img
الرئيسة / أطباق رئيسية / حراء اصبعو سلسلة وصفات حول العالم 11 ملكة الأكلات السورية

حراء اصبعو سلسلة وصفات حول العالم 11 ملكة الأكلات السورية

/
/
/
2668 مشاهدات

 

حراء اصبعو سلسلة وصفات حول العالم 11 ملكة الأكلات السورية

حرااااء اصبعو من "سلسلة وصفات حول العالم" ♡11♡ ملكة الأكلات السورية

حراء اصبعو سلسلة وصفات حول العالم 11 ملكة الأكلات السورية

حراء اصبعو سلسلة وصفات حول العالم 11 ملكة الأكلات السورية , معكم صديقة زاكي الشيف الموهوبة ,

المقادير

  • الحراء اصبعو أكلة لذيذة وشعبية ومعروفة فيكم تقولو زعيمة السفرة بجمعة النسوان ههههه وعن الاسم لا تسألو رومنسي كتير وبدل على رقي اللي عم ياكلوه بأناقة وهدوء .. لحشو هالكلام ورا ضهركم وتعالو معي نحرق أعصابنا مو بس أصابعنا قال هدوء قال
  • للحراء اصبعو منحتاج: عدس بني كامل حوالي كوبين
  • نصف كوب كزبرة خضرا مفرومة ناعم
  • دبس رمان وعصير ليمون
  • إما قطع عجين ((مكون من ماء وطحين ورشة ملح وبتكون العجينة متماسكة شوي)) منعجنهم سوا وبعدين منفردهم ومنرشهم بالطحين ومنقطعهم قطع صغيرة أو فيكم تستخدمو المعكرونة كبديل
  • زيت زيتون
  • ثوم مهروس وشوية كزبرة خضرا
  • للتزيين جوانح بصل أو حبات رمان او كزبرة خضرا أو خبز مقلي أو كل شي سوا أو بلا هههههه

الخطوات

♡بسم الله الرحمن الرحيم♡

شوفة عينكم الموضوع مابدو مقادير دقيقة لأنها بتعتمد على زوقكم

انا حطيت شي تقريبي بس

يعني مو كل الناس بتحبها بنفس درجة الحموضة أو مثلا نفس الكثافة لهيك حطو ودوقو ايييي أهم شي تدوقو

أول شي طبعاً منسلق العدس وبس يستوي تقريباً منضيف دبس الرمان وعصير الليمون وقسم من الكزبرة وبس يغلو غلوتين منحط الزيت و مننزل قطع العجينة أو المعكرونة

الخيار بيرجع الكم حبيباتي والبندورة الي والسلطة الله يرحمها ماكانت طيبة ههههههه

ومنخليهم يغلو كلهم سوا لتستوي العجينة او المعكرونة ويتسبك كل شي مع بعضو وبتصير جاهزة للسكب

هلأ بقى مشان الزينة والنكهة مع بعض رح نحمس الثوم المهروس بشوية زيت ونحط عليه شوية كزبرة خضرا منقلبها تقليبتين بس مشان تحافظ على لونها الحلو

ومشان الخبز فيكم تقلو خبز بالطريقة المعتادة وفيكم تقطعوه لمربعات وتربطو المربع من نصو بخيط ليعطينا شكل الببيونة

منقليهن وبعدين منفك الخيط وصار عنا احلى فيونكات خبز مقلي نزين فيهن الشعر

عفواً الأكل

وفينا نزين بجوانح بصل مقلي مقرمش بتطلع رووووعة

وفينا نزين بحبات الرمان

كلو أطيب من بعضو

المهم جربوها وادعولي لإني عم اكتب هالوصفة وأنا فارطة من التعب وعيوني عم يدعو عليي عالعذاب اللي مسببتلهم ياه اهئ اهئ

أستودعكم الله وبشوفكم بالحلقة الجاية

124 تعليقاً

  1. الله يسعدكوعلى خفة دمك الي متل العسل.وتسلم اديكي على اكلاتتتك الروعة والي بتشهي الواحد ماشالله عنك..بتشبه الرشتاي كتير

  2. الله يسعدها يا ناس العسل وكلامها كلو عسل ربي يسلم هالديات يا وردة زاكي ما شاء الله تبارك الرحمن المنظر لا يقاوم أبدعتي حبيبة قلبي ♥️♥️♥️♥️

    بس سؤال الي ما بيحب الكزبرة الخضرا شو بيعمل 🤔🤔😪😪😪

  3. ياعيني عليك يانوارة زاكي حتا المحروق اصبعه بتاعك يختلف عن المحروق اصبعه للغير بطريقة التقديم والاناقه. ومنظرو كثير بيشهي. الله يسلم هلديات وربنا يعطيك العافيه. علطول علمفضله 😘😘😍

  4. يعطيك الف عافية ويعيشو هالايدين ما شاء الله بتشششششهههييييي وحرقتي مخي بهالحراقات باصبعه بموووت فيها هاي الاكلة وبعملها بالتمر الهندي يممممممميي بتجننننننن
    😍😋😍😋😍😋😍😋😍😋

