img
الرئيسة / أطباق رئيسية / دجاج مدفون بالملح واخييراً تجرأت وجربتها ملكة رمضان

دجاج مدفون بالملح واخييراً تجرأت وجربتها ملكة رمضان

/
/
/
3551 مشاهدات

 

دجاج مدفون بالملح واخيييراً تجرأت وجربتها ملكة رمضان

دجاج مدفون بالملح واخيييراً تجرأت وجربتها ملكة رمضان

دجاج مدفون بالملح واخيييراً تجرأت وجربتها ملكة رمضان

دجاج مدفون بالملح واخيييراً تجرأت وجربتها ملكة رمضان, معكم صديقة زاكي الشيف الموهوبة ,

المقادير

  • دجاجة كاملة كبيرة وزن 2 كيلو
  • نصف كوب لبن
  • م.ك زيت زيتون
  • ملح
  • عصير ليمونة
  • م.ك معجون الماسالا نزلته من قبل
  • اذا ماعندك معجون الماسالا اعملي خلطة بهارات من
  • فلفل ، كمون ، كزبرة ، اوريجانو، بهارات دجاج ، كاري ، ملعقة صلصة بندورة واي بهارات بتحبيها بس معجون الماسالا بغنيكي عنهم كلهم
  • خضار للحشوة
  • بصل
  • ثوم
  • بازيلا وجزر

الخطوات

دجاج مدفون بالملح ملكة رمضان

السلام عليكم ورحمة الله وبركاته

صرلي اكثر من سنة بدي اعمل هالطبخة ومترددة وخايفة تطلع مالحة وتخرب الطبخة كلها ، ولما تهوّرت وقررت اجربها جربتها برمضان عشان تعلا المخاطرة اكثر العيله صايمه والكل بستنى الفطور واتكلت على الله وطلعت هالطبخة ضرب من الخيال مش طبخة عادية، لازم لازم تجربوها عنجد ندمانة عالسنة اللي ضيعتها بالتردد. خلينا نشوف الطريقة

أولاً/ تتبيل الدجاجة

بنتبل الدجاجة من قبل بيوم انا تبلتها عالسحور وبلشت طبخها بعد العصر .

—بنتبلها بمعجون الماسالا اللي نزلت طريقته قبل هيك ولبن ومعلقة زيت وملح وعصرة ليمون وبندعكها مزبوط وبنتركها بالثلاجة ليلة.

—ثاني يوم بنحشي الدجاجة بالخضار مزبوط وبنحاول نسكر رجليها انا دخلتهم بطرف الجلد.

ثانياً/ دفن الدجاجة بالملح

— اول شي بنجهز كمية كبيرة من الملح و بنبللها مي مجرد تبليل مش تغريق يعني حوالي 3 كيلو ملح و يفضل يكون خشن .

— بنجهز صينية يكون حجمها مناسب لحجم الدجاجة ما تكون كبيرة و بنحط في قعرها ورقة زبدة و بنبلش نعمل طبقة الملح المبلول بارتفاع 1سم مش اكثر و بنحط فوقها ورقتين زبدة متعاكسات و بنحط الدجاجة عليهم و بنسكر ورقتين الزبدة المتعاكسات على الدجاجة عشان نحميها من الملح .

—بنرجع للملح المبلول وبنغطي الدجاجة فيه واذا كان ناشف من المي بترجعي تبلليه عشان يمسك عالدجاجة مثل العجينة.

—لازم نغلق حولين الدجاجة بالملح مزبوط بحيث تكون الدجاجة داخل كرة ملح كاملة من كل الجوانب.

—عشان تسهلي عملية اغلاق الملح عالدجاجة بللي ايدك بمي ومسدي عالملح لحتى يستوي معك السطح ويكون سماكة الملح 1 سم من كل مكان.

ثالثاً/ الشوي

بتدخليها الفرن المحمي على اعلى حرارة بالرف الوسط لمدة ساعتين ونص كاملات.

—الوقت والحرارة العاليه ضروريات لهالطبخة لاتخافوا منهم مارح تنحرق الدجاجة ولا تنشف ولا ولا اشي بالعكس رح تطلع احلى من اي شوي اكلتيه من قبل.

رابعاً/ افتتاح الدجاجة والتقديم

بعد ما تمر المدة الكاملة رح يطلع الملح قاسي وبده تكسير بشي ثقيل مثل مطرقة او مغرفة نوع ثقيل.

—بتكسري الملح وبجد لما تفتحي ورق الزبدة منظر خرافي مارح تنسيه بالمرة كيف من برا الملح قاسي ومنه محروق ومن جوا دجاجة محمرة وريحتها بتفوح بكل المكان .

—بدك تكوني حذرة بنقلها لطبق التقديم لانها بتكون ذايبه ذوب انا حطيت ملاعق كبار من الاربع جهات للدجاجة وانا وبنتي رفعناها لحتى نحافظ على شكلها .

