امرأة لا تهزم بقلم هلا الغرابلي

74 23٬536

امرأة لا تهزم بقلم هلا الغرابلي
هذه القصة مقدمة من قسم المنوعات في زاكي

امرأة لا تهزم بقلم هلا الغرابلي
امرأة لا تهزم بقلم هلا الغرابلي

#امرأة_لا_تهزم_بقلم_هلا غرابلي
لو سمحتوا ارفعوا القصة بالتعليقات لأنو كتار ماعم يشوفوا

الجزء الأول:
اذا قهرت إمرأة ، لا تعتقد أبدا أنك هزمتها .. فحتى لو وقعت أرضا ، انهارت و بكت و غابت عن الأنظار و لازمت الفراش ، ستراها فجأة جلست أمام المرآة سرحت شعرها و وضعت أحمر الشفاه و عادت بقوة إلى ساحة المعركة .. فحذر من المرأة “فهي لا تهزم ابدا….هي تبدأ من جديد” (منقول)

الحب كلمة كبيرة ما بتعرف حدود و حواجز وقت بتحب بتعطي و بدون ما تنطر لحتى تاخد وقت بتحب بتصير تشوف الدنيا أكبر و أحلى وقت بتحب قلبك هو يلي بتحكم فيك و بتحكم بحياتك حتى لو غلطت بالحب الحب هو نفسو ببررلك بإني أنا الحب يلي بسيطر على قلبك و حواسك الخمسة و طريقة تفكيرك و حتى سلوكك و أنا حبيت…
إياد هو الحب الأول بحياتي و هو الشب يلي غير مفاهيم كتيرة عندي بإنو الحب هو المغامرة و المجازفة هو إنك توهب قلبك و عقلك و جسمك لحبيبك و بإنو الحب بمجتمعنا الشرقي ما عم ينعطى حقو و عم ينظلم و يتقيد بعادات و تقاليد و ممنوعات مجتمعنا فرضها عليه و أول ما تعرفت عليه بالسنة التالتة بالجامعة جذبني بأفكارو و عقلو المنفتح و تطور إعجابي فيه بسرعة لحب قوي كتير حتى اقوى من القيم و المبادئ يلي أهلي و مجتمعي ربوني عليها…
حبينا بعض كتير و تقربنا من بعض حتى صارت علاقتنا متل أي اتنين متزوجين فعليا بس غير قانونيا و كان إياد يقلي شقفة ورق و كلام على حبر ما رح يغير شي من حبي إلك و نحنا رح نتزوج بس نتخرج و نكون جاهزين ماديا و نفسيا لناخد هيك خطوة لإنو الزواج هو مسؤولية كبيرة على الطرفين لازم يتأكدو إنو الطرفين منسجمين مع بعض بالروح و الجسد حتى ما يفشل الزواج و ينتهي بالطلاق…
تخرجنا أنا و إياد من الجامعة مع بعض وهو بلش يشتغل مع أبوه بمكتب تعهدات و أنا اتوظفت بشركة و بعد سنة بلشت أفتح معو موضوع الزواج و قلي إن شاء الله هالفترة أنا و أهلي منجي منزوركن و منطلبك من أهلك بس أعطيني شوية وقت لأفتح الموضوع مع أهلي و بكون رجعت من السفر لأني مسافر على مصر بموضوع شغل للوالد قلتلو أديش بدك تقعد بمصر قلي بجوز أسبوعين أو تلاتة بس أكيد رح نبقى على تواصل قلتلو كتيرر رح اشتقلك فين و قلي أنا كمان رح اشتقلك لهيك ناطرك بكرة بالشقة كالعادة لودعك قبل ما سافر…
ودعت إياد و سافر ليرجع من المفروض بعد 3 أسابيع و حاولت خلالن أتواصل معو عالفيس و الواتس بس ما مشي الحال حتى نطرتو كتير ليدقلي و ما دقلي لهيك حاولت التهي بشغلي و رفقاتي لوقت يرجع…