    • هههههههههه ياقلبي انتي الله يسعدك ما ألذك ويخليلي ياكي😍
      خليها لله رح انهبل بس شفت اني نسيانة اكتب التمر الهندي ومو جايبة سيرتو وهو بجنن بهالوصفة😢😢
      قلت رح ردلكم وارجع علق تعليق للكل مشان نبههم😓

    • حبيبتي نور سلامتك من الهبل يا عسل 😂😜😜😜😜
      انا بصراحه فكرتك بس عاملتيها بدبس الرمان وبس شفت لونها قلت اكيد حاطة تمر هندي وناسيه تكتبو عادي حبيبتي بتصير
      المهم يسلمو ايديكي 😘😘😘😘😘

    • الله يسلمك ويسعدك ياعسل😄
      هههههه عنجد مشكورة كتير على تنبيهك😍😙
      عفكرة جربتا قبل بالدبس لحالو وكمان طيبة كتير بس التمر الهندي بيعطيا نكهة غير شوي

      ردت اجت عبالي هلأ😂

  5. ماشاءالله تبارك الله
    وصفه رائعة ولمساتك عليها حكايه ثانيه الله يعطيكي الخير ويهبك صلاح دينك
    نور أنتي تدمري الدايت تبع البنات كل وصفه يشتكو منك سوي لهم وصفات كلها حرمان يرجعو يتمنو هذا الجمال بوصفاتك .

    • انتي كل شي بتقوليه هو اللي حكاية❤
      ربي يكرمك ومايحرمني جمال وجودك ورقة كلماتك ويجزيكي كل خير على دعوتك الحلوة
      صدقاً من أروع الدعوات اللي ممكن تدعيلي ياها
      الله يجزيكي الجنة ياقلبي😘

      ومشان البنات أنا عرفانة ليه حاطينني وقاعدين ههههه
      كلو لأنو اقترحت عليهم بجروب صبايا الوطن العربي ريجيم جماعي ينقذنا من اللي نحنا فيه😂
      قام كل ماشافولي وصفة صارو بدهن يذكروني بالريجيم😠
      أصلاً أنا الحق عليي علقت حالي😂😁

    • اللهم آمين وإياكي أختي الغاليه على قلبي
      ههههههههههههه
      وأنا قول ليش يذكروكي بالريجيم الله يعينكن عليهن
      والله ماعرفنا الرجيم إلا هذه السنين عقدو الناس به
      الناس تاكل حسب أحتياجه ما احد يقدر ياكل أكثر مما يشبعه وهذه حقيقه لكن الغلط باالنظام اللي ناكل فيه والأوقات وقلة العمل مع تسهيل التكنولوجيا لكل شيء
      لوظبطت هذه الامور مايضر الأكل لا إفراط ولا تفريط .

    • اي والله عم تحكي جواهر بس بدك هالكروش يفهم ههههه
      أصلا أنا الحق عليي بضل ناغشهم عن الاكل والريجبم ففكروني قد الجرافة😂
      زايدة كم كيلو يادوب ههههههه

  6. #نصائح للطبخ ….😍 🌸 الملوخية وطبخات اللبن والطحينية ما بيتغطوا ابدا اثناء الطبخ او بعده لحتى يبردوا …الملوخية بتسود وبتفصل واللبن والطحينة بيفرطوا. 🌸 لا تفتحي ابدا على ورق العنب لانه رح يسود ويقسى، عيريله ساعة ونص بالطنجرة العادية وساعة الا ربع بالضغط واتركيه مسكر حتى يدفأ وشوفي لونه الأخضر ما احلاه . 🌸 حطي مع سلق ورق العنب شوية ملح ليمون بيحافظ على لونه عند الطبيخ وما بيسود . 🌸قطعي الباذنجان بالطول ما بيشرب زيت وبعد ربع ساعة من رش الملح عليه اغسليه وصفيه غطيه بطحين واقليه بزيت حامي اولها وبعدين خففي النار بيطلع مقرمش وناشف وشكله بيشهي. 🌸اياك تحطي خل بميه سلق اللحمه بيتحول لونها اسود وعالفاضي 🌸سر طراوة العجين ضعي ملعقة خل ابيض تصبح العجينه هشه وطريه ولونها ابيض 🌸عند قلي السمك ضعي قليل من رشة الفانيلا البودره في الزيت حتى لة تظهر رائحة السمك في البيت 🌸سر الكبسه اعصري برتقاله فوق الكبسه عند استوائها أوبرش البرتقال بيعطيها طعم رائع، وبالنسبه للزبيب انقعيه في عصير البرتقال يصبح طعمه خيالي 🌸أهم شيء بالكبسة والصيادية لا تحطي بندورة معصورة عالخلاط بتخبص الرز .حطي معجون البندورة. 🌸عشان تحفظي ثوم الخزين بدون ما يفضى لفتره طويله تصل لسنتين ويمكن اكتر افصلي سنون الثومه عن بعض بدون تقشير وحطيهم بقنية وفي الثلاجه وكل ما بدك خذي من الثلاجه وبكون سهل التقشير 🌸بنكاشة الاسنان اثقبي حبة الكوسا 3ثقوب قبل الطبخ بتدخل المي جواتها وبستوي الرز كلة …واطبخية اول ثلث ساعة بمية وملح لحالها بعدين بتضيفي دبس البندورة او اللبن جربوها ودعولي. 🌸حتى تحافظي على الخضره فتره طويله احفظيها بكيس خيش .كيس رز بسمتي بظل ثلاثه اشهر بالثلاجه ما بصير عليه شي 🌸الجاج ما تغطيه عند السلق قبل ماتشيلي الزفرة تطلع بفرق بطعمه كتير واذا بالضغط نفس المبدأ شيلي الزفرة بعدين غطيه 🌸اذا طبخت لبن رايب ما تحطي ملح الا بعد ما تطفي الغاز ويهدى غليان اللبن ما بيفرط معك و لو حسيته فرط بس يبرد شوي عيدي عليه بالخلاط بيرجع تمام 🌸لتبييض لون الحمص ..حطي بالخلاط عند الطحن قطعة ثلج او فرزي الحمص ساعتين قبل الطحن بصير لونه أبيض وطعمه الذ. 🌸اذا كنت ناقعة رز وماصحلك تطبخيه بنفس اليوم ضيفيلو ملح وحطيه بميته بالتلاجة بضل يومين تلاتة مابيصرلو شي ووقت الطبخ اغسليه منيح من الملح 🌸عند شوي السمك بالصينية او الجريل حطي فوق شرائح الليمون اعشاب بيعطيه ريحة وطعم روعة وبيمنع التصاقة. 🌸حطي رشة سميد تحت عجينة البيتزا اثناء فردها بتعطيها قرشة مرتبة ولون حلو ومما بتلزق.. 🌸

