img
الرئيسة / أطباق رئيسية / خروف محشي دوالي

خروف محشي دوالي

/
/
/
3441 مشاهدات

خروف محشي دوالي

خروف محشي دوالي

خروف محشي دوالي

خروف محشي دوالي, معكم صديقة زاكي الشيف الموهوبة ,أم جاسم

المقادير

  • خروف وزن 10 كيلو او نصف خروف علوي او سفلي مش طولي.
  • خضار
  • بصل
  • ثوم
  • فلفل اخضر او احمر حار
  • بندورة
  • بهارات لحمة
  • كاري
  • فلفل اسود
  • شطة مجروشة
  • بابريكا
  • لبن يوغرت
  • صلصة بندورة
  • ماجي
  • زيت زيتون
  • خل
  • دوالي ملفوفة نية

الخطوات

خروف محشي دوالي

السلام عليكم ورحمة الله وبركاته

وعدتكم انزل وصفة الخروف المحشي اليكم الطريقة

أولاً/ عمل برايم

بنعمل برايم ضروري وهوه محلول النقع يلي حكيت عنه قبل هيك وهوه لكل 3 لتر ماء معدنيه نصف كاسة ملح وثلاث ارباع كاسة سكر وملعقتين خل طبعا بتضاعفي كمية المحلول عشان يكفي حجم الخروف وبتنقعيه من قبل بيوم ، طبعا رح تحكي انه حجمه كبير والثلاجة مابتوسع ، لا بتوسع بس استخدمي جاط كبير عميق من يلي بيوسع عشرة كيلو رح يوسع.

ثانياً/ تتبيلة الخروف

بنحتاج خروف صغير 10— 12 كيلو مش اكثر

بتنضفيه منيح وبتعملي اله تتبيلة وهيه عبارة عن:

خل وزيت وليمون وملح وفلفل وبودرة ماجي وبهارات لحمة وبهارات كاري وشطة وبصل وثوم وفلفل حار وبندورة مقطعه ولبن زبادي وصلصة بندورة ،

بينطحنوا على الخلاط وبيندهن فيها الخروف بشكل ممتاااز مع تدليك لحم الخروف بقوة وعمل فتحات بسكين رفيع ودخلي فيها من التتبيلة خااصة منطقة الفخذ لانها فيها لحمه سميكة وضلي ادهني من جوا ومن برا .

غطيه وحطيه بالثلاجة اكمن ساعة لنقل 3 ساعات عالاقل.

ثالثاً/ الدوالي

بدك تكوني لافه الدوالي ومجهزيتها نيه طبعا ، بس ييجي وقت الشوي بترتبي الدوالي داخل بطن الخروف وبتحطي بين طبقات الدوالي شرحات بصل وثوم وبندورة وليمون بتعبيه 3/4 مش كامل البطن عشان ياخد راحته الورق بالاستواء وما ينضغط.

رابعاً/الشوي

بعد ما ترتبي الدوالي سكري بطن الخروف باعواد شوي خشب ماتدققي كثير على اغلاق البطن لانه راح يقفل مع طبقات القصدير.

لازم تلفي الخروف بطبقات من القصدير عشر طبقات تقريبا وبدك مساعدة حد معك بهالخطوة ، ليش عشر طبقات عشان مانفقد سواءل الخروف يلي رح تطبخ الدوالي لازم نحتفظ فيها كلها وما نفقد ولا قطرة، وعشان يتحمل الخروف بدون ماينحرق بالفرن مدة شوي طويلة.

خامساً/ مدة الشوي مهم

طبعا اكيد ما رح نصير نتفقد الخروف كل شوي لانه محكم الاغلاق وممنوع ينفتح القصدير ولا بأي شكل عشان السوائل، كيف نعرف مدة الشوي؟ كل كيلو من لحم القطع الكبيرة بحاجة نصف ساعة بالفرن ، لذلك خروف عشرة كيلو بحاجة خمس ساعات بالفرن، اول ساعة على نار حاميه وباقي الوقت على أخفض حرارة عندك.

سادساً/ التقديم

طبعا بعد مدة التعذيب كلها بالفرن بكون الخروف تحمر لحاله مابده تحمير واكيد رح يكون عندك عزيمة عشان تعملي هالكمية، بفضل يتم فتح القصدير امام الضيوف ماتقلقي راح يكون شي فاخر ومشرف وببيض الوجه ومتحمر وشكله تحفة لحاله بدون تزيين خاصة لما ينفتح البطن وتنهار الدوالي ومعها بعض السوائل صراحة من اجمل مناظر الاكلات يلي شفتها.

*بعرف انه ممكن يكون صعب عمل هالطبخة مكلفة لانها لكن ممكن تنعمل بنفس الطريقة على نصف خروف لكن نصف علوي او سفلي كامل ما ينقطع نصف بالطول لا بدنا بالعرض مثلا الرقبة مع الاكتاف والبطن او الجزء السفلي الافخاذ مع البطن،، عشان نقدر نعبي دوالي فيه.

وممكن تتنفذ على ديك رومي كمان نفس الشي.

وصحة وهنا يارب.

بعتذر لانه ماعندي الا هالصورة بس كنت مصورة خطوات العمل كلها بس انحذفت بفرمتة التلفون.

42 تعليقاً

  1. بارك الله فيكم واشكركم على التشجيع.

    فائدة النقع بالمحلول بتطرى اللحمة ومابتنشف بالشوي لانه مدة طويلة وكمان بتشد اي دم باللحمة وبطلع بلمع من النضافه.

