سويسرول الإدمان ولا أسهل وبمنتهى الرقي

137 4٬395
 

سويسرول الإدمان ولا أسهل وبمنتهى الرقي

سويسرول الإدمااااااان ولا أسهل وبمنتهى الرقي

سويسرول الإدمان ولا أسهل وبمنتهى الرقي

سويسرول الإدمان ولا أسهل وبمنتهى الرقي , معكم صديقة زاكي الشيف الموهوبة , السلاااام عليكم ورحمة الله وبركاته شوفو لنكون متفاهمين من أولها بمجرد ما تخلصو قراءة هالوصفة كل وحدة رح تاخد موقعها بالمطبخ وتعملها لعيلتها خلي الكل ياكل سويسرول زنكة زنكة ودار دار شدو الهمة يا شطار هههههههه أنا اذا بقعد أوصفلكم من هلأ للصبح مابخلص لك هي أطيب سندويشة بالحياة هي الدمار المحقق بذاتو وياهومالالي عالسويسرول وحلاتو ويسعدلي قلبو ما أكبر غلاتو وهف من أبو عبدو ما أكتر حكياتو للي مابتعرف محسوبتكم هية الملقبة أبو عبدو هههههه يلا نطو معي نشوف المقادير

المقادير

  • 4 بيضات كبار أو 5 صغار
  • ثلاث أرباع الكوب سكر
  • نصف كوب طحين
  • ربع كوب كاكاو
  • باكيت فانيليا
  • حوالي 3 ملاعق كبيرة زبدة مذوبة منخليا عجنب لتفتر

الخطوات

☆بسم الله الرحمن الرحيم☆

بدي قلكم انو الغالبية بيعتبرو السويسرول صعب أو مارح يزبط أو مارح ينلف معنا منيح بس كرمالي أنا جربوها هيك وقلعو عين ابليس هههههه

شوفو سويسرول الشوكولا اللي عليه فريز كان أول تجربة سويسرول إلي والو زمان وطلع تحفة والحمد لله فقويت قلبي وصرت اعملها أكتر ودايما بتزبط يسلمولي ايديني أنا ههههههه

أول شي بدنا نخفق البيض مع السكر والفانيليا مو أقل من ربع ساعة لنوصل فيها لمرحلة بكون فيها البيض كريمي

ولاحظو كيف بالصورة الرابعة لما ينزل على وش الخليط بضل متماسك عالسطح شوي يعني مابيختفي أثرو فورا

بعدين رح نخلط الطحين مع الكاكاو اذا كنا حابين نعمل السويسرول ع شوكو أما اذا حابين سادة فمنبدل مقدار الكاكاو بطحين كمان

بعد ما ننخلهم رح نضيفهم على 3 دفعات مثلا على خليط البيض بالتدريج ونخلط بالسباتيولا أو بملعقة خشبية بس بخفة مشان مانهبط البيض

يعني اعتبرو حالكم عم تعاملو بيبي هههههه

بعد مايندمجو تمام رح نحط الزبدة ورح نخلطها مع الخليط كمان وخلص رح نصب الخليط على صينية مبطنة بورق الزبدة وندقها مرة أو مرتين بخفة مشان تروح من الخليط فقاعات الهوا

ومندخلها عالفرن المحمى مسبقاً على درجة حرارة 180

بدي قلكم إنو 7 أو 8 دقايق كافية تماماً لتكون جهزت عنا (حسب الفرن طبعا واختبروها بعد 7 دقايق بعود خشبي)

لأنو هية رح تطلع بقمة النجاح والطراوة ولأنو مابدنا ياها تنشف زيادة وتتكسر معنا باللف

اذا اتبعتو هالتعليمات رح تكتشفو قديه الموضوع سهل وقديه الكيكة بتجنن

لدرجة إني وقت طالعها مابلفها ولا بعمللها شي

بتركها لحتى تبرد شوي بعدين بحشيها وبلفها

احشوها بشو مابدكم

ممكن كريما وفواكه او بس كريما أو شوكولا دهن أو مربى

الخيارات المتاحة كتيرة وسعراتها ولا أظرف ههههه

بعدين منلفها ومنغلفها ومندخلها للبراد كم ساعة وبعدين زينو كيف مابتحبو وهي قدامكم شوية خيارات متواضعة بتمنى تعجبكم

