عزيمة أحلى رفيقة لإلي حبيت شارككم بإبداعاتها ونفسها الطيب والاحترافي♡

35 9٬436
 

عزيمة أحلى رفيقة لإلي حبيت شارككم بإبداعاتها ونفسها الطيب والاحترافي♡

عزيمة أحلى رفيقة لإلي حبيت شارككم بإبداعاتها ونفسها الطيب والاحترافي♡

عزيمة أحلى رفيقة لإلي حبيت شارككم بإبداعاتها ونفسها الطيب والاحترافي♡

عزيمة أحلى رفيقة لإلي حبيت شارككم بإبداعاتها ونفسها الطيب والاحترافي♡, معكم صديقة زاكي الشيف الموهوبة ,اول شي بدي اتشكرك نوارتي من كل قلبي عالأوقات الحلوة اللي بقضيها معك يا أختي اللي مونستني بغربتي وتاني شي بدي قلك ربي يحميكي ويبارك لاهل بيتك فيكي ويهنيهم ويهنينا معهم عالأطايب اللي بتطلع من تحت ايديكي هههههه بصراحة يابنات انا مادقت متل كبستها أبدا لهيك حبيت انقللكم طريقتها بالكبسة وباقي الأكلات ويارب تجربوها وتحبوها متل ما أنا صرت شوفا بمنامي هههههه

المقادير

  • مقادير الكبسة تتبيلة أفخاد الدجاج “بتتقدر حسب كمية الجاج” :
  • توم
  • عصير ليمون
  • دبس بندورة
  • ملح
  • فلفل أسود
  • بابريكا
  • ألوان الطعام
  • زيت
  • مقادير أرز الكبسة:
  • نصف كيلو رز بسمتي
  • سنين توم
  • بصلة وسط مقطعة جوانح
  • حبة فليفلة خضرة مقطعة مكعبات صغيرة
  • بندوراية وسط مبروشة
  • جزرة مبروشة
  • ملعقة بقدونس مفروم ناعم
  • ملعقة كزبرة مفرومة ناعم واذا ماتوفرت وحدة منهم منستغني عنها
  • مكعبين ماجي
  • قرنفل حب
  • هيل حب
  • قرفة حب
  • ملح
  • فلفل اسود
  • كركم
  • بهارات كبسة
  • شطة “اختيارية”
  • خليط من السمنة والزيت
  • مقادير صينية البطاطا بالكريمة:
  • بطاطا مسلوقة ومهروسة مع
  • ملح
  • فلفل أسود
  • بابريكا
  • صدور دجاج مقطعة لقطع صغيرة شوي
  • فليفلة خضرة مقطعة مكعبات صغيرة
  • فطر مقطع شرائح
  • ملح
  • فلفل أسود
  • رشة هيل
  • بابريكا
  • كريمة للطبخ
  • قشقوان
  • مقادير سلطة الكسر التركية “بكسر الكاف” ههههه:
  • برغل ناعم منقوع بمي دافية
  • كمية من زيت الزيتون
  • بصل أخضر مفروم ناعم
  • دبس بندورة
  • دبس رمان
  • دبس فليفلة
  • ملفوف مفروم ناعم
  • خس مفروم ناعم
  • نعنع اخضر مفروم ناعم
  • عصرة ليمون
  • ملح
  • فلفل أسود

الخطوات

☆بسم الله الرحمن الرحيم☆

اول شي لجاج الكبسة منخلط كل المكونات عدا الزيت مع بعض ومندعك قطع الجاج فيهم

انتبهو ماتكترو عصير ليمون لحتى مايطلع الجاج حامض

بعد ماندعكهم بالتتبيلة منيح منحطهم بصينية فرن ومنحط بالصينية شوية مي بسفلها ومنحط على وشهم زيت ومنغلف الصينية بقصدير ومنحطها بالفرن ومنكون مشغلينو من فوق ومن تحت لحتى تستوي تقريبا منشيل القصدير ومنتركها لتتحمر

اما بالنسبة للرز

منحط الزيت والسمنة عالغاز منسيحهم ومنحط عليهم البهارات الصحيحة ومكعبين الماجي منحمصهم شوي وبعدين منضيف التوم والبصل والبهارات الناعمة ومنشوحهم ليدبلو منضيف الفليفلة الخضرة

كمان منقلبها لتدبل منضيف برش البندورة والجزر ومنتركهم لبتسبكو شوي مع بعض

طبعا مابدي احكي عالريحة دمااااار

بس يتسبكو مع بعض منحط شويات الكزبرة والبقدونس منقلبهم سوا بعدين منضيف المي ولما تغلي منيح منصفي الرز المغسول ومنضيفو ومنخلي النار عالية لأول ما يبلش ينشف ميتو شوي منحركو ومنوطي النار تحتو عالاخير ومنتركو لحتى يستوي ويتهدى

وبعدا طبعا بتصف نوارتي جاجاتها الحلوات بزوقها المعهود فوق الرزات اللي مابينشبع منهم ههههه وبتزينوه بالمكسرات وشو مابيحلالكم..

هلأ منجي لصينية البطاطا

منقلي قطع الشيش بشوية زبدة وزيت لحتى يستوو منضيف عليهم ملح وفلفل ورشة هيل والفليفلة الخضرة ومنقلبهم مع بعض ومنتركهم لتبلش تدبل الفليفلة شوي منضيف شرحات الفطر ومنقلبهم ليدبل الفطر كمان ومنصفهم بسفل جاط البايركس

بوعاء تاني منهرس البطاطا المسلوقة ومنحطلا ملعقة زبدة وبهارات ملح وفلفل أسود وبابريكا ومنشكلها كرات ومنصفهم فوق الشيش والفطر

وبعدا منحط فوق الكرات كريمة سائلة بدون مانخلطها بأي شي ومنحط فوق الكريمة قشقوان ومندخلهم الفرن ليسيح القشقوان وبعدا هجووووم طبعاً ههههه

أما بالنسبة لأكلة الكسر التركية

مننقع البرغل بشوية مي دافية بحيث ما ينخبص بس كمان ما يقرط

بهالاثناء منحط عالغاز الزيت والبصل منقليه شوي ومنضيف عليه دبس البندورة ودبس الرمان واذا حبيتو الحد حطو دبس فليفلة

ومنضيفهم عالبرغل ومنحركهم منيح ومنضيف الخس والنعنع والملفوف وعصرة الليمون ورشة فلفل اسود وملح طبعاً ومنخلط وصارت أكلتنا اللذيذة جاهزة

يارب تكونو حبيتو الأكلات وماتنسونا من الدعاء أنا ونوارتي الأمورة

ودعولها بالبركة

عرض التعليقات (35)