الرئيسة / منوعات / قصه انا وشادي للكاتبه هلا غرابلي

قصه انا وشادي للكاتبه هلا غرابلي

/
/
/
7167 مشاهدات

 

قصه انا وشادي للكاتبه هلا غرابلي

قصه انا وشادي

قصه انا وشادي للكاتبه هلا غرابلي

قصه انا وشادي للكاتبه هلا غرابلي , معكم صديقة زاكي الشيف الموهوبة ,leen
انا وشادي … قصة ل : هلا الغرابليالجزء الاول :

فرح : نجحت ….نجحت…يا امي

ام فرح : مبروك يا روح امك مبروك…بتستاهلي ولله تعبتي كتير ، خدي عم يدقلك عمك

فرح : اي عمو…..الله يبارك فيك يا رب …..اي لحمدلله …انشالله بيطلعلي هندسة معمارية ……اكيد عمي ……لا ماتقولا ما حابة سافر و اترك امي و اخواتي لحالن… ولله انت ما في منك و ما بتقصر …..انشالله خير ….الله معك

ام فرح : شبو عمك ….لوين تسافري؟

فرح : عم يقلي بجوز ما يطلعلك هندسة هون و لازم سجل بغير محافظات لهيك قلتلو كيف بدي اترك امي و سافر

ام فرح: ما رح يصير علي شي ،هيدا مستقبلك و لازم تركضي وراه بس السفر مكلف

فرح : اي قلي انو هو رح يتكلف بكل شي

ام فرح : الله يقدملك يلي فيه الخير

فرح: يالله اديش كويس ، ما بحسو الا متل ابي الله يرحمو

نجحت بالبكالوريا و نزلت على الجامعة لسجل على الفرع يلي كان نفسي فيه بس معدلي ما كان بيسمحلي انو ادرس هالفرع بمحافظتي ، لهيك ضبيت شنتايتي و ودعت امي و سافرت على محافظة تانية بتبعد عن محافظتي 5ساعات ، اول ما وصلت على محافظة جامعتي ما كنت بعرف حدا ابدا ، بس عمي اخو ابي و يلي كانت احوالو المادية ممتازة جدا و يلي كان مخصصلنا مصروف شهري لنعيش منو بعد وفاة ابي ، امنلي سكن اجار عن طريق معارفو ، لهيك اول ما وصلت فورا رحت على عنوان الشقة يلي استأجرلي اياها و دفع مقدم سنة لقدام ، و خبرني بانو اذا تلبكت و ما عرفت شي بانو احكي ابنو شادي يلي بيدرس هندسة ميكاترونيك بنفس المحافظة ، بس طبعا انا ما حكيتو و حبيت اعتمد على حالي ….

فتت على الشقة يلي كانت من غرفتين و صالون و مجهزة تجهيز جيد ، عزلتا و ضبيت اغراضي فيا و تاني يوم نزلت داوم بجامعتي و اتعرف على رفقات جداد و فوت جو جديد ، خلال فترة دوامي بالجامعة ما كنت شوف ابن عمي شادي الا بالنوادر جدا و ما كنت شوفو الا عم يشفط بسيارتو هو ورفقاتو بكورنيش التجارة ، كنت سلم عليه من بعيد بس و قول بقلبي الله يصبر اهلو عليه لانو كان شب طايش و ما متحمل مسؤولية شي مع انو شب مأمنلو كل شي و ما عاش ابدا بنفس الظروف يلي عشتا انا و اخواتي ، بقيت قاعدة سنة كاملة بالبيت لحالي و احيانا يجو رفقاتي ينامو عندي قبل ما يدقلي عمي و يقلي

ابو شادي : ولله بدي اطلب منك طلب و خجلان بس بعرف ما بتخجليني

فرح : عمي انت ما بتطلب انت بتامر ، انت بمقام ابي

ابوشادي : ابني شادي الله يلعنو بس متخانق و متضارب مع صاحب الشقة يلي مستاجرا و الرجال ما بقا قادر يتحمل تصرفاتو و الجيران اشتكو للشرطة عليه ،لهيك قلعو و انا ما قدرت دبرلو بيت لانو هادا عاشر بيت بينقل عليه لهلأ و بيتقلع منو

فرح : ايه

ابوشادي : ….بس بدو يجي يقعد عندك هالفترة لبين ما لاقيلو بيت ينضب فيه

فرح : …….

ابو شادي : شو قلتي ؟ ما رح يطول عندك ابدا و اذا دايقك بشي خبريني فورا و انا بتصرف معو

فرح: اممم…. طيب عمي …..متل ما بدك

ابو شادي : الله يرضا عليكي و بطريقك الله يخليكي شو بتشوفي عليه بتخبريني فورا لانو هالولد اخرتي على ايدو

فرح : بعيد الشر عن قلبك ….الله يطولنا بعمرك و ما يحرمنا منك

سكرت الخط مع عمي انا و مدايقة كتير و دقيت لامي فورا

فرح : عرفتي عمي شو طلب مني ؟

ام فرح : اي عرفت حكاني و قلي

فرح : اي و شووو رايك انت ؟، كيف بدي اقعد معو لهادا ، اكل و اشرب و البس و اتحممم

ام فرح : اخ بس شو بدي احكي ما بعرف ..عمك طلب منا هالطلب مرة بهالعمر ..خجلت قلو لا

فرح : و انا خجلت قلو لاا بس امي ما واردة يقعد معي و اذا يعني ابن عمي

ام فرح : امي فترة بس و انت ما تعطيه وجه ابدا و التزمي بغرفتك

فرح : انا ما خايفة منو بس الناس و الجيران اذا سالت مين هيدا شو بدي قلن ؟

ام فرح : قليلن اخوكي

فرح : طيب …الله يمضي هالفترة على خير

سكرت الخط مع امي و التفتت على دراستي و العصر انرن جرس بيتي 7رنات ورا بعض و سمعت صوت تخبيط بالرجل قوي على الباب ، يا ربي … استعنا على الشقى …اجا شادي

الجزء التاني :

شادي : فروووحة ….وينك ….افتحي

فرح : يلا جاااي

شادي : بعدي بعدي ما شايف قدامي

فات هو و حامل كرتونة كتبو و مراجعو يلي هيك سمك الغبرة عليها لانو ما بيفتحا ابدا و حاطط غيتارو على ضهرو ،شلح الكرتونة و الغيتار على الصوفا ، و ركض على الشباك و فتح البرداية بهمجية ، انشرطت البرداية من دفاشتو و طلع بسباطو على الصوفا و فتح الشباك و طلع نص جسمو براتو و بلش يصفر

شادي : شبااااااب اطلعو اطلعو …الطابق الرابع

نزل من الصوفا و شافني عم اطلع و انا شبه مجلوطة على رجليه و على الصوفا و على البرداية يلي مزعا و على الكرتونة يلي شلفا على الصوفا

شادي : يييي ما انتبهت ، لاتواخذيني ….. هيدا البيت …اممم ماشي حالو ….وين غرفتي

فرح : على ايدك اليسار

شادي : …..اممم ماشي حالا ……بس لو كان فيا برندا و اطلالة ، و بدا شوية عفش ، بس اخر شقة كنت قاعد فيها كانت سوبر ديلوكس و اطلالة عالبحر

بعد 5دقايق وصلو رفقاتو التلاتة و بلشو يفوتو بشناتي تيابو لشادي ، شنتاية ورا شنتاية

فرح : شو هدول كلن؟

شادي : هدول تيابي

فرح : هدول تيابك الا جهاز عروس ؟

شادي : هههههههه لا جهاز عريس ..ليكي طابخة شي؟ ولله حمض قلبي من اكل الجاهز

فرح : اي ملوخية

شادي: ملوووووخية…شباب اليوم غداكن ملوخية شغل بنت العم ، (اطلع فيني و غمزني و حكى بصوت واطي ) بغدين على السريع و بقلعن فورا ،حرام لانو تعبو معي بجيبة الاغراض

فرح: بس ليش جايب كل اغراضك ؟يعني انت بدك تقعد فترة بس

شادي : لا ماجايبن كلن ، تركت قسم منن عند رفيقي

فرخ : ااااه …طيب انا فايتة سخنلكن الاكل معناتا

فتت على المطبخ و انا كل عشر عفاريت ينطو قدامي ، الله يصبرني على ما بلاني ، حطتلن الاكل و تغدوا و راحو و بقيت انا و شادي بالبيت ، انا فتت على غرفتي و هو قعد يرتب اغراضو ، بعد شوي اجا لعندي ،فتح الباب بسرعة بدون ما يدقو

شادي: فرح

فرح: شادي دق الباب قبل ما تفوت تاني مرة اذا بتريد

شادي : اه نسيت …راح من بالي

فرح: شو بدك ؟

شادي (خبط ايدو على جبينو): نسيتيني شو كنت بدي قول ….اه.اه تذكرت …ما عندك واي فاي بالبيت؟

فرح : ما عندي لا

شادي : اووف كيف بدي شيك هلأ على حسابي الفيس

فرح : ما عندي فكرة ، شيك على بياناتك

شادي: هيك خربان بيوت …معناتا رح اسعى بتركيب بوابة انترنت للبيت

فرح : لااا ما في داعي …انا ما بحاجتا و بعدين يعني ما حرزانة تتكلف عليها و انت فترة و رايح

شادي: ما بعرف ايمت بطلع من عندك بس اطمني انا ضيف كتيرررررر خفيف و ما رح تحسي بوجودي اطلاقا

فرح : اممم ليش صحي علقت مع صاحب الشقة يلي كنت مستاجرا ؟

شادي : ما تذكريني ..لك كانت بنتو نازلة على الدرج و انا طالع من بيتي ، اي كانت لابسة لبس بقول للواحد دخيل الله لطشني ، بنطلون و بلوزة ضيقين لدرجة بتحسي الدم واقف بعروقا و ما قادر يمشي على قد يا حرام ما مديقة على حالها

فرح: اي

شادي: قلتلا بس دخيل هالجسم اللبيس ولا بجية ابوا الحيط وراها ،سمعني شو حكيت و هجم علي يضربني و انا بكستو بعينو …..يعني سبب ما حرزان ابدا ليقلعني من الشقة

فرح : اذا متل ما عم تقول فعلا ما حرزاااان

شادي : ماشي ما رح لهيكي ، تصبحي على خير

فرح : و انت من اهلو

بعد ساعة سكرت كتابي و قمت على تختي لنام ، اول ما حطيت راسي على المخدة ، سمعت صوت من برا

شادي : احم احم …دن..دن ….دن….سهران و ناطر عينيكي …ناطر عينيكي ليطلو …قلبي دقاتو نار …

كان صوت شادي هو و عم يعزف على غيتارو و يغني كانو عامل حفلة براسي ، حطيت مخدتين لحتى ما اسمع الصوت و اقدر نام ،بس ما مشي الحال ، طلعت من الغرفة و رحت لعندو

فرح : بعدك فايق!