كنت قاعدة مع بنت جيرانا سارة يلي كانت بعمري تقريبا و عم نتساير و ننقل صور لبعض عالواتس وقت وقعت صور تحت إيدي ما كنت عم صدق
عيوني شو شفت كبرت الصورة كتير هاد إياد معقول ما أعرفو و أنا بقدر ميزو من بين مية شاب ما بس بعيوني و بقلبي كمان انتبهت علي سارة و أنا عم كبر الصورة قلتلي هي صورة من العرس يلي حضرناه من عشرة أيام شو عرس يا سالي بياخد العقل كملت سارة حكيها عن العرس و أنا مصدومة و عم قلب بالصور شي عم يرقصو سلو شي عم يقطعو الكاتو و شي عم يبدلو المحابس…. إياد تزوج و عروستو جنبو و أنا إلي أسبوعين ناطرتو ليرجع من سفرو و يطلبني من أهلي…

الجزء الثاني:
زائر طارئ من يأتيك دون موعد، يدق بابك منتظراً أن تفتحه مبتهجاً بقدومه ،ولكننا نحن البشر غريبون نخاف فتح الأبواب ونتردد ، أفكارنا السوداء و وساوسنا تسبقنا لما وراء الأبواب ، نخاف أن تُغتال لحظة السلام التي نعيشها وتُسرق لحظة الرضى والسكينة منا ، نخاف أن يؤد حلم جميل أو أمل غامض…
فثمن السعادة باهظ يا سيدي وأنا أخاف فتح الأبواب لغريب…
حبست دمعتي و صدمتي و نزلت فورا من عند بنت جيرانا سارة يلي قلتلي وين رايحة لسا هلأ جيتي قلتلا تذكرت عاطية موعد لرفيقتي و نزلت عالشوارع امشي و ابكي و صدى كلماتو و وعودو عم يخنقني تابعت للشقة يلي كنا نلتقي فيها و وقت جيت افتحها تفاجأت انو فيها عالم انحرجت كتير و نزلت فورا الشقة تأجرت لناس تانين و إياد تزوج وحدة تانية غيري الصورة خلص واضحة إياد تسلى علي و خدعني بإنو هو إنسان متحرر وصاحب قرار و بعيد كل البعد عن الشب الشرقي يلي بتجوزو أمو و بيكره مجتمعنا يلي بيفرض ضوابط على الحب كل هالحكي طلع كذب بس أنا لازم شوفو و اطلع بعيونو و قلو ليش هيك عملت فيني أنت دمرتني و أنا كنت لعبة عندك بعدما مليت مني كبيتني و تزوجت وحدة تانية كانت مشاعري ضايعة بين الكره و الحقد و الغضب و الانكسار بقيت ساعتين بالشارع و الحديقة و أنا ابكي و رجعت على بيت أهلي و نمت فورا بقيت 3 أيام قوم آكل لقمتين و أرجع نام حتى على شغلي ما بقا رحت و أهلي حاولو يفهمو مني شو صاير بس أنا ما خبرتن و مستحيل خبرن لإنو بجوز يقتلوني لإنو الغلط علي لهيك اتحججلن بإني مرضانة و راسي عم يجعني بعد 3 أيام لبست تيابي و رحت على مكتب أبوه لإياد و فتت عندو قلتلو عمو أنت أبوه لإياد مو هيك؟؟؟ قلي أي قلتلو إياد موجود؟؟ قلي لا بعتو على ورشة قلي ليش بدك إياه؟ قلتلو أنا رفيقتو لإياد و كان عايرني كتبو لأدرس فين و هو تخرج قبلي و ما رجعتلو إياهن و حاولت أتواصل معو و دقلو كإنو مغير رقمو قلي أي ولله..