سامحوني على كترة الصور بس حبيت سليكم شوي زيادة هالمرة ههههههههه

انتو رح تتسلو بس أنا الي يومين عم قصقص فيهن هههههههه

حبيباتي بحبكم كتير وبتمنى تدعولي بالبركة وتعطوني رأيكم بهالوصفة وأهم شي تفرحو فيها حبايبكم

وبشوفكم بالوصفة الجاية

137 تعليقات
  1. شام لاحمد :

    شوهاد والله تحفه شي بجنننننننن يسلمون يارب

    1. 💖نور أحمد💖 :

      تسلمي لقلبي والله كلك زوق😍😘

  2. 💖نور أحمد💖 :

    حبيبة قلبي loulou انا عم ردلك على تعليقك بس مابعرف ليه ردي ماعم يطلع😓
    يسعدلي قلبك حبيبتي كلك لطف 😘

  3. 🍒أم محمّد🍒 :

    ما هذااا يا نور !!
    بالفعل انها دماااار شااامل ..شامله لكل شي شكلهااا رووووعه وبتفتح النفس يسلموو دياتك يا رب ..كل صوره احلى من الثانيه

    1. 💖نور أحمد💖 :

      عيونك الحلوة يا قلبي
      أسعدتيني متل العادة بلطفك وزوقك والله
      ربي يكرمك يا وردة ويخليلي ياكي 😍

  4. Farah :

    ما شاء الله عنك نوارة زاكي دائما مبدعة وفنانة يسلم هالايدين ويعطيكي الف عافية يا رب وما يحرمنا من وصفاتك الحلوة متلك❤❤❤😘😘😘

    1. 💖نور أحمد💖 :

      حبيبة قلبي الله يسعدك ويعافيكي ومايحرمني منك انتي كمان
      مخجلتيني دايما بزوقك والله😍😘

  5. وردة الأردن(الجبل) :

    ما شاء الله شي متل الخيال الله يحميكي وتضلي مبدعة على طول يا أحلى نور

    1. 💖نور أحمد💖 :

      ربي يحلي ايامك ومايحرمني منك ياقلبي من بعدك انا😀😙

  6. ام ليث :

    بسم الله ما شاء الله عليكي حبيبة قلبي ♥️
    والله قلبي داب على سويسرولاتك يا عمري هههه وما شاء الله كل سويسرول أطيب من التاني كلهم بجننوا و الطعم اكيد اكيد غراااام 😍😍 بصراحة انا غيبت على آخر واحد بيصير آخد هاللقمة ههههه ان شاء الله جاري التجربة وعالمفضلة عطوووول يسلمهن هالايدين يا رب
    وربي يسعدك و يحفظك ويباركلك بصحتك و عافيتك يا قلبي 😘😘😍💋

    1. 💖نور أحمد💖 :

      هههههههه دخيل قلبك ياعمري الله يسعدك ومايحرمني هالطلة الحلوة
      اشتقتلك كتير والله كيفك طمنيني عنك😘
      وعحسابك السويسرول كلو مو بس آخر لقمة😁
      للأمانة فعلا رائع وان شاء الله بس تجربيه رح تدعيلي
      ممنونتك من كل قلبي على ثقتك لأنك حابة تجربي الوصفة وابقي طمنيني عن النتيجة ها😄😙

  7. الآء محمد :

    نور يا نور أبدعتي منظرهم بيشهي و اكيد ع المفضلة

    1. 💖نور أحمد💖 :

      حبيبة قلبي نورتيني ياعسل😄
      يخليلي ياكي😘😍

  8. نهلة الزعبي :

    يسعدلي المعدل عنجد انك ابدعتي

    1. 💖نور💖أحمد💖 :

      الله يسلمك ياقلبي هاد من لطفك😍

  9. هُدى :

    مرحبا أخت نور انا لما بحط الأشياء على ورق الزبده بعد ما تنضج بيلزق بورق الزبده وبتغلب وأنا افك فيه وبيلزق وبخرب شكل الأكل ان كان كيك او معجنات

    1. 💖نور💖أحمد💖 :

      هلا ياقلبي نورتيني😘
      غالبا نوعية ورق الزبدة بتكون مو منيحة
      جربتي غير أنواع؟؟

اترك رد

لن يتم نشر عنوان بريدك الإلكتروني.