شادي : اي اقعدي سهري معي لسمعك عزفي و صوتي

فرح : لا سمعتن و انا بالتخت ، صوتك واصل لعندي

شادي: اي جد بعتذر يمكن ما عرفتي تنامي ،خلص بطلت اعزف ، بصير اعزف بالنهار

فرح: شادي ما تزعل مني و البيت بيتك يعني بس انا لانو بنام بكير لانو عندي دوام الصبح

شادي : لااا ولا يهمك …حقك

رجعت على غرفتي و نمت و فقت تاني يوم ، لقيت البيت فوضى كتير ، لبست و ضبيت كتبي لانزل على الدوام و انا طالعة من غرفتي ، طلع شادي بوجهي من غرفتو و كان عم يتاوب

شادي: صباح الخير

فرح : صباح النور

شادي : وين رايحة قبل الشحادة و بنتا

فرح : على الجامعة عندي دوام

شادي : ااه انت من جماعة مقاعد الصف الاول بالقاعة ، يلي بيقعدو و ببحلقو بالدكتور و بسجلو كل كلمة قالا حتى صوت عطستو

فرح: اي صح انا منن ، و انت من اي جماعة ؟

شادي : انا من الجماعة يلي فهمانة الحياة مزبوط و عارفة تعيش ، بروح على الجامعة مشوار بس لانبسط و غير جو

فرح: و ايمت بهالحالة بتتخرج ؟

شادي : كل شي لحال ،قبل الامتحانات بدرسلي كلمتين و بروح بجرب حظي ،على اساس يلي بيتخرج اول رح يفلح اكتر

فرح : طيب انا رايحة ،رح اتاخر

شادي: الله معك

الجزء التالت:

رحت على الجامعة و رجعت و لقيت البيت متل ما هو ،تياب يمين و شمال ،فتت على المطبخ لاطبخ بس طلع شادي بوجهي و رعبني

فرح:يييي …رعبتني …بعدك هون ….فكرتك نزلت على الجامعة

شادي : اي ليكني رايح …فرح اي اكتر ساعة رايحة لتيابي ساعة فرزاتشي ولا ساعة دولتشي اند غابانا؟

فرح: ليش ما الاتنين بيعطو نفس التوقيت؟

شادي : هههه طبعا

فرح: اي خلص البس اي وحدة و بعدين انا بعرف هيك تفاصيل بيهتمو فيا البنات اكتر من الشباب

شادي: صح و انا لانو البنات بيهتمو بهيك شي عم اهتم بهالشي

فرح: اممم يعني انت عم تهتم بماركة الساعة يلي لابسة بس كرمال تلفت نظر البنت

شادي: اي …..ليش انت ما بتهتمي بهيك تفصيلة؟

فرح :ههههههه ضحكتني بدي اترك الشب و اخلاقو و ذوقو و معاملتو وشكلو و روح اطلع على ماركة الساعة يلي لابسة ….شو هالتفاهة

شادي : امرك غريب ..كل البنات بحبو الشب الغني و يلي لابس اتقل لبس و راكب سيارة اخر موديل

فرح: ما تشمل الكل …هاي مظاهر بس و ما بتهمني و ما بقيم الشخص منا

شادي: طيب انا لازم روح اتاخرت

فرح: بس شو مشان هالفوضى!

شادي: ايه لارجع منحكي بهالموضوع

و راااح شادي و ما رجع للساعة 11بالليل ، سمعت صوت تشحيطة سيارتو بالحارة و الاغاني على اعلى صوت ،فات على البيت هو و عم يغني ،شغل التلفزيون على الصوت العالي

ميسسسسيي …..يلاااا يا ميسي يلا ميسسسي….. كووووول كوووول

طلعت من غرفتي انا و معصبة و عم احكي مع حالي يعني اذا ما عزف على غيتارو ،بشغل التلفزيون على الصوت العالي ، ما عندو احترام لغيروو، اول ما طلعت على الصالون شفتو لابس شورت بس ،اتفاجات بوقاحتو انو هيك قاعد بالبيت و كانو ساكن لحالو

فرح: شووو القصة ،فكرت ميسي عم يلعب عنا بالصالون

شادي:ههههه خلص هلأ بوطي الصوت

فتلت ضهري و بدي ارجع على غرفتي

شادي: ما انكدك

فرح: شو قلت؟

شادي: ما قلت شي

فرح : لا قلت ما انكدك

شادي: اييي قلت ما انكدك،لسا مبارح جيت و مبلشي تنظري علي ،ما بدك طلع ولا صوت بس لانك نايمة ،طب اذا انت بتنامي قبل الجاجة انا شو دخلني لحط حالي على الصامت

فرح: ولله انا بنام بكير لانو عندي دوام و جامعة و ما متلك ما بروح الا لبعد الضهر

شادي: ما دخلك فيني ايمت بروح

فرح: و انت ما دخلك فيني انا ايمت بنام

شادي: نامي ايمت ما بدك تنامي بس انا كمان بدي اتحرك بالبيت و اخد راحتي و هاي قعدة و بدي اتفرج على المباراة بصوت عالي

زت حالو على الصوفا و رفع صوت التلفزيون على العالي ،درت ضهري و رجعت على تختي و نمت بس تاني يوم فقت الصبح بكير و شغلت التلفزيون على اغاني فيروز على الصوت العالي و بالصدفة كانت طالعة اغنية انا وشادي و كل ما تقول فيروز رااااح شادي اعلي الصوت اكتر حتى يسمع و بعدين شغلت السيشوار سشورت شعري و بعدين الخلاط لاعمل كوكتيل ،طلع من غرفتو معصب وشعراتو منكوشين و عم يقاتل دبان وجهو ،طفى التلفزيون و رجع فات نام ،انا شغلتو و نزلت على الجامعة فورا ،بقينا على هالحالة اسبوع لاجا يوم و طلع من غرفتو و مسك السيشوار و خبطو بالحيط ونزل على الارض مية شقفة

شادي:كملي سيشوار لشوف هلأ

انا جمدت بارضي ،ما توقعت انو شادي يلي بضل يضحك و ينط و اخد كل شي مسخرة يطلع انسان عصبي كتير ،نزلت على الدوام و على الساعة 5بعتلو مسج

مسج فرح:انا رح نام اليوم عند رفيقتي ،لا تنسى تنزل قاطع سخان الحمام

مسج شادي: اليوم عيد عندي

انا خفت ارجع على البيت بعد ما عصب علي الصبح بس بعدين غيرت رايي و قلتلا لرفيقتي سوزان انا بدي ارجع نام بالبيت لانو خايفة يجيب رفقاتو على البيت و يقلب البيت مزبلة ،رجع على البيت و اول ما فتحت الباب ،شفت شادي مع بنت قاعدين بوضع رومانسي كتير ،وقفت على الباب ما عرفت حالي فوت الا اطلع لانتبه علي شادي

شادي:شو جابك ؟على اساس بدك تنامي عند رفيقتك

فرح: مسالخير…

كيفك (سلمت على الصبية و بعدين التفتت لعندو)غيرت رايي اخي و هيدا بيتي ايمت ما بدي برجعلو

ريما لشادي:ما عرفتني عليا

شادي: هاي فرح …بتكون اختي

فتت على غرفتي و نادتلو لشادي ، اجا و بلشت اعلق معو

فرح:شو هالمسخرة يلي برا …..فاتحلي البيت ملقى للعشاق

شادي: انت قلت بدك تنامي عند رفيقتك

فرح : و حتى لو ما نمت برجع بشوف هالمنظر

شادي : راجعلك بس لاحطلا ل يلي برا

اعتذر منا و راحت و رجع على غرفتي،و فات بدون ما يدق الباب،كنت عم غير تيابي ،رجعت لورا تخبيت فورا ورا الخزانة

فرح:انت ايمت رح تصير دق الباب قبل ما تفوت

شادي:اي قفليه

فرح : ما الو قفل بدي جبلو دربيس من فوق

شادي: المهم تاني مرة اعطي خبر اذا غيرتي رايك

فرح: ولله هيدا الناقص ،ليك شادي اتحملت منك كتير و ما بقا قادرة اسكت ، الشي يلي شفتو هلأ كلو بدي انقلو لابوك و خليه يتصرف معك

