img
الرئيسة / حلويات / كيكة خرافية بنكهة القهوة مع مهلبية الشوكولاتة البيضا حاجة ماحصلتش

كيكة خرافية بنكهة القهوة مع مهلبية الشوكولاتة البيضا حاجة ماحصلتش

/
/
/
2969 مشاهدات

 

كيكة خرافية بنكهة القهوة مع مهلبية الشوكولاتة البيضا حاجة ماحصلتش

كيكة خراااافية بنكهة القهوة مع مهلبية الشوكولاتة البيضا حاجة ماحصلتش

كيكة خرافية بنكهة القهوة مع مهلبية الشوكولاتة البيضا حاجة ماحصلتش

كيكة خرافية بنكهة القهوة مع مهلبية الشوكولاتة البيضا حاجة ماحصلتش , معكم صديقة زاكي الشيف الموهوبة , اليوم رح ندلع حالنا وقهوة وماقهوة وشوكولاتة وما شوكولاتة وتجربوها ماتجربوها وتعزموني ماتعزموني ههههه عنجد الوصفة على قد مو سهلة على قد مو نكهاتها عميقة ورقيقة وكلها جمال بالحقيقة هههههه عفكرة أنا وعم نام من شي يومين فكرت بهالخلطة والوصفة ماطبقتا عن شي من النت ولا شفتا بهالطريقة أصلاً لهيك ماعرفت حطلا اسم محدد فسموها عكيفكم ههههه أعتقد أكيد إنو مليان وصفات بتشبها بس عنجد بالنسبة الي كانت من هبل ماقبل النوم وقت العقل يبحلق ويبطل يرضى ينام فبينتجلنا هيك أفكار الله يرضى عليه هههههه المهم تعو بلا مانعسكن بالحكي وفوتو قدامي عالموتفاك عقولة الأتراك ههههه

المقادير

  • مقادير الكيك:
  • 5 بيضات
  • كوب وربع سكر
  • باكيت أو تنين فانيليا
  • ربع كوب ماء داااافئ
  • ملعقة صغيرة أو أكثر نسكافيه مندوبها بالمي (حسب الرغبة وممكن الاستغناء عنها للي مابحبو القهوة)
  • كوب طحين الا ملعقتين منحطهم كاكاو يعني نقصو من كوب الطحين ملعقتين طحين وحطو بدالن كاكاو حسيت حالي من جماعة يشرح الماء بالماء هههههه
  • ملعقة كبيرة نشا
  • باكيت بيكينغ باودر
  • رشة ملح
  • للخليط السحري منحتاج ههههه ضحكو أول لقلكن هههه:
  • بدنا حليب 3 كاسات كبار
  • 5 ملاعق كبيرة نشا
  • حوالي 3 ملاعق نسله للتحلية والنكهة وممكن بدون اذا ماتوفرت
  • 100 غرام شوكولاتة بيضا
  • لتشريب الكيك منحتاج:
  • حوالي ثلاث أرباع كوب حليب
  • ملعقتين كبار نسله

الخطوات

☆بسم الله الرحمن الرحيم☆

أول شغلة يا كيكات حياتي انتو رح نجهز الكيكة

منسناول هالبيضات ومنفصل الصفار عن البياض

ورح نخفق البياض لحالو ليصير قوامو متل قوام الكريما بيحتاج حوالي 7 دقايق خفق متواصل

ورح نخفق الصفار مع السكر والفانيليا منيح ليفتح لونهم وبعدا رح نضيف المي الدافية اللي بنكهة القهوة على خليط الصفار ونخفق منيح مشان يدوب السكر نوعاً ما وبعدا رح ننخل الطحين والنشا والكاكاو والبيكينغ باودر ورشة الملح كلهم مع بعض فوق الصفار ونخفقهم سوا منيح

واجينا للحلقة الأخيرة ههههه

منجيب خليط البياض ومنحطو على 3 دفعات كل مرة ثلث على خليط الصفار ومنحرك بالملعقة الخشب أو السباتيولا من تحت لفوق لحتى مانطير كل الهوا اللي حصلنا عليه أثناء الخفق

برضايي عليكن يامو نيمولي أبو جعفر اللي جواتكن شوي وعملو هالكيكة برقة ونعومة يا كيوت انتو ههههه

بس نخلص منصب الخليط بقالب مبطن ومندخلو على فرن محمى مسبقاً على درجة حرارة 180 لحتى يستوي بياخد حوالي نص ساعة افتحو واعملو اختبار العود الخشبي للكيك اذا طلع نضيف بكون استوى

بعد مانطالعو منتركو ليبرد تماماً بعدين منعمل فيه شوية ثقوب بعود ومنشربو بخليط الحليب والنسله