—قدميها فوق الخبز او ممكن فوق الرز مع سلطة البصل بالسماق والبقدونس لنكهه ما بتنسى بالمرة.

—والف صحححة وهنا

—لاازم تجربوها اللي ماجربها راح عليه كثير عنجد

ملاااااااحظة

ممكن استبدال ورق الزبدة بالقصدير يكون ممسوح زيت بس هوه مش صحي ملامسته للاكل .

 

161 تعليقاً

  1. ماشاء الله ..لا قوة إلا بالله ..شكلها ولونها روووووووعه ..ما كان معي نت هلأ شفتها ربي يهنيكي ويبارك بصحتك وعافيتك ويبعد عيون الناس عنك ««قل أعوذ برب الفلق»»

  2. يسعد قلبك انتي و وصفاتك بس سرت اقرأ اسمك بسرعة احفظ الوصفة وبكره راح اعملها ع الفطرة بأذن الله واحكيلك عن الوضع انا كتير بوثق بوصفاتك وبجربها بتطلع غير شكل يسلموا ايديكي كتييير

    • اهلا وسهلا فيكي نورتي
      لا ابدا مافي اي اثر للملح وفيه ورق زبدة بيحميها من الالتصاق ومن الملح مع انه كثير بعملوها بدون ورق زبدة ومابتطلع مالحة بس ماحبيت اجازف واستخدمته اضمنلي.

  3. ماشاء الله تبارك الرحمن جد انك مبدعة
    ومو عارفه شو احكيلك انتي ملكة
    كل مرة بتفاجئيني 😍😍😍😍
    كل شي من ام جاسم ع المفضلة 😊😊😊😊

  4. طيب بصير اعملها في الفرن العربي بتزبط وكيف اعيار النار ؟وكمان سؤال خارج الوضوع بدي صلصة طحينة للكفته تكون مختلفه عن المألوف ««اذا ما فيها غلبه»»

    • والله في الفرن العربي الصراحة متحيره لانه هوه ناره مباشره عالرف ما بتقدري تبعدي الدجاجة عن النار.

      طيب ممكن تحطي عالرف اللي فوق النار شغله تبعد صينية الدجاجة مثل صينية ثانية مقلوبة المهم النار ماتكون ملزقه بالدجاجة بتنحرق.

      ونار الفرن العربي حاميه كثير انتي وطيه نتفه صغيرة بس تهدا شوي بس لا تنزليه للوسط بتنزل سوائل الدجاجة بعدين.

      وان شاء الله بتزبط كلشي اله حل

    • بالنسبة للطحينة للكفته انا بعملها بالطريقة التقليدية المعروفه ماجربت اجدد فيها
      هيه طحينة مع ليمون ومي وملح بنحركهم وبنغليهم عادي مع التحريك المستمر

      وفي كمان بنضاف لبن عليها بس تجهز وبترجع بتنغلى مع التحريك المستمر وبتتخفف بمي كمان، نفس كمية الطحينة بنحط لبن. طعمها بكون مختلف شوي يعني الواحد بتحير هيه طحينة ولا لبن وبتكون سائلة اكثر من الطحينة لحالها.

  5. ماشاء الله لا قوة الا بالله 👏👏👏👏👏👏👏
    مهما حكينا مابنوفيكي حقك ياملكة زاكي ،، تبارك الرحمن ربي يجزيكي الخير ويديم عليكي الصحة والعافية ويبارك لأهل بيتك فيكي .

    ام جاسم لو سمحتي في نقطة مافهمتها هسا انتي حطيتي طبقة ملح بصينيه الشوي وفوقها ورق زبدة وفوقها الدجاج وغطيتيها بورق الزبدة وفوقها طبقة ملح ؟؟ هيك صح والا مافي طبقة ملح من تحت

    لأني حطيتها ببالي وبإذن الله رح اعملها الجمعه

  6. سوزان🌹
    يسلمو ايدكي مش جديد عليكي التميز والابداع انتي فنانه بكل شي .ذكرتيني بالشيف التركي بوراك

  7. ام جاسم يا ام جاسم اااااااااخ يااااا قلببييييي المنظر بوجع القلب وبجوع المعدة عنجد منظر خراااااافي مبدعة مبدعة مبدعة كلشي من تحت اديكي بجنن يسلمهن يا رب😍😍😍😍😙😙😙😙😙😙😙😙

  8. ما شاء الله ام جاسم صدقا مو عاارفة احكي هههههههه
    هو ده ههههههه
    😄😄😄
    شو عملتي فيي من اكتر الوصفات يلي بحبها بدجاج
    😀😀😀😀
    اللهم باارك رائعة رائعة رائعة ربي يسعددك 💋💋
    شيف ولا ارووع 👏👏👏👏

اترك تعليقاً

لن يتم نشر عنوان بريدك الإلكتروني.