ما شفتو غير مد ايدو و تناولني من ورا الخزانة

شادي: شوووو قلتي …عيدي عيدي ما سمعت

فرح:اي….. بدي قلو لعمي ،ما بس عن هالشغلة و شغلات كتير ،بتنزل من البيت و ما بتفكر تكب الزبالة بطريقك ، برجع بلاقيك اكل كل الطبخة بدون ما تتركلي حصتي و غير عزفك و صوتك النشاز اخر الليل ، انت شب مدلل زيادة عن اللزوم و مفكر حالك قاعد لحالك او ببيت اهلك انا هالشي ما بناسبني ابدا

شادي: اي و ما يناسبك و اصلا هالبيت ابي يلي دافع اجارو ما ابوكي

طلعت فيه و انصدمت من جوابو ،دمعو عيوني و بلشت ابكي

فرح:اممم فعلا مزبوط و انا تاركتلك هالبيت

مسكت شنتايتي و بلشت ضب بتيابي ،وقف ما عارف شو يعمل

شادي: خلص فرح انا بعتذر ……ما بعرف كيف طلع مني هالحكي

فرح: عم تهتني انو قاعدة بمال ابوك ، يا ريت تتشبه لابوك بس ، اطلع من هون حتى ضب اغراضي

شادي: خلص ولو …ما الك طلعة من هون

صار يقيم التياب من الشنتة و يرجعن للخزانة و انا ارجع قيمن من الخزانة للشنتة

فرح: خلص اتركن ….شو عم تعمل

شادي : ما الك طلعة من هون و رايح قفل باب البيت

راح قفل الباب ،وانا سكرت الشنتة و رحت على الباب لروح عند رفيقتي، وقف على الباب

شادي: ما …الك…طلعة ..من هون ما تعذبي حالك

فرح: بعد من طريقي

شادي: خلص قلتلك انا بعتذر ،مرقيلي اياها هالمرة ،هاتي راسك لبوسو

قرب علي ليبوسني من راسي

فرح: بعد عني …شبك جنيت …شو مفكرني رفيقك الا متل الشكيلة يلي كانت عندك

شادي: خلص قعدي خلينا نتفاهم و شو بدك انا جاهز اعمل

الجزء الرابع:

اطلعت فيه و شفقت عليه لانو خايف يوصل هالشي يلي صار لعمي لانو عمي عاطيه اخر انذار و الا بدو يسحبو من الجامعة و يرجعو على الشغل

فرح: طيب …رح مرقلك اياه هالمرة بس اسمع لازم نحط النقط على الحروف و كل واحد يعرف شو واجباتو بهالبيت

شادي: طيب …ماشي …انا شو لازم اعمل يعني

فرح: هلأ بكتبلك اياهن على ورقة بس رجع تيابي لمحلن

فتت على غرفتي و ضبيت تيابي ، بلشت اكتبلو شو مهماتو اليومية لشادي بالبيت لانو وقت كان ساكن لحالو ما كان يعمل شي ابدا و كان يجيب شغالة كل ٣ايام تنظف و تجلي و تغسل ،خلصت كتابة الورقة و طلعت لعندو

فرح: تفضل …..هاي ورقة بقائمة الشغلات و الممنوعات يلي عليك

شادي: هههههههههه شو هادا هههههههه موضوع تعبير ،ارمي القمامة عند الساعة العاشرة صباحا ، ثم اذهب الى السوق لاحضار بعض الحاجيات و الخضراوات ….

فرح: عم تتمسخر علي …هات الورقة

سحبت الورقة من ايدو

شادي: امانة هاتي بدي كفيا ….ما بحياتي ضحكت هالضحك ….بالفصحى و حاطة فواصل و حركات كمان ….هاتيا

فرح: ما رح اعطيك اياها

ركض وراي لياخد الورقة مني و انا ركضت على غرفتي و جعلكت الورقة حتى ما يقرأها و يستلمني مسخرة و خبيتا ورا ضهري

فرح: خلص روح من هون ما رح اعطيك اياه …ما اغلظك

شادي: لن اذهب من جحرك قبل انا اخذ هذا الفرمان منك يا بنت العم

فرح: الله لا يعلق حدا ب لسانك

قرب علي و خلصني الورقة و ركض على الصالون ،يقرا شوي فيا و يضحك

شادي: لاااا كل هالحكي كوم و توقيعك بالاخير كوم تاني ….ما اهبلك

فرح: ما تقول عني هبلة

شادي: طيب كلو مقبول بس انا ما بعرف اشتري خضراوات هههه

فرح: ما بدها شطارة ،معك معك بتتعلم

بقي اسبوع ما يحكيني الا بالفصحى بس خلال الاسبوع التزم شوي بالشغلات يلي كتبتلو اياهن

خلال فترة اقامتو لشادي عندي ، كانت تحكيني امي و قلا انو شادي مجنني كتير بسلوكه بس بعدين قلتلا انو صار احسن من قبل بشوي بس وقت كان عمي يتصل فيني كنت قلو انو شادي منيح و ما في منو حتى ما ادايقو و خليه يحمل عليه ،و انا كنت كل يوم قبل ما انزل على الجامعة ،افتح باب غرفتو و مد راسي و قلو

فرح: شادي لا تنسى تنزل الزبالة بس تفيق

شادي: الناس بتقول صباح الخير بالاول قبل ما تجيب سيرة الزبالة

فرح: طيب صباح الخير ، شادي لاتنسى تنزل الزبالة بس تفيق

شادي: روحي …روحي على دوامك خلي الجامعة تنفعك

المشاكل مع شادي ما خلصت ابدا و مرة كنا قاعدين نهار الجمعة مع بعض، هو عم يعزف و انا عم مسح غبرة البيت

فرح: شادي اليوم ما نزلت الزبالة

شادي: يالله …خربتيلي مزاجي هلأ …كيف بدي ركز هلأ بهالمعزوفة

فرح: قوم قوم …طالعة ريحتا

شادي: بعد شوي

فرح : لا قوم هلا اذا بتريد

شادي: اوووف بهالبيت الواحد ما بيعرف يعيش مرتاح

فات على المطبخ هو و معصب و اخد الكيس و نزل و بعد دقيقتين بس رجع ،فتحتلو و انا شفت منظرو و بلشت اضحك

فرح: ههههه شو هيك صاير معك

شادي : شو صاير معي؟؟انخزق كيس الزبالة و وقع على كل تيابي

فرح: ييييي يلي بشوف شكلك بفكرك حاضنو لكيس الزبالة هههه

شادي: بعدي هيك ما ناقص مسخرتك

فرح : وين راااايح

شادي : فايت اتحمم

فرح: روح اشطف الدرج و لم الكيس هلا الجيران بطلعو بعلقو معنا بعدين ارجع اتحمم

شادي: يييييي بقا ، رايح رايح ،شو هالعيشة معك شقاء بشقاء

نزل شادي يشطف الدرج و هو عم يشطف نزلتلو سطل مي

فرح: يعطيكي العافية خالتي شادية اشطر شطافة ادراج بالحارة كلها ههههه

شادي: انا شطافة ادراج !!

مسك سطل المي و زتو علي ، فرح: يووووو ما اغلظك …كل تيابي صارو مي …ما بينمزح معك

شادي: لكن انا شادية …اطلعي على البيت ما بدي نعلق هون و تسمع الجيران اصواتنا

فرح: طالعة بس انا بفرجيك يا شادي انا مزحت معك بالكلام بس

طلع شادي على البيت و هو معصب و قرفان من ريحتو و فات على الحمام فورا تحمم و طلع ، مريت من جنبو

فرح: يييي…شادي . ..لسا ريحتك زبالة …قصدي يعني لسا معلقة فيك الريحة

شادي: عنجد …يالله ..راجع اتحمم

رجع تحمم و طلع

شادي: تعي شميني هلأ

فرح: اخف من قبل

شادي:يعني لسا شامة ريحة

فرح: اي اي شوي …ارجع فوت تحمم مرة تانية

شادي : فايت فايت …كلو منك لو حاطة الزبالة بكيس سميك ما كان صار هيك

فات على الحمام و انا قعدت اضحك عليه لانو كذبت عليه ردا على سطل المي يلي زتو علي ، طلع من الحمام و شافني عم ركب دربيس لباب غرفتي

شادي: اتركيه هلا انا بجي بركبو عنك

فرح: ما في داعي انا بعرف ركبو لحالي

قعدت نص ساعة و انا عم حاول بس دق المسمار بقلب الباب و شي يوقع من ايدي و شي اضرب اصبعي بالغلط و شادي قاعد على الصوفا قبالي و عم يعزف على غيتارو و يطلع فيني شوي و يضحك

فرح : شادي قوم ركبو عني

شادي : على اساس ما في داعي و عاملة حالك ست المعلمين

فرح: ما توقعت الموضوع يكون معقد لهل الدرجة ،هلأ شو بدك تركبو الا لا

شادي: هاتي …..بعدي من هون …هاي الشغلات للرجال بس ..بتخلق معو

فرح: ولله ..هاي الشغلات مكتسبة

شادي: لا ما مكتسبة ،في كتير شغلات بتجي من فطرة الرجال لانو الله خلق جسمو و بنيتو غير بنية المرة و لو بقيتي ساعة ما كنت رح تعرفي تركبيه

فرح: ما عم اعرفك انت و مثقف

شادي :اي تماما كيف النكد من فطرة المرة ،القوة و العزم من فطرة الرجال ؟

فرح: النكد من فطرة المرة !!

شادي: اي ، بعمرك شفتي مرة ما نكدة ؟ هلا ما تنطي و تقليلي انا ما نكدة

فرح: اي انا ما نكدة

شادي: و لك انت اخدة نكد نص بنات كوكب الارض و على شو اسمك فرح ما بعرف

فرح: هلا هادا يلي طلع معك ، اذا انا نكدة انت شو ، انت اصنص نكد لك انت….

