مشاوي كباب وشقف وكبدة خروف ملكة الأكلات الأردنية

36 3٬042
 

مشاوي كباب وشقف وكبدة خروف ملكة الأكلات الأردنية

مشاوي كباب وشقف وكبدة خروف ملكة الأكلات الأردنية

مشاوي كباب وشقف وكبدة خروف ملكة الأكلات الأردنية

مشاوي كباب وشقف وكبدة خروف ملكة الأكلات الأردنية, معكم صديقة زاكي الشيف الموهوبة ,

المقادير

  • اتنين كيلو كباب ممكن خروف أو عجل
  • لحمة خروف مقطعة شقف أتنين كيلو
  • كبدة خروف وممكن المعلاق كله كبدة وفشة وقلب وكلاوي يعني معلاق واحد
  • لية خروف مقطعة شقف نص كيلو منشان الطعمة الزاكية وبيساعد على سوا اللحمة أسرع
  • قد ما بدكم زاكي مع المشاوي بأنواعها:
  • بندورة
  • بصل يابس
  • وممكن فلفل حار وحلو كمان
  • اللحمة برأيي المتواضع ما بتحتاج أكتر من:
  • الملح
  • الفلفل الأسود
  • وبلا البهارات حتى ما تغطي على طعمتها الطبيعية:
  • للشوي:
  • فحم ومنقل

الخطوات

المشاوي يا جماعة زاكي من ألذ وأطيب الأكلات إلي ما بيختلف عليها اتنين وعنا بالأردن وبغير دول طبعا كتير بينحب المشاوي وبنعملها بالبيت عالبرندة عالسطح بالبستان برحلة وبنقولها «هش ونش»

هلأ بالنسبة للطريقة لأنه ما عندي مفرمة لحمة بنجهز الكباب عند اللحام لحمة خروف بدون عظم او عجل طبعا بينفرم معها شوية بصل مش قد كمية البصل إلي بتنفرم بالكفتة ولية خروف وشوية عروق بقدونس وملح وفلفل وبتكون جاهزة للشك أو التسيخ على اسياخ الشوي

بيكون الكباب اطرى من الكفتة الي فيها كمية البصل اكتر وممكن ثوم وفلفل حار او عادي معه وبتكون متماسكة اكتر وما بتفترك متل الكباب

وبنشكه أو نسيخه بسياخ الشوي الحديد بأنه نحط جاط فيه مي والكباب عنا مخلوط منيح مع الملح والفلفل ونبلش نبل أيدينا مي ونعبي الكباب عالسيخ بشكل طولي حتى يمسك عليه وبيكون جاهز للشوي نرتبه عالمنقل وبنشويه ونقلبه عالجهتين ويا عيني عالريحة إلي بتفوح بتشهي

أما الكبدة والشقف والقلوب والكلاوي والفشة مثلا كلها بقطعها شقف بحجم مناسب للشوي وبشكها عالسيخ بعد التمليح والتفلفيل هههه وممكن إذا حبينا منه حار بنحط شطة حمرا بودرة

وبتكون جاهزة للشوي برتبها عالمنقل وبسياخ تانية بحط حبات بصل وبندورة وبشويها مع اللحمة والكبدة وننتبه ما تنحرق بنقلبها عالجهتين وبنراقب الجمرات الفحمات يعني لحد ما يستوا بنحطهم بخبز مشروح أو عادي مع البندورة والبصل المشويات والكباب كمان وياااا سلاااام مع لبن رايب بس

وصحة وميت هنااااا

36 تعليقات
  1. آية :

    ياعين ياليل شو هالصباح الحلو مشاوي مشاوي شي بشهي خلص فطورنا والغدا عندكم افتحولنا الباب😉

    1. وردة الأردن(الجبل) :

      ميت هلا وتسلمي على تعليقك اللطيف

  2. faten ali :

    ريتو الف صحه وعااافيه
    بدي اسألك من وين انتي من الاردن

  3. ام البنات :

    صحتين وعافيه….

