img
الرئيسة / مشروبات / مشروبات ساخنة / كافيه لاتيه وسر الثلاث طبقات ملكة رمضان

كافيه لاتيه وسر الثلاث طبقات ملكة رمضان

/
/
/
4023 مشاهدات

كافيه لاتيه وسر الثلاث طبقات ملكة رمضان

كافيه لاتيه وسر الثلاث طبقات ملكة رمضان

كافيه لاتيه وسر الثلاث طبقات ملكة رمضان

كافيه لاتيه وسر الثلاث طبقات ملكة رمضان, معكم صديقة زاكي الشيف الموهوبة ,

المقادير

  • نصف كوب حليب مركز محلى
  • م.ص سكر
  • نصف كوب ماء
  • م.ص نسكافيه بلاك

الخطوات

كافيه لاتيه وسر الثلاث طبقات ملكة رمضان

السلام عليكم ورحمة الله وبركاته

دائما بنشوف بالدعايات والكافيهات هالقهوة اللي شكلها بيفتح النفس وبنتحير كيف بعملوها وكيف اللي على وجهه رسمه بالرغوة او مفصول طبقات وهوه كله سوائل ، وطبعا كبرت براسي وصار لازم اجرب ، وحسيت حالي تورّطت اعمل وتفشل اعمل وتفشل وجربت كل الطرق بلا فائدة والمشكلة انه بطبق الوصفات بحذافيرها وبتفشل ، لحد ماعرفت السبب واللي هوه الحليب ورح اذكر لاحقا ليش، خلينا نشوف الطريقة

أولاً/ الحليب

بنحتاج حليب مركز محلى كامل الدسم تحديدا مش مكثف وبناخد منه نصف كوب وبنضيف م.ص سكر وبنسخنه مجرد تسخين لدرجة تحطي اصبعك فيه يكون ساخن بس بتتحمليه، لنقل مدة دقيقة عالغاز او نصف دقيقة بالميكرويف. ( للي عندها ميزان لازم درجة حرارة 60)

ملاحظة/

لازم مايغلي بس يسخن

ثانياً/ تكوين الرغوة

بعد تسخين الحليب اما بتخفقيه بخفاقة النسكافيه لحتى يطلع الفوم او بتفرغيه بمرتبان زجاج وبتغطيه وبترجّيه بسرعه لمدة نصف دقيقة ورح تلاقي كمية فوم ممتازة طلعت.

—اذا كنتي بتحبي كمية فوم كبيييرة بتاخدي الفوم عن وجه الحليب وبتنزليه بكوب التقديم وبترجعي ترجّي الحليب وتاخدي الفوم وبالاخر بتصبي الحليب نفسه بالكوب.

ثالثاً/ طبقة النسكافيه

بتغلي نصف كوب ماء وبتذوبي فيه م.ص نسكافيه وبدوووووون سكر.

ملاحظة/

لازم هاد الخليط يكون بدرجة الغليان مش تسخين ومايكون عليه سكر.

رابعاً/ عملية صب اللاتيه

بتبلشي تصبي النسكافيه بهدوووء وعلى اطراف كوب الحليب مش بالوسط عشان ما نهبط الفوم ولا نغير لونه.

خامساً/ فصل الطبقات

لما تنزلي النسكافيه عالحليب رح يصير منظر رائع قدام عيونك رح يستقر النسكافيه فوق الحليب مارح يختلط فيه ورح تطلع الرغوة لفوووق فبصير عنا ثلاث طبقات منظرها خرافي. ممكن ترشي رشة بسييييطة نسكافيه عالوجه بس من الناعم لانه ثقيل بهبطلك الفوم.

سادساً/ سبب تشكل الثلاث طبقات واسباب النجاح والفشل للوصفة

بتفصل الطبقات عن بعض بسبب مبدأ الكثافة اكيد متذكرينها بالفيزياء كثافة الحليب اعلى من كثافة النسكافيه بسبب انه مركز وانه كامل الدسم وانه عليه سكر وانه ساخن مش مغلي.

طبقة النسكافيه اقل كثافة من الحليب لانه مغلي وغير محلى خفيف يعني فبستقر فوق الحليب.

طبقة الفوم اخف شي فيهم لانها مليااانة هوا طبعا فبتطلع لفوق وهيك بتتشكل الثلاث طبقات.

* اسباب النجاح

1. لازم حصرا حليب مركز محلى ، مابزبط بالحليب العادي ولا الطازج ولا الباكيتات ولا نوع الا المركز .

2. حرارة السوائل الحليب ساخن والنسكافيه بيغلي

3. اضافة سكر للحليب لزيادة كثافته

سابعاً/ الطعم

الطعم للامانة مش نسكافيه لانه مفصول كلشي لحال الفوم معروف ما اله طعم والنسكافيه بدون سكر مرة، والحليب حليب طعمه.

—للأمانة انا صورت الخطوات ورجعت خلطت الكوب بالملعقة لحتى اشربه لاني ما بحب الحليب لوحده فخلطته وخربت الشكل.

*نصيحة*

لما تعمليها قدمي مع الكوب ملعقة صغيرة عشان الضيف اللي بحب الخلط مثلي يخلط ومايشعر بالحرج.

—بس كتقديم وشكل فخاااااامة عنجد وللناس اللي بتحب الحليب ما رح يخلطوا.