شادي: خلصت …شوفيه اذا منيح هيك

فرح: اي منيح يسلم ايديك

الجزء الخامس:

اكتر يوم كنا نعلق فيه مع بعض و تسمع الجيران اصواتنا هو يوم الجمعة لانو عطلة و معظم النهار بوجه بعض ،كنت قاعدة عم لف ورق عنب بالصالون و هو واقف على المراية و عم يستعرض عضلات بطنو و ايديه

شادي: ليكي فرح شو رايك بعضلاتي …برايك لازم العب حديد لسا ولا خلص حاجة؟

فرح: ما بعرف هالشي بيرجع الك اذا ما حبيت تلعب حديد العب نحاس

شادي : هع هع هع نكتي على اساس

فرح: تعا استعرضلي عضلاتك ب لف ورق العنب بلكي بخلص بسرعة

شادي: هيدا الناقص ولله

فرح: اي وين المشكلة ؟ ما رح اكل الطنجرة لحالي هلا انت بتاكل كل 5 ورقات ب لقمة وحدة

شادي: شو عم تعديلي لقماتي !

فرح: لا ما قصدت هيك بس انكسر ضهري

شادي: ما حدا قلك لفي ورق عنب قلتلك مشي ناكل بيتزا بس انت عاملة فيا ست بيت

فرح: طيب معناتا روح كول بيتزا هلأ لحالك و بس حط الغدا ما تقرب

شادي : اي ما رح قرب ،اصلا كل طبخك من أفى ايدك

فرح: ماشي خليك على كلمتك

شادي: فرح …ليكي اطلعي شوي ….ال six pack abs واضحين عندي

فرح: واضحين كتير متل عين الشمس ,روح البس و اتستر بقا ،عنجد ما ضل هيك بالبيت يعني احترم انو بنت عمك قاعدة معك

شادي: اها اها قولي قولي

فرح: شو بدي قول

شادي: قولي انو جسمي مغري

فرح: ههههههه مغري هههههه يا لطيف ما قادرة اطلع اكتر عليك عم انغري فيك …. ارحمني دخيل الله من ثقتك الزايدة

شادي : خلص رح البس و ارحمك شايفك عم دوبي قدامي

فتت طبخت ورق العنب و تغديت و فتت على غرفتي لادرس بعد شوي طلعت على المطبخ لاعمل كاسة شاي،شفت شادي واقف فوق طنجرة الورق و عم ياكل ورقة ورا ورقة بسرعة

فرح: كمشتك

شادي: الله ياخدك رعبتيني

فرح: شو عم تعمل ؟

شادي(بلع االاكل يلي بتمو): عم دوقن بس ،اذا ناقصن ملح او حامض بس لا تمام يعني

فرح: بعد هيك ….ما في تاكل ….انا طبخي من افى ايدي

شادي: لك كنت عم امزح معك ..هاتي الطنجرة لهون

فرح: ما رح طعميك منها

هو يمسك الطنجرة من جهة و انا جهة

شادي : خلص اتركيا …ما ابخلك….لك انا ابن عمك….عيب عليكي

فرح: ما رح تاكل منا

شادي: فرررح ….انتبهي ……صرصور وراكي

تركت الطنجرة و نطيت برا المطبخ و اطلعت على الارض ما لقيت شي

فرح : وينو

شادي :فات تحت البراد ….

فرح: كذاب ما في صرصور

شادي (و هو عم ياكل ورق): طيب ماشي متل ما بدك كنت مفكر اقتلك اياه بس هلا غيرت رايي و بس شوفك نايمة بدي احملو من شواربو و حطو على وجهك خليه يدبك دلعونة و يعمل سيران على ملامحك

فرح: يييع مقرف و كذاب كمان

شادي (متابع اكل): ما تصدقي ايه بس انا بتوقع انو هو ما لحالو بهالبيت اكيد العائلة الكريمة معو و هلأ بتشوفين يمكن تحت البراد عاقدين اجتماع سري كيف بدن يقضو عليكي

فرح: شو قصدك يعني الصرصور مفرخ هون

شادي: طبعا بتعرفي انو الصرصورة ما بتحتاج غير مرة وحدة للصرصور بحياتا و بتقضي طول حياتا عم تحبل و تخلف منو

فرح: هههههههه تحبل و تخلف شبك لسا شوي تانية رح تعملي الصرصور ابن عالم و ناس و دارس و متعلم

شادي : كل شي وارد …..دايمة على الورق كتير طيبين بس حدا قلك قبلي انك وحدة على نياتك و بينضحك عليكي بكلمتين

فرح: شو قصدك يعني ما في صرصور

شادي: انو ما ملاحظة اني اكلتلك طنجرة الورق انا و عم سايرك بحكي فاضي

فرح : ما افجعك

شادي: ما اهبلك

فرح: تعا ما تروح بدك تركب لمبة الحمام ،انحرقت مبارح القديمة

شادي:هلأ انت ما بتلاحظي انك كل نهار جمعة ما بتحبي تشوفيني قاعد و مرتاح و عاملتيني كهربجي و شطاف ادراج و مسلك بلاليع و نجار …كيف كنت مدبرة حالك قبلي ؟

فرح: طيب ماشي هلأ رح فرجيك كيف كنت مدبرة حالي قبلك

شادي: اي فرجيني

طلعت من البيت و دقيت على باب جيرانا يلي ساكنين تحتنا و طلبت من ابنن فادي يجي يركبلي اللمبة و الشب اصغر مني بسنتين بس طولو و عرضو بيعطي عمر اكبر بكتير

فرح:تفضل فادي ….على الحمام الله يخليك

وقف شادي بارضو ،مسكني من ايدي و سحبني

شادي: مين هادا البغل يلي مفوتيه لهون …كانو انا ما معبي عينك

فرح: ايييه اتركني….ما تقول عنو بغل عيب عليك ….مو انت قلتلي كيف كنت مدبرة حالك من قبل

شادي: اي و هيك انشالله كنت مدبرة حالك من قبل… الله لا يعطيكي شطارة

فات عند الشب و قلو

شادي: خيا يعطيك العافية انا بكفي عنك

طلع الشب من البيت و وصلتو على الباب و رجعت لعند شادي

شادي: وليه فرح انت في بعقلك شي ….ترى انا كنت شاكك و هلا اتاكدت …كيف بتفوتي شاب غريب لعندك على البيت وانت لحالك ما بتخافي يعملك شي

فرح : الشب محترم و مؤدب

شادي: محترم و مؤدب!اوعى تفكري تعيديا و انا ما موجود بالبيت

فرح: طيب ما انت عملتلي محاضرة على هاللمبة

شادي: ايييييييه حكينا كلمتين بس ما دققي علين ،شغلي من عندك لشوف اذا اشتغلت

فرح: اي تمام ميرسي

شادي: اخ يا شادي وين كنت و وين صرت….الدنيا دوارة

فرح: اي انتبه دوخ و هي عم دور هههه

شادي: انت احسن شي بتعمليه انك ضلك بغرفتك وحاطة راسك بين الكتب،بترتاحي و بتريحي

الجزء السادس:

انا و شادي كانت علاقتنا عم تتحسن و تتحول لصداقة نوعا ما بس المجاكرات و التحديات كانت مستمرة و رغم انو كان شادي عصبي و طايش بس كان انسان قلبو طيب كتير و حنون ، رجعت من دوامي على البيت و كانت الدنيا عم تمطر كتير و في مشي ربع ساعة من موقف الباص للبيت ،وصلت على البيت و كل تيابي مي و بردانة كتير ،فتت على البيت و شفت شادي عم يشرب كابتشينو و عم يدرس لاول مرة

شادي: يااا ليش هيك منظرك

فرح: يعني ما شايف اديش الشمس قوية برا

شادي: غيري تيابك فورا هلا بتمرضي

غيرت تيابي و جيت ركض قعدت على الارض قبال الصوبيا

فرح : اتشم …اتشم

شادي: اعطسي لهديك الجهة هلا بتعديني

فرح: بعطس بالاتجاه يلي بدي اياه

شادي: هلأ انت بس بدك تعاندي و تعارضي

فرح: شو عم تدرس …اول ما فتت على البيت و شفتك عم تدرس فكرت حالي مخربطة بالبيت

شادي: اي قربت الامتحانات

فرح: يااا برد كتير انا فايتة اطمر حالي بفرشتي

شادي: الله معك

فتت على غرفتي و نمت بعد ساعة مر شادي من جنب باب غرفتي

شادي : فررررح ….كيف صرتي …مت الا لسا؟ ….فرح …فرررح …شبك

فرح : ما بعرف حاسة جسمي مرخي كتيررر و حرارتي طالعة شكلي رح امرض

حط ايدو على جبيني

شادي: لا انت مرضتي و خلصتي …سلامتك،رح روح اعملك كاسة زهورات و كمدات مي و انزل على الصيدلية جبلك دوا للكريب

بقيت سخنانة هديك الليلة و تفاجات بالجانب الانساني بشخصية شادي يلي ما تركني ابدا و بقي جنبي سهران طول الليل حتى فقت تاني يوم الصبح و شفتو نايم جنبي

فرح: شادي ….قوم…قيم ايدك عني …شادي ..فيق ..ليش نايم هون

شادي: ايه ايه ..اتركيني بس شوي ..نعسان لسا

فرح: طيب

قمت من التخت احسن بشوي من مبارح ،شربت كاسة زهورات و فتت نمت بغرفتو و بعد 3ساعات فاق و اجا على غرفتو

شادي: فرح ..كيف صرتي؟ …ليش نايمة هون؟

فرح: اي احسن لحمدلله بس ما رح انزل على الدوام

شادي: انت بس هيدا يلي اخد عقلك الدوام

حكيت رفيقتي نور و قلتلا تمر عندي بعد الدوام و تجبلي شو اخدو لانو كان في محاضرة مهمة ، اجت نور و فتحلا الباب شادي و فاتت مسطلة فيه

شادي: اهلين …فرح بغرفتا

فاتت لعندي و قبل ما تسالني كيف صرت او شو صاير معي

نور: ولييه مين هيدا؟

فرح: هادا اخي

نور : بس انت ما قلتي انو عندك اخ

فرح: اي هيدا من ام تانية

نور : ايوا ..بيشل شللان

فرح: وليه اساليني كيف صرت ..

