كبة بدون ماكينه وبدون هبرة ناجحة مئة المئة

67 15٬344
 

كبة بدون ماكينه وبدون هبرة ناجحة مئة المئة

كبة بدون ماكينه وبدون هبرة ناجحة 100%

كبة بدون ماكينه وبدون هبرة ناجحة مئة المئة

كبة بدون ماكينه وبدون هبرة ناجحة مئة المئة , معكم صديقة زاكي الشيف الموهوبة ,أم جاسم

المقادير

  • 2 كوب برغل حجم وسط
  • 1.5 كوب طحين
  • نصف كوب زيت ذرة
  • ملح
  • كمون مطحون
  • بصل بودرة
  • للحشوة
  • لحمة مفرومة خشنة
  • بصل
  • ملح وفلفل
  • بهارات مشكلة
  • زيت للقلي

الخطوات

كبة بدون ماكينه وبدون هبرة وناجحة 100%

السلام عليكم ورحمة الله وبركاته

كثير نحرمنا من اكلة الكبة لانه ماعنا ماكينة الكبة اللي هيه ماكينة اللحمة ، بس آن الأوان انه نستمتع بأكلاتنا اللي بنحبها بدون هم الماكينة، وصفة اليوم بسيطة بس بدها عضلات والكبة الاصلية بكون بقشرتها داخل لحمة هبرة حمرا مطحونة مع عجينة الكبة بس انا ما استخدمتها لانه الوصفة عن التوفير

خلينا نبدأ

أولاً/ البرغل

بننقع البرغل حبة وسط مايكون ناعم ولا خشن انا بجيب خشن وبضربه عالخلاط كم ضربة يتكسر بس.

بننقعه بمي بتغلي كل كاسة برغل بنحط عليها كاسة ونص مي بتغلي وبنغطيها مدة ساعة.

— بعد النقع بنلاقي البرغل تفتح وطري شوي بنضيف بصل بودرة وملح وكمون وبنبلش نعجّن فيه بقوة وبس نحسه تعجن شوي رح يصير لزج ودبق بنصير نضيف طحين ، كل كاسة برغل بدها ثلثين كاسة طحين بالتدريج بنحطه وبنعجن وبين فترة والثانية بنرش زيت ذرة وبنستمر بالتعجين ، العجن بده وقت قعدت اعجن فيه يمكن ثلث ساعة او اكثر ، المهم بتعجن ويصير كتلة طرية وغير دبقة كل ماشفتيها دبقت دهني ايدك بالزيت ومسديها.

—بنغطيها وبنريحها بالثلاجة ساعتين.

ثانياً/ الحشوة

بنقلب البصل لحتى يصير ذهبي وبنضيف اللحمة الخشنة مع ملح وفلفل وبهاراتك المفضلة وبنقلب على نار متوسطة لعاليه، مابدنا مية اللحمة تنزل ، لحتى تستوي بنطفي وبنتركها تبرد.

ثالثاً/ تكبيب الكبة

بناخد كمية من العجينة قد فنجان القهوة وبنعملها كرة وبنحط اصبعنا بالزيت ( ممنوع المي ) وبنقور الكرة من النص وبنصير نبرمها ونضغط وبنحاول نرققها قد مانقدر.

— بنحشيها وبنزبط شكلها وخاصة اطرافها.

رابعاً / القلي

بنحمي الزيت على حرارة متوسطة مابدنا يحمى كثير لإنه الزيت الحامي بخلي يطلع عالكبة من برا نقاط بيضا شكلها مش حلو.

وبنخليه ياخد وقته بالقلي وبنقلبه من وقت للثاني ، بعدين بنطلعه على ورق مطبخ .

خامساً/التقديم

قدمي الكبة ساخنة ، كثير طيبة وفيها قرمشة لطيفة من برا، والصراحة طلعت اطيب من المتوقع.

67 تعليقات
  1. ام فهد :

    مسا الخير بسير اعملا ببرغل ناعم واذا امكن قدي فيني احط طحين وبرغل

  2. شيف محترف :

    ام جاسم ملكة 👍👍👍👍👍👍👍👍👍👍👍👍👍❤❤❤❤❤❤❤❤❤❤❤❤❤😘😘😘😘😘😘😘😘😘😘😘😘😘😘😘😘

  3. ام صالح :

    اليوم جربتها وطلعت روعة
    ودعيتلك ياام جاسم..كنت اعملها و كانت تطلع معي يابسة اليوم طلعت غير شكل
    الله يجزيكي الخير

  4. لبنى :

    ام جاسم ….بموووت عالكبة بس المشكله ما بتزبط معي

    1. 💠أم جاسم💠 :

      ايش مشكلة الكبة معك ايش مابزبط؟ طعمها؟ قوامها؟ بتفرط؟ وين المشكلة بالضبط؟

  5. […] الطريقة هنا […]

  6. ام معاذ :

    عنجد كتير زاكيه

  7. غزل :

    يسلمو ايديكي بتشهيي

  8. ام احمد العزاوي :

    طعمها بيجنن انا هيك بعملها بالضبط 👌بس بحشيها جاج بتطلع روعة

  9. سعسعديان :

    يسلمو ماشالله كل حبهعالتكه واكيد طعمها
    ولا يمكن تظبط معي بالتكوير 😪

  10. ام يوسف من غزة💕 :

    ماشاء الله منظرها بيشهى وحبيت اجربها
    بس سؤال عادى لو انقع البرغل كول الليل والصبح اعملها عجينه بينفع ولا كيف ردوو عليا ضرورى

  11. […] طريقه لاخت ام جاسم […]

  12. ام عبدالرحمن :

    زيت بخليها تفتح طحين مافي داعي انا بعملها بدون طحين

  13. نوران :

    طيب يا ام جاسم لما انقع البرغل بصير طري وادا ضل عليه مي تصفيه ولا اخليها

  14. […] كبه على طريقة ام جاسم المبدعه , معكم صديقة زاكي الشيف الموهوبة ,dina السلام عليكم ورحمة الله وبركاته ،، وردات زاكي العزيزات حبيت اشاركم وصفة لأم جاسم وصفه الكبه ، طبقتها بحذافيرها وطلعت جد بتشهيييي وزابطه ميه الميه معي خصوصا عند القلي مافرطت معي ولاحبه، يسلمو إيديك ام جاسم وتضلي تتحفينا بوصفاتك الرائعه،، وهلئيت بتركم مع الصور طريقة الكبه لأم جاسم […]

  15. […] بتقدروا تشوفوا الوصفة على ملف أم جاسم أو من هنا مباشرة […]

  16. كبة البرغل - زاكي

    […] ترجع تنور زاكي بوصفاتها الرائعة لو سمحتي أدمن تحطي رابط الوصفة هون ليستفاد الكل من […]

اترك رد

لن يتم نشر عنوان بريدك الإلكتروني.