img
الرئيسة / أطباق رئيسية / دجاج مقرمش سهل وسريع

دجاج مقرمش سهل وسريع

/
/
/
3101 مشاهدات

دجاج مقرمش سهل وسريع

دجاج مقرمش سهل وسريع

دجاج مقرمش سهل وسريع

دجاج مقرمش سهل وسريع , معكم صديقة زاكي الشيف الموهوبة , اشتقتللللللللللللللللللللللللللللللللكم انا يسعدلي كل أوقاتكم يا أحلى أميرات أول شي طمنوني عنكم بسرعة لأنو ناطف قلبي عليكم ومتمنية تكونو بأحسن حال تاني شي أنا بعتذر عالتقصير والغياب من كل قلبي بس الظروف كانت مريرة اهئ اهئ أول شي قبل العيد بيومين ماما الله ييسرلها سافرت بزيارة للشام وتاني شي بعد العيد كربت كريب قوي كتير وطول معي وطولت آثارو كمان لدرجة لهلأ ماراحت بشكل نهائي اعترفو مين داعي عليي ههههههه عم امزح والله انتو بتجننو بس هي أول مرة بمرض هيك وببطل اقدر اعمل أي شي المهم الحمد لله هلأ صرت أحسن ورجعتلكم بهالوصفة السهلة البسيطة اللي بنوب مابتسمن ها وانا أكذب القايلين ههههه خلص بلا كتر حكي ست نور وخلصينا انطقي المقادير حاضر خلص لا تعيطو عليي

المقادير

  • كيلو صدور جاج مقطع مكعبات
  • بيضة
  • ربع كوب نشا
  • كوب ونصف طحين
  • كوب ماء
  • ملعقتين كبار خل
  • ملعقتين كبار زيت
  • نصف صغيرة بيكينغ باودر
  • نصف ملعقة صغيرة دبس فليفلة اذا بتحبوها حارة شوي
  • البهارات:
  • ملح
  • فلفل أسود
  • بابريكا
  • توم
  • زنجبيل
  • قرفة
  • بهارات دجاج قلكم شغلة انا بتحول لهندية احيانا وبحط كل شي بهارات بتطلع بوشي هههه يعني من الآخر حطو النكهات اللي بتحبوها وبق بق بق بقيق

الخطوات

☆بسم الله الرحمن الرحيم☆

يلا حماس حماس هههههه

الي زمان ماكتبت وصفات

ذكروني شلون كنا نطبخ ههههه

بسيطة منجيب جاط ومنكرفت فيه كل المكونات منخلطن مع بعض ومنحط فيه الجاج ومنشيل قطع الجاج بعدها بكونو تغطو بالخلطة ومنقليهم بزيت غزير حامي لحتى يستوو وياخدو اللون الذهبي المقرمش المغري الشهي اللي يؤبش قلبي

اول شي بتكون النار عالية بعد دقيقتين وطوها شوي لحتى يستوي منيح من جوا

وبس يا حبوشاتي شيلوهم صفوهم من الزيت وقرمشو لقلكم ودعولي

انا قدمتها مع صوص الجبنة بسيط كتير

حطيت جبن شيدر مع شوية كريمة عالغاز وبس هههه

صحي تعو لهون اعترفو مين سمنت بعد رمضان تجي تصف جنبي ههههههه

بحبكم كتير انا ربي مايحرمني منكم ولا تنسوني من دعواتكم الحلوة

243 تعليقاً

  1. ما شاء الله عنك الله يباركلك
    شكلهم بشهي وكثير طيبين يسلمو اديكي
    الف صحه وهناا 😘😘
    والف الحمد لله عسلاامتك نورتي من جديد بوصفاتك وحكياتك العسل ❤❤

  2. حمدلله على سلامتك نور زاكي الرائعة اللطيفة وست البيت الشاطرة والشيف التوب المحترفة كمان

    شو بدي أكتب عنك كمان أصلا أحلى شي فيكي وبرغم حلاوة وصفاتك كلامك وطريقة كتابتك للوصفات أحلى وأحلى كمان وإنتي لا بترغي ولا شي ولا بتقري بلهجتنا حتى هههههه ولو كنتي هيك حبيبتي وبحكي عن حالي وأكيد كمان كتير من الاخوات هون متلي ما كنت حبيت أقرأ إلي بتكتبيه للاخير وكنت مليت أكمل قراءة بالعكس إنتي قمة بالذوق واللطف وبتعرفي كيف تجذبي الواحد ليفتح وصفتك ويقرأ إلي مكتوب من الأول لآخر الوصفة ويشوف صور الوصفات وتصويرك الحلو الجذاب

