img
الرئيسة / حلويات / أروع طريقة القشطة لجميع حلوياتك في رمضان ملكة رمضان

أروع طريقة القشطة لجميع حلوياتك في رمضان ملكة رمضان

/
/
/
4337 مشاهدات

 

أروع طريقة القشطة لجميع حلوياتك في رمضان ملكة رمضان

أروع قشطة لجميع حلوياتك في رمضان ❤

أروع طريقة القشطة لجميع حلوياتك في رمضان ملكة رمضان

أروع طريقة القشطة لجميع حلوياتك في رمضان ملكة رمضان , معكم صديقة زاكي الشيف الموهوبة , بالبداية حابة قول لكل وردة فيكم كل رمضان وانتي بألف خير ومزينة بيتك وعيلتك وراسمة البسمة على وش كل اللي حواليكي وربي يقويكي ويهون عليكي صيامك وشغلك وركضك ببيتك واهم شي يهون عليكي روايح الطبخ المهفهفة انتي وصايمة هههههه ينعاد عليكم وعلى حبايبكم بالخير واليمن والبركة يارب وبحبكم في الله أخواتي الأميرات حبيت نزل هالوصفة رغم معرفة الكتير لطريقة عمل القشطة بس حابة تجربوها بهالمقادير وان شاء الله بتدعولي ويلا ننطلق للمطبخ

المقادير

  • مقادير القشطة:
  • لترين حليب
  • ملعقتين خل
  • 5 ملاعق كبيرة نشا
  • ملعقتين كبار طحين
  • ربع كوب سكر
  • ملعقتين كبار قشطة
  • باكيت فانيليا
  • عجينة كلاج جاهزة أو اذا بتحبو نزلت طريقتها سابقاً
  • سمنة مذوبة
  • للقطر:
  • كاستين سكر
  • كاسة ماء
  • عصرة ليمون

الخطوات

☆بسم الله الرحمن الرحيم☆

أول شي منحط اول لتر حليب عالغاز واول ماتبلش علامات الغليان منضيف الخل ومنحركو مع الحليب ومنخليه دقيقتين عالنار فمنلاقيه بيفرط

منصبو على مصفاية ومنتركو على جنب يبرد ومنجي للخليط التاني

منحط الحليب مع السكر و النشا والطحين ومندوبهم مع بعض عالبارد ولما يدوبو منيح منحطهم عالغاز ومنحرك باستمرار ليتخن المزيج ومابعرف انا ليش بضل بدوق بجميع مراحل العمل ههههه

منضيف القشطة والفانيليا والحليب المفروط اللي لاحشينو على جنب ومنطفي الغاز ومنحرك كل شي مع بعضو تمام ومندوق حبيباتي

منترك الخليط على جنب ليبرد شوي وبهالأثناء منبلش نفرد ورق الكلاج بالصينية وندهن بيناتهم سمنة مذوبة

وبس نحط عدد طبقات قد مامنحب منصب عليهم القشطة ومنفردها منيح

حاليا لا تدوقو خلص صرتو بتعرفو الطعمة

ومنرجع منحط طبقات من العجينة وندهنها بالسمنة

((انا بالبقلاوة تبع القشطة مابحب كتر طبقات عجين مشان الدايت ههههه))

((وكمان بحب خلي اطراف العجينة زايدة عأطراف الصينية لحتى ماتطلع القشطة لبرا أبدا بتلزمنا للدايت ))

بس نخلص منحمل الصينية ومنلحشها بالبراد كم دقيقة

هالخطوة رح تسهل علينا عملية التقطيع كتييييير

سألوني ليش؟

مابدكن تسألوني؟

تسطفلو بدي احكي أنا هههههه

بس نحطا بالبراد رح تجمد السمنة ويتماسكو الورقات كلهم مع بعض وبالتالي ببطلو يرقصو ويعملو عروض استعراضية نحنا وعم نقطع فيها هههههه

اي وخلص يعني منقطعها ومندخلها الفرن الحامي لحتى تشقر منطالعها ومنسقيها بالقطر البارد ومنتركها تتشربو وتبرد وترتاح ويما الحب يمااااااااا

عفكرة كل مرة بقول مابدي احكي هالمرة كتير وبفشل فشل ذرييييييع فخلصو قراءة وخدو بنادول هههههه

ان شاء الله تجربوها وتعجبكم وتدعولي بالبركة ياعسولات

بحبكم قد الدنيا❤

98 تعليقاً

  1. تسلم ايدك نوارة وربنا يبارك فيكي ويعطيكي من خيري الدنيا والاخرة
    ،،، عن تجربة هاي طريقة القشطة بتجنن واحسن من قشطة المحلات انا بكل الحلويات بستخدمها ومبارح جهزتها عشان القطايف .
    الله يعطيكي العافية يانوارة زاكي ❤

  2. نور يا نور شو احكي وشو أقول انربط لساني ع الحكي ومش عارفة بشو بدي اوصفك بالمبدعة بالفنانة بأم الزووووق والإتكيت والى بخفة الدم جد جد يعجز اللسان عن وصفك بس ما بحكي غير ربي يخليلي اياكي يا أغلى واحلى شيف بالدنيا كلها