هلأ بقى دور دعايات الشوكولا

لو كنتي مكتئبة ومش عارفة مالك ايه

أو متدايقة ونفسك بحد تفشي غلك فيه

أو عيانة ودواكي مش بتلاقيه

عليكي بالشيكولاتة وزغردي لولولولولولوليه

شبكن عم تدعو الله يشفيني؟ والله أنا دح هههههه

تعو تعو عالمطبخ لسا ماقلبناها حفلة

العبرة بالنهايات يمااااا

هلأ دور الخلطة الفوقانية

رح نحط المقادير كلا عدا الشوكولاتة مع بعض ونحركهم منيح ليدوب النشا والذي منو بعدين منشغل الغاز تحتن ومنحرك باستمرار لأول مايبلش بدو يغلي منضيف الشوكولاتة البيضا ومنحركهم غلوتين تلاتة لتدب الشوكولا ومنطفي وصارت خلطتنا جاهزة

منصبها فوق الكيك

أنا أخدت منها ملعقتين وخلطتن بملعقة نسكافيه مدوبة بملعقة مي مشان آخد نكهة القهوة كمان عالوش واللون البني الحلو وعملت فيه الخطوط للتزيين

وهلأ حبيباتي وسعولي هيك لأنو مو حابة اترك منو ولا دردورة

دحنا هنريحووووووه ياماما هههههه

خلصنا وصفتنا اللذيذة وبتمنى من قلبي تجربوها وتدعولي بالبركة وبكل شي حلو متلكم

واذا في شي حدا مابحب القهوة مع إني بشك بالموضوع ففيكم تلغو القهوة من كل الوصفة وتتهنو فيها براحتكم

بحبكم أنا وأستودعكم الله أميراتي♡

113 تعليقاً

  1. ياسلام على الكلام والله يختي كلامك مثل الدواء على الجرح. الله يكرمك ويزيدك من فضله ونعيمه ويرزقك الذريه الصالحه حبيبتي انتي اما الصور ايش اقول عنهم روووووووعه والله 😋😋😋😋😋 الله يسعدك😘😙

  2. بسم الله ماشاء يسلمو ايداكي اشي بفتح النفس .الله يجزيكي الخير لانك بتنشر علم.بس سوال ازا سمحتي شو نستله قشطه.وهل هي ضروريه.انا دايما بعمل صفاتك خصوصا كيكية الشوكلا

    • الله يسلمك ياقلبي واياكي😍
      كلك لطف والله ممنونتك من قلبي وفرحتيني بدعواتك وكلامك والله يجعل أعمالنا البسيطة خالصة لوجه الله ❤

      أما بالنسبة للنسله فهية الحليب المكثف المحلى ولا مو ضرورية للوصفة أبدا هية إضافة للنكهة بس ياعمري وفيكي تستغني عنها😄😘

      وصحتين وعافية على كيكة الشوكولا مشكورة كتير على ثقتك 😄

  3. ما شاء الله عليكي حبيبتي ربي يحفظك ويبارك بعمرك وصحتك يااارب 😍
    ماذا فعلتي بي يا أختاه وأه يا قلباه وأه يا وجعاه ههههههه عجبك هيك صرت شاعره 😄
    بعيدا عن الكيكه والحركات الموجوده لك تؤبشيني شووو بحبك وبس حكياتك إلي بخلووووني أضحك 😙❤
    يسلموووو ديادك حبيبتي ربي يسعدك والضحكه الحلوه ما تفارق وجهك ويكرمك بالجنه وووووبحببببببك أنااااا🌹

  4. يسلمو اديكي شكلها بشهي ..بس سؤال بطبق الكيكة بكل حذافيرها وتكاتها وبتنفخ ويامحلاها لما بطفي الفرن بطلعها وفجاة بلاقيها طبطت شوي وين المشكلة وغيرت نوع الباكينج باودر …ومابفتح الفرن شواعمل لظل نافخة ومرتبة وهشة ساعديني ياام الكيكات الحلوة الزاكية 😂

    • أول شي الله يسلمك ياقلبي كلك زوق ومنورتيني😄
      تاني شي بالنسبة للكيكة ممكن تكوني ماعم تخليها وقت كافي
      يعني لو قمتيها قبل ماتنشف تماما رح يضل جواها رطب نتفة ورح يهبط عبعضو بس تطلع

      وكمان حرارة الفرن بتلعب دور يعني مو لازم يكون حامي زيادة ولا ناقص عن الحرارة المطلوبة

