حلا راقي بمكونات متوفرة وطعم رهيب من اختراعي سلسلة وصفاتي لرمضان 9

57 6٬238
 

حلا راقي بمكونات متوفرة وطعم رهيب من اختراعي سلسلة وصفاتي لرمضان 9

حلا راقي بمكونات متوفرة وطعم رهيب من اختراعي من "سلسلة وصفاتي لرمضان" ♡9♡

حلا راقي بمكونات متوفرة وطعم رهيب من اختراعي سلسلة وصفاتي لرمضان 9

حلا راقي بمكونات متوفرة وطعم رهيب من اختراعي سلسلة وصفاتي لرمضان 9 , معكم صديقة زاكي الشيف الموهوبة , كنت قاعدة بأمان الله واذ بهرمون الحلويات طلع لأعلى مستوياتو عندي ومابخفيكم انا ضعيفة قدام هالهرمون هههههه بس المشكلة انو كان عبالي شي جديد فعملت حملة تفتيش عالمكونات بالمطبخ ولاقيت بالفريزة عندي بواقي كيك وبالبراد موز وصلصة كراميل محفوظة بالبراد كمان فقلت وجدتها وجدتها على خطى نيوتن يعني ههههههه جربتها بهالطريقة واكتشفت لحظتها انو هالاكتشاف احلى من اكتشاف الجاذبية وبدغدغ المشاعر أكتر هههههه المهم تعالو لحقوني نحكي بالمقادير لأنو شكلي فصلت

المقادير

  • بواقي كيك
  • باكيت او باكيتين بسكوت حسب الكمية
  • موز مهروس منيح
  • شوية جوز هند حسب الرغبة
  • صلصة الكراميل عبارة عن:
  • كوب وربع سكر
  • ربع كوب ماء
  • 2 ملعقة كبيرة زبدة
  • نصف كوب حليب
  • 2 ملعقة كبيرة قشطة

الخطوات

☆بسم الله الرحمن الرحيم☆

اول شي منطحن البسكويت مع بواقي الكيك ومنحطهم عجنب

تاني شي منعمل صلصة الكراميل

منحط السكر عالغاز لحالو بطنجرة ناشفة تماما ومنتركو ليتكرمل منضيف عليه المي ومنحرك

بالأول رح يمسك ببعضو وبعدا رح يبلش يرجع يفك المهم نضل نحركو ومنضيف عليه الزبدة ومنحرك وبس يدوبو ويغلو مع بعض منضيف القشطة والحليب ومنحرك منيح لتمتزج كل المكونات مع بعضها وصار عنا اطيب صوص كراميل جاهز وفينا نحتفظ فيه بمرطبان زجاجي مغلق منيح ونحطو بالبراد ومنستخدمو وقت الحاجة

هلأ منهرس موز حسب الكمية اللي رح نعملها وحسب حجم الموز كمان لأنو احيانا بيجي طولي ههههههه

هلا بقى منخلط كل هالأطايب مع بعضها بعدين منضيف جوز الهند

ليش ياحزركم تركت جوز الهند للأخير

لأنو لو انضاف من الاول كان ممكن يتشتش شوي بالصلصة والموز فأنا حبيت ضيفو بعد ما اخلط الصلصة والموز مع الكيك المطحون ليحافظ نوعاً ما على قوامو

والتشكيل والتقديم طبعاً متل ما بتحبو

انا هون قدمتها بطريقتين

مرة عملتها كرات ومرة حطيتها بقالب الكب كيك وحطيت بقلبا من نفس صوص الكراميل وسكرتها

((اللي ماعندها قالب كب كيك تعملهم بفناجين القهوة بيطلعو تحفة ولا تدعو أي شيء يقف في طريقكم هههههه))

بكل الأحوال والأشكال سوف نفترسها هههههه

المهم جد جربوها طعمها مميز وهيك مدري كيف مو عارفة عبرلكم بس تجربوها بتعرفو لحالكم

عفكرة عم اكتبلكم الوصفة والساعة 3 وربع بالليل وانا راسي وألف سيف مابنام إلا لتخلص

بتتذكرو عيون توم بتوم وجيري؟؟ اها نفس المنظر ههههه

لهيك دعولي يرضى عليكم وان شاء الله تكون عجبتكم الوصفة وتصبحو على ألف خير ههههه♡

عرض التعليقات (57)