img
الرئيسة / معجنات / طريقة عمل خبز التوست بطبعة الفهد

طريقة عمل خبز التوست بطبعة الفهد

/
/
/
1732 مشاهدات

 

طريقة عمل خبز التوست بطبعة الفهد

خبز التوست بطبعة الفهد

طريقة عمل خبز التوست بطبعة الفهد

طريقة عمل خبز التوست بطبعة الفهد , معكم صديقة زاكي الشيف الموهوبة ,

المقادير

  • 2 كوب حليب سائل دافئ
  • 6 م.ك سكر
  • 1 م.ك ملح
  • 1م.ك خميرة فورية
  • 1م.ك بيكينج باودر
  • م.ص خل
  • بيضة
  • 2م.ك زبدة بحرارة الغرفة او زيت ذرة
  • 4 كوب طحين ممكن اقل
  • كاكاو
  • حليب سائل اضافي

الخطوات

السلام عليكم ورحمة الله وبركاته

اللي بعيش كثير بشوف كثير ومن لما شفت نوع هالخبز قررت اعمله واجربه لانه ملفت للنظر وشكله حلو وتغيير عن المألوف خلينا نشوف الطريقة

أولاً/ العجين

بنخلط كل المواد عدا الطحين مع بعض بعدين بنبلش نضيف الطحين بالتدريج اول كاستين دفعه وحدة بعدين نص نص لحتى تمسك معك العجينة وتكون طرية بنضيف ملعقتين زبدة بحرارة الغرفة وبنكمل عجن لحتى تنعم مزبوط وتصير ملساء.

ثانياً/ التلوين

بنقسم العجينة 3 اقسام نصف وربعين

—النصف بنتركه ابيض وبنغطيه

—الربع الأول بنضيفله نصف م.ص كاكاو وملعقة حليب سائل وبنعجن لحتى تندمج مع بعضها وتلوّن لون بني فاتح خفيف وبنغطيها .

—الربع الثاني بنضيفله 3 م.ص كاكاو و3 م.ك حليب سائل وبنعجن لحتى تتلون بني غامق وبنغطيها.

— بنتركهم يتخمروا ويتضاعف حجمهم.

ثالثاً/ التشكيل

وهاي أهم خطوة

—بنقطع كل لون من العجين عشر قطع

—بنبرم اول شي اللون البني الفاتح رول

— بنفرد البني الغامق بالطول وبنحط البني الفاتح عليها وبنسكر عليها بالغامق موضح بالصور.

—الان الرول اللي نتج بنحطه على العجينة البيضاء وهي مفروده طوليا وبنرولها.

— يعني صار عنا قطعه أبيض داخلها قطعه غامق واللي داخلها قطعه فاتح، يارب تكون وضحت.

— بنجمع الرولات كلهم على بعض على شكل اسطوانة وبندحرجهم بلطف عشان ياخدوا شكل اسطواني.

—بنضع الرغيف اللي نتج بقالب توست وبنتركه يتخمر مزبوط ساعة لساعتين جنب الصوبة المهم لازم يتضاعف حجمه.

رابعاً/ الخبز

بعد التخمير بنخبزه في فرن محمي على 180 لمدة 35—45 دقيقة بالرف الوسط بطول بالفرن لانه من جوا بده وقت ليستوي .

ملاحظة/

اذا شفتيه من برا استوى ونفش بسرعة لا تطلعيه لا تستعجلي بكون عجين من جوا خليه ياخد وقته، واختبريه زي الكيك بعود خشب اطا طلع عليه عجين بكون بده وقت كمان.

خامساً/التقديم

بعد الخبز رح تتفاجئي بحجم الرغيف لانه رح يتعملق اتركيه شوي يهدأ لا تقطعيه دغري . وغطيه بقماشه مش ببلاستيك.

—قطعيه واستمتعي بأجمل خبز توست ممكن تشوفيه وممكن تحمصيه وتعمليه سندويشات رائع وصحة وهنا.

ملاحظة/

الكاكاو ما اله طعم بالمرة بالخبز يعني طعمه خبز عادي.

50 تعليقاً

  1. الله عليكي والله طلعت عيني بس شفتوو لهالخبز ودورت ع وصفاتووو لقيتو كلو مواقع اجنبيه وخفت لأنها مش موثقه ميه ميه ….. بس هسه صارت اكيددد موووثقه تسلم ايدك وكالعاده ع التجربه 😍😘😘😘😘

  2. ما شاء الله تبارك الرحمن ابدااع بكل ما للكلمه من معنى
    يسلمو اديكي حبيبتي ام جاسم الله يباركلك ويعطيكي الف عافيه دمتي متميزه بوصفاتك الراقيه 👌🏻👌🏻👌🏻

  3. بارك الله فيكم جميعا

    شامه لا انا مو شيف والطبخ هوايه عندي
    واللي بخلي اي حد يتعلم الطبخ والحلويات انه يجرب الوصفات مرة ومرتين وعشرة لحتى تزبط وانا ما بيأس بضل اجرب لحتى تنجح معي الوصفات وبنزلها.

  4. ام حاسم يختي عليكي وعلى افكاررك بس احكيلي من وين بتجيبي هالافكاااار الفظيعة هاااي
    يسسسلم ايديكي وعينيكي يااارب ويعطيكي الف عافية
    شكلها بجنن

  5. تسلم يمينك يارب ماشاء الله عليكي مبدعه ومتألقه تتهنو «««معلش سؤال خارج الموضوع اشتريت رز فلفيلهم ونقعت كلعاده وطبختو لكن ما استوى ابدا شرب الميه وضل ناشف وما استوى وضليت اجرب اني اطول بنقع وازيد المي لما اطبخو وعبث مازبط المهم نقتو مره تانيه لمدة 3ايام وزبط رز بحليب طيب انا اشتريت واتورطت شو اعمل مع هيك نوعيه واسفه طولت عليكي

  6. بارك الله فيكم وجزاكم كل خير

    ام البنات والله ماعمري جربت ارز فلفليهم وغريبة انه هيك ، مافي غير تضلي تجربي لحتى تعرفيله .
    جربي انقعيه بمي بتغلي ساعة وحطي على مية النقع ملعقة خل . ولما تطبخيه وتتنشف المي اللي على سطحه غطيه بقطعة قصدير تحت غطا الطنجرة وقت ما توطي الغاز عليه ووطي الغاز على ااخر شي يعني يادوب طالع شعله من عين الغاز.
    وإذا مازبط معك بالمرة مافي غير تضلي تعملي رز بحليب لحتى يخلص شو بدك تعملي! وبعوض عليكي رب العالمين.

    احسن رز امريكي صنوايت.

  7. يسلموا ايديكي والله ما خليت جربت بس زوجي الله يسامحو ما رضي يبدل المهم شكرا الك على ردك والله الصراحه طريقتك رز بحليب زاكيه كتير بس نوعية الرز مضروب بس زبط واستوى رح اهريهم رز بحليب يستاهل ليش مارد عليه يمكن اجرب اعمل كراويه واطحنو واشوف كيف •••• اسفه ازعجتك كتير دمتي بخير اينما كنتي

اترك تعليقاً

لن يتم نشر عنوان بريدك الإلكتروني.

Translate »