img
الرئيسة / أطباق رئيسية / طريقة عمل رقاب محشية ولا احسن مطعم

طريقة عمل رقاب محشية ولا احسن مطعم

/
/
/
3321 مشاهدات

 

طريقة عمل رقاب محشية ولا احسن مطعم

رقاب محشية ولا احسن مطعم

طريقة عمل رقاب محشية ولا احسن مطعم

طريقة عمل رقاب محشية ولا احسن مطعم , معكم صديقة زاكي الشيف الموهوبة ,

المقادير

  • رقاب خرفان عدد حسب الحاجة
  • بهارات لحمة
  • بهارات مشكلة
  • شطة
  • قرفة مطحونة
  • ملح وفلفل
  • زيت زيتون
  • ورق غار
  • روز ماري
  • ارز مفلفل مع بازيلاء وجزر

الخطوات

السلام ورحمة الله وبركاته

وصفة اليوم رح تكون باستخدام قطعه مهمّشة من الخروف هيه الرقبة يلي اغلب الناس بتبعد عنها وبتتجنبها لانها قطعه لحمتها قاسية والتعامل معها شوي صعب.

بس نحنا اهل زاكي لازم نجرب كل شي ونتعلم كل شي وخلينا نبدأ الطريقة.

أولاً/ تحضير الرقاب

بنجيب رقبة خروف او جدي ( غنم) وبنخلي اللحام يقسملنا ياها نصفين الطف واحسن للطبخ واذا بدك بتخليه يسحب العظمة منها بس انا استخدمتها بالعظم ، برضه العظم بيعطي طعم ونكهه للطبخ.

—جبنا الرقاب انا استخدمت رقبة ونص على 3 قطع بنضفها كويس وبنفتح جنب العظمة فتحة بسكين طويله زي جيبة طولية عشان نحشيها فيما بعد، وبنعمللها برايم اللي هوه

3 لتر ماء عليهم

كوب سكر

وكوب الا ربع ملح

نصف كوب خل

وبننقع الرقاب فيه ليلة كاملة.

المحلول هذا بسحب اي دم او زفارة من اللحمة وبطري اللحمة.

ثانياً/ تتبيلة الرقاب

ثاني يوم بنصفي الرقاب من المحلول وبنغسلها كمان مرة وبنجهز تتبيلتها.

بنخلط في صحن زيت زيتون وبهارات مشكلة وملح وفلفل وبابريكا وشطة وقرفة وبهار كاري وممكن ملعقة صلصة بندورة.

بناخد الخلطة وبندهن منها داخل الرقاب محل الحشي وبنحشي الحشوة اللي هيه:

ثالثاً/ الحشوة

بنقلب بصلة وثوم بزيت ذرة وبنضيفلها بهارات نفس المستخدمة بالتتبيلة وبنقلبها لحتى تطلع ريحتها وبنضيف بازيلاء وجزر او لحمة مفرومة وبنخليها تستوي وبنضيف الرز المنقوع وبنقلبهم سوا وبنضيف المي المغلي وبنطبخها كالمعتاد، وقبل ما يستوي تماما باخد منه كمية قدر كاسة بتكفي لانه بدياه 3/4 استواء وبتكمل بالفرن.

جهزت الحشوة بنخليها تبرد شوي وبنحشي فيها الرقاب.

رابعاً/ الشوي

حشينا الرقاب بندهنهم من برا بالتتبيلة بشكل ممتاااز احنا مادهناهم بالاول عشان نستحكم نمسكهم ونحشيهم ، هلا لازم ندهنهم كويس.

—بنجهز ورق قصدير وبندهنه بالتتبيلة من جوا وبنحط عليه ورق غار وقرقة عيدان وممكن روزماري وبنحط قطعه الرقبة اللحمة من تحت والعظمة من فوق ضرورية هالحركة عشان تستوي معك.

