حلو السمسمية والفسدقيه سلسة وصفاتي المشكله 1

39 4٬004
 

حلو السمسمية والفسدقيه سلسة وصفاتي المشكله 1

حلو السمسميه والفسدقيه سلسة وصفات مشكله 1

حلو السمسمية والفسدقيه سلسة وصفاتي المشكله 1

حلو السمسمية والفسدقيه سلسة وصفاتي المشكله , معكم صديقة زاكي الشيف الموهوبة ,أم محمّد

المقادير

  • للجلوكوز :
  • 2 كوب سكر
  • ثلاث ارباع الكاسه مي
  • رشة ملح
  • عصرة ليمون
  • للسمسميه:
  • 500غ سمسم محمص بعادل نص كيلو
  • 150 غ سكر ..ما يعادل كاسة ونص شاي
  • 150 غ جلوكوز
  • ربع كوب ماء
  • للفسدقيه:
  • 500 غ فسدق
  • 150 غ سكر
  • 150 غ جلوكوز
  • ربع كوب ماء

الخطوات

يسعد أوقاتكم بكل خير …اليوم حبيت اقدملكم اول وصفه بسلسة وصفاتي المشكله ..وهي طريقة السمسميه والفسدقيه رااائعه وسهله …

ان شاء الله تعجبكم ….

ويلاااا مع شرح الطريقه ….

& اول شي بعمل الجلوكوز …وبدي أشكر ام جاسم عالطريقتها بالجلوكوز لانه اخذتها من وصفتها وطلعت زابطه ..انا عملت نص الكميه يلي منزليتها ..ويلي هي

كوبين سكر ضفتلهم تلات ارباع الكاسه مي وعصرة ليمون ورشة ملح وذوبة السكر شوي شوي وهو هالغاز واول ما يبلش يغلي بتركه لمدة ربع ساعه عالنار وسط ..ومن بعد غليانه ربع ساعه بعمله الاختبار وهو باخذ نص معلقه صغيره منه وبنزلها بمي واذا تلاشت وما تشكل عندي منها كره بخليه شوي عالغاز وما بطول عليه لانه عالسريع بفرق الوقت معه ..برجع بكرر الخطوه يلي عملتها لتشكيل كره طريه من الجلوكوز ..واذا قدرت امسكها بايدي واشكل منها كره فخلص هيك الجلوكوز بكون عندي جااهز بطفي تحته فورا مو لازم اتاخر عليه وهو عالغاز لازم اختباري اله يكون سريع

& من ثم ببلش بطريقة الحلو وهي بضيف مقدار السكر والماء عالغاز بطنجره او مقلاه وتكون ما بتلزق وبذوبهم سوا وهمو عالغاز …وبضيفلهم مقدار الجلوكوز وبخليهم يغلو شوي ومن بعد هيك برجع بعيد الاختبار تاع الجلوكوز يلي شرحته باول الوصفه لما تتشكل عندي الكره الطريه فورا بضيف مقدار السمسم وبقلبهم سوا لمدة ثواني وهمو عالنار ومن ثم بفردهم مزبوط بصينيه مدهونه زيت ولازم اشتغل فيه وافرده واقطعه وهو لسى سخن لانه اذا برد ما بقدر افرده او اقطعه …من بعد فرده بالصينيه بقطعه مربعات او حسب ما بتحبو ومن بعد ما ببرد بقدر افكهم من بعض لانهم مقطعين …وهيك بتكون معي جاهزه السمسميه وكتير زاكيه …وصحه وعافيه

& طريقة الفسدقيه نفس السمسميه بضيف الفسدق من بعد اختبار نجاح الجلوكوز مع السكر والمي…بقلبه شوي معه وهو عالغاز عشان ياخذ لون كمان لانه الفسدق مش محمص …وبعد هيك بفرده بصينيه مدهونه زيت وبدي اكون سريعه بفرده وتقطيعه لانه تقطيعه اصعب من السمسم ..ومن بعد ما اقطعه ويبرد بكون صار جاهز ..

وصحه وعافيه

بتمنى اكون وضحت الطريقه وعجبتكم

39 تعليقات
  1. 💠أم جاسم💠 :

    ما شاء الله عنك وعن وصفاتك
    شغلك مرتب وخطواتك واضحة
    وصحة وهنا
    وسعيدة جدا انك جربتي الجلوكوز ونجح معك.

