الرئيسة / منوعات / حكايه عالسريع

حكايه عالسريع

/
/
/
2329 مشاهدات

 

حكايه عالسريع

حكايه عالسريع

حكايه عالسريع

حكايه عالسريع , معكم صديقة زاكي الشيف الموهوبة ,

منقول

نسوان حارتنا شو عملت فيهن ام احمد

الساعة_ 10 _ الصبح بفصل الصيف والحارة هادية الا صوت الراديو وسميرة توفيق بتغني بسك تيجي حارتنا _ببيت من هالبيوت _

وفجأة صوت الطبلة بيرن رن بنص الحارة وبعد صوت الطبله صوت الزغروتة الحلوة.. اويها يا ريتو مبارك واويها يا ريتو سبع بركات

والنسوان بتركض على الشبابيك شو هالصوت ومن اي بيت ؟ شوو في يا ام وليد من وين صوت هالطبله وشو المناسبه؟

هاد الصوت من عند ام احمد تعدها مخطبه ابنها

طييب يختي واللي مخطبه ابنها بتصبح تزغرد

هاي بيني وبينكم ام احمد الجاره المعدله اللي ضحكتها ما بتفارق وجهها

كل الجيران بحبوها ومستنيين اللحظه اللي يوقفوا معها بفرحها .

نسوان وقفت تتفرج ونسوان حطت عراسها وراحت تركض باواعي البيت تسال عن المناسبه وتشارك ام احمد فرحتها واللي بتوصل تقول ريتو الف مبروك يا ام احمد بس خير شو في ؟

تقلها ام احمد اقعدي شوي بس تلتم كل الجارات بقلكم شو القصه

وصارت اللي تفوت تقعد تصفق وتشارك بالغناني والزغاريد وهي مش عارفه شو في

المهم اكتمل العدد والكل مستني يعرف شو في

وقالت ام احمد خلص يختي انتي وياها كلكم تجمعتوا.. اه يختي بس يلا قوليلنا شو في ؟

امنه خطبت؟ والا اليوم طلبة ابنك احمد ولا شو السالفه؟ قالت يلا هلأ رح تعرفوا

راحت على الغرفه الثانيه وفتحت الباب وصارت تجر بشغله ثقييله وكلهم يحكولها بتجري بمين يا مسخمه هسا ظهرك بينقطم

شوي ولا هي جايبه مشمع كبيير عليه حوالي 80

كيلو ملوخيه

الكل مصدوم ومش فاهم اشي وهي بتضحك وبتقول مااا بتجمعكم بهالسرعه غير الطبله

بدكم اياني يا مقصوفات الرقبه القطهم لحالي بهالحر اااه .. يلا شمرري انتي وياها عن ذراعاتكم وقولو بسم الله ..والستات كللهم على صووت وااحد ههههههههههههههه

يقطع شرررك يا ام احمد الله لا يعطيكي العافيه على هالعمله

قالت هيني رايحه اركب بكرج القهوه

وبلشوا هالنسوان يلقطوا بالملوخيه وهمه يضحكوا ويحكوا شايفه هالمنكوبه ضحكت علينا

وشربوا القهوه وهمه يشتغلوا ويقرقروا وشوي يغنوا وشوي يطقسوا على بعض وشوي يلّطشوا بعض بعواد الملوخيه ..وبهدداة بال ومن كل طيب خاطر

ام احمد كل شوي تغيب وترجع .تطل عليهم

همه اصلا بدهمش منها اشي غير تغنيلهم

ويلا من اغنيه لاغنيه ومن نكته لنكته ومن ضحكه لضحكه وبلشت ريحة المجدره والبصل المحمر تطلع عملتلهم غدا عشان يتغدوا سوا ويصير يومهم عنجد ولا احلى

والمجدره صارت جاهزه والبصلات تقللو

وصحون السلطه واللبن انحطو ،،

خلصوا تلقيط الملوخيه ونضفوا حواليهم وما حسوا ابدا بالوقت وحطت ام احمد سدر هالمجدره مزين بالبصل ..ونزلوا بهالمعالق عن جنب وطرف

اكلو وانبسطوا .. وشربوا شاي بنعنع وهمه يحكوا عن الطبله والزغرودة الصباحيه اللي انتهت بتلقيط 80 كيلو ملوخيه واكلة مجدره شهيه ..وعن نهفة ام احمد

ورووحوا يكملوا اشغالهم وكل وحده ضحكتها من الذان للذان.. ولا وحدة اعتبرتها كذابة او استغلالية او خداعة

كلهم اخذوها بطيبة قلب وحسن نيه وفكاهه

هيك كانوا الناس وهيك كان الزمن الجميل

ويااااه على بساطة زمان وايام زمان ?. وسقالله على هداة البال والناس اللي ولا اروق

صحيح….مين فرزت ملوخيه

87 تعليقاً

  1. هههههههههه ههههااي.. من أول ما قرأت العنوان حكيت هاي الحكاية لأم علي لأنها دايماً مستعجلة 😃
    ولو إني أسمعت صوت الطبلة كانت رحت وعاونتها لأم أحمد 😅