إياد انشغل هالفترة بعرسو و عروستو عقبالك عمو قلتلو مبروك…
ألو إياد كيفك
سالي….أهلين
أهلين فيك بتحب قلك الحمد لله على السلامة إلا ألف مبروك يا عريس
سالي ..أنا كنت.. بدي أحكيلك بس… ما كان في وقت و كل هالشي صار غصب عني…
بدي شوفك هلأ
هلأ ما بقدر أنا بالشغل..خليها لبكرة…
دبر حالك هلأ بدي شوفك أحسن ما ألحقك لشغلك ناطرتك بحديقة تشرين…سلام…
سبقتو على الحديقة و الكرسي يلي كنا نقعد عليهن على طول حتى اسمي و اسمو محفورين عليه نطرتو و أنا نار بقلبي شاعلة ما كنت رح أقدر طفيها من غير ما شوفو و اسألو ليش هيك عملت…
إجا و مد ايدو يسلم علي بس أنا ما مديتها قلتلو أنا بدي شوفك لأسالك ليش هيك عملت حسيتو متل الحية يلي بتلون جلدها قلي أنا تزوجت بنت عمي و أهلي غصبوني عليها قلتلو و أنا..أنا سالي يلي قدمتلك كل شي و سلمتك حالي أنا شو بعمل هلأ كيف بدي كمل حياتي قلي سالي مجتمعنا و عاداتو أكبر مني و منك و أكبر من حبنا قلتلو هلأ أنت عم تحكي هيك و ين حكيك القديم اسمع أنا بدي دمرك متل ما دمرتني و رح روح أفضحك لمرتك بإنك تسليت على بنت الناس ….قرب علي و مسك إيدي قلي اسمعي ولية لمرتي بكسر رجلك اذا بتقربي لعندا و أنا ما جبرتك على شي كل شي عملتي بكيفك و إرادتك و بعدين أي شب محلي ما رح يتزوج إلا بنت شريفة و محافظة على حالها و ما باس تمها إلا أمها أديش بدك مصاري لتطلعي من حياتي ؟؟؟؟! و طلع مصاري من جيبتو أنا طلعت فيه نظرة قرف و استحقار و مصدومة بالحكي يلي عم اسمعو أخدت المصاري و مزعتن و كبيتن بوجهو و قلتلو مصاااااري مصااااري ليش شو مفكرني قدامك وحدة رخيصة و ما بتسوا و ما بعيني مال الدنيا أنا كنت مفكرتك رجال بس و قد كلمتك و وعدك قلي سالي أنا مستعد صلح غلطي و أعملك عملية ترجعي فيها بنت متل ما كنت قبل وعلى حسابي و لا من شاف و لا من دري قلتلو هلأ صار حل مشكلتنا بغشاء بكارى و قلبي و السنين يلي ضيعتن معك و الحب يلي حبيتك إياه قلي بكرة بتنسي و بتحبي حدا تاني و بتكملي حياتك قلتلو أكيد أكيد رح أنساك و كمل حياتي بس تذكر منيح هالقعدة لإنو الدنيا دولاب و كل شي بتعملو بيرجعلك و بتدفع تمنو و فاتورتك أنت رح تكون غالية كتير و تركتو و مشيت و أنا عم أبكي و منهارة…
رجعت على بيت أهلي مكتئبة و تعبانة..

