img
الرئيسة / حلويات / كيك السبانخ شكل وطعم ولا أروع

كيك السبانخ شكل وطعم ولا أروع

/
/
/
1688 مشاهدات

 

كيك السبانخ شكل وطعم ولا أروع

كيك السبانخ شكل وطعم ولا أروع♡

كيك السبانخ شكل وطعم ولا أروع

كيك السبانخ شكل وطعم ولا أروع , معكم صديقة زاكي الشيف الموهوبة , اليوم وصفتنا رائعة بكل معنى الكلمة أولا مفيدة كتير وتحديدا للناس اللي مابتحب السبانخ وخاصة الأطفال وثانيا شكلها أكتر من رائع وبيفتح النفس وثالثا في لفتة خطيرة ههههههه كلنا منحب لون الفستق الحلبي المميز وخاصة بالتقديم وطبعاً مابيخفى عليكم سعرو العالي لهيك أنا أخدت شقفة من الكيك وطحنتا عالخلاط وزينت فيها واذا بتلاحظو شكلها مابيفرق أبدا عن الفستق الحلبي المطحون وكمان قمت من هي الدرور حطيتهم بحافظة وحطيتهم بالفريزر وكل ما حبيت رح زين فيهم بدل الفستق الحلبي هههههههه يعني السبانخ فستق اقتصادي هههههه والأحلى انو الطعم أبداً مو مبين ولا مأثر ويلا نبلش بالمقادير لأنو شكلي سرحت بالكلام زيادة

المقادير

  • 4 بيضات
  • كوب سكر
  • ثلث كوب زيت
  • كوب سبانخ مطحون ناعم تماما ورح نشوف كيف طريقة عملو البسيطة
  • باكيت فانيليا
  • باكيت بيكينغ باودر
  • ملعقة خل
  • رشة ملح
  • كوب طحين
  • ثلث كوب نشا

الخطوات

☆بسم الله الرحمن الرحيم☆

أول شي منجهز السبانخ لحتى يبرد

بعد مانغسل ورق السبانخ ونصفيه من المي منحط بطنجرة حوالي ثلاث أرباع كوب ماء ومنشغل تحتها لتبلش تغلي مننزل فيها ورق السبانخ ومنقلبو أقل من دقيقة بحيث بس يرتخي ارتخاء بدون مايتغير لونو

يعني لازم يضل محافظ على لونو الأخضر

بعدين منطفي تحتو ومنطحنو هو والمي اللي معو بالمضرب تبع الشوربة لحتى يصير ناعم متل مو شايفين بالصورة

منحتاج لمقادير الكيك اللي حاطتها كاسة من السبانخ ومنخليها تبرد تماماً

هلا بقى منخفق البيض مع السكر والفانيليا كتييير منيح لحتى ينفش البيض ويصير لونو أبيض تقريباً

بعدين منضيف الزيت والسبانخ ومنخلط ومنرجع نضيف الطحين والبيكينغ باودر والملح والخل ومنخفقهم ليمتزجو منيح

وعلى فرن حامي مسبقاً على درجة حرارة 180 لحتى يستوي

بعد نصف ساعة بالفرن تقريباً منعمل اختبار العود الخشبي وانتو أدرى بأفرانكم

بعدين منتركو ليبرد تماماً وبعدها منسقيه ومنقدمو بالطريقة اللي منحبها

انا أول شي عملت الكيك طبقات وقطعت منهم دوائر ومربعات وطحنت الباقي عالخلاط لصارو درور

وحبيت اطلع عن التقديم التقليدي للكيك وقدمتو بطريقتين

الأولى اني قطعت قطع مدورة وحطيت الموز والكريمة متل مو شايفين بعدين غطيت الكريمة بالدرور المطحونة

والتانية اني حطيت فوق المربعات الكريمة وفوق الكريمة فواكه مشكلة وزينتا بدرور الكيك

والشكلين حبيتهم بصراحة ولفتو نظر أي حدا شافهم وبتمنى يكونو عجبوكم الكم كمان وتتحمسو تجربوهم

وأبداً ماتخافو من نكهة السبانخ لأنكم مارح تحسو إلا انو عم تاكلو كيك عادي هههههه

هي أكتر شغلة فرحانة فيها لأني مو من محبي السبانخ وبزعل لإني مو محصلة فائدتها

بس هيك ان شاء الله على طول رح آكل سبانخ ههههههه

بحبكم كتير ياطبوشات وماتنسو تدعولي بالبركة

36 تعليقاً

  1. لولو

    بتشهي ولله بلاول فكرت فستق عليهن لحتى قرئت لعرفت 😂
    تسلم ايديكي حبيبتي
    اشتقتلك ياحلوة الله يباركلك بكل حياتك وبكل خطوة بتخطيها

  2. اللهم بارك .. ذوقك الرفيع ولمساتك الجميلة أثرها واضح على وصفاتك وعلى قلوبنا💖
    ربي يبارك فيك ويحفظ عليك موهبتك وإبداعك ويرفع قدرك في الدنيا والآخرة🌹

  3. يميي عنجد شي تحفه وفن ..
    ام ادهم المطبخ مالو حدود بالابداع ونور ماشاء الله عنها عودتنا على الابداع وكل شي جديد ومختلف ومش غلط الواحد يجرب وهي ما نشرت الوصفه الا بعد ما جربتها

  4. ماشا الله شي ناهي وافكار رووووعة تبارك الله
    الله يحميكي ويسلم ايديكي ويبارك فيكي ويجزيكي الخير على كل خطوة ياعسل 😘😘😘

  5. لك ربي يسلمهم هالايدين الي بلتفوا بالحرير ماشاءالله عنك فن وذوق وابدااااع تبارك الرحمن الله يحميكي بتشهيييي😋🤩😘💝

  6. اختي ام ادهم عجبتك عجبتك ما عجبتك لبلاش هاد رأيك بس لو سمحتي وصفات الشيف نور ما حدا بقدر يعيب عليهم لهيك ازا مو عاجبيتك الوصفة لا تفوتي عليها وتعلقي

    نووووور يا مبدعة الى الأمام يا روح الروح 😍

  7. حبيباتي كلكم والله عم اقرا والدمعة بعيني من حلاوة مشاعركم وكلماتكم الحلوة
    مو عارفة بشو بقدر كافيكم
    وجودكم احلى نعمة بحياتي
    الله يديم هالمحبة ومايحرمني منكم وممنونة الكم كتيييير وحدة وحدة ولثقتكم فيي رغم انو الوصفة جديدة بالنسبة للكتير منكم😘😘
    اختي ام ادهم انا بتفهم كلامك كتييير لأني بالبداية كنت مستهجنة الموضوع بس بتمنى منك تجربيها قبل ما تحكمي عليها
    سدقيني لو مالاقيتها رائعة مستحيل نزللكم ياها
    ولما قلت مابتطلع طعمة السبانخ كنت متأكدة من كلامي تماماً
    انتي جربيها واكيد رح تدعيلي
    بالنهاية انا حبيت فيدكم فيها لاني بعرف انو اغلب الأطفال ما بيرغبو السبانخ وبهالطريقة رح ياخدو فائدتو ان شاء الله واكيد بتقبل نقد اي حدا ومشكورة على تعليقك❤

  8. لولو مبلا راجعين ان شاء الله انا كنت كتير مشغولة هالكم يوم😅
    ام عمرو حبيبة قلبي والله انتي دايما غامرتيني بلطفك وزوقك
    الله يسعدك ويخليلي ياكي يا غالية😘

اترك تعليقاً

لن يتم نشر عنوان بريدك الإلكتروني.

Translate »