img
الرئيسة / سلطات و مقبلات / الزعتر البلدي خلطة بتنهدى لملوك

الزعتر البلدي خلطة بتنهدى لملوك

/
/
/
2478 مشاهدات

الزعتر البلدي خلطة بتنهدى لملوك

الزعتر البلدي خلطة بتنهدى لملوك

الزعتر البلدي خلطة بتنهدى لملوك

الزعتر البلدي خلطة بتنهدى لملوك, معكم صديقة زاكي الشيف الموهوبة ,

المقادير

  • نصف كيلو زعتر ورق مجفف
  • نصف كيلو سمسم
  • ربع الى نصف كيلو سماق حسب الذوق
  • ربع كيلو قضامة اسطنبولية
  • ملعقتين ملح ليمون
  • ملعقة ملح
  • نصف وقية عين الجرادة حب
  • نصف وقية كزبرة ناشفة حب
  • ملعقتين شومر حب
  • ملعقة كمون حب
  • كوب زيت زيتون

الخطوات

السلام عليكم ورحمة الله وبركاته

مافي بيت بتخلى سفرة الافطار فيه من الزيت والزعتر وانا شخصيا كثير بحبه وبفضله على باقي الاصناف، حتى بالمناقيش شو طعم وشو ريحة رائعة، لهيك حبيت اقدم طريقته البسيطة رغم انه متوفر وبكثرة بالاسواق بس شغل البيت شيء استثنائي مافي جاهز بيشبهه . ورح اعتبر هالوصفة كمان هدية للمغتربات يلي ما عم يلاقوا زعتر.

أولاً/ طحن المكونات

*بنبدأ بالزعتر بكون ورق مجفف بنطحنه عالمحضرة بالنعومة يلي بنحبها ، في ناس بيفركوه فرك ماحبيت هالطريقة طحن افضل.

* السماق

السماق انا جبته حب عن الشجر عشان اضمن يكون طبيعي مية بالمية ، بس بكون حبوب رطبة بدنا نتركها يوم منشورة تنشف وبعدين بنطحنها على مطحنة البهارات وبننخلها من البزر اللي فيها.

—طبعا بتقدري تشتريه مطحون جاهز بس انا مابقدر عشان ابني لازم السماق اله يكون مضمون مافي صبغات.

*القضامة بنطحنها برضه بسرعة بتنطحن .

ثانياً/ حواجة الزعتر

يلي هيه خلطة مطيبات رائعة جدا وما بتغير طعم الزعتر بل بتزيده زكاوة وجودة.

بنحمص الحبوب بالاول وبنتركها تبرد بعدين بنطحنهم ناعم جدا ً.

ثالثاً/ جمع المكونات

بنفرك الزعتر بزيت الزيتون لأربع اغراض ، لون اغمق للزعتر ، وطعم الذ ، وفائدة أكبر، وبيخفف حرورة الزعتر.

—والان بدنا نخلط كل المواد مع بعض ولا ننسى السمسم ماذكرته لانه مابده اي عملية لا طحن ولا شي. وبنضيف الملح

— وملح الليمون بفضل انه ينطحن ناعم بينتشر احسن وطعمه ببين طبيعي ما بيزعج.

ملااااحظة

المكونات نسبها حسب الذوق يعني بتحبي حامض كثير زيدي سماق ، بتحبي السمسم زيدي سمسم،

بتحبي مالح زيدي ملح وهكذا.

انا كنت متخوفة من حواجة الزعتر لاني اول مرة بضيفها بالعادة ما بستخدمها ، فحطيت منها بالتدريج ملعقتين وذقت طلع ما الها طعم زدت زدت لحتى حطيت كامل الكمية وللأمانة كثير طيبة ورائعة يلي بذوق بيندهش منها مابعرفوا ايش فيها بس بحكيلك زاااااكي جدا.

رابعاً/ التخزين

بيتخزن بالمطبخ عادي ما بصرله شي ابدا بمرتبانات او اكياس بعيد عن الرطوبة.

*بتمنى من كل قلبي تجربوا هالخلطة وتعطوني رأيكم لإنه بهمني ، والف صحة وهنا مقدماً.

193 تعليقاً

  1. ام جاسم الله يسعدك بدي منك خدمه
    احكيلي كيف اشوي جاج بشواية الفرن من اول خطوة لآخر خطوة وكم بدها وقت
    اول مرة بدي اعملها عندي عزومه بكرة لاهل جوزي عشان بنتي
    ع العشرة بدي ابلش لانو بعد الظهر لازم بكون الغدا جاهز

    • شوفي رح احكيلك الشوي على السيخ شكله هيك قصدك لانه مش ضامنه ارجع ادخل عزاكي المسا.