بقيت هيك شهر قبل ما أرجع داوم بوظيفتي و أرجع لحياتي الطبيعية بس بجرح غميق بالقلب ما ممكن إنو يلتئم مع الزمن بعد فترة إجاني عريس و أهلي كانو شايفينو شب مناسب
إلي بس أنا رفضتو و طلعت علل فيه و كل عريس كان يجيني كنت أرفضه بحجج وهمية و بقيت على هالحالة سنتين فيق ألبس و روح على شغلي و أرجع أتغدى و نام و بالنوادر جدا لأطلع مع رفقاتي أو شي زيارة اجتماعية بحجة تعبي من الشغل…
أهلي لاحظو علي الحزن و الإكتئاب يلي كان واضح على ملامحي و حاولت كتير أمي تتقرب مني لتعرف سبب هالتغيير بس أنا كنت دائما أتحجج بإنو تعبانة من الشغل و ما مرتاحة فيه بعد فترة دخلت أمي على غرفتي و قلتلي هالمرة ممنوع ترفضي جايك عريس كامل مكمل أخلاق و نسب و علم و من جميعو قلتلا لشوفو بالأول بلكي شكلو ما عجبني قلتلي خدي شوفي صورتو قلتلا لا وجه لوجه أفضل قلتلي بس الشب ما بالبلد هو بألمانيا و أنت رح تسافري لعندو قلتلا ما بدي أتزوج على غربة قلتلي لا هي ما حجية اعملي حسابك إنو وافقنا عالعريس و أبوكي طاير عقلو فيه من عيلة معروفة و مهندس و أعطى الموافقة للجماعة عصبت كتير و قلتلا كيف بتوافقو عني بدك تزوجوني بالغصب قلتلي شوفي أديش صار عمرك بكرة بفوتك القطار و أنت ما حاسة على حالك الوقت بيمشي بسرعة بدك ترفضي طلعي قولي لأبوكي انا ما لي علاقة و ابوكي اعطى كلمة رجال و ما بتراجع عنها…
فتت بورطة كبيرة إجو أهلو للعريس و شافوني و عجبتن و انقرت فاتحتي و انكتب كتابي و بعد 6 شهور رح سافر لعند زوجي صارت الأمور بسرعة و بلمح البصر كإنو في شي عم يمشينا و يسيرنا يمكن هاد يلي اسمو النصيب و المكتوب بس أنا كان كل همي وقت وصل لعند زوجي و يعرف إني أنا ما بنت شو رح يتصرف أكيد رح يطلقني و يفضحني بين أهلي…

الجزء الثالث:
في كل مرة نحب فيها من جديد علينا صياغة أنفسنا ،نكتشف ذاتنا ، نجدنا مليئين بالحب والخير…
لعيوننا يعود بريقاً قد تغرّب عنها …وتعلو صوت ضحكاتنا ….ويستعيد الوجه ملامحه ….هو الحب
إجا موعد السفر ضبيت تيابي و عملت حفلة لرفقاتي و قرايبيني بعد 6 شهور خطبة كان خلالن خطيبي ليث يدقلي كتير ليتقرب مني و يحاول يفتح معي مواضيع كتيرة بس أنا كنت بغير وادي كان عقلي و قلبي بعدن مع إياد يلي لقبل ما سافر كانت تصلني أخبارو من بنت جيرانا و كان متابع حياتو و مبسوط و صار عندو بنت أما أنا وقفت حياتي سنتين بسببو و بسبب سذاجتي يلي ضيعنتي و دمرت حياتي…

وصلت على مطار ألمانيا و كان ليث ناطرني و حامل بوكيه ورد بإيدو أول ما شفتو زعلت عليه قبل ما أزعل على حالي شو ذنبو لياخد وحدة كانت ضحية غيرو غدرها و تسلى عليها أو كانت ضحية غبائها قرب علي و حضني و بوسني و قلي نورتي ألمانيا قلتلو منورة فيك و طلعنا بالسيارة و فتلنا شوي بشوارع المانيا فرانكفورت و رجعنا عالبيت يلي كان مزينه بورد و شموع و بوالين حمر قلتلو شكرا على هالمفاجأة الحلوة قلي أنت يلي فاجئتيني و طلعتي عالواقع أحلى بكتير من الصور قلتلو كلك ذوق أنا رح غير تيابي و قلي أنا رح حط العشا فتت و غيرت تيابي و لبست أكتر بجامة محتشمة عندي و طلعت أول ما شافني انصدم لإنو كان متوقع اطلع بصورة تانية تعشينا و حكينا عن وضع البلد يلي كان عم يسوء وضعو و هو حدثني عن ألمانيا و النظام فيها و شو ممكن أنا أشتغل بشهادتي…
