img
الرئيسة / أطباق رئيسية / طريقة عمل خبز بالبصل

طريقة عمل خبز بالبصل

/
/
/
3021 مشاهدات

 

طريقة عمل خبز بالبصل

خبز بالبصل

طريقة عمل خبز بالبصل

طريقة عمل خبز بالبصل , معكم صديقة زاكي الشيف الموهوبة ,

المقادير

  • للعجين:
  • كيلو ونص طحين
  • ماء دافي
  • ملح
  • سمسم
  • حبة البركة
  • لصينية الدجاج:
  • دجاجة منظفة ومقطعة
  • ملح
  • رشة فلفل
  • رشة كمون
  • حبة بصل كبيرة
  • زيت زيتون
  • ورق قصدير
  • للبصل ثلاث حبات بصل كبار مفروم ناعم او حسب الحاجه
  • كاستين ونص زيت زيتون
  • باكيت ماجي اختياري
  • رشة فلفل
  • رشة كركم
  • رشة كمون
  • ملح
  • للزينة:
  • سماق
  • لوز

الخطوات

السلام عليكم ورحمة الله ،،،

اكلتنا اليوم اكلة تراثية ومشهورة بالرمثا ،، بتتكون من عجين عويص وبصل وزيت وبتنعمل مثل مبدأ المطبق

بسم الله نبدأ،،،،،

اول شي بنخلط الطحين مع السمسم وحبة البركة والملح ونعجن بالماء الدافي لحتى نحصل على عجين طرية نوعاً ما وبنتركها ترتاح اقل شي ربع ساعة.

بعد ما ارتاحت العجينة بنكورها كرات او اقراص حسب حجم الرغيف اللي بدك اياه او حسب حجم فرنك ،،، انا فرني صغير عشان هيك عملتهن حجم حبة الليمون ،،، بس نكمل تكوير العجين بنغطيه بنايلون وبنتركه يرتاح من ثلث ساعه ل نص ساعه اقل شي .

بهاي الفترة اللي تركنا العجين يرتاح بنذبل البصل بطنجرة بنحط البصل المفروم والزيت والملح والكركم والفلفل الاسود والكمون والماجي ووعالنار بنحركهن وبنتركهن يتذبلو عالهدا لحتى يستوي البصل ويذبل بنتركه يبرد.

خطوات تطبيق العجين والبصل مع الزيت

القطعه الاولى:

بنجيب اول قطعه عجين بنفردها وبندهنها من خليط الزيت والبصل وبنطبق اطراف الرغيف لجوا مع دهنهن بالبصل والزيت لحتى يتكون معي مربع بنشيله وبنحطه ع جنب.

القطعه الثانية:

بجيب كرة عجين ثانية وبفردها وبدهنها بصل وزيت وقبل مااعملها مربع بحط بنصها مربع العجين اللي عملته بالاول وبعد هيك بعملها مربع نفس ماعملت بالقطعه الاولى مع دهن الاطراف بالزيت والبصل وبنحطة ع جنب

القطعه الثالثة:

بجيب كرة عجين ثالثة وبفردها وبدهنها بزيت وبصل وبحط بقلبها المربع المكون من قطعتين عجين اللي عملناهم بالاول وبنطبق العجين مربع كمان مع دهن الاطراف بالزيت والبصل وبنحطه ع جنب كمان مرة

القطعه الرابعه:

بنجيب الكرة الرابعه والاخيرة بالرغيف وبنفردها وبندهنها بزيت وبصل وبنجيب المربع المكون من ثلاث قطع واللي تركناه على جنب بنحطه بقلب العجينة الرابعه وبنطبقها مربع مع دهن الاطراف بالزيت والبصل وهيك بنكون كملنا اول رغيف خبز بالبصل بنتركو يرتاح اقل شي نص ساعه وبنكمل باقي العجين بنفس الطريقة كل رغيف مكون من ثلاث او اربع قطع عجين زي مااعملت ويارب اكون وصلتلكم الطريقة مزبوط،

الشوي:

بعد ما كملنا ارغفة الخبز وكل رغيف مكون من 4 كرات عجين مطبقين بقلب بعض وتركناهم يرتاحوا نص ساعه بنحمي الفرن على اعلى حرارة ويفضل يكون الفرن عربي بس اذا مش موجود عادي ،،، بنجيب صينية الشوي وبنحط فيها شوية زيت زيتون وباخذ اول رغيف وبفردو وبحاول مااقرب من الاطراف بس من النص بفردو لحد ماتحسي انه انفرد معك بشكل متساوي بعدها بحط الصينية بالفرن من تحت يعني يكون فوق النار مباشرة وبس يتحمرو الاطراف من تحت بنحطو عالتحمير وبس يتحمر بنشيلو بنحطو على فوطة مطبخ ونرش على وجهو رشة سماق ونغطيه ونكرر نفس الطريقة مع باقي الارغفة.

