طريقه عمل دجاج مندي طعم وريحه ولا أروع ملكة الأكلات الغزاوية

107 5٬367
 

طريقه عمل دجاج مندي طعم وريحه ولا أروع ملكة الأكلات الغزاوية

طريقه عمل ماندي الدجاج طعم وريحه ولا أروع ملكه الأكلات الغزاويه

طريقه عمل دجاج مندي طعم وريحه ولا أروع ملكة الأكلات الغزاوية

طريقه عمل دجاج مندي طعم وريحه ولا أروع ملكة الأكلات الغزاوية , معكم صديقة زاكي الشيف الموهوبة ,

المقادير

  • دجاجتين لتتبيلهم بنحتاج:
  • قطعه كبيره زنجبيل طازج
  • خمس فصوص من ثوم
  • خمس حبات هيل
  • معلقه كبيره بهار دجاج
  • معلقه كبيره بهار شاورما
  • معلقه صغيره كاري
  • معلقه صغيره فلفل أسود
  • معلقه صغيره سماق
  • نصف معلقه صغيره شطه
  • عصير نصف ليمونه
  • تقريبا نص كوب زيت زيتون
  • ملح حسب الرغبه
  • للحشوه البرغل:
  • نص كوب برغل
  • كوب ماء أو مرقه لو ميه بدك تحطي معلقه صغيره ماجي بودره منشان الطعم يكون أطيب
  • بصله صغيره مفرومه ناعم
  • رشه ملح وفلفل أسود
  • للحشوه البصل:
  • بصله كبيره مقطعه شرائح
  • قرن فلفل أخضر حار
  • عود روز ماري
  • معلقه من تتبيله الدجاج
  • كبده الدجاج
  • رشه ملح وفلفل أسود

الخطوات

بسم الله نبدأ

حابه أحكي إنو معظم البيوت في غزه بتعمل هالاكله ومشهوره كتير بهالطريقه كتير طيبه ونكهتها بتختلف كليا عن أي نوع فحبيت أشاركم هالوصفه وإن شاء الله بتنال إعجابكم

يتم إشعال الحطب بالبرميل لمده ساعتين هاي شغله الشباب الله يعطيهم الصحه والعافيه

بالوقت هادا أنا غسلت الجاج كويس وتركته ليتصفى من الميه

عملت التتبيله دقيت التومه مع الزنجبيل والهيل ضفت البهارات وعصير الليمون وزيت الزيتون لحصلت على مزيج يشبه المعجون أخدت منه وصرت أدعك الجاج من جوه وبره وكنت مشرحه الصدر كمان حطيت فيه من التتبيله

عملت حشوه البرغل حطيت كل المكونات مع بعض لما تشرب البرغل الميه طفيت عليه وتركته

ولتتبيله البصل حطيت كل المكونات مع بعض وأخدت معلقه كبيره من التتبيله السابقه وخلطتها معهم حشيت جاجه هيك وجاجه هيك من البطن والرقبة وكمان والافخاد وسكرتهم كويس بنكاشات أسنان وضميت رجليهم بخيط وهوون خلصت مهمتي

بعد ما صار الحطب جمرات يتم إستدعاء كل الكناين يلا هاتوا الجاج يلا ولكو يلااا ههههه منشان لازم ينحطو مع بعض بنصف الجاج على شبكه وينزل إلي مثواه الأخير والحمد لله يغطى البرميل بغطايه بتكون حديد وبعدها بنجيب بطانيه أو حرام قديم يكونو مبلولين ميه وبنغطي كويس من كل الجهات وبعدين بنحط رمل فوقهم من كل الجوانب وووبنستنا ساعه ونص لحتى يكونو إستوا وأخدو لون بجنن والصوره إلي عليها أصبع هدول جاجاتي

ملاااحظه هاااامه ؟؟؟

أنتو ملاحظين إنو الجاج كتير هادا لأنو كل العيله لما نعمل ماندي بنعملها مع بعض

يعني السلفات ودار عمي وطبعا كل وحده بتعمل جاجاتها ببيتها وبتتفن بتتبلتها وتكون على كيفها بتأكل مع رز أو بطاطا مقليه وسلطه وحمص يعني عالجهتين زااااكي

بتمنا هالوصفه اللذيذة تعجبكم وتدعولي يا قمراتي بالخير والعافيه

وصحه وعافيه بحبكم أنا

107 تعليقات
  1. 📮📮 :

    يعطيك العافية ويسلموا ايديك..

