طريقة عمل جمبري مقلي بشهى كتير كتير
معكم صديقة زاكي صاحبة الوصفات الشهية و المميزة الشيف المتألقة Om Mohammad Mostafa
السلام عليكم يا احلي جروب 😘
دا كان غدانا الصراحه نفسي انزله من بدري بس قلة التفاعل خلت الواحد يتكسف ينزل حاجه واي سؤال انا تحت امركم
❤️❤️ جمبري مقلي ❤️❤️
بطريقه بسيطه جداً وصراحه كل ما حد يدوقه يسألني علي الطريقه
توم مدقوق مع كزبره بودر وكمون وفلفل اسود وشطه بودر حسب الرغبه وبسيط من بشر ليمون ناعم وعصرة ليمون بسيطه
وشويه من بهارات الكاري المخلوطة ( مجدي)
وملح
وال بيفرق معايا في الطعم ويخليه مميز صراحه بضيف بصله مبشوره
وبتبل الجمبري وبسيبه ساعه يرتاح في التلاجه وبعدين بقلبه في الدقيق واقليه
ولو عاوزه لونه يبقي جميل. انا بضيف للدقيق قليل من بودرة صفار الزعفران وبقلبها في الدقيق كويس قبل ما احط الجمبري فيه 👍🏻👍🏻
❤️❤️ سلطة البطاطس ❤️❤️
ملهاش مقادير وحسب زوقك انتي
بقشر البطاطس وبعملها أصابع سميكه واسلقها في ميه وملح ورشة بودرة الزعفران
اسيبها تستوي ٩٠٪
يعني ماسكه نفسها مش مهريه وف نفس الوقت مستويه
بقطعها مكعبات
وفي الهون أكون مجهزه التتبيله بتاعتها عشان لازم تكون البطاطس سخنه عشان تتشرب التتبيله كويس اعملها التتبيله والهون😅😅 معلشي انا بحب الحجات القديمه 😂😂
ادق توم مع شطه مجروشه مع كمون وفلفل اسود وكزبره بودر وملح ويقدونس مفروم ناعم ندقه مع التوم
وازود عليهم في نفس الهون😅 خل حسب الرغبه وعصير ليمون وقليل من زيت الزيتون واركنهم علي جمب شويه ياخدو من طعم بعض
وأقلبهم علي مكعبات البطاطس واسيبها تاخد من طعم التتبيله شويه ومنساش اقلبها كويس قبل التقديم وبألف هنا😘
❤️❤️ رز. السمك ❤️❤️
بضيف معلقه كبيره مليانه سكر مع البصل تتكرمل معاه
بتدي لون حلو وطعم رائع
وطبعاً بيحب. الكمون والفلفل الأسود وبحب أزود قرفه ودا حسب رغبتك
بشوح البصل الاول بزيت
ولما الرز يشرب ميته بضيف مكعبات زبده علي الوش واغطي عليه واسيبه يكمل سواه علي نار هاديه
وبراحتك تتحكمي في لونه من درجة تحمير البصل سواء عوزاه غامق اوفاتح
وبألف هنا وعفواً للاطاله
