عمي بدي اطمن انها موجودة 😂😂😂
وما صدقت على الله متى يطلع الضو ولبست البدلة وكشخت ورحت سلمت على امي وعلى صفاء مرت اخوي
وقعدت استنى جعفر لحتى اجا سلمت عليه خمس مرات وكل مرة يناولني نص دينار بالاخير حكالي والله لو تسلم علي مية مرة بعد هيك ما رح اعطيك غيرها
كمشت شوية ملبس بجيبتي وطلعت عالحارة اشتريت فرد ورحت لعبت بالمرجيحة الي عاملها ابو زهدي قدام دكانته مع مرقة خالتي ام محمود عايدتني ربع ليرة يلا كتر خيرها
رجعت عالبيت كانو عم يحضرو مسرحية العيال كبرت ووقتها حكتلي امي هات يا زاهي عيدتيك اخبيلك ياها
طبعا امي كل عيد بتحكيلي هالجملة وبعد العيد ما بشوف ايشي من المصاري
المهم كنت ميت نعس بس تنحت الا بدي احضر معهم المسرحية بس من كتر التعب غفيت جنب امي وما صحيت الا عصوت جعفر
( انت ظلك نام بالصالة وبعدها تعال يا جعفر انقله لجوا )
امي( اي خلص يا جعفر مش بكفي يا حبيبي نام بدون عشا )
اما تاني يوم صحيت شو ميت جوع بلاخم ملاخمة
واول ما فتحت عيني لقيت وحدة قاعدة مع صفاء وبتحكيلها
( ولك شو مقعدك عندهم اطلبي من زوجك يرحلك عبيت تاني هسا كل شغل البيت عليكي اطلعي من عندهم وارتاحي )
طلعت هاي بنت خالتها لصفاء رجعت عالغرفة ولا كاني سمعت ايشي بس طبعا صحيت امي وحكتلها كل شي سمعته
ول عليها مش عارف ليش الناس بس يشوفو حدا مبسوط لازم يخربو عليه
وبالفعل هالصفاء على قد ما كنت احكي عنها عاقلة وفهمانة طلعت تفرقع لوز من تاني ساعة صارت تنق فوق راس جعفر بدها تطلع من البيت من عنا وتحججت هالغضيبة في قال اخوك كبر وما بصير اعيش معاه ببيت واحد والي قهرني اكتر اخوي جعفر رد عليها وصدقها
لانه اجته من باب الدين هسا صار يفهم بالدين
بس اكتر ايش زعلني امي حكتله بدك تطلع اطلع انا ما بمنع حدا ،،،،، هاد بيت ابوك متى ما بتحب تيجي اهلا وسهلا
صار جعفر يدور على بيت وبلش يجهز ليرحل عالبيت الجديد
اشترى كم فرشة وطلع غرفته النوم من عنا وبنت خالتها لصفاء اعطتها طقم كنب منجدته السنة الي فاتت ،،،، يا الله شو عز علي طلعته من البيت اذا مش عشاني عشان هالمسكينة امي ،،،، بس اخ منهم النسوان بقلبو عقل ازعم زلمة
بدكو الصراحة حقدت عليها لصفاء وكان نفسي ادقها قتلة ما تنساها بحياتها
ام زاهي( تعال يا زاهي ودي هاد الصحن لدار اخوك جعفر )
اخدت الصحن وبوجهي على دار جعفر ،،، دخلت لجوا صفاء بتحك وجعفر بحك
….. بسم الله عليكم مالكم
عليم الله من كتر ما حكو صرت احك معهم مو اتاريها بنت خالها معطيتها طقم الكنب وهو كله بق ما هو لو فيه الخير ما رماه الطير بس بتستاهل الله اعطاها على قد نيتها
هالصفاء ام بقة
فش يومين بالزبط واجت تترجى بامي ترجع تعيش عنا وتتاسف وحالتها حالة بس والله عجبتني امي حكتلها اسمعي علي يا صفاء انا المرة الماضية مشيتلك اياها وحكيت يمكن البنت بدها توخد راحتها بس اذا بنعاد الي صار لا انتي كنتي ولا بعرفك
زاهي( وهديك كمان بنت خالتها ما بدنا نعرفها )
ام صار ( طبعا بنت خالتك ممنوع تيجي عنا ولا نشوفها )
صفاء( حاضر يا عمتي بس انت اسكت ابو بنطلون مرفوع )
شووووف والها عين لسا تحكي هالصفاء ام بقة
صحيح انا زعلان منها وما بدي اياها ترجع بس يلا عشان اخوي والمعاملة بالنهاية مع الله بس بنظري بطلت صفاء ام فستان احمر
صارت صفاء ام بقة 😂
……. يتبع في الحلقة القادمة
#حنين_طه

 



عرض التعليقات (94)