img
الرئيسة / أطباق رئيسية / فطيرة البطاطا بالدجاج مع الشكر الجزيل لأم عبدالله الفارس

فطيرة البطاطا بالدجاج مع الشكر الجزيل لأم عبدالله الفارس

/
/
/
2039 مشاهدات

 

فطيرة البطاطا بالدجاج مع الشكر الجزيل لأم عبدالله الفارس

فطيرة البطاطا بالدجاج مع الشكر الجزيل لأم عبدالله الفارس

فطيرة البطاطا بالدجاج مع الشكر الجزيل لأم عبدالله الفارس

فطيرة البطاطا بالدجاج مع الشكر الجزيل لأم عبدالله الفارس, معكم صديقة زاكي الشيف الموهوبة ,

المقادير

  • 6 حبات بطاطا متوسطة مسلوقة
  • نص كوب جبنة شيدر مبروشة
  • نص كوب جبنة موزريلا مبروشة
  • ملح وفلفل
  • رشة شطة مجروشة
  • ملعقة بقدونس مفروم ناعم
  • م.ك كاري
  • 2 بيض
  • مقادير الحشوة
  • دجاج مكعبات
  • راس بصل كبير
  • نص كوب جبنة موزريلا

الخطوات

السلام عليكم ورحمة الله وبركاته

بداية بحب اقدم جزيل شكري وتقديري واحترامي للشيف ام عبدالله الفارس لانه اخدت هالوصفة الرائعة من ملفها الغني ما شاء الله وكانت وصفة رائعة ومغذية جدا جدا فيها تقريبا كافة العناصر الغذائية الضرورية . بس استخدمت للحشوة دجاج بدل اللحمة. وبدلت شوي من المكونات حسب ما بتاكل عائلتي.

أولاً/ عجينة البطاطا

بنسلق البطاطا بشكل ممتاز حتى تنهرى عشان نقدر نعجنها وبنضيف ملح وفلفل وشطة وكاري وبقدونس وجبنة نوعين لتعطي غنى للوصفة وبنضيف البيض وبنعجن مزبوط حتى نحصل على عجينة.

ثانياً/ الحشوة

استخدمت دجاجة كاملة قطعتها مكعبات وطبختها مع بصل وملح وفلفل وشوية جبنة موزريلا بتعطي رطوبة للحشوة ونكهه طبعا.

ثالثاً/ تطبيق الفطيرة

بندهن جاط البايركس بزيت الزيتون وبنمد نصف كمية العجينة وبعدها الحشوة مع رشة جبنة وطبقة العجينة الثانية وبنمسد وجهها وبنرش جبنة موزريلا وحبيت اضيف رشة سمسم وحبة البركة .

رابعاً/ شوي الفطيرة

بندخلها فرن محمي اعلى حرارة من تحت ربع ساعة وبعدين بنحمرها ما بدها وقت لانه كلشي مستوي الا البيض وتذوب الجبنة بس.

—جربوها رائعة وطيبة ومغذية جدا وصحة وهنا

107 تعليقاً

  1. لولو

    ماشاءالله بتشهي 😍😋
    تسلم ايديكي وايدين اختنا ام فارس 😙

    ام جاسم وعدتيني بطريقة ثوم وبصل بودر
    يمكن نسيتي 😔

    عندي سؤال بدي اعمل كروسان بشكولاتة المنزلية
    بتنجح برائيك ومشكورة مقدما 😙

  2. الله الله شو بتجننن تسلم ايدك وايد ام عبدالله ..فعلا وصفات ام عبدالله بتجنن وعن قريب ان شاء الله في وصفه بدي اجربها الها

    لولو حبيبتي الثوم البودرة …جيبي راس ثوم قطعي الحبات لشرائح جدا رفيعه وصفيهن بصينيه فرن صف يعني ما تحطي حبه فوق الثانيه وحطيهم بالفرن ع حراره هاديه جدا عشان ينشفو تمام بدهم ساعه الا تقريبا حسب فرنك

    وبس طلعيهم اتركيهم لحتى يبردو تماما واضربيهم بالمولينكس تاعت البهارات وشوفي ازكى ثوم بودرة 😍😍

    اما البصل بودره جربت انشفها بالشمس وجربت بالفرن …يلي بالشمس كتيييير افضل اي نعم بدها وقت بس بالفرن بينحرق ع السريع وما بينشف