خلصت عشا و قلتلو عن إذنك بدي نام لإنو تعبانة من طريق السفر تصبح على خير وكان كل ما يجي يقرب أتحجج و أتهرب منو ليوم قلي أنت ما حبيتيني يعني إلنا متزوجين أسبوعين كل ما بقرب عليكي بتقليلي يا تعبانة يا خايفة يا راسي عم يجعني شو القصة أنا بلشت أبكي و قلو ما عارفة شو بدي قلك قلي أحكي شو في قلتلو قبل ما احكي اسمعني للآخر بعدين قرر حكتلو قصتي مع الشاب يلي غلطت معو بدون ما أذكر اسمو و ختمتها بإنو أنا كان فيني أعمل عملية بس أنا ما بدي غشك أنا كل يلي طالبتو منك هلأ بس 3شهور نبقى متزوجين و ما تروح تفضحني لأهلي أو أهلك و بعدين كل واحد بروح بطريقو و بوعدك ما طالبك بشي لا مصروف و لا حتى متأخر بالعكس اذا بدك أنا بعطيك المبلغ يلي بدك إياه اطلع فيني نظرة ما قدرت فسرها و قام فورا و طلع من البيت و وقت رجع كنت نايمة…
تاني يوم كنت ناطرتو يرجع يفتح معي الموضوع و يقلي شو قرر بس ضل ساكت و ما حكى شي لبعد 3 أيام وقت كنا سهرانين قلي ليش تزوجتيني مادام وضعك هيك الزواج مبني على الصراحة و الصدق و أنت كنت لازم تصارحيني قبل الزواج مو هلأ وقت صرتي عندي و على ذمتي قلتلو أنا ما كان بدي أتزوجك لا أنت و لا غيرك بس البابا كان عاطي كلمة لأبوك و أنا وقت جيت أرفض قلتلي أمي أبوكي أعطى كلمة رجال و مستحيل يتراجع عنها و خاصة إنو كنت عم أرفض كل عريس بيجيني ما بس كرمال هالموضوع ولإنو أنا كمان ما عاد إلي ثقة برجال بعد هالصدمة قلي أنا ما من أخلاقي أفضح حدا و ما ببالك أنت انحطيتي على اسمي اعتبري البيت بيتك لوقت تقرري ترجعي على بلدك قلتلو انا ما ناوية أرجع على بلدي أنا بقيانة هون رح أتعلم لغة و أشتغل و استقر لإنو كمان نظرة الناس للمطلقة بمجتمعنا صعبة قلي يعني بعتبر حالي كنت وسيلة إلك لتهربي من….قلتلو ما تكمل قلتلك إني ما كنت رح أقبل بهالزواج و انحطيت تحت الأمر الواقع و بس صرت هون خلص ما رح أرجع و أنت شو فارقة معك بكل الأحوال رح ننفصل و ما بقى نشوف بعض و ما رح حملك مسؤوليتي انتهى حديثنا على هالأساس انو بعد 3شهور رح نطلق…
بقيت 3شهور عايشة معو متل الرفقات كان إنسان محترم جدا معي و أحيانا يساعدني بدراستي للغة كونو إلو 8 سنين بألمانيا و كتير أحيانا كنا نطلع نتمشى أو نتعشى بشي محل و عرفني على رفقاتو و جو و آخر الليل كل واحد فينا ينام بغرفة أنا بغرفة النوم و هو بغرفة القعدة و بعد 3شهور فتحت موضوع الطلاق بإنو نبلش بالمعاملة حتى انفصل عنو بالمسكن قلي أنت مدايقة من العيشة معي يعني ضحكت و قلتلو لا أبدا بس أنت لازم تكمل حياتك و ترجع تتزوج قلي بس أنا رح يصير اسمي مطلق و أي بنت بدي اتقدملا بدا تقول ليش مرتي طلبت الطلاق