—واخيييرا كثير كنت مبسوطة لما نجحت معي بعد 7 محاولات فاشله والحمدلله لا تتخيلوا قديش بكون مبسوطة بس اتغلب بشغلة وبالاخر تزبط ، يارب تكون عجبتكم وتجربوها وتضيفوا ضيوفك افخم ضيافه وصحة وهنا.

121 تعليقاً

    • ويبارك فيكي ربي ام علي بتعرفي لما شغله تعبي راسك وتصيري بس بدك تعرفي كيف بتنعمل ههههه هاد الاحساس اللي تملكني بس شفت اللاتيه واصريت اعملها والحمد لله انها نجحت اخييرا

  1. الله الله روووووووووعاااااتك ياقادرة ههههههههه يا كبيييييره اي شوووو هاد طول عمري اشوفو واقعد افكر كيف بطلع معهم هيك روووووووووعاااااتك والله روووووووووعاااااتك 😍😍😍

    انتي اجيتي لحالك ولا الهوا رماكي بطريقي 😂😂 ربي يبارك فيكي ويباركلك ويسعدك يارب العالمين

    نرجع هسه لكلمة سرسوب هههههههههههههههههههه 😂 الله عليكي فرطت ضحك ..فكرت حالي لحالي بعرف كلمة سرسوب …طلع ضايل في بالدنيا متلي 😂😂😂😂

  2. تبارك الرحمن ما شاء الله عنك يسلمو اديكي شكلو كثير مرتب وانيق
    الف صحه وهناا يا قلبي جزاكي الله خير على محاولاتك وتعبك ومجهودك الرائع كلو بميزان حسناتك ان شاء الله الله يحفظك لعيلتك يا اشطر شيف 😘😘❤

  3. ما شاء الله عليكي حبيبتي رووووعاتك أللهم بارك يعطيكي العافيه يااارب😍
    حلو الواحد يتم يجرب وبالاخر يطلع هالشكل الرائع والمميز بوركتي غاليتي على هالمجهود الرائع والمميز وجعله الله فى ميزان حسناتك إن شاء الله ❤

  4. يسلمو اديكي ام جاسم عنجد مبدعة ومبارك نجاح الوصفة ههههه
    انا بالنسبة الي مو من محبين الحليب ابدا لا خلط ولا فصل ههههههه
    بس عجبتني كتير شكلها يسلمو اديكي 😙😙😙😙😙😙😂😙

  5. يسلم دياتك يا قلبي منظرهاااا بيشهي القلب

    بس انا ما بحب الحليب بس حجربها لأنو اليوم حيجوني ضيوف ازا قدرت وابني كان هادي الله يهديلي ايا حجربها

    بس سؤال بينفع اعملها بالحليب المكثف الي انا بعملو بالبيت 🤔

  6. الله الله عليك يا حبيب والديك تبارك الله الله يعطيكي الف الف عافية والله كلمات الشكر قليلة في حقك اتحفينا كمان و كمان يسلم لقلبي المعدل

  7. ام جاسم اليوم ما روحت ع صلاة التراوح مشان النسكافه حكالي جوزي تعالي روحي ع المسجد حكيتلو لا والله تعبان
    وانا في بالي اني اجرب الوصفه والله ما صدقت زوجي وولادي يطلعو طبعا نيمت بنتي لانها فساده ازا خربت شي بتفسد لابوها وبضل يضحك عليه شي يومين تلات
    ما علينا …والله ستعديت وعملتها أول كاسه يالهوووووي دمار شامل😂😂😂
    تاني كاسه شو طلعت رووووعه وعملت لولادي وزوجي كمان …….يسلمو اديك ياعمري

  8. ما شاء الله ام جااسم 👏👏👏👏😇
    كانك عاملة هالوصغة ع الوقت هههههه 😀😀
    هو ده يلي بدي اياه ههههه اللهم باارك هاي الوصفة لحاالها عشقي ههههه وراج جربها يعني حجربها ههههه 😀😀😀
    بصراحة اول ما شفتها وانا مبسوطة صرت قارئها 3 مرات من كتر ما كان نفسي اعملها حسيت حالي كانو رايحة ع السوق وبدي اشتري شغلة وخايفة اطير مني ههههه 😅😅😅😅😅
    يسلم ايديكي 😍😍😍

  9. الله عليكي ياام جاسم اقسم بربي كلمة مبدعة وشيف قليلة بحقك ان شاءالله اكيد رح اجربا ماشاءالله عليكي كل وصفة احلا من التانية الله يخليكي لعيلتك يارب❤😘

    وعجبتني كلمة سرسوبة كلمة حماتي هههههه 😅😘😘😀

  10. روعاتك ام جاسم شيف على حق الله يسعدك دائما بتبهرينا بوصفاتك عن جد مافى منك شيف بيحقلك اتكونى شيف على مستوى ومبدعه دائما ومتالقه الله يحميكى ويحفظك يااحلى وانجح شيف بالدنيا

  11. انا مابتخيل انو في اي وصفة بتوقف بوش انسانة مبدعة متلك
    ممكن تجربي وتعيدي فيها كم مرة بس بالنهاية عندي ثقة انو النجاح حليفك بإذن الله😍
    ربي يسلم ايديكي عالمنظر الخرافي والمشهي ويعطيكي الف عافية حبيبتي متألقة كالعادة اللهم بارك 😄 😘

اترك تعليقاً

لن يتم نشر عنوان بريدك الإلكتروني.