في حب المقلوبة

/
/
/
1187 مشاهدات

 

في حب المقلوبة

المقلوبة

في حب المقلوبة

في حب المقلوبة , معكم صديقة زاكي الشيف الموهوبة ,Mariam Ramadan

المقادير

  • دجاج
  • باذنجان
  • زهرة
  • بطاطا
  • ارز
  • زيت ذرة
  • ملح
  • بهارات مسكلة

الخطوات

مساء الخير لاحلى جروب

يعني اللي إخترعت المقلوبه …

روحي الهي يرحمك و يتجاوز عنك …

كيف خطر ع بالك هيك ..

انتِ عارفة شو يعني بطاطا و باذنجان و شوية زهرة مع اللحمه او الدجاج واللي كلهم صاروا مطعمين ع الرز !!

إنتِ عارفة كمية السعادة .. الموجوده داخل كل لقمه ..

أي ستيك .. و أي سوشي … والأ اللي بتغزلوا بالمعكرونه..

و البيتزا ..

طريقة التقديم … لحالها حكايه …

هضبة بحق و حقيق ..

بتوديك ل جنوب افريقيا و بتحس حالك عامل منجم بستخرج الألماس …

بعدين … حطيتي جنبها سلطه بتزبط .. حطيتي لبن احسن ..

بدك تخلطي خيار باللبن .. كمان بمشي الحال ..

ما بدك تحطي اشي .. لحالها مغمسه

والأ .. كمان بتعطيك سندويشة مقالي تسليكه لتجهز الطبخه

يعني بالبلدي .. كاملة مكمله الطبخه ..

بعدها … بتسمحلك .. تحبس بأي شي ..

بيبسي و سفن 100% .. شاي بالنعنع أحسن و أحسن ..

وقلبك بصير يرقص

وخصوصا مقلوبة ام نضال الخرافية تبا تبا للتواضع

بمناسبة المنشور هدول مقلوباتي على مدار السنة

30 تعليقاً

  1. يسلمو كتير حبيبتي عاشت ايدك بس ياريت تشرحيلي بوضوح كيف هيك طلع معك متل القالب والله ما عم يظبط معي هالشكل الحلو مع انو بيطلع معي ظابط وطيب كتير بس هالشكل المرتفع المتماسك ما يظبط. ساعديني بلجواب، 😘

  2. أم جنى إذ بدك المقلوبة متل قالب
    لاتغسلي رز يعني خلي فية نشاء ولما تقلبي طنجرة خلية تتشرب لمدة ساعه من بعد ما تطفي علية

  3. تسلموا حبيباتي وربي يسعدكم وكلكم ذوق ..بالنسبة للاخت ام جنى حتى تحصلي على مقلوبة بهالشكل اغسلي الرز وانقعيه عادي ما في مشكلة لكن ضروري تستعملي الرز العادي زي صن وايت او تايجر لانه المقلوبة ازا عملتيها برز بسمتي فقط الا ما تفرط .انا بعملها برز صنوايت وبحط لكل ٣ كاسات ارز صنوايت نص كاسة ارز بسمتي
    تانيا غير زيت الباذنجان اللي قلتيه ما تحطي زيت ،يعني الزيت اللي شفطه الباذنجان يكفي لانه كثرة الزيت بتفرط المقلوبة .تالتا ما بصير تحركي رز المقلوبة نهائي يعني بترتبي الباذنجان والبطاطا والزهرة والدجاج او اللحمة بقاع الطنجرة وبتحطي الرز المنقوع ومملح ومبهر وبحطي فوقهم صحن مسطح حتى ما يطلع الباذنجان لما تسكبي المرقة وبتحطيهم ع نار وسط ومجرد ما يبلش يغلي الرز ويتشرب بتشيلي الصحن بعد ما تخفضي النار ع الاخير وبتغطي الطنجرة وبتتركيها لينضج الارز تماما دون تحريك ولما تستوي اطفي النار واتركيها عشر دقايق فقط ..لانه ساعة كتير وبتبرد المقلوبة ،وبعدها بتقلبيها واناظري دقيقتين حتى ترفعي الطنجرة ورح تحصلي على قالب مقلوبة
    وصحة وهنا

  4. الطنجرة اللي بستعملها عادة للمقلوبة المنيوم واحيانا بستعمل الجرانيت او التيفال على حسب الكمية اللي بدي اعملها .وصدقوني امي طول عمرها تعملها بالامنيوم وتطلع قالب ماشاء الله ..فالطنجرة مش مقياس لنجاح المقلوبة .والمقلوبات الصغيرة اصغر شي عملتهم بالالمنيوم .

اترك تعليقاً

لن يتم نشر عنوان بريدك الإلكتروني.

Translate »