مني بعد 3شهور و مدة قليلة ما رح تقتنع بأي سبب قلتلو شو يعني هالحكي قلي عالقليلة لازم طبقي السنة عندي قلتلو سسسسنة كتيرر و أنت هيك عم ضيع وقت معي قلي شو فارقة معك أنت بس تدايقي مني وقتا انفصلي و اتفقنا على هالأساس إنو نأجل الطلاق لبعد سنة و خلال هالسنة تزوجنا فعليا و فكرت إنو موضوع غلطتي مع إياد تسكر بس على أول مشكلة إلي مع ليث عليت أصواتنا و قلي بكفي آخدك على وضعك انصدمت بحكيو و قلتلو فعلا الشب الشرقي حتى لو طلع على القمر ما بيتغير و أنا ما جبرتك تكمل معي و اوعا تفكر اذا أنا غلطت غلطة بأيام مراهقة و طيش مستعدة أتحمل رجال يهيني و يهتني طول العمر كل البشر بتغلط و بتستغفر ربها و الله بيغفرلا إلا انتو البشر ما بتغفرو و أنا دفعت تمن غلطي سنتين من عمري بالخوف و القلق والقهر بس ما رح ضل أدفعن طول العمر الشب بيغلط و بتابع حياتو و الناس ما بتعيبو و بتبررلو بإنو شب و طايش إلا البنت عنا وقت بتغلط ماحدا ببررلا أو بغفرلا ليششش بس لإنو عندها غشاء بكارى هو بس يلي بمجتمعنا بيثبت عفة البنت نحن مجتمعنا ذكوري بامتياز و أنت ذكر من هالمجتمع و فتت على غرفة النوم و نزلت الشنتاية و بلشت ضب تيابي و لحقني فورا و أنا تابعت حكيي أنا كان فيني يا ليث أعمل عملية قبل ما أطلع لعندك و أنت كنت ما رح تعرف بهالشي قلي شو عم تعملي قلتلو الشي يلي لازم أعملو من زمان ما كنت لازم رد عليك و أبقى عندك أكتر من 3شهور قلي خلص كبري عقلك و صار يقيم التياب من الشنتة و أنا رجعن قلتلو أنا صغرتو لعقلي وقت بقيت عندك أنا ما حدا بيكسرني و كرامتي فوق الدنيا كلها و صدقني إنتو الرجال كلكن بتشبهو بعض كنت مغشوشة فيك و مفكرتك إنسان مختلف سكت شوي و قلي وين بدك تروحي قلتلو هالشي ما بيعنيك ضبيت تيابي و جمعت كل أغراضي من بيتو و جيت أنزل وقف و قلي وين بدك تروحي بهالوقت خلص لبكرة الصبح بتروحي قلتلو بعد من طريقي ولا ثانية ببقى عندك بعد كلامك و فتحت الباب و نزلت و لحقني وقفت تكسي و طلعت حاول يمنعني بس ما رديت علي و بما إنو إلي سنة بألمانيا صرت بعرف أحكي و اتنقل بدون ما ضيع رحت على فندق كنت شوفو على طريق شغلي نزلت و حجزت فيه يومين لبين ما لاقي بيت صغير أنتقل علي دقلي ليث كتير و أنا ما كنت رد علي تاني يوم إجا على موعد طلعتي من شغلي قلي سالي خلينا نروح نشرب قهوة بمحل و نحكي قلتلو ليث خلص خلصنا ما بقا في حكي بينحكى قلي وين عم تنامي ؟؟؟
قلتلو هالشي ما بخصك و بلش بالطلاق قبل ما أنا بلش فيه لإنو أنتو الرجال العرب بتكرهو مرة تخلعكن بتحبو أنتو يلي طلقوها لهيك رح أنطر عليك متل ما أنت نطرت علي بس ما طول كتير لإنو بدي تابع حياتي و أرجع أتزوج رجال بمعنى الكلمة قلي خلص أنا بعتذر ما بعرف كيف طلعت مني هالكلمة خلص مشي نجيب أغراضك و نرجع عالبيت قلتلو لا مستحيل حتى ترجع تعيد نفس الجملة على أول مشكلة بترجع بتواجهنا و أنا ما مستعدة أتحمل خلص الله يوفقك و يهنيك بحياتك و انساني و تركتو و مشيت….