نور: يييه ولله نسيت، شو عمرو؟

فرح: لك خلص بقا قيميه من راسك لانو مرتبط و بحب وحدة كتير

نور : يقطع حظك يا نور

فات بعد شوي شادي لعنا و جايب فنجان قهوة لنور ، نور يلي اخدت فنجان القهوة هي و عم تطلع فيه ،قعدت ساعتين عندي و نص وقتا كانت عم تسالني عن شادي و سيرتو الذاتية وعن البنت يلي بحبا ، بعد ما راحت نور رجعت نمت ساعتين و فقت المسا و رحت على غرفة القعدة

فرح::ليش مطفي كهارب البيت كلا شو القصة؟ عم تقنن؟

شادي: لااا عم اعمل جو رح يطلع فيلم رعب بعد شوي تعي حضريه معي الا بتخافي من الرعب ؟

فرح: لا ما بخاف شكلك انت يلي بتخاف حتى عم تعزمني احضرو معك

شادي: ههههه الحق علي يلي وجبتك

فرح: انا بحب الرومانس اكتر

شادي: اها اها روماااااانس …شكلك بتحبي حدا …قولي مين هو

فرح: ما خصك

شادي: عادي احكي انا رجال اوبن مايند

فرح: ما حب ..فيك تقول اعجاب

شادي: امم معجبة فيني يعني ،احكي ما تخجلي

فرح: ما اخف دمك لا طبعا بشب معي بالكلية

شادي: اممم…شو مميزاتو ؟شو عندو ؟

فرح: ما عندو شي بس بيعجبني ك شب ،شاطر كتير و ما بفوت محاضرة و بنفس الوقت بيشتغل بكافتريا بعد االدوام ،انسان مسؤول و معتمد على حالو بكل شي

شادي: ولله …اي تتهنو ببعض

فرح: ما منحكي مع بعض الا بالدراسة بس

شادي: اكيد بعرف بدون ما تقليلي ،يعني اتنين متلكن شو بدن يحكو الا بالدراسة ،هاي قمة الرومانسية عنكن

فرح : لا هيك شاب بيعرف شو هي الرومانسية و كل شي بيعطيه حقو

شادي: شو عرفك بقا ؟شو شفتي من رومانسيتو؟

فرح: مرة عارني كتاب و قلي خليه عندك قد ما بدك

شادي: خخخخخخخخ موتيني من الضحك ،يالله شو رومانسي ،روميو العادة،لك يا هبلة هاي ما رومانسية

فرح: لكن شو هي الرومانسية ؟

شادي: الرومانسية انو يصبحك بوردة و يمسيكي بوردة و يسمعك غزل و يكتب فيكي شعر و يخاف عليكي من الهوا الطاير و يهتم فيكي

فرح: ايي ما هو كان حاططلي وردة بقلب الكتاب

شادي: ايوااا

فرح: بس انا هيك شي ما بهمني ،يعني الورد ما بيقطع بعقلي و علبة شوكلا نوتيلا او سندويشة شاورما مع دبل كريم توم و بيبسي عندي اياها بتعبي االراس اكتر من بوكيه ورد

شادي:هاي بتعبي البطن ما بقا دخلو الراس بالموضوع بس العمى اذا هالحكي صحيح ،انشالله انتو كل البنات هيك بتفكرو

فرح: طبعا بس نحن ما منحب نخجلكن و نقلكن هالشي حتى ما تاخدو عنا صورة ما مزبوطة و ما يخرب برستيجنا

شادي: يا ضيعان مصاريك يا شادي يلي كبيتن على الورد

فرح: الله لا يردك شكلك كبيت كتير

شادي: كتير و بس، بفتح حديقة فين

فرح: متل ما عم قلك هلا على الرايحة و الجاية خدلا شوكلا و شاورما و نقرشات و رح تحبك اكتر و ما بقا تقدر تستغنى عنك

شادي: بتصير دبة على هالحالة

فرح: لاااااا ما تخاف لانك انت وقت بتنكد عليها بتحرقلا كل هالسعرات الحرارية

شادي: امممم بحكيك وجهة نظر لازم اتعاقد معناتا مع محل شاورما و محل شوكلا بالجملة

فرح: اي تعاقد بس انا ما لازم يطلعلي شي من هالمعلومات السرية و الخطيرة يلي اعطيتك اياها

شادي : لا ما بطلعلك شي ،اضوي من هون بلش فيلم الرعب

فرح: طيب بس ما تفيقني بالليل و تقلي خايف

شادي:وحدة متلك بتخاف، انا رجال

فرح: ايه طيب ..تصبح على خير

شادي: و انت من عيلتو

فتت على غرفتي و ضل شادي بالصالون ،حاطط جاط البوشار بحضنو و مركز عيونو على الفيلم ، رجعت على الصالون زحف و لفيت ورا الصوفا يلي قاعد عليها و طلعت فجاة من وراه و قلتلو بببع ، ارتعب و قام متل المجنون و كب جاط البوشار على الارض و صار يحكي بالعبري

فرح: هههههههههه انا رجال انا ما بخاف

شادي: ماشي يا فرح ولله لردلك اياها

فرح: هلا تصبح على خير دير بالك ام كحلة سايحة تطلعلك من الشاشة

الجزء السابع:

فرح: شادي …شادي ..قوم …فيق

شادي: اتركيني كمل نومتي حتى على النوم لاحقتيني

فرح: الله يخليك قوم شفت ابو بريص بغرفتي

شادي: ابو بريص! شو دخلو لغرفتك

فرح: شو بعرفني..قوم قتلو

شادي: خلص اتركيه للزلمة بحالو بكون عم يدور على مرتو ام بريص و ابنو بريص

فرح: لك قوم بلا غلاظتك …ما بقدر نام قبل ما تقتلو

شادي:اخ بس منك …قايم ..قايم ….وين شفتيه ؟

فرح: كنت عم ادرس و لمحتو على هيدا الحيط …ما بعرف وين اختفى

شادي : ما في شي لا ورا الخزانة و لا ورا التخت ..بجوز متهيألك من قلة النوم روحي نامي

فرح: مستحيل اقدر نام بخاف يهجم علي انا و نايمة

شادي:يهجم !!شو قلب وحش و بعدين بدو يترك كل البيت بحيطانو و بسقفو و يجي عندك و يهجم عليكي ،اذا خايفة كل هالقد تعي نامي جنبي بغرفتي

فرح: بالله شو …دور عليه منيح بتلاقيه

شادي: دورت …ما شفت شي …انا راجع كفي نومتي

فرح: اذا بتريد ولو قلتلك ما بقدر نام

شادي : روحي نامي بغرفة القعدة

فرح : لاا بخاف يكون طلع من غرفتي على غرفة القعدة وقت ناديتلك …ما بقدر نام قبل ما شوف جثتو قدام عيني

شادي: شو بعملك يعني انت تنامي و انا بضل سهران لاحرسك من ابو بريص ،بلا صغر عقل شو بدو يعملك ،ما رح ياكلك تصبحي على خير

فرح: طيب خلص بنام بغرفتك انا بنام على التخت و انت بتنام على الارض

شادي : طيب مشي قدامي انا لا بالنهار و لا بالليل بخلص منك بس اخ منو لعمك يلي لهلأ ما لقالي بيت

فرح: ما بقا مطول انشالله

فتت نمت انا علىتخت و هو على الارض و الصبح فاق شادي قبلي و مرق ريشة القلم على وجهي ،حطيت ايدي على وجهي و فكرتا دبانة ،رجع عاد نفس الحركة و صرخ

شادي: فرح …ابو بريص على وجهك

انا سمعت كلمة ابو بريص بس و قمت من التخت متل المجنونة انا و عم ارقص هوبا كمبا ستايل، اطلعت على شادي شفتو عم يضحك على شكلي

شادي: هههههه هاي رد على حركة مبارح ، انا ما بينلعب معي….يلا زعلت هلأ

رجعت على غرفتي انا و عم ابكي ،فتت و قفلت الباب وراي،لحقني بعد شوي

شادي: فروحة ….فريحة …افتحي الباب …شبك ولو زعلتي …يعني انت تمزحي معي و انا ما امزح …افتحي الباب خلص انا بعتذر …فروحة ….يعني خلص ما رح تفتحي الباب …

فرح: روح من هون ما رح افتحو

شادي: طيب بس بدي قلك شغلة انو ابو بريص بعدو جوا هههههه

فتحت الباب بسرعة و ضربت فيه ،لفني فورا و كانو اجتو فرصة

فرح: هاااي شبك بعد عني

شادي : انت يلي ضربتي فيني و فكرتك خايفة قلت اعطيا يا ابو الشاد جرعة حنان

فرح:بالله اي فوت فوت قتلو و اذا ما قتلتو رح انقل اغراضي على غرفتك

شادي:لا دخيل الله انا يا دوب واسعتني

….بعدي هيك ….ما في غير بعمل خير معك و بكب بهالبحر

بعد ربع ساعة ،ناداني شادي

شادي: فرح تعي شوفيه

فرح: ما بدي بقرف ..امسكو بورقة و كبو

شادي:ليكي ما احلاه

فرح: اووف روح كبو بقى شو هالقرف ….ليك شادي شو رايك بما انو اليوم جمعة و الطقس حلو و قاعدين بوجه بعض نعمل حفلة باربكيو على البرندا

شادي: حفلة باربكيو على البرندا يلي مترين بمتر

فرح: اي قول ما بتعرف تشوي

شادي: انا …..بالعكس انا يلي بعرف اشوي

فرح: معناتا رح البس كرمال نروح على المول منجيب شيش و اغراض السلطة و شوية اغراض للبيت

شادي : اي منروح بعد ما نفطر

فطرنا و نزلنا على المول

شادي: سبقيني رح جيب السلة

بعد شوي اجا من بعيد و اشرلي بايدو انو اجي لعندو

فرح: كنت بدي اشتري خضرة ليش جبتني لهون ،هيدا قسم المنظفات

شادي: كنت بدي فرجيكي شغلة بحياتك ما شفتيا

فرح: شو هاي ؟

حملني و حطني بالسلة و ركض فيني

فرح: شادي ….وقف ….