    بيجوز طولت عليكي حبيبتي بس عنجد وربي بيشهد ولو أنه عم نتحاكى من ورا الشاشات وبعالم الكتروني وافتراضي إني استلطفتك إنتي وكتير من البنات هون بهالتطبيق الحلو من لما سجلت بزاكي أول مرة وبلشت ابعت وصفاتي المتواضعة عليه وإحنا موجودين بهالدنيا وبشر من لحم ودم وممكن نتجمع بصداقة وود ومعزة ومودة حتى لو مش شايفين ولا سامعين بعض مباشرة

    بتمنى الله يتمم عليكي صحتك وعافيتك يا رب ويرزقك كل إلي بتتمنيه إن شاء الله

    وبيجوز أنا هلأ يقولوا عني لتاتة وعجانة ورغاية وقرارة وكل كلمة بتعطي نفس هالمعنى وبكل اللهجات كمان معليش موافقة😊 وشكرا

    • ياحبيبة قلبي ربي يكرمك ويجبر خاطرك
      ما بتتخيلي قديه كلامك ريحني وفرحني
      بصراحة خفت للحظة يكون هالشي فعلا زاعجكم
      انا لو مابحسكم اخواتي ماكنت اخدت أريحيتي بالكلام هيك
      واللي قلتيه عني كبير عليي بصراحة وخجلتيني كتير وغمرتيني بلطفك يا وردتنا العسل
      والحمد لله انكم مبسوطين وهاد أهم شي عندي😘
      الله يجزيكي كل خير ياقلبي ويديم هالصحبة الحلوة بيناتنا ويكرمنا باللقاء في الدنيا والآخرة ان شاء الله😄
      والله يعطيكي اضعاف هالادعية الحلوة اللي دعيتيلي ياها😍😍
      وانتي عسلامتك والله مافي منك وانبسطت كتير انا وعم اقرأ كلامك😘❤

    • يسعد عنيكم انتو التنتين والله شكلكم دمكم خفيف وبالنسبة😄😄😄للحكي الكتير فالناس الي بتحكي كتير بتكون ناس طيبة وقلبها طيب لأنه الي بقلبها عاراس لسانها وانا استمتعت بكلامكم وحتى لو كان طويل بس بيكفي انه بيشيل الهم عن القلب ولولا كلامكم الكتير اللطيف كنا انجلطنا فاستمروا وأنا من مشجعينكم 😘😘😘🌹🌹🌹والله حبيتكم من دون ما أشوفكم ……كيف لو شفتكم شو كان صار 🤗🤗🤗🤗

    • انا مع الشيف المحترف كلامك صحيح ١٠٠ % هدول التنتين وكتير كمان من الاخوات بجننو هني وحكياتهم تسلمولي ويخليلي اياكم

      الشيف المحترف طمنيني عنك ؟؟؟

      وردة الأردن طمنيني عنك حبيبتي ان شاء الله تكوني بخير والله اشتقتلكم

    • اختي ام عمرو يسعد مساكي يا رب انتي وكل سيدات زاكي والله هالبرنامج كتير حلو لأنه استفدنا منه من عدة جوانب وهي انه احنا عم نتعلم الطبخ وبنتعلم وصفات جديدة وبيتيح النا فرصة نعرف كل بلد بشو مشهورة وشو اكلاتها والأهم من هادا كله انه بنتعرف على نساء محترمات جدا جدا لأنه من كلامهم بتعرفيهم وبتتعلقي فيهم حتى لو ماشفتيهم وجها لوجه بس بيكفي انك تتعرفي عليهم ولو كان عندك مشكلة بتحسي انهم كلهم دون استثناء بيزعلو عليكي وبتحسيهم بيحاولو يفكرو معك بحلول لمشكلتك وبيقفوا معك حتى بصوتهم وهادا الشي بيخفف عنا كتير وبحب اتوجه الك ولكل سيدة مشاركة بزاكي بالشكر والأحترام والتقدير لأني تعلمت منكم كتير اشياء فادتني بحياتي مع اني ما شاركت الا من فترة قريبة بس …….انا بتابع من زمان كتير وكنت اقرأ التعليقات بس من فترة صغيرة سجلت وصرت اشارك بالتعليقات وانا بحبكم كتير …….وسلامي الك اختي ام عمرو😍😍😍😘🌹🌹🌹🌹🌹

    • شيف محترف وام عمرو تسلموا يا رب على لطافتكم وذوقكم وبشكركم من قلبي على كلامكم وحسن ظنكم فينا

      وأم عمرو الله يسعدك ويطول عمرك يا رب أنا بألف نعمة من الله بس أوقات الواحد بيغيب شوي لظروف تسلمي وتظلي على طول بخير يا أميرة