نقلت على بيت و استقريت فيه و بقيت على تواصل مع ليث كرمال الطلاق بس الحياة ما بتمشي متل ما بدك كمان هي إلها مفاجآتها يلي بتغيرلك مسار حياتك أنا طلعت حامل من ليث كان خبر حملي مفاجأة إلي ما قدرت أعرف حالي مبسوطة إلا زعلانة مبسوطة لإنو رح يصير عندي ولد يملي وقتي و يآنسني بغربتي أو زعلانة لإنو بدو يجي هالولد لأب و أم منفصلين و احترت كتير خبر ليث إلا لا خفت خبي علي و هاد غلط و ما من حقي و خفت خبرو و يفكرني إنو متمسكة فيه بالرغم من إني بحبو بس ما كنت مستعدة أخسر كرامتي للمرة التانية بمبرر الحب ..الحب يلي أنا تعلمت مفهومو من كيسي و تجربتي الحب يلي بقوينا و بيحفظلنا كرامتنا و يلي بخلينا نعطي بس بحدود و ما على حساب حالنا و مصلحتنا حب متزن و متوازن بين القلب و العقل هو وحده الحب يلي بيستمر و بأثمر…

الجزء الرابع:
دقيت لليث و قلتلو بدي شوفك انبسط كتير و قلي بمر عليكي بعد شغلك و منروح نتغدى بشي محل و وقت شفتو قلتلو بدي قلك شغلة بس ما تفهمني غلط أو إنو تفكر إني انا ممكن غير رأيي و أعدل عن فكرة الطلاق قلي تفضلي عم أسمعك قلتلو أنا حامل قلي عنجد عم تحكي رح يصير عنا ولد ما مصدق قلتلو أي للأسف رح يصير في ولد بيناتنا قلي سالي خلص خلينا نعطي حالنا فرصة تانية مو كرمالنا كرمال هالولد بس حرام يجي و يتشتت بيناتنا و أنت حامل و رح يكون عليك صعب إنك تابعي بشغلك خدي إجازة من شغلك و ارجعي اقعدي بالبيت عندي….
بعد شهرين رجعت على بيت زوجي ليث بعد ما اعتذر مية مرة و حسيتو إنو ندم على جملتو و لو ما عملت هيك كان ضل يهتني طول العمر و انا ما كنت رح أعمل غير إنو أبكي و ضل سامح و كملت شهور حملي عند ليث و جبت زين يلي طلع بيشبه أبوه كتير هالصبي غير حياتنا و قوى علاقتنا أكتر….
بعد 4سنين من زواجنا كنا بجمعة عند بيت رفيق زوجي رامي وقت اندق بابن و فات رفيقو لرامي و مرتو و اولادو يلي كانو طالعين على ألمانيا..