  4. ميس :

    صحة والف عافية يارب

  5. . ..... :

    رزان 🌷
    صحة وهنا يا قلبي
    احنا عنا بنقدم معهن سلطة مشويات وهي عبارة عن باتنجان مشوي مع بندورةوبصل وثوم وفلفل حار مشويين عالمنقل وبنضيف الهن زيت زيتون وملح

    1. هبة :

      نفس السلطة تبعيتي بس انا مابحط بانجان😋

    2. . ..... :

      رزان🌷
      تسلميلي ياهبوش ربي يسعدك ويهنيكي جربيها مع باتنجان رح تحبيها كتير

    3. وردة الأردن(الجبل) :

      شي زاكي والله

  6. رشا رشا :

    يسلمو اديكي حبيبتي ورده
    الف صحه وهنا 😘😘

  7. ... :

    سوزان🌹
    ماشاء الله عنك فتحتي نفسنا عالصبح ..ذكرتيني باجواء عيد الاضحى وكل عام وانتو بخير

    1. وردة الأردن(الجبل) :

      وإنتي بخير

  8. ريحانة🌿 :

    اللهم بارك عالهش والنش
    من ألذ الأكلات
    صحتين وعوافي على قلوبكم💝

  9. أم حسنين :

    عاااااشت ايدج…..ماشاءالله بيشهي اطيب شي هي المشويااات😍😘🌹

  10. ريحانة🌿 :

    1. وردة الأردن(الجبل) :

      يسلموا ريحانة شكلهم بياخذ العقل

    2. وردة الأردن(الجبل) :

      روعة بياخدوا العقل تسلمي ريحانة

  11. أم حسنين :

    1. وردة الأردن(الجبل) :

      يسلموا شكلهم بيشهي

  12. Farah :

    يسلمو ايديكي ويعطيكي الف عافية يا رب 👍👍👏👏👏

  13. هبة :

    يمممممم
    ياعيني عالمشاوي وخاصة اذا من تحت ايدين معدلين
    يسلم ايديكي ياعسل😘
    المشاوي اكلة لاقبلة ولابعدا وخاصة بايام العطل ياااااعيييييني😀
    الف صحةوهنا عقلبكن😙

  14. هبة :

    منقلك صغنون متل منقلي😅😋

  15. صفاء 👒 :

    يا ما شاء الله
    أحلى اشي وازكى وأطيب والذ واحلى جو لاحلى اكلة
    صحة وعافية على قلبكم

  16. أنثى ♀ :

    ما شاء الله الريحة شاممتها يسلمو ايديكي حبيبتي 😘 وصحة وعافية على قلبكم

  17. إم مصطفي 😉 :

    ما شاء الله عليكي حبيبتي ربي يحفظك ويبارك بعمرك وصحتك يااارب 😍
    كتير طيبين والشكل ولا أجمل صحه وعافيه يا عسل 🌷😙

  18. 💠أم جاسم💠 :

    ما شاء الله روووعة
    ازكى اكلة مابيختلف عليها اثنين المشاوي
    الف صحة وهنا ويعطيكم العافيه

  19. نادية :

    روعة وتسلم ايدك

  20. 🌺🌺🌺🌺 :

    ماشاء الله تبارك
    الله يديم عليكي هالنعمه

  21. أمي جنتي :

    ماشاءالله
    الله يبارك لكم وصحه وعافيه عليكم تسلم إيدك .

  22. 🍒أم محمّد🍒 :

    صحه وعافيه ورده ..بتشهي الكباب

  23. أم عبدالله الفارس :

    يا اكلاتك يا ابداعاتك 😍😍😍 تسلم الأيادي إن شاء الله حبيبتي و بألف صحة و هنا عليكم يا رب

  24. ام علاء ابو يحيى :

    يا سلام على الاكل الزاكي تسلم الايادي منظرهم رووووعه الله يعطيك العافيه

  25. ام عبد الرحمن ولين 💗💗 :

    صحة وعافية يارب منظر بيشهيييييي
    انا عشقي الكباااب
    هاتيلك صحن 😁

  26. joudi :

    يا سلام الريحة لعندي يميي مطرح ما يسري يمري

  27. 💖نور أحمد💖 :

    يميييييي
    ماشاء الله تبارك الرحمن منظرهم روووووعة والله واعتقد بيطلعلنا كل وحدة سيخ😂
    ان شاء الله هنا وعوافي ويعطيكي الف عافية وفعلا اللحمة المشوية مابدها أكتر من ملح وفلفل😍😋

  28. ام محمد الجالولي :

    يسلمو ايديكي روعه
    ماشاءالله المنظر روووووعه

اترك رد

لن يتم نشر عنوان بريدك الإلكتروني.