شادي: هههههههه

فرح: شادي ….لك نزلني …شوف الناس كيف عم تطلع فينا

شادي: ههههه ما رح وقف

فرح: لك انتبه رح..تفوتني برفوف الشامبو

فاتت السلة برفوف الشامبو ووقعو علي علب الشامبو و اجا الشاب يلي بيشتغل بالمول و شاف الفوضى يلي عملناها، عصب علينا و قلنا روحو العبو برا ، طلعنا من المول نحن و عم نضحك

فرح: كلو منك هاي اول مرة بتقلع من محل

شادي : لسا اذا بضلي معي ما رح تلاقي محل يستقبلك هههه…مشي نروح نشتري الاغراض من سوق الخضرة احسن شي

رحنا على السوق و اشترينا اغراض الشوي و رجعنا على البيت ، انا فتت اعمل السلطة و شادي استعار منقل الشوي من عند جيرانا و بلش يشغل الفحم بالبرندة

فرح: اكيد بتعرف تشوي ؟

شادي : اكيد هلأ شوفي كيف بدك ترجعي تلاقين مجمرين

فرح: طيب انا فايتة شك الشيش بالسياخ

فتت على المطبخ و بعد ربع ساعة رجعت لعند شادي لشوف وين وصل بالشوي

فرح: شادي …شو هدول الاوراق يلي بايدك

شادي: ما بعرف جبتن من غرفتك حتى شعل فين

فرح: شادي يخرب بيتك هدول محاضراتي …قاعد عم تحرقن ….قلتلي بتعرف تشوي لكن

شادي: روحي من هون و ما تعميلي على قلبي احسن ما اشويكي محل الشيش ،بتطلعي اكلة غير شكل

مشيت حفلة الشوي بعد مية مشكلة عن السلطة ليش حامضة و عن الشيش ليش محروق ، تاني يوم الصبح نزلت على الجامعة لجيب برنامج امتحاني و انا راجعة على البيت ،شافني شب على الطريق و لحقني و صار يلطشني لوصلت على باب البناية و بنزلة شادي شافو عم يدايقني ، هجم عليه و بلش يضربو و التمت كل الناس علينا و انا حاولت بعد شادي عن الشب قبل ما يخلص عليه ، بس اجت الشرطة و اخدت الاتنين سوا، انا خفت كتير و ما عرفت شو اعمل،اتصلت بعمي انا و عم ابكي و قلتلو انو شادي اخدتو الشرطة و خايفة ينحبس و ينام بالسجن ،قلي طيب ماشي هلأ بضب شنتايتي و بجي بس مسافة الطريق ، بعد 7ساعات وصل عمي و راح فورا على مركز الشرطة حتى يطلع شادي ،دقتلو كتير و ما رد و بعدين رد و قلي مشي الحال ليكنا جاين على الطريق ، نزلت اشتري قهوة قبل ما يوصل عمي،بس وقت رجعت و قبل ما حط المفتاح بالباب و افتحو،سمعت صوت شادي و ابوه عم يعلقو ،وقفت اسمعن شوي قبل ما فوت ….

الجزء التامن:

ابوشادي: منيح الشب اسقط حقو عنك و مشي الحال بغرامة مالية

شادي: و ما احلاه ما يسقط حقو ،انا يلي لازم احبسو و اشتكي عليه

ابوشادي: ليش حضرتك ما بتلطش على بنات ؟

شادي: كنت بلطش بس هلأ لا و بعدين بدك شوفو عم يلحقا و ضل ساكت

ابو شادي : ما ضل ساكت بس ما تعملو عاهة للشب

شادي: بيستاهل و لسا حسابو ما خلص

ابو شادي: يا رب صبرني على هالولد قوم ضب اغراضك

شادي:ليش؟

ابو شادي: بكرا الصبح بدي لاقيلك بيت

شادي: بس انا ما بدي اطلع من هون

ابوشادي: ليش انشالله؟

شادي: يعني يا ابي ما بصير فرح تنترك لحالا بضلا بنت و هديك المرة فوتت شاب يركبلا لمبة يعني بجوز تحتاج لشي بكون انا جنبا و بساعدا

ابوشادي: شادي ما تعبني كتير فوت ضب اغراضك ،بدي ريح بنت عمك منك و بتعرف انو قلي صاحب البيت انو اصواتكن على طول طالعة عم تعلقو مع بعض

شادي: انا ما زاعجا بقعدتي عندا ابدا و هلأ بس تجي اسالا

ابو شادي : من دون ما اسالا انا ابني و بعرفك

شادي: انا تغيرت انا ما بقا شادي الطايش و المستهتر و يلي ما بحمل مسؤولية شي

ابو شادي: و مين هيدا يلي طلعتو من السجن من شوي ؟

شادي: ليش ما عم تفهم علي ،انا بخاف عليا لفرح تبقى لحالا بلكي لا سمح الله حدا فات عليا و اذاها ،اذا من ابو بريص هديك المرة خافت تنام لحالا

ابو شادي: حنون مشالله ،بنت عمك قعدت سنة كاملة بهالبيت لحالا و ما صار عليا شي و انت ولا مرة فكرت تحكيا و تسالا شو لازمك

شادي: اي طيب معك حق بهالشغلة بس هيدا الحكي زمان و هلأ انا من الاخر ما رح اطلع من هون واذا طلعت بدك تلاقيلي شقة بنفس البناية او جنبا

ابوشادي: ما حرزانة و كلها شهر بتقدمو امتحانات و بترجعو لبيوتكن و بعدين اجاها عريس لفرح و بجوز تنخطب ،تصور يطلع الشب لهون و يسال عنا ،و يعرف انو قاعدة مع ابن عما ببيت لحالن،شو بدو يفكر عنا ،ما بدنا نقطع بنصيب البنت و نخرب سمعتا ؟

شادي: بدا تنخطب !!!!بلكي هي ما بدا تنخطب

ابوشادي: شادي يا بضب اغراضك لانقلك على بيت تاني يا اما بترجع معي و بتنسى الجامعة ،شو قررت؟

شادي:طيب طيب

بعد ما خلصو حديثن ،فتحت الباب و فتت ،قعدت شوي مع عمي و فتت لعند شادي على غرفتو و لقيتو عم يضب اغراضو بعصبية

فرح: لحمدلله على سلامتك

شادي:الله يسلمك ،وين كنت؟

فرح: كنت عم اشتري قهوة

شادي: فروحة انت مدايقة من قعدتي معك ؟

فرح:…لا

شادي: اي فوتي احكي هالحكي لعمك

فرح: ما بقدر لانو قرار ابوك هو الصح

شادي: طيب …ماشي ..متل ما بدكن …

ضب اغراضو شادي و تعشينا و انا فتت نام بغرفتي و عمي فات نام بغرفة شادي و شادي بقي بغرفة القعدة ،و بعد نص ليل سمعت حدا عم ينقر على باب غرفتي

فرح: مين

شادي(عم يهمس): انا شادي ..

فتحتلو الباب و فات فورا و سكر الباب وراه ،و حاول يقنعني بانو احكي مع ابوه و اقنعو انو يبقى عندي بس انا رفضت الفكرة تماما مع انو كنت مزعوجة من جوا انو شادي رح يترك البيت و يترك فراغ كبير بحياتي ،طلع من غرفتي هو و معصب و تاني يوم راح عمي و شادي ليوقعو عقد اجار البيت عن شهر و نص و بعدين اجا اخد اغراضو و راح ، بعد 3 ايام كنت سهرانة عم ادرس ،سمعت صوت حركة بالصالون ،و كانو في حدا معي بالبيت ،فكرت انو ممكن يكون شادي بس تذكرت فورا انو انا اخدت نسخة المفاتيح منو ،خفت كتير و قمت لشوف شو القصة ما شفت شي ،رجعت على غرفتي ،بعد شوي نزل قاطع الكهربا و صارت الدنيا ظلام ، خفت اكتر و ركضت على باب غرفتي و قفلت الباب و صرت صرخ مين هون؟؟، مسكت موبايلي و اتصلت بشادي و انا عم ابكي و خايفة و ما رد علي الا بعد 5محاولات لبعتلو مسج انو في حرامي عندي بالبيت

فرح: شادي تعا فورا هلأ هلأ في حدا عندي بالبيت

شادي: حدا عندك بالبيت؟ يلا ليكني جاي على الطريق ،قفل الباب عليكي و بس وصل انا رح اعطيكي خبر و اذا جنبك شي سكينة او اداة حادة امسكيا بايدك

بعد 5دقايق اجا شادي و دق على باب غرفتي ،و قلي فرح افتحي الباب انا جيت ،فتحتلو الباب و حضنتو

