img
الرئيسة / حلويات / طريقة الغريبه بالصور الغريبة الصح بتذوب بالفم ذوبان

طريقة الغريبه بالصور الغريبة الصح بتذوب بالفم ذوبان

/
/
/
5338 مشاهدات

 

طريقة الغريبه بالصور الغريبة الصح بتذوب بالفم ذوبان

طريقة الغريّبة الصح بتذوب بالفم ذوباااان

طريقة الغريبه بالصور الغريبة الصح بتذوب بالفم ذوبان

طريقة الغريبه بالصور الغريبة الصح بتذوب بالفم ذوبان , معكم صديقة زاكي الشيف الموهوبة ,

المقادير

  • 2 كوب طحين
  • 1 كوب سكر بودرة
  • 1 كوب سمنة طرية غييير مذابة

الخطوات

غريبة

السلام عليكم ورحمة الله وبركاته

رغم انها من اسهل الحلويات الا انه كثير ناس مابتزبط معهم اما بتتشقق او بتفرش وبتسيح واليوم جبتلكم الوصفة الصح وان شاء الله بتجربوها وبتعجبكم

أولاً/ العجينة

اول شي بنخفق السمنة شوي بس تصير كريمية (هون لازم انبّه انه السمنة لازم طرية لا جامدة ولا سايحة وبتفرق بالقياس كمان يعني كاسة سمنة جامدة غير كاسة سمنة سايحة غير عن كاسة سمنة طرية)

—بنضيف السكر وبنخفق لحتى يبيض اللون هون خلص دور الماكينة.

—بنضيف الطحين وبندمجه معها باليد عن طريق اللمّ والتجميع وممكن بعض الضغطات براحة اليد بس ممنوع العجن لانه بيقسي الغريبة.

—بنغطيها وبنريحها بالثلاجة ساعة

ثانياً/ التشكيل

بعد تبريد العجينة بنلاقيها جمدت وبتتفتت وهاد عادي بنفركها كلها لحتى تفتت بالكامل وبنبلش دعك براحة اليد بس لحتى ترجع طرية لا تزوديها لانه حرارة ايدك ممكن تسيحلك السمنة وتخرب العجينة.

—بنشكلها زي مابدنا دوائر او حلقات او حرف s

وبنصفها بالصواني وبنرجعها عالثلاجة لمدة بس ما يسخن الفرن.

ثالثاً/الخبز

بنشوي الغريبة بفرن محمي على 180 لمدة 15—20 دقيقة بالرف العالي من فوق والفرن مشتعل من تحت فقط.

*اذا كان الفرن ساخن رح تتشقق معك واذا كان بارد رح تفرش معك وتصير شوربة

ملاااحظة

هاي المدة بتطلع الغريبة بدون لون وهيه هيك الغريبة الصح بس اذا حبيتي تحمريها بتتركيها تبرد تماااما بعدين بتعطيها وجه تحمير عالشواية خمس دقائق. انا حمرت صينية وتركت صينية بدون تحمير.

* ليش لازم تبرد قبل التحمير؟

اذا حمرتيها وهي سخنة بتفصل من النص الحبة .

—بعد الخبز ممنوع لمسها الا لحتى تبرد لانها بتكون طرية وحساسة وبتمسك حالها بس تبرد.

رابعاً/التقديم

صفيها بصحونك وقدميها لحبايبك مع فنجان قهوة او كاسة شاي وصحة وألف هنا.

129 تعليقاً

  1. شايفة ام جاسم هههه لانو اي شي بتوديه بكون ثقة 100بلمية ولا علية غبار الله يوفقك انتي بتتعبي واحنا على بارد المستريح مناخذ الوصفة الله يجعلها في ميزان حسناتك يارب

  2. الله يجزيكم الخير على كل الدعم يلي بتقدمولي ياه وان شاء الله بضل عند ثقتكم وحسن ظنكم.

    اميرة بأخلاقي يعطيكي العافيه وثقتك غاليه .