تهريب من الوضع يلي بالبلد و بتفاجأ إنو هالجماعة هنا إياد و مرتو و أولادو و تفاجأت أكتر وقت قام زوجي و سلم على إياد و بوسو و طلع بيعرفو من
أيام المدرسة الثانوية أول ما إجت عيني بعينو تلبكت كتير و هو بين عليه الصدمة صح أنا ما بقا بحبو و بحب ليث بس خفت هو يعمل اي حركة تلفت النظر إنو نحنا منعرف بعض كملنا قعدتنا و قلتلو لليث يلا لازم نقوم زين بلش يضوج شكلو بدو ينام التفت إياد لليث و قلو ابنك ما شاء الله قلو أي و في ابن تاني جاي عالطريق كمان قلو الله يخلين يارب نزلنا من عند رامي و نحنا بالسيارة راجعين سألتو لزوجي من وين بتعرفو لإياد ؟؟؟ و هو بلش يحكي عنو قلي أنا بعرفو من أيام المدرسة بس هو كمل جامعة بالبلد و أنا جيت هون كملت دراستي تابعت حديثي قلتلو أنا ما حبيت مرتو صار يضحك قلي مرتو هي بتكون بنت عمو و نص شباب البلد متسليين عليها قبل ما توصل لعندو و تصير مرتو قلتلو عنجد و معقول هو ما بيعرف هالشي قلي لا ما بعتقد إنو بيعرف قلتلو طب ليش تزوجها ؟؟ قلي أبوها معو مصاري و هو بيعبد الليرة بس هلأ أبوها فلس بعد يلي صار بالبلد قلتلو أكيد بتكون عقلت و هديت هلأ بعد ما تزوجت قلي لا من سنة تقريبا حكاني رفيقي من البلد و فتحنا سيرتها و قلي إنو بيحكي و بيطلع معا أنا سكتت بس أفكاري ما سكتت بإنو أديش الدنيا صغيرة لترجع تجمعني بإياد و بهالطريقة و أعرف عنو و عن مرتو كل هالتفاصيل فعلا كما تدين تدان
بعد أسبوع دقلنا رامي و قلنا إنو بدو يجي يسهر عنا هو و مرتو و معو إياد و مرتو أنا قلتلو لزوجي طب رامي و مرتو نحن صحبة معن من زمان و منعرفن منيح أما إياد و مرتو شو بدو يجيبن لعنا و أنا ما حبيتن أبدا قلي ولا أنا حبيتن خلص بيجو هالزيارة و نحن ما منردلن إياها و وقتها هن بيفهمو إنو ما مرغوبين بيناتنا….
اندق الباب المسا و فتح زوجي ليث و استقبلن و أنا طلعت لاستقبلن أنا و قرفانة و ضاغطة على أعصابي لإنو اتأكدت إنو أنا ما بس ما بقى بحبو لإياد و بكرهو كمان قلن زوجي أهلا و سهلا شو اشتقتلونا بهالسرعة لسا من أسبوع شفناكن صارو يضحكو و قلو رامي ولله هي فكرة إياد قلتلن أهلا و سهلا فيكن يلا أنا رح آخد غيداء (مرة رامي)و هبة(مرة إياد) و نقعد لحالنا قاطعني إياد فورا و قلي ليش يعني بدكن تاخدو راحتكن بالحكي علينا و ضحك قلتلو لا ولله بالنسبة إلي ما في شي أحكي عن ليث إلا الحكي المنيح لإنو رجال ما في منو و انفصلنا عنن بعدين قمت عالمطبخ أعمل قهوة و لحقني إياد بحجة بدو يفوت عالتوااليت و فات عندي عالمطبخ قلي سالي التفتت عليه و قلتلو عفوا بدك شي من المطبخ ؟قلي لا لحقتك لأحكي معك قلتلو اذا بتريد إياد أنت صفحة و طويتا و اطلع فورا من المطبخ قبل ما يجي زوجي قلي سالي أنا ندمت كتير إنو تركتك أنا بعدني بحبك قلتلو إياد اطلع برا أحسن ما نادي زوجي خلص الحكي بيناتنا من زمان و أنا بحبو لزوجي و مبسوطة معو و أنت دمرت حياتي أول مرة ما رح اسمحلك يكون إلك مكان بحياتي هلأ..
إجا بدو يكفي حديثو قاطعتو و صرت نادي بصوت عالي ليييث ليييث خاف و طلع فورا و بعدها حاول كتير يقوي علاقتو مع زوجي بس أنا قلتلو لليث إنو ما بدنا إياهن و ما حبيتن أبدا و خلينا نقطع
علاقتنا فين و من وقتها ما بقا شفناهن إلا بالنوادر…
ممكن أي بنت تغلط لإنو نحنا بشر و ما معصومين عن الغلط بس ما تيأسي و ضلي طول حياتك عم تدفعي الثمن و تسمحي لحدا يهينك و يمسح شخصيتك كرمال هالغلط تعلمي من غلطك و ارجعي حطي نقطة أول السطر و ابدأي من جديد…انتهت…

عرض التعليقات (74)