فورا انا و عم ابكي

فرح: امانة ما بقا تتركني لحالي

شادي: خلص رح صير نام عندك

بعد ربع ساعة و بعد ما هديت اعصابي ،بعدت عنو

فرح: صحي انت كيف فتت لهون؟ ،انا اخدت منك نسخة المفاتيح

شادي: انا عملت نسخة عنن قبل ما اعطيكي اياهن لانو خفت يصير معك شي

فرح:شااادي لتكون انت يلي فتت و خوفتني

شادي: هلأ هيدا يلي طلع معك ،معقول انا رعبك و خوفك و خليكي تبكي بس خلص انا رايح و يبقى وقت يصير معك شي ما دقيلي

فرح:طيب خلص

شادي: انا فايت اتفقد البيت و شوف مين فايت على البيت

فرح: ليش ما خبرت الشرطة انت و جاي؟

شادي: خفت يكون ما في شي و عم يتهيألك بس ،قلت بجي و بشوف انا بالاول

فرح:اممم

الجزء التاسع:

رجع نام عندي شادي بالليل اول فترة و بعدين صار يقضي الليل و النهار عندي، قدمنا امتحانات و رجعنا عند اهالينا ، بعد ما وصلت عند اهلي بيومين خبرتني امي انو متقدملي ابن رفيقو لعمي اسمو ماهر و ابن عيلة و ناس و بيشتغل مهندس و دخلو منيح و انو الشب عاجبو كتير لعمي و شايفو انو ما بينرفض ابدا ،وافقت انو شوفو و اقعد معو قبل ما اعطي ردي بالقبول او الرفض ، اجا الشب هو و اهلو و طلبني رسمي بوجود امي و عمي و مرة عمي ، نطرت كتير قبل ما اعطي الموافقة ، نطرت لشوف ردة فعل شادي يلي ما عاد شفتو او سمعت عنو شي و ما حبيت اسال عمي عنو حتى ما يفكرني مهتمة فيه كتير مع انو كان يتصل فيني كتير من قبل و يطلب يشوفني بس اختفى فجاة ،وافقت على ماهر و تحددت خطبتي بالصالة الذهبية بعد يومين ، بعد يومين رحت عند الكوافيرة لاعمل شعري و مكياجي ،كنت قاعدة بصالون التجميل انا و ما مرتاحة ابدا و كل عقلي بشادي و وين اختفى و ليش ما اعطى ردة فعل ،يمكن انا فهمت اهتمامو غلط فيني و فسرتو بانو حب ،بعد ما خلصت اتصلت بماهر و قلتلو يجي ياخدني على الصالة ،سكرت معو و فورا رن موبايلي

فرح: شادي

شادي: وينك انت؟

فرح: انا عند الكوافيرة ….الليلة خطبتي

شادي: بعرف هاتي العنوان فورا

فرح:ليش !جاي ماهر ياخدني

شادي: بلا ماهر بلا بطيخ هاتي العنوان عم قلك بدي احكي معك كلمتين بس

اعطيتو العنوان و بعد 5دقايق اجا ،سمعت صوت تشحيطة سيارتو ، طلعت و شفتو واقف مرتكي على سيارتو

فرح: شبك شو جابك هلا؟

فتح باب السيارة

شادي : اطلعي

فرح: شو جنيت لوين اطلع !عم قلك ماهر على الطريق جاي ياخدني

شادي : لسا بترجع بتقلي ماهر

انا و عم احكي معو ، اجا ماهر بسيارتو ،اطلعت على ماهر هو و عم يصف سيارتو و بعدين على شادي

فرح: هاي اجا ماهر

مسكني شادي من ايدي و فوتني على السيارة و سكر الباب و قفل السيارة و فتل لمحلو و طلع و مشي فورا ،اطلع علينا ماهر هو و مصدوم

فرح: شو عملت ؟ لوين اخدني …رجعني ..

ضل ساكت ، انتبهت على ايدو مجروحة و عم تنزف دم

فرح: شبا ايدك ، شو صاير معك ، احكي بقا

رن موبايلو و رد عليه

شادي: اي… صارت معي ….يبلطو البحر معازيمكن ….انت ما فيك تمنعني من شي انا بدي اياه ….ابن رفيقك صار احق مني فيا

سكر الخط فورا هو و معصب

فرح: مع مين كنت عم تحكي؟

شادي: مع عمك ….الو ٥ايام حابسني متل الكلب بغرفتي ، لو ما كسرت ازاز البرندا و طلعت منا ما بعرف لايمت كان ضل حابسني

فرح: عمي …ليش عمل هيك؟

رن موبايلي و المتصل كان عمي ، سحب شادي الموبايل من ايدي و طفاه و حطو تحت رجلو

فرح: وقف شوي …شادي …خلينا نفوت على شي صيدلية تلفلك ايدك

شادي: انا وقت سمعت انك رح تنخطبي جنيت و علقت مع ابي و قلتلو هالخطبة ما رح تم الا على جثتي ،قام حبسني بالغرفة متل التور الهايج و من شوي سمعت امي عم تقلا للخدامة انو اليوم رايحين يحضرو خطبة ،عرفت انو خطبتك …

فرح: ايييه شو يعني؟

شادي:يعني انا ما بدي اياكي تنخطبي لغيري …فرح انا بحبك و ما بتخيلك مع حدا تاني غيري

فرح: ….

شادي: شبك سكتي

فرح: هلأ جاي تحكي هالحكي ….لف و رجعني …هلا بتحط ابوك و امي بموقف محرج قدام المعازيم و قدام رفيقو لابوك

شادي: ما رح لف و ارجع و هو يلي حطكن بهالموقف ما انا ،انا قلتلو بدي اياها لهل البنت بس قلي البنت بتستاهل احسن منك و انت رح تعذبا معك و هاي امانة برقبتي امني ابوها عليها قبل ما يموت ….فرح انا ما بستاهلك شي؟

فرح: …..

شادي:شبك سكتي …انت ما بتحبيني ؟

فرح: طيب خلينا ننزل على الصيدلية هون و تشفلك ايدك و بعدين منحكي

شادي: خليكي هون انا رح انزل لحالي كرمال مكياجك و فستانك السهرة

نزل على الصيدلية ، و رجع بعد شوي

فرح: لوين هلأ ؟

شادي: ما بعرف رح نقطع وقت بالسيارة ،ليفهمو انو خلص ما في خطبة بقا

فرح: انت هيك عم تكبر المشكلة و تتحدى ابوك

شادي: قيمينا من هالسيرة .. انت طالعة كتير حلوة الليلة

فرح: ولله عيونك الحلوين

شادي: بتعرفي ما مصدق ايمت يرجع يبلش الفصل الدراسي الجديد بالجامعة حتى نرجع نسافر و نعيش ببيت واحد

فرح: مين قلك انو بدنا نرجع نعيش ببيت واحد ؟

شادي: انا عم قلك ،رح نكتب كتابنا قبل و هيك ما في الك حجية

فرح: ولله قررت من عندك

شادي: يعني على اساس انت عندك زعلة ،بعدين تعي لهون انت كيف بتوافقي على هيدا ماهر …فرح ..(وقف بالسيارة فجاة)….لتكوني ما بتحبيني ؟

فرح: ليش انت في حدا بيعرفك و ما بحبك بس انا وافقت بعد ما نطرت كتير عليك انو تعمل شي و وقت ما عملت فكرتك ما بتحبني و انا عم اتوهم

شادي: فرح انا ما بس بحبك انا بموت فيكي …نحن عشنا مع بعض 3شهور اكلنا و درسنا و ضحكنا مع بعض ،انت اول وحدة بحب شوفا اول ما فيق و اخر وحدة قبل ما نام ،احيانا بقعد بتذكر ايامنا سوا و بضحك لحالي ،ليكي حماتي عم تتصل فيني..

فرح: حماتك ههههه

شادي:الو ….اي مرة عمي ….هي معي …ههههه ماتخافي ما عملتلا شي …خدي حكيا

اخدت الموبايل من شادي و حكيت امي و خبرتني انو عمي علق مع رفيقو من ورا عملة شادي و تفشكلت الخطبة و انو عمي معصب كتير و متحلفلو لشادي ،قلتلا هلأ شوي تانية منرجع ،سكرت الخط مع امي

فرح: شادي نحن لازم نرجع

شادي: اي منرجع بس خلينا نرجع لعند اهلي بالاول و نقلو لابي انو نحن منحب بعض

رجعنا عند بيت عمي و طلعنا لعند عمي على المكتب ،كان قاعد معصب و عم يدخن ،اول ما شاف شادي قام من ورا مكتبو و ضربو كف و قلو

ابو شادي : فرح اختك بالرضاعة يا غبي

الجزء العاشر:

(فرح اختك بالرضاعة ) وقت سمع شادي هالجملة ،رجع خطوتين لورا و هو ما مصدق شو عم يسمع و بعدين طلع ركض من المكتب هو و عم يبكي و بدون حتى ما يطلع علي ، اما انا ما قدرت استوعب الصدمة ،وقفت على رجلي 5دقايق بس و بعدين وقعت على الارض و غبت عن الوعي و ما صحيت الا على عمي عم يكب علي مي باردة ،

فرح: شادي طلع اخي …ليش حطيتو بوجهي ٣شهور و خليتني حبو و هلأ عم تقول انو نحن اخوات بهالبساطة …ليش من الاول ما حكيت ؟

ابو شادي: فرح …انا بعتذر و ما كنت متوقع انك تحبيه ابدا …فرق شاسع بينو و بين ماهر ،قومي عمي فترة و بتعدي عليكي و بتنسيه و بترجعي اقوى من قبل

فرح: انساه !!اممم …ماشي انا بدي ارجع على البيت

ابوشادي: رح وصلك …اسبقيني ….قادرة تمشي لحالك

فرح: اي قادرة

نزلت انا و عمي و طلعنا بالسيارة و طول الطريق انا و ابكي و اتذكر ايامي مع شادي ،بعدين رن موبايلي و رديت فورا