    طريقة الطبخ عنا اسمها زرب…

    كتيير طيبة بتعطي نكهة تانية للأكل سواء كانت الطبخة لحوم او ارز .

    1. إم مصطفي 😉 :

      حبيبتي تسلمي وديادك يسعدك ويبارك بعمرك وصحتك يااارب 😍😙

  2. رشا رشا :

    ما شاء الله تبارك الرحمن يسعدك ويسعد طريقه شرحك يا قلبي هههه صديقيني يا ام مصطفى عشت كل لحضه معك من اول مولعتو النار بالبرميل لحد مستوت الجاجه وقديمتيها عنجد ما شاء الله الله يحفظ عيلتكم ويوفقكم جميعا وتظلو تعملو اطيب اكلات سواا
    الف صحه وهنا
    فالك الفوز ان شاء الله ❤😘😍

    1. إم مصطفي 😉 :

      يا عمري تسلميلي يااارب كلامك عسل يااااعسل😍
      كنت كاتبه مقدمه أكبر بكتير بس للأسف ما راحت الوصفه ورحت كتبتها كمان مره وإقتصرت هههههه فذهبت 😄😁
      يااااارب أنا وأنتي إن شاء الله ❤

  3. ام جهاد :

    ماشاء الله الله يعطيك العافية ام مصطفى. ويديم المحبه بينكم

    1. إم مصطفي 😉 :

      حبيبتي تسلمي يا رب أللهم أمين ربي يسمع منك يا رب 😍😙⚘

  4. ام البنات :

    يا سلام عليكي ..يسعد اوقاتك وتظلي دايما فرحانه بلمة الحبايب وسفرتك مرتبه وعجبتني حشوه البصل بلجاج جديده عليه

    1. إم مصطفي 😉 :

      حبيبتي تسلمي يا رب فعلاااا لذيذه كتير وبتنفع للجاج إلي بالفرن جربيهااا طيبه❤😙😍

    2. ام البنات :

      طيب ربي ذكرك ورفع مقامك …وزادك بركة …اللهم آمين

    3. إم مصطفي 😉 :

      يا عمري أللهم آمين ربي يجزيكي كل خير أنتي بجد جوهره أللهم بارك ❤😙

  5. ريحانة🌿 :

    اللهم بارك ..
    ربي يعطيكم العافية جميعا من إخوان وسلفات وبيت احما كامل
    ربي يوفقكم ويجمعكم على الخير والمحبة دائما ويألف بين قلوبكم
    يسلم دياتك غاليتي تصوير رائع وشرح وافي ..
    جزاك الله خيرا🌹
    وصحة وعوافي على قلوبكم
    وهذه الطريقة في الطبخ معروفة باسم (زرب)😊

    1. إم مصطفي 😉 :

      غاليتي ربي يبارك فيك ويعطيكي الصحه والعافيه أنتي أختي التي لم تلدها أمي 😍❤
      قد ما أحكي مش راح أوفيكي حقك أسأل الله رب العرش العظيم أن يجمعنا بالفردوس يااارب ❤

    2. ريحانة🌿 :

      آمين آمين
      ربي ما يحرمني من أجمل خوات🌹

  6. ام صالح :

    منظرهم بشهي

    1. إم مصطفي 😉 :

      حبيبتي تسلمي يا رب والطعم بشهي أكتر😄😍😘

  7. وردة🌹 :

    ماشاءالله منظرهم مشهي الله يعطيكي العافيه ويقويكي واضلو تعملو عزايم الله يديم المحبه يارب ودايمين عابعض

    1. إم مصطفي 😉 :

      أللهم أمين ربي يسمع منك يا رب 😍😙
      حبيبتي ⚘

  8. أم عبدالله الفارس :

    روووعه روووعه😍😍😍😋😋😋 الله يديم عليكم إن شاء الله هاللمه الحلوه و بألف صحة و هنا… عشتي والله اكله زاااااكيه😋😍

    🌹🌹🌹🌹🌹🌹

    1. إم مصطفي 😉 :

      حبيبتي تسلمي يا رب أللهم أمين ربي يسمع منك يا عسل😍😙⚘

  9. ناديه :

    ياسلام شي بيفتح النفس.فعلا انك ىائعة ياام مصطفى وشغلك بثقل بالذهب ماشالله عنك.ارميلك جاجة نتغدى عليها 😂😂😂

    1. إم مصطفي 😉 :