صينية الدجاج :

بنقطع راس البصل شرحات او ناعم مثل مابتحبي ، وبجيب الجاج المنظف والمقطع وبنضعه بصينية مع البصل ورشة ملح ورشة فلفل اسود ورشة كمون خفيفة جداً وزيت زيتون و وبنخطلهن سوا وبنرتب الجاج وبحطله كاسة مي وبغطيه بقصدير ،،، وعالفرن ساعه وبعدها بشيل القصدير وبحمرو عالجهتين ،

التقديم:

بعد ماكلشي استوا نيجي للتقديم بنحط الخبز بالبصل بصينية تقديم مناسبه وبشيل الجاج من الصينية وبرتبو ع وجه الخبز وبرش للجاج سماق وبزين باللوز المقلي وصحة ومية هنا على قلوبكم ،،، ياريت اكون وصلت الفكرة والطريقة بصورتها الصحيحة والله يعطيكم العافية

90 تعليقاً

  1. ما شاء الله ولا حول ولا قوه الا بالله 😍
    يعطيكي العافيه حبيبتي وربي يبارك بعمرك ويحفظك يا رب أبدعتي يا عمري وعنجد دماااااااار شهتينيييييييي❤😙

  2. ما شاء الله تبارك الرحمن شكلو ولا اطيب عنجد بشهي وبفتح النفس يسلمو اديكي يا معدله وست الستات الله يباركلك وان شاء الله رح اعملها برمضان 😘😘

  3. حبيباتي تسلمو ربي يجزيكم الخير ويسعدكم سعادة الدارين انا بعثت رد لكل وحدة عند تعليقها

    نور حبيبتي ماعاش مين يزعلك المرة الماضية رديتلك تحت تعليقك مباشرة بس يمكن ماشفتي او ممكن تكوني مش محدثة زاكي
    ياريت تحاكيني ك و ك ب ا د
    ببعثلك تعليق على شلة الانس بإسمي هناك

  4. يم يم شيء فاخر عالآخر وبفتح النفس ربي يسلمهم دياااااتك عن جد بشهييي بدي منه😭😉 هو عفكره بشبه المكموره والمسخن😋🥰🌹

  5. ما شاء الله تبارك الرحمن
    يا سلام عالاكل الرمثاوي المميز
    وبدي اشكرك ام هديل لانك بتركزي على اكل منطقتك ومعتزه فيه وهوه فعلا يدعو للفخر وانتي مفخره للشمال وللاردن كلها.
    ريته الف صحة وهنا يارب

    • حبيبتي ام جاسم ربي يجزيكي الخير على كلامك الراقي ،،، اكيد والله احنا بنفتخر بالاردن ومحافظاتها واهلها ،، وعلى فكرة انا بالاصل من محافظة المفرق بس امي رمثاوية وجوزي وولادي من الرمثا بس سبحان الله الوحدة بتنتمي اكثر لأصل اولادها بالذات انا عشت بالرمثا اكثر من المدة اللي عشتها بالمفرق

    • الله يحيي اصلك ام هديل اهل المفرق والنعم منك ومن اهل اولادك واهل الرمثا.
      ربي يبارك فيكي ويكثر من أمثالك
      اللهم امين احبك الله الذي احببتني فيه انتي اخت عزيزة وشيف رائعه.

  6. الف صحه وهنا حبيبتي ام هديل شكله بشهي ذكرتيني باكلات الوالده كانت تعمل فطاير البصل بالفلفل الاسود واللحمه بس كمية البصل هي الغالبه وكانت تعملها بالطابون ويا سلام على اكل الفطاير من الطابون وهي سخنه

  7. يسلموووووو ايديك احبكم بالله
    ممكن طلب انا طلبته من ام جاسم وبدي اشوف ازا انتي بتعرفيه
    نوع من الحلويات بشبه قمر الدين بس حلاته اخف بكتير. وفيه بذور الصنوبر الصغيرة وقزحة وسمسم
    ازا عرفتيه وبتعرفي طريقته ياريت تنزليه

اترك تعليقاً

لن يتم نشر عنوان بريدك الإلكتروني.