ملاحظة/

ممكن نضع ورقة زبدة داخل ورقة القصدير بتحميها من الحرق او الالتصاق. وبنلفها عادي.

— بنلف الرقاب بورق القصدير كويس وبنحطهم بصينية وبالصينية بنحط ورق غار وقرفة وروزماري وبنحط ماء مغلي لمنتصف الصينية وعالفرن على احمى حرارة لمدة ساعتين ونص لثلاث ساعات بس لازم نتفقدها باستمرار بالمي لا تخلي المي تنشف بتضلي تزيدي مي مغلي للصينية.

—بعد ساعتين ونص بنطفي الفرن وبنترك الرقاب تهدى شوي قبل ما نفتحها خمس دقايق وافتحي القصدير رح تلاقيها ذاايبة وريحتها بتشهي.

خامساً/التقديم

قدمي الرقاب المحشية مع ارز مبهر زيادة وسلطة ولبن وصحة وهنا.

35 تعليقاً

  1. ما شاء الله تبارك الرحمن اكل رووعه ووبفتح النفس مميزه بكلشي الله يحميكي ويسلمو اديكي حبيبتي ام جاسم ويعطيكي الف عافيه الله يباركلك بصحتك وعيلتك يا رب 😘😘
    عنجد فتحتي نفسي عليهم ما شاء الله

  2. ماشاء الله تبارك الرحمن عنجد انك مبدعة ومنظرهم بيفتح النفس تسلم إيدك حبيبتي والله يحميك ويحفظك لعيتلك ونيالهم فيك😍😘😍😘
    جد ولا احسن مطعم 😍😍😍😍
    انا صارلي متجوزة سنة ونص ولا طبخت اللحمة نهائيا ببيتي لان جوزي ما بيحبها ولا بيحب ريحتها بس انا بحبها😭😭😭😭

  3. جد يعطيك الف عافيه
    والله اكله بترفع الراس قدام المرضي تبعي
    ان شاء الله رح اجربها
    بس سؤال كيف احكي لجوزي انو الرقبه يطلعلياها متل تبعوتك الي في صور
    هينؤ حفظتها مشان ارجع الها ان شاؤ الله

  4. بنات كتبت بداية الجزء الأول من القصة اللي ألفتها يوم الخميس بوقت العشاء وأرسلته لزاكي ولليوم مانزلت ايش المشكلة
    طبعاً أنا كتبتها مكان الوصفات للطبخ لأنة بكتبها من راسي تلقائياً لأني حافظ للنص وللسيناريو بخيالي
    من تأليفي عليها إسقاطات من واقعنا
    وما أعرف طريقة ثانية لتنزيل القصص
    بس مدري ليش لليوم مانزلت
    ياريت زاكي يخبروني المشكلة أكون ممنونه لهم .

  5. بارك الله فيكم جميعا

    نور عين بعلك احكيله رقبة خروف او رقبة جِدي الرقبة يقسمها نصفين عشان تكون احسن حسب مابدك العدد ، واحكيله يخليها من العظم اذا بتحبي بس ساعتها بدك تعملي الحشوة وتحطيها بالوسط وتلفي اللحمة عليها رول لانها بتكون مفتوحة ونفس الخطوات الباقيه.

    امي جنتي تأكدي انه قصتك وصلت الادمن اساليها على اول وصفة

  6. يسلموا ايديكي يعطيكي العافية اللهم صلى على النبي محمد الله يحفظك ام جاسم

    امي جنتي … بدها يومين لتنزل شكرا على القصص يلي بتكتبيهم

  7. بصراحة خلص الكلااااام ومو عارفة اعبرلك عن اعجابي بإتقانك وابداعاتك الرائعة اللي مالها وصف
    متألقة كالعادة يا ملكة الله يباركلط ويسعدك ويهني اهل بيتك فيكي ويجزيكي عنا كل خير😘

اترك تعليقاً

لن يتم نشر عنوان بريدك الإلكتروني.