      يا عمري من عيوووني تسلميلي يااارب كلك ذوق 😚😍⚘

  10. شام :

    يمم شكلهم بشهي 😋😋
    يسلمو دياتك يا رب ويعطيك العافيه والله يديم اللمات الحلوه ويديم المحبه بينكم
    💓💓

    1. إم مصطفي 😉 :

      أنتي عسل ربي يبارك فيك ياااارب😙⚘

  11. شام :

    وصحتين وعافيه يا رب 😍💓

    1. إم مصطفي 😉 :

      حبيبتي تسلمي يا رب على ألبك 😙😍

  12. هبة :

    يسلملي المرتب والطباخ ياناس والله شو ماقلت قليل بحقك ياعمري😀
    الله يسلم ايديكي ويحفظك ويرزقك الذرية😀 الصالحة ويعطيكي الف عافية ماشاءالله بيشهو الجاجات من تحت ايديكي ياعسل

    والله يديم اللمة الحلوة ويجعلكن دايمن لبعض ويعل الوفق والسعادة دايمة بيناتكن😚😚

    1. إم مصطفي 😉 :

      يا عمري تسلميلي يااارب ربي يسمع منك يا رب وانا شو ما احكي قليل بحقك يحفظك الله😍😙❤

  13. 💠أم جاسم💠 :

    ما شاء الله تبارك الرحمن الزرب طالع بشهي والتحمير خرافي الف صحة وهنا على قلوبكم يارب وان شاء الله تدوم هاللمة الحلوة وتدوم المحبة بينكم.

    1. إم مصطفي 😉 :

      حبيبتي تسلمي وديادك يسعدك ويبارك بعمرك وصحتك يااارب 😍😙

  14. ام علاء ابو يحيى :

    تسلم ايدك حبيبتي وايد الشباب والصبايا ربنا يحميكم ويزرع المحبه بينكم شكلهم بشهي الله يعطيكم العافيه ان شاء الله تعيشي وتشوفي مصطفى بشعلك الزرب ويقلك يلى يا امي هاتي الجاحات اشويلك اياهم
    الزرب معروف عنا في الاردن في البيوت والمزارع وكثير اكله طيب

    1. إم مصطفي 😉 :

      حبيبتي تسلمي يا رب ربي يسمع منك يا غاليه وإن شاء الله بيجي اليوم إلي أفرحك فيه زيي ما بتفرحيني بدعواتك الصادقة ربي يبارك فيك ويعطيكي الصحه والعافيه ياااارب❤😙😍

    2. ام علاء ابو يحيى :

      الله كريم يا ام مصطفى ان شاء الله يكرمك قريبا

  15. اردنيه وافتخررر 😍😍 :

    مشالله مبدعه بجنن هاي الاكله اسمها زرب بجنن كتير جوزي بعملي اياها وبنفس هاي الطريقه

    1. إم مصطفي 😉 :

      يا عمري تسلميلي يااارب صحه وعافيه فعلاا كتير طيب😍😙⚘

  16. ام عمرو :

    ما شاء الله تبارك الرحمن المنظر بيشهي يسلم دياتك حبيبتى والله انك مبددددعة الله يحفظك ويحميكي ويخليكي لأهلك ويا ريتني بقربلك واذوق هالأكلات الطيبة من تحت دياتك هههههههههههههههههه ♥️♥️♥️

    1. إم مصطفي 😉 :

      يا عمري من عيوووني والله سبحان الله قلوبنا مجتمعه من وارء شاشه نفسي ألتقي بكل الصبايا والله 😍😢

    2. ام عمرو :

      اه والله وانا نفس الشعوووور حابة ألتقي فيكم كتير انتي وكل الصبايا

      أم مصطفى انتي كم عمرك 🤔🤔🤔

    3. إم مصطفي 😉 :

      يا عمري تسلميلي يااارب عمري ٢٤سنة 😄😙

    4. ام عمرو :

      ما شاء الله تبارك الرحمن الله يمد بعمرك كمان وكمان طلعت هاد انا أكبر منك انا ٢٦ سنة🙈🙈🙈

  17. Farah :

    يا عيني يا عيني شو هالابداع يا مبدعة جد اشي بشههههههههههي كيف من تحت دياتك اكيد اطيب 👏👏👏👍
    هاد عنا بنسميه زرب بنحط رز وجاج في البرميل بس شو الطعم بطلع خرافي يسلم هالايدين وصحة وهنا يا رب 💖💖💞💞💞

    1. إم مصطفي 😉 :