  2. يسعد قلبك ام علي حبيتك يعمر بيتك …..اااااخ ياريت ترجع ايام البساطه وطيبة القلب والكل قلبو على الثاني …الخير بلجايات انشالله ….وضحكتيني يسعدك ربي

  3. والله بكتني هالقصه😢😢😢 يا الله على ريحة الماضي و ذكريات زمان و الطيبه و الحنيه بين الغريب و القريب… .. سبحان الله .كلشي تغير و صار يجري بسرعه. نادرا ما نشوف مثل أم أحمد و جاراتها بهذا الزمن….. اني و لله الحمد عندي صديقات بالجم بين و فتره و فتره نتجمع و نسوي عزومه و كل وحده تجيب معها طبخه و نظل نسولف و نضحك و ننكت على بعض😊 نسلي نفسنا بشي يعوضنا عن ذكرياتنا و أيام زمااان

  4. رااااحووووو الطيبين والله حياة زمااان احلى بمية مرة من هالأيام الي لو الواحد جارو تصير عندو مصيبة ما بطل علي 😔😔
    والله قبل كم يوم وحدة بتحكي بناتي تعرضلهم بكم بدو يخطفهم وصارو يركضو وينادو بعز الظهر لقو وحدة بالطريق بحكولها خالتو ساعدينا في واحد بنادينا بالبكم ولا هية بتقلهم وانا شو دخلني روحو روحو انا مش فاضية تخيلو لوين وصلت فيهم البشر هالايام 😔😔😢😢😢

  5. ياسلام على الطيبه والتعاون لكل زمان ناسه كانو أقرب للفطرة مننا اليوم
    الله يردنا إليه رداً جميلا
    روحك جميله أم علي الله يسعدك ويحفظك .

  6. ههههههه صقالله على ايام البساطه واللمات الحلوه
    انا لو هسه اعمل متلها ولا حدا بعبرني ههههه الكل بيطلع علي من بعيد لبعيد

    يسلمو ام على على هالقصه الروعه عنجد فرفشنا شوي
    ربي يسعدك يا غاليه 😘😘

  7. هههههه الله يسعدك ام علي على هالذكرة الحلوة الي ذكرتينا فيا 😘
    الله يرحم ايام الماضي الي راح مابقى يرجع والحمدلله ع كل حال😀

    ام احمد لعيونك ها انتي قولي وشبيك لبيك بتلاقينا كلنا بين ايديك ههههخ
    بس بدنا صدر مجدرة ها من هلق عم قلك😁😀

  8. لولو

    سبحان الله انبارح كنت بحكي لصبايا عن امي وجاراتها كنا يجتمعو ويساعدو بعض
    ويسالو عبعض ويطبخو يتذكرو بعض
    وهلق كل وحده ببلد ودوبن يتصلو ببعضن من مشاغل الحياة وهموما
    ستي ام ابي كل جاراتها كانو طيبين وبيوتهن كانت عربية ومون مكدوس وملوخية ونعنع وفلفلة وبندورة و و و و و
    وجمعاتهن كانت بتجنن الله يرحم منهن الي مات ويشفي منهن العايش يارب
    ويحميلي ستي وشوفا عن قريب يارب 😢

  9. لولو

    ولو رشا نحن لها
    انتي جيبي 100 كيلو وشوفي مين بدو يشتغلها 😂😂😂😂

    لالا بمزح خلص جبيهن وتعالي عزاكي وزعيلينا بالعدل ☝
    والي بنخلصهن اول بتربح طبخة من تحت ايديكي 😍
    هبة ياام كرش ان شاءالله رح تخسري سدر المجدرة 😂😂😂

  10. والله قصة بتجنن …ايام زمان ولا احلى منها بتذكر امي كانت تجيب ملوخية مية كيلو ونساعدها اناواخواني بتلقيطهن ..ولا طبيخ البندورة ياعيني عليه لما نعمل ١٠٠ بكسة بندورة ياسلام ع ريحة زمان هسه الملوخية ملقطة وبنفرمها ع المكينة وفي نسوان بشتروها مفرزة جاهزة وهي طعمتها من الايد بت٦بها اطيب من كل راحة هالايام

  11. عنجد قصه بتجنن وهاي ايام الطيبين اللي بيحكي عنها الكل لكن للأسف في ناس ما لحقوها ووعيو على زمن مخزي وحقير(زمن الحروب والخباثه والكراهيه وحب النفس وكره الخير للناس والموبايلات ….الخ)😔زيي مثلا😔

  12. اسمعي ام علي انتي جيبي ١٥٠ كيلو والكل مستعد يشمر عن ايديه ويساعدك بالتلقيط بس انا نادوني بس تطبخوها وتخلصو عشان ادوقها ازا زاكية والا لأ شو رأيكم يا جماعة 🤣🤣🤣🤣

  13. هههههه لو نزلتي الحكايه قبل خرطت ١٤ كيلو لحالي في نص الليل
    اخ لو بعرف اعملت زي ام احمد بس طبلة وسميرة توفيق 😂😂😂😂😂باقيه الشغله هيك

اترك تعليقاً

لن يتم نشر عنوان بريدك الإلكتروني.