  2. بدي اسألك ام جاسم شلتي اشي من دهنه الخارجي؟
    استخدمتي السكين بتنضيفه من بقايا الاحشاء الداخلية؟
    وحطيتي مي ببطنه عشان الدوالي يستوي؟
    كم اخد كمية دوالي منك؟
    كم شخص بكفي الخروف؟ عملتي سلطات جنبه؟
    هلأ ازا بدي اوديه ع مخبز فرن عربي رح ياخد نفس الوقت بالفرن؟
    غلبتك بس جوزي حاب اعمله لعزومة وانا ولا مرة جربته.
    ويعطيك العافية والله يهني عيلتك فيك

  3. الله يبارك فيكم كلامكم بيسعدني وبشرفني.

    توت بري رح اجاوبك سؤال سؤال
    الخروف بيجي منظف من عند اللحام من الاحشاء كاااملة ، بضل تنظفيه انتي بمي وملح تفركيه وبتشيلي اي شحمة زيادة بالسكينة عادي.

  4. مي مع الدوالي حطيلك كاسة مش اكثر لانه الخروف بيفرز مي عالدوالي.

    حسب حجم الخروف بياكل دوالي يعني الخروف الصغير بده كيلو دوالي لانه بطنه واسع بس كمية الدوالي اختيارية يعني ممكن اقل تعملي.

    كل كيلو دوالي بتاخد 2 كيلو رز

  5. طبعا بتعملي سلطات ولبن جنبه وورقيات بتحطي جرجير بصل اخضر فجل فلفل حلو كمان.

    خروف 7 كيلو بكفي عشر رجال لحد 12 كمان لانه لحمة ودوالي كمان. ولاتمسي الوزن رايح معه وزن العظم كمان.

    لو عند الفرن او بالبيت شوي قطع اللحمة الكبيرة كل كيلو لحمة بدها نص ساعة بالفرن وزيدي ساعة عالمجموع كامل عشان يذوب.

    يعني
    اطا وزن الخروف عشرة كيلو بده خمس ساعات وزيدي ساعة بصيروا 6 ساعات على الرف الوسط اول ساعة اعلى حرارة وبعدين نار هادية للاخر.

    لا تفتحي القصدير قبل انتهاء المدة لانه رح يفقد السوائل وينشف.

  6. يسلمو كتيييييييير ام جاسم
    كتر خيرك
    ان شاء الله ازا عملته بخبرك شو بصير معي.
    بدي اسألك عن الكيك الي بتعمليه ما بدي اوديكي ع وصفة وصفة من وصفاتك واغلبك ما صدقت لقطتك هون 😅
    الفرن الي استخدمتيه للكيك كهربائي او غاز؟ ازا كهربا على اي نظام يعني فوق وتحت او تحت ومروحة وهيك؟
    لأنه لاحظت عندك فرن كهربا بوصفة الماكرون.
    هلأ عندي فرن كهربا وخايفة اعمل فيه الكيك. لانه اسمعت بنشف
    فبدي اتأكد منك هلأ فعلا بنشف الكيك

  7. ان شاء الله بيزبط معك الخروف وبتدعيلي.
    بالنسبة للكيك اه على فرن الكهرباء والفرن الكهربا بيطلع الكيك ازبط من الفرن الغاز لانه بوزع الحرارة صح .

    شوفي هوه اي شيء بينشف منك بالفرن لانه بكون مطول بالفرن كثير ، الكيك على فرن الكهرباء بتشغلي الفرن على اعلى شي من فوق وتحت لحتى تحطي فيه الكيك بتخليه 5 دقائق على الحرارة العالية لانه بس فتحتي الباب فقد الفرن 30 درجة من الحرارة ، وبعد الخمس دقائق بتنزليه للدرجة المطلوبة وهيه 180 غالبا للكيكات.

    بدك تتأكدي من درجة حرارة فرنك اذا مزبوطة لانه فرن الكهربا مش دايما حرارته صح انا مثلا فرني لما بدياه على 180 بحط على 250
    لازم تجربي بالاول عشان تعرفي شو الحرارة الصح عندك.

    اول كيكة عملتها على فرن الكهرباء خربت لانه طلع بارد زي ماحكيتلك ال 180 فيه يادوب 130 او اقل.

    بعد ماعرفتله صرت اهمل فيه كل الحلويات عادي خاصة انه زجاج وفي ضوء يعني بتراقبيه عن كثب.

    واي سؤال ثاني ولا يهمك.

  8. يسلموووووو كتيييييييير كتيييييييير ام جاسم
    رح ادعيلك من غير ما اطبق لانه بكفي بتجاوبي بتفصيل على اسألتي.
    الله يجزيك الخير
    الله يسعدك ويحفظك ل عيلتك

  9. ام اوس طبعا بتقدري تحشي الدجاج دوالي بنفس الطريقة لفي الدوالي واحشيها في تجويف الدجاجة بس لا تحشي للاخر عشان تعطيه مجال يستوي خلي فراغ صغير وضيفي كاسة شاي مي وحطيه بكيس حراري او بقصدير بس لازم يكون محكم الاغلاق تماما عشان يستوي.

  10. اليوم عملت كيكة ب فرن الكهربا
    حطيتها على 250 وحميته قبل 10د ما شاء الله زبطت وطلعت تمام التمام.
    يسلمو ام جاسم على نصيحتك.

اترك تعليقاً

لن يتم نشر عنوان بريدك الإلكتروني.