      حبيبتي تسلمي يا رب كلك ذوق بجد الرز معاه حكااااايه 😍😙

  18. فاطمة..ام ملك.. :

    ماشاء الله عليكي
    يسلمو ايديكي يارب

    1. إم مصطفي 😉 :

      حبيبتي تسلمي وديااادك الحلوين😍😘

  19. لين :

    يا عيني ياعيني ربي يسلمهم هالدياااات المعدلااااات منظرها بشهيييي وبفتح النفس تبارك الرحمن ماشاءالله عنك يانواره😋😘🌹💞

    1. إم مصطفي 😉 :

      وأنا بقول ليش الوصفه منوره حبيبت قلبي والله كلامك عسل تسلميلي يااارب كلك ذوق 😍❤😙

    2. لين :

      تسلميلي ياقمر منور بوجودك ربي يسعدك😘🌹💞

    3. ام البنات :

      هلا يا لين كل غيبه بسلامة

    4. لين :

      هلا فيكي حبيبة ألبي ام البنات ربي يسعدك والله اشتقتلكم خيرات الله ومالي غنى عنكم حبيبتي بس كنت مشغوله نقلت من بيتي والحمدلله اتيسرت الامور وهلأ رجعتلكم 🥰🌹💞

      طمنينا عنك.. كيفك😍

  20. ام علي🌸A🌸 :

    1. إم مصطفي 😉 :

      حبيبتي تسلمي وديادك الحلوين 😍❤

  21. om hasn :

    1. إم مصطفي 😉 :

      يا عمري من بعدك❤😍

  22. om hasn :

    عنجد عنجد انا زعلانة ول بتاكلي كل هدول لحالك بدون ما تطيريلك وحدة علية انقرش عليها الله يسامحك بس هههههههههههه😂😂😂😂😂😂😂😂
    ريتو الف صحة وهنا يا عمري يسلمهن هالايدين يا رب😙😙😙😙😙😙😙😙

    1. إم مصطفي 😉 :

      ههههههه ولك مو حالي هادا للعشيره إلي عنا ما شاء الله 😄😍
      حبيبتي إم حسون تسلميلي يااارب يسعدك ويحفظك لأولادك ❤😙

  23. أم صبحي :

    اااااه شفت الأصبع.. بشهوا جاجاتك .. إن شالله بيسلموا هالإيدين ياعمري على هالإبداع.. والله يديم المحبه والوفق بينكم وبين جميع الناس
    وصفتك روووووووعة 💖💖

    1. إم مصطفي 😉 :

      هههههه كله ولا الاصبع حبيبتي ربي يحفظك ويبارك بعمرك وصحتك يااارب
      😙😍

  24. الهام :

    ابداااع 👍👍

    1. إم مصطفي 😉 :

      حبيبتي تسلمي يا رب 😍😙

  25. 💖أحبكم بالله💖 :

    اللهم بارك شكل مشهي وربنا يباركلكم باللمة الحلوة ويحفظكم ويحفظ اخواننا بغزة وينصرهم ويكون عون لهم .
    عن جد من ازكى الاكلات التراثية اكلة الزرب وبتوقع موجودة بنطاق واسع بأغلب البلدان

    1. إم مصطفي 😉 :

      حبيبتي تسلمي وديادك يسعدك ويبارك بعمرك وصحتك يااارب 😍😙

  26. 😍 Um Saif Ajlouni 😍 :

    ماشاء الله المنضر ولا اروع من هيك
    اشي بيفتح النفس يعطيكووو الف عافيه
    وصحتين وعافيه علي قلوبكم يارب
    الله يزيد المحبه بينهم😍😍
    ججاتك مبينين عن دون الججات ههههههه بشهووووو 🤤🤤

    1. إم مصطفي 😉 :

      أكيد ولك انا معدله أللهم بارك 😁😄
      حبيبتي إم سيف ربي يسعدك ويبارك بعمرك ويفرجها عليكي من حيث لا تحتسبي ❤😙⚘

    2. 😍 Um Saif Ajlouni 😍 :

      امين يارب الله يسعدك ويوفقك بحياتك ويرزقك الذرية الصالحة إن شاء الله
      ولووووو حبيبتي صحبتهم المعدله كان ماطلعووو هيك 😋😋😋يسعدلي اياكي

  27. أمي جنتي :

    ماشاءالله اللهم زد وبارك
    جمال لايوصف هذه الأكلات التراثية اللي تشبع الفكر والعين وتعطي الطعام حقه من الأهتمام
    الله يجعله عافيه على أجسادكم وقوه في مواجهة أعدائكم يا أهل غزة الكرام
    أبدعتي وأبدعتي وأقنعتي الله يحفظك أم مصطفى ويعطيك ويهبك كل ماتتمني بحق لا إله إلا الله .