    وكل عااااااااااام وانتي بألف ألف خير وربي يقدرك ويقدرني ويقدر جميع الأخوات على الصيام والقيام

    محبتك وأختك هنااااء ( أم عمرو ) ♥️♥️♥️

    • آمين يارب العالمين😍
      انا اللي شو احكي وشو قول عن أخت رائعة ومخلصة متلك
      والله شعوري مابينوصف وانا عم اقرأ تعليقك
      ربي يكرمك بكل شي بتتمنيه ويسعدك متل ما أسعدتيني ويخليلي ياكي حبيبة قلبي😘😍
      كتير مشتاقتلك والي زمان ماعم اعرف القط حدا منيح 😅
      أحبك في الله يا هنوءة
      اسم على مسمى اللهم بارك😄

  3. وك يا احلى نوااااره شو هالفن شو هالابداع والاناقه والذوق والترتيب عن جد شو ما بحكي ما بوفيكي حقك ياعسل ماشاءالله عنك تبارك الرحمن الله يحميكي ويحفظك يا أحلى شيف 🥰🥰💞💞🌷🌷

    • ويكرمك ويفرح قلبك متل مابتفرحيني دايما يا أميرتنا الحنونة😍
      كتير بفرح شو ماكتبتيلي لأني بحس بالصدق بتعليقاتك😄
      الله يجبر خاطرك ومايحرمنا منك😘

  4. يسعد مساكي …..ربي يبارك بعمرك وصحتك ويعطيكي لحتى يرضيكي …..طريقتك عجبتني كتييييير قيد التجربه اذا ربنا راد ….انتي رائعه واسلوبك ظريف دمتي بخير

  5. هههههههههههههههههههه 😂 اي بدناش نسال وتحكيلناش استغفرك يارب كل شي غصب 😝😝😝

    الحمدلله والشكر لله اني شفت الوصفه بعد الافطار هههههههههههههههههههه 😂

    يسلمهن ولك دماااار وفوق الدمار بنقطه 😍😍😘

  6. هههههه الله يسعد قلبك و روحك يا سكرة انتي 😍😍
    رمضان مبارك يا عمري و كل عام وانتي بخير وينعاد عليكي وعلى عائلتك و الأمة الاسلاميةجميعا بالصحة و العافية و راحة بال يا رب 😘😘
    ما شاء الله تبارك الرحمن إبداع ما بعدو إبداع 👍
    منظرهم خرافي و الطعم اكيدخطييير
    والله شهيتيني عليهم 😋😋
    يسلم ايديكي الحلوين يا قلبي و ربي يعطيكي ليرضيكي حبيبتي ♥️💕 احبك بالله 💕

  7. يسلمو اديكي يا احلى نور انتي رووووعة واكلاتك رووووعة وحكياتك اروووووع وارررررروع 💖💖💖💖💖😍😍😍😍😍😍

  8. يسلموا ايديكي يا نور اللهم بارك ما شاء الله عنك الله يحميكي رمضان كريم عليكي وعلى كل اصدقاء زاكي
    فن وابداع لا يوصف اشتقنالك واشتقنا لوصفاتك الحلوة مثل قلبك

  9. حبيبتي نور بدي اطلب منك طلب صغنون تعمليلنا البرياني اذا ما فيها غلبة عليكي بأقرب وقت لاني حابة اعمله على طريقتك في القريب العاجل ولك كل الشكر يا غلاتي 💖

  10. كل عام وأنتي بألف خير وسعاده وراحه بال يا قلبي ربي يحفظك ويرزقك الذريه الصالحه إلي تسر قلبك ❤😍
    نغشه وطيوبه وخفيفه دم والووووصفه دمااار أللهم بارك بارك ربي يحميكي يا عمري ويسعدك دنيا وأخره 🌷😘

    ❤أحبك في الله ❤

    • حبيبة قلبي الغالية ام مصطفى وانتي بألف خير ياوردتنا الرقيقة😍
      ان شاء الله العيد الجاية بكون عندك بيبي عسل وطيوب متلك يا غالية😘
      ممنونتك كتير عكلامك الحلو من بعدك انا😍
      أحبك الذي أحببتي فيه😀
      وانا حبك كمانة😄

  11. ما شاء الله عليكي يا نور وصفتك رائعة ابداااع اللهم بارك 😘😘😘😍😍😍😍😍😍
    صحة وهنا يسلم ايديكي
    👏👏👏👏👏👏
    اتقان واناقة رائعة ❤❤
    شر بدي اعمل فيكي اكيد راح اعملها برمضان وعن قريب 😄😅😇😅😇
    ❤❤❤❤

  12. وانتي بالف خير يانوراتنا ربي من عالي سماه يعطيكي ليرضيكي ويحفظلك حبايبك ويخليلك الحجي ويسلم ايديكي على هالمنظر 😀 والف صحةوهنا😘😘

اترك تعليقاً

لن يتم نشر عنوان بريدك الإلكتروني.