img
الرئيسة / سلطات و مقبلات / مخلل الخيار والجزر

مخلل الخيار والجزر

/
/
/
1752 مشاهدات

 

مخلل الخيار والجزر

مخلل الخيار والجزر

مخلل الخيار والجزر

مخلل الخيار والجزر, معكم صديقة زاكي الشيف الموهوبة ,

المقادير

  • خيار حجم صغير
  • جزر
  • ماء
  • ملح خشن
  • خل ابيض
  • سكر
  • مكونات اختيارية:
  • فلفل حار
  • ثوم

الخطوات

السلام عليكم ورحمة الله وبركاته

المخللات مافي مائدة بتخلى منها سواء برمضان او غير رمضان ولكن برمضان تحديدا والعزايم لابد من تواجد فاعل للمخللات وعلى رأسها الخيار والجزر. بالنسبة للفت ما عملته هون بس كتبته مع الطريقة . وهيه الطريقة اصلا معتمده لكل انواع المخللات مابفرق نوع عن نوع.

أولاً/ تنظيف الخضار

لازم ياصبايا نغسل الخيار تحديدا بمي فيها خل عشان تقتل البكتيريا اللي ممكن تسبب تعفن المخلل او ظهور الريم الابيض على وجه المخلل.

—الجزر مش ضروري غسله بالخل لانه بقشره ما بخلله بقشرة فلو بدك تخلليه بالقشر اغسليه بماء وخل بعنايه.

—بالنسبة للفت انقعيه بمي لحتى يتحلحل التراب وتقدري تنظفيه مزبوط وانا بفضل تقشريه.

—والمرتبانات كمان إذا بلاستيك حطي فيهم شوية خل وغطي وحركي الخل بكل الاتجاهات واقلبيه بعدين على غطاه لحتى تستخدميه وهوه فيه الخل عشان الغطا يتعقم.

(المرتبانات الزجاجية طريقة تعقيمها في نهاية الوصفة)

ثانياً/ محلول التخليل

لازم تلتزمي بالعيارات عشان يطلع مخلل مزبوط ممكن في ناس كثير بتستخدم طرق بدون قياس وبينجح معها عالتعويد بس بفضل القياس .

—لكل كوب ماء ملعقة كبيرة ممتلئة ملح خشن خالي من اليود مش ملح المائدة لإنه اليود بخلي المخلل يطرى بعد فترة. وملعقة خل ابيض . وعلى كامل المرتبان ضيفي م.ك سكر بحافظ على القرشة.

—والماء لازم مفلتر او مغلي ومبرد

ثالثاً/ التخليل

—بتعبي الخيار صحيح مش مقطع ولا مفتوح من الوسط ممكن إذا مستعجله عليه تفتحي بالسكين فتحه بوسط الخيارة، لازم يتعبى المرتبان كامل يعني إذا الخيارات قليلة اختاري مرتبان صغير على قدهم ليش؟ لانه إذا حطينا كمية قليلة في مرتبان كبير اول شي رح تطوش الخيارات وما نعرف نغمرها بالمي وثاني شي بتكون تراكيز الملح بالمي عاليه عليه فبطلع مالح.

ملاحظة/ سبب فضاوة مخلل الخيار من الداخل

السبب نوع الخيار اذا كبير رح يفضى من جوا بناء على الخاصية الاسموزية رح تنتقل المي الكثيرة داخل الخيارة للوسط الأعلى تركيز وهوه المحلول الملحي.

—عشان هيك اختاري الخيار الصغير ورفيع مابيفضى ابدا.

—والجزر بنقطعه لانه قاسي وبطول بالتخليل وبنعبي مرتبان كامل.

—اللفت بيتقطع قطع كبيرة عشان يطول معك وما يذوب او يطرى . وحطي معه قطع شمندر بنفس الحجم عشان يتلون باللون الزهر الحلو.

—بنضيف المحلول للمرتبانات والي بحب الحار يضيف فلفل حار واللي بحب نكهة الثوم يضيف اسنان ثوم صحيحة وبنغلقهم وما بنفتح عليهم قبل اسبوعين .

رابعاً/ اسباب عفن او ظهور الريم الابيض على وجه المخلل

1. الخضار غير معقمة

2. المرتبانات غير معقمة وعفكرة طريقة التعقيم الأكثر كفاءة مش الخل بل هيه الغلي انه تغلي المرتبانات واغطيتهم بماء لمدة خمس دقائق او تدخليهم فرن حامي خمس دقائق ولكن لانه مرتباناتي بلاستيك مابقدر الا بالخل اعقمهم.

3. استخدام اليد في اخراج المخلل من المرتبانات لانه اليد ممكن تدخل بكتيريا للمخلل فاستخدمي شوكة او مصفى صغيرة.

4. ماء الحنفية لإنه غير معقم

نصيحة/ حاولي استخدمي مرتبانات زجاجية افضل من البلاستيك.

91 تعليقاً

  1. الله يعافيكم ويبارك فيكم صبايا

    ام جنى انا ما بحط المخلل بالشمس هوه لونه حلو بدون شمس وبصراحة ولا عمري جربت.

    اما بالنسبة للخل لا ليش يقتل الفيتامينات بالعكس الخل منيح ومعقم وبينحط عالسلطات ، الحرارة هيه اللي بتقتل الفيتامينات انه تنطبخ زيادة الخضرة.