    1. إم مصطفي 😉 :

      حبيبتي تسلمي يا رب ربي يسمع منك ويقر عينك بفرحه لا توصف ❤😙

  28. منى :

    ماشاء الله منظرهم روووووعة.
    يا ريتني كنه مع هالكناين 😄

    1. إم مصطفي 😉 :

      يا عمري تسلميلي يااارب هههههه ياريت حبيبتي بتنوريني أنا مرت الكبير وكل يوم بضرب الكناين يا تري تامه بدك تكوني كنه😁😄😂😂

    2. منى :

      انا بعرف الحماية اللي بتضرب مو مرت الكبير.😦
      خلص انا بكون مرت الصغير المدللة 😉
      اصلا” احلى شي المعارك بين السلفات 😄

    3. إم مصطفي 😉 :

      ههههه كبيره بالأسم بس لتصدقي بمزح😁😙

    4. منى :

      شكلك مثلي مرت الكبير بس بالاسم .🐮

  29. dina :

    ماشاء الله اشي طيب هاد زرب بنعمله لما نروح على مزرعه اهلي واحلا اشي اللمه مع بعض عند الاكل الله يديم المحبه يارب عند الجميع والجاجات متحمرات وبشهو الله يباركلكم يارب 💕❤💕❤🌸💓

    1. إم مصطفي 😉 :

      شفتي جاجاتي حلوووين صح😄
      حبيبتي تسلمي يا رب ربي يبارك فيك 😚❤

  30. 🍒أم محمّد🍒 :

    ما شاء الله ..رووووعه وشكلهم بشهي صحه وعافيه عالقلبكم جميعا ويعطيكم العافيه
    ولا احلى من هيك طبخه ولمه وجوها حلوو
    تتهنو يا رب
    طلع عندكم بغزه المندي مختلف عن يلي بنعرفه من الاكلات الخليجه..حلو عرفتينا عالاسم الزرب عندكم ..
    الله يريح بالك ام مصطفى ويفرحك بمصطفى

    1. إم مصطفي 😉 :

      حبيبتي تسلمي يا رب ربي يسمع منك يا عسل😍😙

  31. إم مصطفي 😉 :

    يا حبيباتي تسلمولي يااااب😍

  32. وردة الأردن(الجبل) :

    1. إم مصطفي 😉 :

      هادا إلي يا عمري تسلميلي يااارب 😍😙

  33. وردة الأردن(الجبل) :

    يسلموااااااا الغزاوية واكلاتهم بتجنن ما في أحلى من هيك يعطيكي العافية ام مصطفى والله محيي غزة وأهلها الصابرين الصامدين

    1. إم مصطفي 😉 :

      حبيبتي تسلمي يا رب وشعب الأردن ما في زيه الله يحي أصله ويحميه❤😙

    2. وردة الأردن(الجبل) :

      تسلمي يا رب وأكيد ما فرق بينا

  34. 💖نور أحمد💖 :

    جماااااااال غير عادي ماشاء الله تبارك الرحمن شي بهبللللللللللل والله😍
    متخيلة نكهتو حاجة محصلتششششش
    اي يسعدلي المبدع واكلاتو الطيبة انا اي هههههه
    يعطيكم الف عافية والله هي النكهات الاصلية 😋😋
    ان شاء الله الف صحة وهنا احلى كنة😁
    ولكو هاتي قطعة😂

    1. إم مصطفي 😉 :

      هههههه حبيبت قلبي والله كلامك عسل تسلميلي يااارب كنت مستنيه تعلقيك والله وذكرتك بوصفات تاااانيه😁❤😙
      فعلااا طعمه راائع ومميز تمنيتك معي ربي يحققلك شو ما بتتمني ويجبر خاطرك بكل شئ حلو بالدنيا⚘😙

    2. 💖نور أحمد💖 :

      هههههه اعترفي تمنيتيني معك قبل الأكل ولا بعدو😂😂
      يسعدلي قلبك يا عسل ما انحرم منك وربي يكرمك بالذرية الصالحة اللي تسر قلبك وخاطرك😍

      وين ذكرتيني بوصفات تانية قري واعترفي😒

    3. إم مصطفي 😉 :