  7. ياااا سلااام سلم شو هالحلووو هاااادا اشي بجنن يعطيكي الللف عافيه يا بعد قلبي ويسلمولنا هالايدين السحريات يلي بيتقلو بذهب ما شاء الله عنك يا نوارتنا وشمعتنا وفلتنا اللي منوره ومحليه زاكي ربي يحفظلنا اياكي ويحفظك لعيلتك وتضلك تسمنيهم وتحشيهم اكل زاكي هههههه ويديم عليكي صحتك وعافيتك يا بعد روحي انتي❤😍

  8. ما شاء الله عليكي حبيبتي ربي يحفظك ويبارك بعمرك وصحتك يااارب 😍
    عدا عن الشكل الرووووعه والتحفه أنتي مميزه كالعاده ووصفاتك لا يوجد مثيل لهما 😄😉
    صحه وعافيه يا عسل وإن شاء الله بالصحه والعافيه على ألبك يا عمري ❤
    وبحببببك أنااااا🌷

  9. كيف يعني😣😣😣 شكلها خراااافي😋😋😋 من وين اجيب بهَليل حراق اصبعوا..

    احنه عدنه بالعراق اكله اسمها محروق اصبعه😂😂 بصل و مي و كركم و خبز ثريد و نعصر عليها حامض. و ناكلها مع البصل و الفلفل الحار😋😋😋 .. والله تلم كل العيله عليها

  10. ماشاءالله تبارك الرحمن شوهاد يانوارتنا بسم الله حولك
    منظرا بيشهي 😍
    وبيغرف القلب على لقمة😋😋
    الله يسلم ايديكي ياقلبي
    كالعادة مبدعةةةةةة😘😘

  11. نور ربي يسعدك على كلامك كله رقي ونغش ربي يهدي بالك ويعطيكي لحتى يرضيكي ….انا ما عمري عملتها بس رح اجربها لانك عملتيها بس مقادير صغيره بس شو نوع المعكرونه لو سمحتي

    • ياحبيبة قلبي انتي ربي يسعدك ومايحرمنا لطافتك وكلامك الحلو
      كلك زوق والله 😘
      جربيها وادعيلي وتقريبا بتزبط أغلب أنواع المعكرونة عدا السباغيتي
      فيكي تستخدمي البواري😁 يعني اللي على شكل أنابيب أو الملفوفة على شكل ديربي😄

  12. حبيباتي كلكم ربي يسعدكم ويخليلي ياكم ويجزيكم كل خير على حلاوة أخلاقكم وكلامكم العسل😍

    بس بدي نبه إني ناسية موضوع التمر الهندي تماماً وكتير استغربت بس رجعت شفت الوصفة😔
    فيكي تضيفو طبعا بعد سلق العدس منقوع التمر الهندي طعمو بهالأكلة روعة والله
    سامحوني على هالنسوة سقطت سهواً😓

  13. يا عيني يا عيني شو هاد يا نور مبدعة وفنانة ما شاء الله عنك شكله لوحة فنية 👏👏👏👍👍👍
    واكيد من تحت ايديكي رح يطلع اطيب يا نوارة زاكي رح جربه اكيد وعلى المفضلة ع طول يسلم ايديكي وصحتين وهنا يا رب 💖💖💖💖💖

اترك تعليقاً

لن يتم نشر عنوان بريدك الإلكتروني.