الو …ايه….شووووو…باي مشفى ….طيب…طيب

ابو شادي: شو في؟ احكي؟

فرح: شادي …عمل حادث سيارة …بسرعة اطلع على مشفى الندى

ابو شادي: يا رب الطف فيه

طلعنا على المشفى انا و عمي و حكينا على الطريق امي و مرة عمي و خبرناهن حتى يلحقونا ، وصلنا على المشفى و سالنا عن الشب يلي فات من شوي و عامل حادث سيارة ،قلولنا فوق هوو ، طلعت و انا قلبي رح يوقف من الخوف عليه ،طلعنا فورا على الطابق التالت و شفنا الدكتور و سالنا عن شادي، قلنا شادي دخل بغيبوبة اثر الحادث يلي سببلو نزيف بالدماغ و هو حاليا بغرفة العناية الفائقة بس ما فيكن تفوتو عندو هلأ ،فيكن تشوفوه من ورا الازاز بس ، سالو عمي عن حالتو قلو حالة شادي ما فينا نقيما هلأ قبل ما يفيق من الغيبوبة و ادعو الله انو ما يطول بالغيبوبة لانو اذا تعدت فترة الاسبوعين او التلاتة احتمال يفيق و عندو مشاكل بالذاكرة و الكلام و يفقد حواس كتيرة

رحنا لنشوف شادي ،كان وجهو اصفر و اجهزة كتيرة موصولة بجسمو ، ضليت ابكي لتنفخو عيوني،اجت امي و مرة عمي ، و شافوه لشادي بهالمنظر و علقت مرة عمي مع عمي بالمشفى و صارت تقلو انت السبب ،اذا بصرلو شي شادي ما رح سامحك ،اجا الدكتور بعد شوي و قلنا بيقدر شخص واحد بس يفوت عندو بس لمدة ٥دقايق و يا ريت يحكي معو حكي بيرفع المعنويات لانو الفحوصات المبدئية عم تقول انو احتمال تكون غيبوبة سطحية و المريض بهالحالة بيسمع كل شي بس ما بيقدر يتجاوب مع الناس يلي حواليه ، اطلعنا ببعض مين بدو يفوت اول واحد عندو ، فاتت مرة عمي لانو الاولوية الها ، و طلعت بعد ٥دقايق ، ساعات و ايام كتيرة مرقت على غيبوبة شادي يلي ما اعطى اي تجاوب مع انو كنت فوت عندو و حكيه ، نزلت لجيب فنجان قهوة و وقت طلعت سمعت عمي و مرة عمي عم يعلقو مع بعض ،بقيت وافقة لاسمع حديثن

مرة عمي: كلو منك انت السبب اذا بصرلو شي بموت حالي

عمي: انا الا انت ؟ مين قال قلو انو فرح اختك بالرضاعة ؟ما كانت هاي فكرتك ؟

مرة عمي: اي فكرتي بس من الاساس ليش لتخليه يسكن عند بنت عمو ،ليش ما طلعت لعندو لقتلو بيت

ورجعت بنفس النهار بس انا بعرف ليش عملت هيك؟واضحة متل عين الشمس؟

عمي: قيمي هالافكار من راسك بقا ،هي يلي وصلتنا لهون ،المخلوقة كانت مرة اخوي يعني ما بحسا الا متل اختي و انا وقت بروح لعندا بروح كرمال اولاد اخوي يلي اخوي امني عليهن قبل ما يموت و لو بدي اياها كنت تزوجتا من زمان و نزلتا ضرة عليكي

مرة عمي: اي روح تزوجا شو ناطر الله يهنيكن ببعض بس طلقني قبل

عمي: اخ بس بحياتك ما رح تفهميني ..الغيرة عامية على قلبك ..انا ما متل كل الرجال …انا بحبك و ما ممكن اطلع على حدا غيرك يا مجنونة لك نسيتي شو عملت حتى تزوجتك و شوفي ابنك شادي طلع متلي واذا صرلو شي انا يلي ما رح سامحك و وقتا كل واحد يروح بطريقو

مرة عمي: اي هيدا انت يلي بدك اياه بدك طلقني حتى تتزوجا

عمي: بتعرفي انا قايم من جنبك احسن الشي لانو احتمال الحق ابني بالغرفة يلي جنبو بجلطة قلبية منك هيك بتكوني روحتي الاب و الابن ،و انشالله وقتا بتكوني ارتحتي و امنتي علينا

قام عمي من جنب مرة عمي لينزل على الكافتريا بس شافني واقفة مسمرة بارضي

ابو شادي: فرح …انت هون …انت من ايمت هون ؟

فرح: انا هون من الاول …لك انتو شو …انا مصدومة فيكن …ما بعرف شو بدي احكي …كذبتو كذبة وسخة علينا و ما حدا دفع تمنا الا هالشب يلي الو اسبوعين جوا ،هالشب بكون ابنكن كيف بتعملو فيه هيك

ابو شادي: فرح…نحن ما كنا متوقعين الامور توصل لهون ولله قلبنا انحرق عليه ،بس اذا قام من هالمصيبة وعد مني انو رح عوضكن و زوجكن باقرب وقت و بدون ما اسال على راي حدا

فرح: اذا قام ..

دمعو عيوني و رجعت نزلت على الكافتريا فورا و بقيت هنيك ساعة ابكي ،رجعت طلعت و طلبت من الممرضات انو بدي فوت حكي شادي لانو عندي حكي احتمال كتير يخليه يفيق من غيبوبته ، فتت عند شادي و قعدت قبالو على الكرسي و مسكت ايدو و حكتلو كل شي سمعتو ، و قلتلو انو بس تقوم رح نتزوج و ما رح نسال على حدا و رح نجيب اولاد صبي و بنت ،الصبي رح يكون بيشبهك كتير و البنت بتشبهني و رح نرجع نعيش بالبيت يلي انخلق فيه حبنا و رح نضل نتناقر متل توم و جيري ليصير عمرنا ٨٠سنة بس انت فيق يا شادي ،فتحي عيونك ناطرتنا ايام حلوة كتير لسا ،عم تسمعني ؟حرك ايدك بس اذا عم تسمعني ؟ليك انا عاطيتك مهلة اذا ما فقت هاليومين بدي روح انخطب لماهر ههههه ،رفع اصبعتو و اشرلي فيا لاااا ،طلعت من الغرفة انا و عم ابكي و صرخ …عمي ….شادي….فاق …..شادي اشرلي باصبعتو و فتح عيونو نادو الدكتور …..

قعدنا اسبوعين بالمشفى قبل ما يتحسن شادي على الاخير و يسترجع قوتو ،و الدكتور تفاجأ بالتحسن السريع و الملحوظ لشادي ،طلعنا من المشفى و بعد شهرين كتبنا كتابنا و عملنا عرس مع انو مرة عمي كانت قالبة وجها طول العرس و ما كانت حابة انو نتزوج ابدا لانو كان متهيألا انو في علاقة بين امي و عمي ، رجعنا على اللادئية لنكمل دراستنا و رجعنا للمناقرات انا وشادي

فرح: شادي قوم انشر الغسيل

شادي: حطيه هلأ بنشرو بالليل

فرح: هههه ليش حتى ما حدا يشوفك عم تنشرو بالنهار يعني و يقولو عنك تشتوش لمرتك …اطمن ما حدا بقول لانو الكل شايف انو مرتك بطنا قداما مترين

شادي: طيب متل ما بدك …انت شو فارقة معك انشر بالليل او بالنهار

فرح: فارقة طبعا بالنهار بينشف اسرع و لانو لازمني اكام قطعة للمشفى

شادي: لسا يومين لولادتك ،بلحقو ينشفو

فرح: اوووف قوم انشرن هلأ

شادي: ما قايم ،في شغل بايدي لازم خلصو للزلمة اليوم لانو بدي عطل و اقعد جنبك

فرح: هلأ بربك ما كنت نشرتن بهالوقت يلي عم تحكي فيه معي

شادي: ما قايم ما قايم

فرح: لا بدك تقوم ….اخ….ولي ولي …شااااادي

شادي: شبك

فرح: شادي بلش الطلق ….شادي طقت مية الراس …ولي ….

شادي: شو بدي اعمل هلأ

فرح: فوت جيب شنتة المشفى بسرعة …..ولللييي …رح ينزل الولد…اسرع يا شادي

نزلنا على المشفى انا و عم اطلق و صرخ ،فتت على غرفة الولادة و وقف شادي يعلق مع الممرضة بلانو بدو يفوت يحضر ولادتي ، بالاخير اجت الدكتورة و قلتلو فوت و هالشي لصالح مرتك ،فات لعندي شادي و مسكلي ايدي و انا اتوجع و عضلو ايدو

شادي: اخ فرح …ايدي …اكلتيلي ايدي

فرح: انت السبب انت السبب

شادي: انا قلتلك احبلي شي….

فرح: اول مرة و اخر مرة …ما بقا عيدا التوبة

شادي: شدي الهمة يلا … لسا بدنا نجيب بنوتة حلوة بتشبه اما و بدي سميا فريحة.

.

 

36 تعليقاً

  1. وين عايشين احنا قال بنت وشب يسكنو مع بعض بنفس الغرفه وتولد قصة حب هالاشي بولد مصيبه لاحول ولا قوة الا بالله لا دينا بيسمح ولا اخلاقنا ولا مجتمعنا بيرضى بهيك اشي

  2. القصة نوعا ما خيالية لأنو ما في وحدة وواحد بيكونو لحالهم بالبيت حتى لو ولاد عّم ، انا بحب قصصك كتير بس هاي القصة نص نص 🙂

اترك رداً على ام خالد💐💐 إلغاء الرد

لن يتم نشر عنوان بريدك الإلكتروني.