      هههههه لا لا بعد ما أكلت 😜
      بوصفه أم جاسم انزلي ع تعليقي شوفي😁😁

  35. ام عمر الزعبي :

    ما شاء الله تبارك الرحمن

    1. إم مصطفي 😉 :

      حبيبتي تسلمي يا رب 😍😙

  36. اولادي سعادتي ( ام آدم) :

    كيف هيك 🙄🙄🙄

    طب هو هاد بيصير 😨

    هاللكلات الزاكيه بدوووني ول طول نهارك قلبوشي وحبوشي واخر اشي بتحشي لحالك 😔😔😔 ومخبيه الاكلات الزاكيه الك 😔😔😔

    مش قادر استحمل المنظر كيف لو اذوق ولا اشم الريحه ع قلبي السلام ✋✋✋

    ههههههههه 😂😂

    تسلم ايدك ياعمري بتششششهي والله بيجننن ⁦❤️⁩⁦❤️⁩⁦❤️⁩⁦❤️⁩

    1. إم مصطفي 😉 :

      ههههههه يسعدهااا حبوووشتي ما ألذك ما شاء الله عليكي حبيبتي وأنتي كمان أكلات بشهوووو وزاكين ما شاء الله ❤😍
      وديادك يااارب يسعدك ويحفظك لأولادك وتشوفيهم احلاااا عروسه وعريس ياااارب⚘😙

  37. ام ياسر 👪 وميوووو :

    يم يمي 😋 شكل الدجاج روعه والحشوه البتشهي. دمار بعنئ الكلمه هههه عوافي علئ قلبكم وربي يزيد ويبارك 💖

    1. إم مصطفي 😉 :

      حبيبتي تسلمي يا رب ربي يسعدك ويبارك بعمرك وصحتك يااارب 😍😚⚘

  38. ام ايهم :

    ما شاء الله لا قوة الا بالله ..ان شاء الله بتعملوها هالاكلات بالافراح عن جد اشي زاكي

    1. إم مصطفي 😉 :

      حبيبتي تسلمي يا رب كلك ذوق إن شاء الله بيوتكم عامره بالأفراح والمسرات نورتينييي😍😙⚘

  39. 🌺🌺🌺🌺 :

    يختي ع الزكاوة
    والله انها بتشهي
    هاتيلك جاجه ادوق كيف طعمها

    1. إم مصطفي 😉 :

      حبيبتي تسلمي يا رب من عيوووني تفضلي 😉😄😙

  40. joudi :

    ماهذا يا فتاة 😱😱اريدُ من هذا الطعام وإلا سأصاب بالجنون

    ام مصطفى شو هل إجرام شو عافله بالجاجات يا حرام عليك انت بتعذبيهن ولا بتعذبينا 😭😭
    يا عيني ع الزكاوا😋😋

    1. إم مصطفي 😉 :

      هههههه حبيبتي تسلمي يا رب ربي يبارك فيك ويعطيكي الصحه والعافيه 🌷😙

  41. ام مهدي :

    فنانه مبدعه يسلمووووو

    1. إم مصطفي 😉 :

      حبيبتي تسلمي يا رب كلك ذوق يسعدك🌷😙

  42. Only me :

    يمي يمي.. ريتووووو صحه وهنا 💕 ع قلوبكم… طعمتهم صارت ع لساني 🤤

    1. إم مصطفي 😉 :

      يا عمري 😄
      تفضلي وإلك أزكى اكله من عيوووني😍🌷

  43. ميس :

    ماشاء الله صحة وهناا يارب

    1. إم مصطفي 😉 :

      حبيبتي تسلمي يا رب على ألبك 😙🌷

  44. […] الشيف إم مصطفي 😉 عن وصفتها طريقه عمل دجاج مندي طعم وريحه ولا أروع ملكة الأكلات الغ… […]

  45. أسماء :

    هلا انتي البصل وين حشيته والبرغل نقعتيه ولا كيف

    1. إم مصطفي 😉 :

      حبيبتي البصل حشيته بالجاجه من جوا
      والبرغل لا ما نقعته تركته يتشرب من المرقه أزكى 🌹

  46. ام محمد الجالولي :

    يسلمو ايديكي روعه
    ممممممممم بشهي

    1. إم مصطفي 😉 :

      حبيبتي تسلمي يا رب أنتي الاروع😍😙

اترك رد

لن يتم نشر عنوان بريدك الإلكتروني.