    • يسعد مساكم جميعا وبالأخص خواتي نور احمد ام عمرو ووردة الاردن …….بحب طمنك عني اختي ام عمرو انا الحمدلله بخير طول ما انتو بخير والله يزيح عنكم وعنا كل هم وغم يا رب ويديم هالصداقة بينا يا رب 😘😘😘😘😘بحبكم كتير

    • مسا الورد
      حبيبة قلبي الشيف المحترف الله يكرمك على كلامك ويجبر خاطرك ويرزقك السعادة بالدنيا والآخرة انتي وكل الأخوات الحلوات اللي معنا😄
      الطيب بشوف الناس بهالطيبة حبيبتي وفيكي الخير 😘
      ونحنا فرحانين بوجودك بيناتنا والله يديم هالمحبة ويجمعنا بجنات عليين 😍 وانا بحبك اكتر😄

      وام عمرو العسل ياحبوبة انتي كلك لطف وطيب ياعمري ربي يسعدك ويحققلك كل شي بتتمنيه ويخليلنا ياكي كمان😀

    • لقطتنا…………اهربوا………….هلأ بتمسكنا 😥😥😥😥😥😥😥هه هه هه هه هه خي اتعبت بكفي ركض والا خلص وقف ؟؟؟ على كل حال الي عندها زيادة من رمضان تعطيني لأني بصراحة نفست عالآخر 🤣🤣🤣الله وكيلكم باكل بس مش كاينة انصح يا ترى شو العلة 🤔🤔🤔🤔

    • ههههه يسعد قلوبكم الحلوة يا رب

      شيف محترف هاي مش علة هاي أكبر نعمة حبيبتي معقول زعلانة إنك عم توكلي وما عم بيبين عليكي شي شو بيعمل إلي بينصح من أقل شي حتى من الهوا لو تنفسه😁
      ما شاء الله عنك أحمدي الله ليل ونهار

    • الحمد لله على كل شي بس الناصح الا ما يضعف اما الضعيف شو بده ينصحه 🤗🤗🤗🤗 بعدين بدك الصراحة الناصحين عندهم وجه ماشاء الله شو حلو عنجد بحكي ما بمزح بعمري ما قابلت وحدة ناصحة الا ما يكون وجهها حلو وجميل ودمها خفيف عنجد ما بمزح تعالي اطلعي على الناصحين فعلا بيكون عندهم القدرة انهم يضحكوكي من قلبك فعلا وعندهم طيبة ومسامحة غير شكل 😄😄😄😄

    • بدك الصراحة انا كنت مليانة وناصحة شوي ومع طولي كان الوضع ممتاز بس الله وكيلك لما إتزوجت انسلا بدني سلي ومن وقتها نفسي ارجع انصح زي زمان بس مش قادرة ابدا 😅😅😅

    • واااااع 😭😭
      مسمية النحافة على يا شيف المحترف ياحلوة ههههه
      خدي الكيليات اللي بدي نحفهن كلن مابيغلى عليكي شي والله مابدي ياهن😂

      عالاقل بس تكوني نحيفة بتاكلي بضمير مرتاح مو بتحسي فوق راسك عصاية عم تقلك هي آخر لقمة😂😂😂

  3. ههههه الحمدلله ع سلامتك
    كيف الوالده نزلت ع الشام الاوضاع استقرت
    من بعد الكريب راجعه بوصفه بتجنن ههههه خلص كل مرة امرضي وجيبلنا هيك وصفه😜😜😜
    لا يا عمري الف سلامه عليكي 😘😘😘😘😘😘😘😘

  4. حبيبتي الف الحمد الله ع سلامتج ربي ينطيج الصحه والعافيه وترجع امج بألف سلامه وعاشت ايدج ع الوصفه شكلها يجذب النضر روعاتج نور الغاليه ودمج الخفيف الحلو الله يسعد ايامج😚

    • ويسعدك حبيبتي
      انتي كلش حبوبة وكلامج زين وينطيني شعور بالسعادة 😄
      ههههه حبيبة قلبي الله يكرمك انتي وكل أهل العراق
      انا بعشق لهجتكم وبفرح لما اقرأ تعليقاتكم بالعراقي😍😙

  5. لك يسلملي الي دمو متل العسل 😘😘
    عليكي الف عافية روحي وحمدلله عسلامتك ياقلبي 😍😚
    والف صحةوهنا على هالاكلة اللذيذة والطيبة عزميني عليها انا بحسن اعملا بس من ايدك اطيب😅😅

  6. بسم الله ما شاء الله. هاد اللي بيحكوا عنه ديناميت هههه لك شو هاللزازة شو هالطعامة هاي تبارك الرحمن ربي يسلم هالايدين الحلوين اللي بطلعوا من تحتهم تحف يا عمري 😘😘
    ربي يحميكي و يحرسك حبيبة قلبي ❤️♥️

اترك تعليقاً

لن يتم نشر عنوان بريدك الإلكتروني.