img
الرئيسة / أطباق رئيسية / دوالي مشوية ملكة رمضان

دوالي مشوية ملكة رمضان

/
/
/
2972 مشاهدات

 

دوالي مشوية ملكة رمضان

دوالي مشويّة ملكة رمضان

دوالي مشويّة ملكة رمضان

دوالي مشويّة ملكة رمضان, معكم صديقة زاكي الشيف الموهوبة ,

المقادير

  • كمية من ورق العنب
  • رز متوسط الحبة منقوع
  • لحمة مفرومة اختياري
  • بهارات مشكلة
  • كاري
  • ملح وفلفل
  • زيت ذرة
  • هيل مطحون
  • خضار
  • بصل
  • بندورة
  • ليمون

الخطوات

دوالي مشويّة ملكة رمضان

السلام عليكم ورحمة الله وبركاته

ما في أحلى من التغيير والتجديد في الاكل خاصة في شهر رمضان المبارك ، عشان الصيّام الصغار والكبار ، حلو نجدد بالطبخات ، والدوالي اليوم مشويّة بالفرن والنتيجة مبهرة الصراحة كثير طيبة ونكهتها مركككزة الحموضة واضحة بالدوالي وازكى شي اللي بكونوا متحمرين بآخر الكيس ، خلينا نشوف الطريقة

أولاً/ التتبيلة والحشوة

كل ست بيت عندها طريقتها المعتمدة بعمل الحشوة للدوالي ، طريقتي انه بثلب اللحمة المفرومة عالغاز مع ملح وفلفل وبهارات كاري وبهارات دجاج او مشكله وهيل مطحون لحتى تنشف من المي ، وبنضيفها للرز المنقوع وبنزيد من كل التوابل وبنزبط الملح وبنزيد زيت.

—واللف طبعا معروف كيف .

—اذا حبيتي تحطي مع الدوالي دجاج او لحمة شوحيها بزيت وتوابل لحتى يتحمر ويتشمع من برا ضروري هالحركة عشان النكهه تطلع طيبة.

ثانياً/ شوي الدوالي

بنحتاج كيس حراري حجم حسب الكمية بنرتب في قعره بصل وليمون وبنرتب الدوالي فيه بشكل عمودي يعني خليه على بعضه مش مفرود فرد بالكيس ، وشرحات بندورة بين طبقات الدوالي.

—بنضيف مي سخنة تغمر ثلثين كمية الدوالي واذا بتحبيه كثير ذايب اغمري اكثر شوي بالمي.

—بنربط الكيس وبنثقبه بعود خشب ثقبين وعالفرن بالبداية على اعلى حرارة لحتى ينفخ الكيس بده يمكن ثلث لنص ساعة وبعدين وطي الفرن وسط لهادي عالرف الاول واتركيها ساعة ونص لتنشف المي.

—بدك تتابعي الدوالي بالفرن تتفقديها واذا نشفت المي وحسيتيه لسا مش مستوي تماما من فتحه صغيرة جدا بحط محقان صغير وبصب مي بتغلي كمية قليلة وبترجعيه للفرن بس المهم لا تفتحي الكيس وتفقديه وتفقدي الحرارة.

ثالثاً/التقديم

بعد الاستواء افتحي الكيس وتمتعي بالمناظر الأخاذه ريحة ونكهه ومنظر خرافي .

—الحلو بهالطريقة انه النكهات مركزة كثير وبتطلع حامضه زيادة عن طبخ الغاز.

ملااااحظة/

اذا كنتي من عشاق الغرابة والجرأة طفي فحمة في الدوالي ودخنيها عشان تطلع عنجد مشاوي دوالي شيء في منتهى اللذة.

وصححة وهنا بتمنى تجربوها لو على كمية صغيرة

103 تعليقاً

  1. يسعد صباحك اولا……انتي خطيره مش قادر اعبر ….المهم بسلق الرز للمحشي 5 دقايق وبعدين بكمل شغل المحشي عادي بطلع الطعم زاكي وبسرعه بستوي هيك بنفع للدوالي بلفرن والا بخبص وشكرا…..

  2. يميميميم الدوالي عشقي كيف ماكان وطريقة بصراحة جديدة يسلم دياتك ياقلبي والله منظر بشهي القلب 😋😋 ويعطيكي الف عافية😘😘

  3. يسلموا ايديكي ام جاسم متألقة كالعادة انا عملتها قبل هيك الطريقة وفعلا تحفة في الطعم والشكل وعجبت عيلتي وسرت معتمداها دايما بشكر جهودك وافكارك

  4. يويييييييليييييييي قلبي وقف من شوفت الدوالي بشههههههي والله مشتهيتو بس ما بقدر اعملو هسة برمضان جوزي ما برغبو كتير 😔

    الف صحة وهنا يا رب يسلم اديكي المعدلة يا عسل 😙😙😙😙😙😙😍😍😍😍😍😍

  5. إم جاسم يا أم جاسم يعني بيصير هيك مليش دخل يلااااا بدي هالوقت 😋
    روووووعاتك يا عمري أنا ربي يزيدك من نعيمه وفضله ويحفظك لعيلتك يااااارب❤😙