    🌿🌿🌿 ان شاء الله بتجربيها اليوم وبتعجبك . رح انتظر رأيك

  3. ماشاء الله يسلمو ايديكي اختي ام جاسم انا كل مفضلتي الك الله يجزيكي عنا كل خييير ولو سمحتي طلب ادعمينا بوصفه لكعك العيد طريه وبذوب ذوب بالفم

  4. كعك او معمول طحين

    7 كوب طحين
    نصف كيلو سمنة بحرارة الغرفة غيييير مذابة او كاستين ونص.
    بنضيف ملعقة دقة كعك ورشة ملح للطحين وبنخلطه بعدين السمنة وبنقلب من تحت لفوق ممنووووع العجن لحتى تتداخل السمنة بالطحين مزبوط.
    بعدين بنعمل خليط سائل مكون من 3/4 كوب ماء عليه 8 ملاعق سكر مطحون و4 ملاعق حليب و3 ملاعق ماء زهر وبنذوبهم مزبوط وبنضيفهم للطحين وبنقلب من تحت لفوق بالللم والضغط ممنوع العجن حتى تمتص العجينة كل السوائل بنغطيها وبنريحها ساعتين بالثلاجة.

    بعدين بنشكلها اساور او بالقوالب وبنحشيها وبنرجع نريح الصواني ربع ساعة قبل الشوي.
    بنشويها بفرن محمي على اعلى حرارة بالرف الوسط لمدة 7 دقائق تقريبا بس لحتى تاخد لون خفيف.

  5. أماني

    يسلمو دياتك ام جاسم
    ما شاء الله وصفاتك لا يعلا عليها
    بكل أمانه بتعطينا الوصفة
    احلى شي في الوصفه شرحك
    الوافي
    الله يعطيكي الف عافيه

  6. ام جاسم غلبتك معي
    بدي اجرب بسكوت البسكريم انتي كاتبة بالتعليقات انه ممكن نستخدم شكولاتة منزلية بس لازم تكون ماسكة شوي.
    بدي اسألك طريقة بديل النوتيلا الي انتي عامليتها بتزبط او اجمدها شوي؟

  7. الله يعافيكم ويبارك فيكم وجزاكم الله كل خير يا رب.

    توت بري اه طبعا بديل نوتيلا بزبط وبدك تخليه متماسك بإنك تزيدي كمية الزيت كل مازاد بتشد هيه اكثر.

  8. ام جااسم بدي اغلبك معي حبيبتي
    هلا بدي اعمل طريقة الدوناات
    انتي حطيتي الحليب والبيض والسكر والخميره والزبده كله مع بعضه؟؟؟
    هيك يعني

  9. ام رواد اتبعي الطريقة على الدونات المكتوبة
    لإنه الصور عليها الطريقة باختصار مو بالتفصيل
    وجواب سؤالك
    بنذوب ملعقة زبدة عالغاز عنار وسط وبس تذوب تماما بنرفع الاناء عن النار وبنضيف الحليب والسكر والملح وبنحركهم لحتى تنزل حرارة الخليط بضيف البيض وبحرك بالمضرب اليدوي والخميرة وبنتركهم 5 دقائق يتفاعلوا.

    —بنضيف الطحين وبنخلط كويس المزيج ما بياخد شكل كرة ولا متماسك هوه دبق ومايل للزوجة، بنغطيه وبنتركه يتخمر 

  10. يعطيكي العافية حبيبتي ام جاسم رح جربا ان شاء الله في اخت بتقول اميري عفوا عالسؤال بس ليش كلمة اميري بدل زوجي يعني

  11. يسلمو اديكي حبي ام جاسم والله انك اجيتي ع الوجع شو مشتهيتها ومتكسل اعمل زمان ما عملتها وانا طريقتي نفس طريقتك بالزبط والله روووووعة ومضمونة ان شاء الله عن قريب رح اعملها 🤗🤗😉😉💖💖💖💖💖💖

  12. نور
    حبيبتي ام جاسم الله يبارك فيكي بس سؤال بحمي الفرن قبل ما حطا او كيف لان عم تقولي ما يكون بارد ولا ساخن الفرن هلا عم ساويا حطيتا بالبراد

  13. اشكركم صبايا وجزاكم الله كل خير

    ٤
    ضيفي لخلطة كعك العيد 2 ملعقة سميد مطحون بودرة بصير بفتّ ، واذا بتحبيه ناشف عجنيه تعجين ، هوه اصلا ما بيتعجن بس لم وضغط ، بس اذا بدكياه ناشف شوي وبيقرش عجّنيه تعجين.

اترك تعليقاً

لن يتم نشر عنوان بريدك الإلكتروني.