  2. ما شاء الله عليكي ام جاسم وانا نفس عيارك بستعمل للمخلل ومع مي مغليه و مبرده وبيضل المخلل معي منيح ما شاء الله و متل ما تفضلتي ما لازم ايدنا توصل للمخلل يوم بدنا نستخدم لازم بملقط او شوكه…..بس سؤال كانوا يحكوا الستات الكبار بالعمر انه الست اللي بتعمل المخلل و عليها الدوره الشهريه او بتشيل المخلل بايدها من المرطبان و عليها الدوره انه المخلل بيخرب مين سمع بهيك اشي لأني انا وحده موسوسه من هالشغله

  3. ما شاء الله عليكي 👍😍الله يمدك بالصحه
    الله يباركلك بعمرك
    عندي سؤال لو سمحتي امبارح عملت معمول وكبسته بالمكبس تبع المعمول بس الحبه اتشققت شوي من الطرف قبل ما احطه بالفرن شو السبب حابه تطلع حبة المعمول كامله من غير ما تشقق يا ريت تفيديني
    مشكوووره 🙂🙂

  4. سلمت يداكي.الله على مخلل الخيار وخصوصي مع الملوخية وشوربة البامية والفاصوليا يااااسلااااام.الله عليكي يام جاسم دائما متالقة

  5. ماشاء الله تبارك الرحمن بيشهي نفس كريقتي بالمخلل تسلم ايدك حبيبتي والله يعطيك الصحة والعافية😘😍
    بس سؤال بالنسبة للوصفة البروستد تبعتك ضروري يكون الجاج بجلدو ولا عادي ي ريت تجاوبيني لاني حابة اعملها بكرا؟!

    • ام كرم للاسف البروستد بده دجاج بجلده عشان تمسك الطبقة المقرمشة عليه وعشان تضل الدجاجة طرية وماتتعرض للنشفان، بدون الجلد مارح تمسك وإذا مسك منها بكون شي خفيف وبتنشف اللحمة.

      معلش استني لحتى تجيبي دجاج بجلده واهم شي يكون دجاج صغير وزن الدجاجة كيلو بس عشان يستوي.

    • عفوا ازا سمحتيلي اعطي رأي ….انا بعمل الدجاج للبروستد بدون جلد ابدا .. وتمسك الطبقه عليه بسكل رائع وكميه ممتازة …للنو انا بعملو بطنجرة عادية مش ضغط وما بغطي عليه الطنجرة ….فبضل القشره متماسكه وما بتطلع لانو فش تكاثف بخار

      وتقبلي رأي ومروري حبيبتي ام جاسم ⁦❤️⁩⁦❤️⁩

    • ام كرم حبيبتي. بطنجرة عاديه الزيت لازم يكون حامي ..وضع تلات قطع او اربعه فقط. بتوطي الغاز لتحت ….ممنوع تحركي القطع قبل مرور عشر دقائق

      والجاج لازم يكون صغير …بدهم ربع ساعه فقط …بعد الربع ساعه ارفعي الغاز وخليهم يقرمشو تقريبا ثلاث دقائق

      وعليكم بالف هنا وصحه

  6. يعطيك الف عافيه…👍
    اخيرا عرفت ليش،بيطلع العفن الابيض ع المخلل
    مع اني ماشيه صح بالمقادير
    السبب عدم التعقيم

    مش عارفه كيف امهاتنا وجداتنا كان يزبط معهم كل شي من دون هيك اشياء سبحان الله ،،،
    انت معلم👍👍

  7. ماشاء الله تبارك الله روووعه ومنظرو بيشهي بدي اسالك حبيبتي عن طريقه مخلل الفليفله الطويله كيف هيك بتصير لونا فاااتح واصفر بيشهي بالمحلات انا معي ببضل لونو غامق نزليلنا طريقتو الله يسعدك😍😍😍😍

  8. يسلمو ولله المعلومات مهمة كتير رح امشي على نفس الطريقة لانو دائمن بصير على وش الطربان ابيض طعمتو انا بكبسون بقناني بيبسي

    • اهلا فيكي هند نصيحة استخدمي مرتبانات زجاج هيه الافضل بلا منازع لانه بتتأكدي من تعقيمها بالغلي.
      يعني ممكن تاخدي كل الاحترازات والاجراءات اللازمة وبالاخر يطلعلك الريم الابيض لانه القنينة او مرتبان البلاستيك مش معقم كفاية.

  9. ما شاء الله عليكي شيف ام جاسم ربي ينفع فيكي ويزيدك من فضله حضرتك الك دور كبير في تنمية مهاراتنا بالطبخ والي بعجبني انك بتبلشي معنا من الأشياء البسيطة والاساسية لحتى نصير ستااات بيوت معدلااااات والك كل الشكر
    ومخللاتك طالعين بشهوووو والوانهم بياخدو العقل 😍

    • ربي يسعدك زي ما بتسعديني دائما بتعليقاتك الرائعه والمشجعه وانتي واضح انك ست بيت شاطرة ومعدلة مجرد انك دائما بتابعي وبتسألي معناته اهتمامك بالمجال كبير وان شاء الله كلنا بنتعلم من بعض.

  10. يعطيكي الف عافية حبيبتي ام جاسم شغل البيت انظف واطيب من الجاهز ربي يباركلك ياعسل نفس طريقتي بس انا بضيف ملح ليمون وكزبرة ناشفة بيعطو طعم ولا األذ 😋😘😘

اترك تعليقاً

لن يتم نشر عنوان بريدك الإلكتروني.