  6. يا سلام عليك يا أم جاسم ويا سلام عالدوالي
    ما شاء الله عنك دائماً بتقدميلنا أفكار جديدة
    ومميزة وإن شاء الله رح أجرب طريقتك.
    وعلى فكرة كل وصفاتك إللي جربتها زبطت معي الحمد لله
    الله يوفقك ويجزيك الخير يا رب

  7. تسلم ايدك يا قمر ولا بعد الدوالي من اطيب الاكلان وين ما راح وبن ما رجع وين ما طش رح نجيبو ونعملوا كيف لو كان مشوي من تحت ديات ام جاسم يا سلام الله يحفظك لاولادك ويحميك هاي الدعوه بدعيلك اياها على طول وخاصه لما اشوف وصفاتك الراقيه

    • الله يسعدك ويجزيكي كل خير والله يا ام علاء بستنى تعليقاتك المفرحة دايما بتخليني اشعر انه الدنيا مليانع ناس طيبه وراقيه مثلك
      ودعوتك هاي والله اغلى من الدنيا ومافيها ولك بالمثل يارب يحفظك لعيلتك ويخليلك احبابك ويفرحك فيهم ياارب.

  8. ما شاء الله عليكي الله يباركلك بصحتك شو ما تعملي دايما مبدعة ومتألقة 👌👌👌👌
    😍😍😍😍😍
    صحة وعافية يسلم ايديكي انيقة 😘😘😘
    😇😇😇
    دوالي شوي او الغاز وبكل اشكاله بجنن تسلممي 👌
    👏👏👏👏

    • هههههه والله بحقلهم
      اللي عندو ام متلك عندو كنز مابيتقدر بثمن
      واللي عندو هيك بنوتات رأئعات وداعمات لمامتهم بيستاهلو احلى بوسات😙😙
      هنا وعوافي حبيباتي الأميرات شذى وحنين بينفع تعملوني اختكم وتعطوني حصتي من الدوالي😂😂

  9. يووووووويل حاااااالي انا … يووووووويل هارتي ……اووووووووويلي …اي شوووو هاد ارحمي ..ارررحممممي

    انا اطالب قرار من الادمن توقف نشر وصفات ام جاسم قبل الفطور …وخليهم بعد الافطار والله ولي التوفيق هههههههههههههههههههه 😂😂

    بمزززح بمزززح 😂😂😂 يسلم دياتك والله شو ما كتبت قليل ..اي اقسم بالله نشف ريقي بس شفت اللقمه ….حسيت الوقت توقف لدقائق معدودة 😂😂😂😁😁😁

    ربي يديم عليكي صحتك ويباركلك فيها وبولادك ويشفيهم وتشوفيهم اعلى المراتب يا رب 😘😘😘😘

  10. ما شاء الله عنك حبيبتي ام جاسم اللهم بارك شكلهم كتيير طيب وبفتحو النفس الله يحفظلك عيلتك ويباركلك فيها يا اروع شيف 😘😘

  11. مساء 🌼🌻🌸الله يسلم ايديكي على هذه الوصفات الأكثر من رائعه يا ملكة رمضان

    حبيت أشكرك على وصفة القطايف اللي بعثتيها …رائعه جدا كأنها جاهزه مع إني أول مره بعمل في البيت
    كل الشكر والتقدير لجهودك 💞

  12. طب والله الواحد مو عارف يوصفك ولا يوصف اتقانك ولا افكارك ولا جمال ابداعاتك اللي ما الها حدود😍
    من قلبي ربي يباركلك ويهني اهل بيتك ويهنينا فيكي
    انسانة متميزة وناجحة ووصفتك هي ممكن تجبلي شلل رباعي لو كنت جوعانة حاليا😂😂
    الحمد لله اني ماشفتا قبل الفطور هههههه
    يعطيكي الف عافية ياقلبي الفكرة رهيبة وواضح انها لذيذة كتييييير😍😙

    • يعني ما بقدر امر من عند جاراتي في زاكي ما بسلم عليهن ……مرحبا ام محمد كيفك انشالله بخير ….تقبل الله الصيام والقيام وجعلك مبارك اينما كنتي …دمتي بحفظ الرحمن

    • يا اهلا ام البنات ..الله يسعدك ويسلمك ..
      شو انك زوق ورائعه ..بسعدني سؤالك كثير
      الله يهنيكي وينولك يلي ببالك
      والصياام ولا احسن من هيك الحمد لله ..
      كتير خفيف ولطيف ..بس للاسف أيامه سريعه
      الله يقدرنا عالقيامه بالطاعه
      وبتشكرك مره ثانيه لسلامك وسؤالك واحلى جاره واخت وصديقه والله ..شرفتيني

    • ام البنات يسعد قلبك شو انك اصيلة ومحترمة والواحد مابقدر الا انه يحييكي ويدعيلك يجزيكي ربي كل خير انتي مثال للست المقدرة الاصيلة ومرورك بشرفنا وبيسعدنا .

اترك تعليقاً

لن يتم نشر عنوان بريدك الإلكتروني.