  2. ام علاء ابو يحيى :

    تسلم ايدك بشهووووو

  3. ناي :

    تسلم دياتك ام محمد
    انا كتير بحب السمسميه
    رح جربها اكيد

  4. qamr :

    عوافي

  5. joudi :

    يعطيك العافية شي خيلة بس سؤال الفستق فستق ني ولا محمص

  6. ريحانة🌿 :

    اللهم بارك .. شو هالجمال والأناقة والوصفة الرائعة 👍
    تسلم إيدك عزيزتي 🌷

  7. qamr :

    ليش تقطيعه قبل ما ينشف معقول بكون قاسي لما توكليه يعني مو متل المجلات

  8. 💖نور أحمد💖 :

    يعطيكي الف عافية حبيبتي شكلهم ولا اروع واكيد الطعمة طيبة
    الله يباركلك ويسلم ايديكي شغلك متقن دايما😙

  9. الاميره$ :

    المنظر بعقد كاير بحبها هالاكله ومع فناجينك الحلوين صارت الوصفه احلا

  10. 🍒أم محمّد🍒 :

    بتشكركم عالتعليقاتكم الحلوه 🌹🌹

    ام جاسم تسلمي وانتي ووصفاتك الاروع

    صحه وعافيه ناي مقدما جربيها كتير طيبه

    ام علاء وريحانه مشكورين عالدعمكم المستمر

  11. 🍒أم محمّد🍒 :

    جود ..الفسدق ني مش محمص ..باخذ لون من القطر

    قمر .. اه زي المحلات هو بطبيعته فيه قساوه شوي من القطر …بس لازم يتقطع قبل ما يبرد لانه لما ببرد بصير قطعه وحده ما بتقدري تقطيعه ..واذا ما بدك تقطعيه وهو سخن عادي بصير بس لما يبرد بتكسريه تكسير بشكل عشوائي ما بطلع معك منتظم ..حسب ما بتحبي

  12. آلاء محمد :

    تسلم ايدك

  13. qamr :

    حلو كتير يسلمو رح اجربها واحكيلك

  14. qamr :

    تسلم روحك على رد

  15. Om taleb :

    يا سلااام بشهو

  16. retaj :

    👌👌

  17. ام اصيل :

    ترتييييب وابداااع بلاااا حدوووود
    تسسلم هالايدين يااارب

  18. 🍒أم محمّد🍒 :

    تسلموو جميعا 💐💐

    قمر صحه وعافيه ان شاء الله تعجبك

  19. am Sara :

    روعه ماشاء الله تبارك الرحمن صحه وهنا يارب معدله ام احمد 😚😚😚

  20. فاطمة..ام ملك.. :

    ماشاء الله عليكي روعة
    وياعيني على فنجان القهوة
    يسلمو ايديكي شكلو بجنن

  21. Ameena qadan :

    ماشاء الله روووووعة
    تسلم ايدك يارب

  22. رشا رشا :

    رووووعه ما شاء الله عنك يسلمو اديكي حبيبتي 😘

  23. سوزان فلسطين :

    يسلمو ايدكي ولا اروع

  24. مممم يسلمو هالادين .انا بحبها كتير

  25. 🍒أم محمّد🍒 :

    مشكوورين كتير عالكلامكم الرائع ..💐💐

  26. إم مصطفي 😉 :

    أللهم بارك ماشاءالله فنااانه يعطيكي العافيه حبيبتي 😍

  27. ام وسام👣 :

    ما شاء الله 😍تسلم دياتك

  28. joudi :

    بتشكر على الرد وانا من زمان بدي وصفه مضمونه بس لو ذوقتينه كل وحده حبه كان أفضل عنجد حبيت 😍

  29. ام شام :

    ماشاء الله منظرها بشهي
    لو سمحتو بدي طريقة عمل معمول حبة البركه

  30. 🍒أم محمّد🍒 :

    تسلمووو ومشكورين يا وردات زاكي 💐

    جود ..يا ريت بقدر اذوقكم منه هههه

  31. joudi :

    الله يسعدك ام محمد صحه وعافيه

  32. 🍒أم محمّد🍒 :

    ويسعدك جود 😊

    ام شام اكتبي بالبحث بزاكي عن طريقة المعمول بخبة البركه وبطلعلك وصفات واختاري يلي بدك اياها ..ان شاء الله اكون افدتك

  33. ام علاء ابو يحيى :

    تسلم ايدك بتشهي خاصه السمسميه يا عيني

  34. ام حمزه :

    ماشاء الله تبارك الرحمن يسلمو اديكي

  35. لين :

    يسلموووا هالدياااات شكلهم بشهيييي انا من عشاقهم السمسميه والفستقيه ابدعتي حبيبتي😋👍🌷

  36. أقدار :

    تسلم ايديكي ي معدلة منظرهم بشهي خاصة مع القهوة😍

  37. 🍒أم محمّد🍒 :

    يسعدكم جميعا ..وبتشكركم عالمروركم وتعليقاتكم الرائعه

  38. أم جنى :

    راىع ومفيد يسلمو كتير

  39. ام عمار :

    يسلموا دياتك بحبها كتير فكره
    انظف من الجاهز يعطيكي العافيه

اترك رد

لن يتم نشر عنوان بريدك الإلكتروني.