ألذ برياني هندي عالأصول سلسلة وصفات حول العالم 7 ملكة رمضان

87 11٬111
 

ألذ برياني هندي عالأصول سلسلة وصفات حول العالم 7 ملكة رمضان

ألذ برياني هندي عالأصول من "سلسلة وصفات حول العالم"

ألذ برياني هندي عالأصول سلسلة وصفات حول العالم 7 ملكة رمضان

ألذ برياني هندي عالأصول سلسلة وصفات حول العالم 7 ملكة رمضان , معكم صديقة زاكي الشيف الموهوبة , 
السلاااام عليكم ورحمة الله وبركاته يارب تكونو بأحسن حال والصيام معكم تمام والكروش ماعم يجوع والعصافير اللي جواتو مخففة زقزقة هههههه طبعاً البرياني أكلة هندية الأصل وبتتميز بنكهاتها القوية الرائعة واليوم رح قدملكم ياها بتفاصيلها لتزينو فيها سفرتكم بالشهر الفضيل وبناءً على طلب الأخت الغالية أم ليث ((بتمنى تعجبك حبيبتي)) ويلا نبلش بالمقادير

المقادير

  • أول شي تتبيلة الجاج (لكيلو):
  • حبتين فليفلة خضرا ((واذا حبيتو حطوها حارة هية هيك اصولها بس انا ماكان عندي فليفلة حارة فحطيت فليفلة خضرة عادية ومعها ملعقة كبيرة شطة))
  • حوالي عشر فصوص توم
  • ملعقتين عصير ليمون
  • نصف كوب لبن
  • ربع كوب زيت نباتي
  • البهارات:
  • ملعقة ك كركم
  • ملعقة ك زنجبيل باودر *واذا متوفر فريش حطي ملعقة كبيرة زنجبيل فريش مطحون بدل الباودر*
  • ملعقة ك كزبرة يابسة مطحونة
  • ملعقة ك بابريكا
  • نصف ملعقة ك كاري
  • للصلصة اللي رح نطبخها عالغاز منحتاج:
  • بصلتين وبندورتين وسط مقطعين جوانح رقيقة
  • ملعقة دبس بندورة
  • ملعقتين سمنة أو زبدة
  • 4 ورق غار
  • عود قرفة
  • فلفل أسود حب
  • هيل حب
  • قرنفل حب
  • نصف ملعقة كمون
  • نصف ملعقة كركم
  • ربع ملعقة كزبرة يابسة
  • لسلق الرز بدنا:
  • كمية وفيرة من المي
  • شوية زيت
  • بهارات صحيحة
  • ملح

الخطوات

☆بسم الله الرحمن الرحيم☆

بتسدئو مو عرفانة من وين بلش؟

مشاعري تجاه هالأكلة ملخبطتني كتير هههههه

المهم يا رزروزات قلبي أول شي منكون منضفين الجاج وشايلين عنو الجلد ومنعمل فيه ثقوب براس السكينة أو بعود خشبي لحتى يتشرب التتبيلة تمام

منحط كل مكونات التتبيلة بالخلاط ومنضربهم سوا ليصيرو ناعمييييين ومنحط الجاجة الحبوبة بالتتبيلة لتتشرب منيح لبين مانجهز باقي المكونات

طبعاً اذا حبيتو عملو هالخطوة قبل بيوم المسويات وتاني يوم بتلاقو الجاجات جاهزين واذا ماعندكم وقت مو مشكلة تعملوها بنفس الوقت بدون ماتضل منقوعة

هلأ بقى منروح للصلصة اللي رح نطبخها عالغاز وعلى نار قوية

منحط السمنة أو الزبدة مع شوية زيت عالنار ومنحط البهارات ومنحمصها

رح تلاحظو حبات الفلفل بلشت تفرقع وحبات الهيل بلشت تنتفخ

المهم لا تحمصوهن زيادة مشان ماتشوفو فيلم رعب وصواريخ عم تطير بأنحاء المكان ههههه

منضيف عليهم البصل ومنقلب ليبلش يدبل منضيف البندورة وبعدها دبس البندورة وانتبهو كلو على نار قوية وبدون ملح لأنو مابدنا ننزل مي وهلأ بقى يا حبوبات منحط قطع الجاج وحدة وحدة مشان مايلحقو

ينزلو مي كمان وبس نخلص إضافة الجاج منصب التتبيلة اللي كان فيها فوقو ومنقلب الجاجات وبعدا منغطيهم ومنتركهم ليقربو يستوو

(الفكرة من النار القوية وعدم إضافة الملح هو انو الجاج ياخد نكهتو الأولى بدون مي لحتى مايبين كأنو مسلوق)

بهالأثناء منصفي الرز البسمتي بعد مانكون نقعناه شوي وصفيناه حوالي 12 دقيقة بكمية كبيرة من الماء مع بهارات صحيحة وشوية زيت وبعدا منصفيه على مصفاية

منجيب طنجرة أو اللي عندها فخارة تستخدمها

أنا فكيت ايدين طنجرتي واستعملتا أصلا عادي مابدها وقفة الشغلة ههههه

منحط بالسفل قطع من الجاج يسعدلي طلتو وشوية صلصة من اللي طبخنا فيها الجاج وفوقن رز وفوقو صلصة وكمالة الجاج وقطع صغيييرة من الزبدة وآخر شي كمان رز وفوقو صلصة وشوية زبدة

وبعدا منغلف الطنجرة بالقصدير ومالازم يكون في ولا فتحة لأنو رح نكمل طبخها ببخارها بالفرن فانتبهو تغطوها بالقصدير بشكل محكم

ومندخلها الفرن على درجة حرارة 200 مشغل من تحت بس،، لمدة ثلثين الساعة تقريبا (انا هيك اخدت وقت معي)

وبعدا منطالعها ومنقلبها على جاط وآه من الروايح والجمال والرز المفرفد حبة حبة

رح تكون الزبدة ساحت بين الطبقات والصلصة لونت حبات الرز بدرجات متفاوتة

والطعم رهيب بشكل مو طبيعي

بصراحة حاسة حالي رح احكي شعر بعد شوي ههههه

بكل الأحوال جربوها وعزمووووونييييييي اوكيه؟؟؟؟؟

قولو اوكيه طيب شبكن صفنتو 🙁

ماتنسو تدعولي بالبركة واذكرو أخواننا المستضعفين من المسلمين بدعائكم عالإفطار♡

بحبكم كتير وبتمنالكم السعادة بالدنيا والآخرة♡

عرض التعليقات (87)