      بتتبلي الدجاج من قبل بليلة بعد تنظيفه طبعا
      ب ملح وفلفل وزيت الزيتون وخل وبهارات دجاج وثوم وبصل مطحون وبابريكا وشطة وادعكيها مزبوط ودبس بندورة.
      وخليها بالثلاجة مغطاه.

      ثاني يوم بتنزلي السوائل عن الدجاج وبتخلي بس التتبيلة اللي بتلزق. ( هاد لانه عالسيخ اما اذا بصينية حطي الدجاج مع كلشي )
      بتشكيه عالسيخ وبتثبتي البرغي تاع الشوكة كويس. وركبيه مكانه وشعلي الفرن من تحت على اعلى حرارة مع تشغيل زر تدوير السيخ
      وحطي صينية مغلغه بقصدير تحت الدجاجات لانهم رح ينزلوا سوائل وتنحرق وتوسخلك الفرن، عالقصدير بتشيليه وبترميه.

      بدها ساعة ونص بالفرن بتكون استوت وتحمرت وتحمير السيخ رائع بدون ما تشعلي الشواية.

      اذا فرنك كثير حامي نزلي حرارته شوي مش كثير.

      بس عفكرة شواية الفرن ما بتوسع الا دجاجتين او ثلاث مابعرف إذا هالقد بدك كمية تأكدي من الكمية قبل ما تتورطي.

      نفس التتبيلة للدجاج لو بدك تعمليهم بالكيس الحراري. وانا بنصحك بالكيس صراحة.

    • ايوا يا ام جاسم. انا استفدت كمان من طريقتك لان انا قبل كنت احط الجاج ع السيخ واشغل زر تدوير السيخ والشوايه. مو اشغلو من تحت يطلع معي محروق وبدو سوا كمان ياعيني عليكي ام جاسم مو عارفي شو احكيلك يسلمو.ياعمري

    • حبيبتي ام جاسم غلبتك معي
      خلص رح اعملوا مرة تانيه من تحت اشغل الفرن
      انا سغلتوا من شوايه ساعه ونصl, الحمد الله طلع كلو مستوي
      بس التوبه ارجع اعيدوا ع السيخ ايدي اتحروقوا وظلوا الشوكه تنفك والله عزبني

  2. بعيدا عن جمال الوصفة وسهولتها أو صعوبتها بهنيكي وبحترمك من كل قلبي على كمية الحب اللي بقلبك تجاه عيلتك واللي بتخليكي تعمليلهم حتى أبسط الشغلات بإيديكي
    انتي أم رائعة اللهم بارك وبتستحقي كل التقدير والله❤
    الزعتر شكلو تحفة خاصة مع فن الترتيب المضاف للصور بطريقة أنيقة ملفتة جدا اللهم بارك😍
    ربي يسلم أناملك ويعطيكي الف عافية ياقلبي😘

  3. ماشاءالله 😀
    الله يحفظك ويبارك لعيلتك فيكي ويعطيكي الف عافية فعلا انك ست بيت من الطراز الرفيع😍
    الله يعطيكي الف عافيةوصحةوالف هنا😙
    منظر الصدر بيشهي والوانا بتفرفح القلب ماشاءالله😄😄

    • الله يسعدك ام علي ويبارك فيكي يا رب
      السماق منتشر عنا بالاردن على جبال الشمال وبكثرة فأكيد موجود بفلسطين بجبال الشمال برضه لانه نفس الطبيعة الجغرافيه.
      او اذا الك زوار للاردن وصيهم بجيبولك

  4. أم مصطفى اذا ماعندك مانع اتحفينا بوصفة الدقة بتشهي خصوصا الدقة الغزاويةولا أنسىى بداع الأخت أم جاسم يعطيك العافية ولا في الأحلام

  5. طبعا ك العاده دخلت اشوف ملفك و أتصفح وصفاتك الروووعه و شفت هالخلطه التجنن😍😍😍 … مدري وين كنت و ما شفتها بوقتها…🤔🤔🤔

    روووووووعه و تحفه و تجنن و ماكو كلام يوصفها ..

    تعيشي و تبدعي يا رب و يسعدكم إن شاء الله حبيبتي انتي و عيلتك و أحبابك بإذن الله…

اترك تعليقاً

لن يتم نشر عنوان بريدك الإلكتروني.