    الطريقه يلي بالشمس. بتقطيعهم كمان شرائح جدا رفيعه وبتصفيهم بصينيه وبتحطيهم بالشمس لحتى ينشفو ممكن ياخدو يوم مع شمس الصيف ..واذا خايفه عليهم من الغبره حطي شاشه نظيفه ووتكون شوي شفافه عشان ما يعفنو وتطلع ريحتهم وبالليل فوتيهم جوا

    وقد ما اخدو غبره ما رح توصل لغبره المصانع والعطارين والمحامص …

    وبس ينشفو تمام اضربيهم بالمولينكس …وبس 🤗🤗

    ان شاء الله اكون افدتك

    • لولو

      ام ادم مشكورة ياقلبي
      غلبتك صحيح اكتر من حدا ماعم ينصحو بالجاهز لان اذا مو مجفف منيح بصرله ريحه وطعمه بيتغير فورا
      لهيك بالبيت انضف واضمن
      وفعلا جربت البصل بلفرن حترق وبقي طري لهيك قلت بذكر اختي ام جاسم بلكي بتفيديني الله يجزيكي ويجزيها جنات الفردوس يارب

    • بارك الله فيكي ام ادم على وصفتك البصل والثوم البودرة.

      خبز التورتيلا
      2 كوب طحين
      نصف م.ص ملح
      وملعقتين حليب بودرة اختياري
      وماء للعجن فقط لا غير
      بتاخد اقل من كاسة مي لانها بتكون جامدة مو طرية زي الخبز. بتريحيها ربع ساعة وبتلشي شغل فيها تقطيع وفرد حسب الحجم اللي بدكياه.

      والفرد بكون رقيق جدا.
      وعلى صاج او قلاية بتحكيها مزبوط وبتحطي الرغيف عليها وبتعدي للعشرة وبتقلبي وبتضلي هيك تقلبي لحتى تستوي مابتاخد وقت ابدا اكمن قلبه وبتجهز .

      بعد ما تستوي حطيها بين فوطتين مطبخ وغطيها مزبوط عشان ماتنشف.

  3. يا عيني عليك يا أم جاسم.. هالمنظر شفته قبل هيك ومتذكرته منيح لأنه جربته.. الفطيرة التركية وطلعت روعة.. فكرت عاملين نفس الفطيرة.. لهو هالمرة بنكهة تانية.. شو بدنا نلحق نطبخ ونتفنن لنلحق
    يسلموا إيديك وإيدين أم فارس
    أبدعتوا 👌

  4. يالله حيك ياام جاسم والله انك فنانة درجه اولى تحياتي لام عبدالله ملكة الابداع
    ….
    ام جاسم شفتك فيكي رؤيا بتجننن
    شفتك طالعه ع جبل متل جبل غار حراء لونو اسود وكلنا تحت بنطلع عليكي وانتي وجهك متل البدر لابسه جلباب خمري واشارب بيج جد كنتي متل فلقه القمر كنتي بتطلعي ع الجبل كنتي مبسوطه كتير وبتضحكي النا

  5. يا عيني يا عيني على هالمحبه 😍😍😍 بسم الله ماشاء الله..

    اسأل الله العظيم رب العرش العظيم أن يديمها علينا وعليكم و على الجميع هالمحبه و كل خير بإذن الله و يرزقنا واياكم العفو والعافية والمعافاة الدائمة في ابداننا و أولادنا و اهلينا و جميع المسلمين يا رب…

    و إن شاء الله نبقى خوات و متعاونات و وحده تشجع الثانيه و الله يقدرنا جميعاً على تقديم كلشي يفيدنا و يفيد عوائلنا و يخلينا متميزين……. ما اريد اقول شكراً لأن بين الخوات ماكو اشكرك و تشكريني…😊😊😊

    بس اقول أحبكم بالله و لله و فعلا انتو احلى و اغلى خوات😘😘😘

  6. ام جاسم هي وصفة ولا زلزال بآخر هالليل😢
    انا الحق عليي فتحتها وشفت هالمناظر الرهيبة
    انا شو بدو ينيمني هلأ
    شو رح شوف بأحلامي😭
    ربي يعطيكي الف عافية المنظر تحفة
    والله يباركلك انتي والمبدعة ام عبد الله فعلا وصفاتها بتشهي😍 والاكلة طالعة من تحت ايديكي شهية جدا ماشاء الله 😙

  7. ماشاءالله لونا بيشهي الله يسلم ايديكي يامبدعتنا ويعطيكي الف عافية انتي وام عبدالله ماشاءالله عنها وصفاتها كلا حلوة وبتشهي😘😄

اترك تعليقاً

لن يتم نشر عنوان بريدك الإلكتروني.