      وكمان بعد ماتضيفي الطحين اكتفي بتحريك خفيف للخليط ومافي داعي تخلطي زيادة

      وآخر شي تأكدي انو باب الفرن بسكر منيح ومافي أي فتحات
      مرة وحدة حكتلي نفس الحكي ونبهتا لموضوع الفتحات وللأسف طلع الباب عندها فعلا بضل مفتوح فتحة بسيطة وهو السبب انو الكيكة ماعم تنجح تمام😅
      بقى شوفيه وطمنيني😙

  5. مسا الانوار ….يا نوارة زاكي ….كيفك..تسلم يمينك الكيكه مرتبه وزوء كتييييير بتزين والتصوير كمان …ربي يجعلك من المقبولين عنده في هاي الايام الفضيله وانشاء الله السنه الجاي ربي معوض عليكي عوض الصابرين يارب وتشوفي كل خير بحياتك ….

    • مساءك عسل يا أصيلة انتي
      ربي يكرمك ويجزيكي أضعاف هالدعوات الحلوة اللي دعيتيلي ياها 😘
      والله يفرح قلبك متل مابتسعديني بتعليقاتك اللطيفة يا وردة انتي❤

  6. والله يا نور انتي الخرافيه 🤤🤤🤤
    ما شاء الله عنك يسلمو ايديكي ويعطيكي ألف عافية وصحتين وهنا ع قلوبكم
    💕🌷💕🌷💕🌷💕🌷💕🌷💕🌷💕🌷💕🌷💕🌷💕🌷💕🌷💕🌷💕🌷

  7. ماشاءالله اللهم زد وبارك وأنعم
    شغل متقن ومرتب ورووووعه وأكيد الكيكة لذيذه ولذيذة أنتي حاله خاصه بزاكي بأسلوبك الفريد يراد لها ولايه للعهد أختي روحك المرحه صعب تتكرر بزاكي الله يحفظك ويحفظ عليكي نعمة ويهبك كل ماتتمني ببركة هذه الأيام الحُرم .

    • ربي يجزيكي الخير لأني بعشق روحانية كلامك اللهم بارك وقلبي بيرتاح بس اقرا دعواتك الحلوة والنقية متلك❤
      الله يكرمك كرم مالو حدود وتبقي منورتيني دائما بمشاركاتك اللطيفة
      ورأيك بوصفاتي بحطو تاج على راسي ياغالية😘

  8. الله الله الله على هالجمااااااال كله وعلى وصفاتك الي اكتر من رائعة وعلى روحك المرحة ودمك الخفيف واسلوبك المفرح الي برفح القلب يا نووووووارة زاكي وتسلم ايدك على هالكيكة الي بطير العقل ماشالله عنك وربنا يحميكي.زيتلك قطعة مابصير توكلي لحالك😁😁😁😁😁😁😁

  9. الله الله ع الفن والإبداع تسلم ايديك ي نواره زاكي
    انا جربت ع طريقتك خبز البيدا يهبل ودرته اكثر من مره والصفيحه حتى هي
    ودرت الخبز التركي خبز رمضان بجد تسلمي ع الوصفات المظمونه

  10. حررررام عليك يانووور ارحمينا وارأفي بحالنه بوصفاتك الرائعه والمتالقه بطريقة التقديم وطريقة العمل 😊 ربي يزيد ويبارك ويسلم الديات الي بتعمل هلوصفات كانها لوحه فنيه ربي يعطيك العافيه وينولك البالك 😘😘

  11. ماشاء الله تبارك الرحمن
    منظر خطييييييييييير ولك ارحمي كروشنا قصدي كسماتنا 😁😁
    بعدين ابو جعفر. بعينك كلنا أنوثة ونعومة ورقة بس عضلات ايدينا قوية شوية💪😂😂وعنا موهبة المصارعة والكراتيه😂😂

    ربي يباركلك بعمرك وبصحتك وبكل شي بحياتك
    ويطعمك الذرية الصالحة يارب العالمين
    بمووووووووووووت فيك ياعسل

    • قلتيلي أنوثة مو
      روحي تطلعي عالمراية وتأكدي ليكون عم تهلوسي مثلاً😂😂

      دخيل قلبك تحرير حبيبة القلب ربي مايحرمني منك وعسلاتي بعض من عسلاتك😁😂
      وانا بحبك قد البحر اللي بتروحيلو دائما😅😆

  12. ماشاء الله عليكي يا نوارة تسلم ايديكي حبيبتي ويبارك بصحتك وعافيتك يارب على كل شيء بالعملية بس انا عاجبني الي تحت الصحن 😄بعد ازنك بدي اياه

  13. ماشاء الله الله يباركلك يارب 😍😍🌸
    كيكتك حلوه متلك يا ننوشه💕🌷❤
    بتعرفي صح كلامك العقل بكون صافي وفاضي أشغال فبخطر عبالو هيك شغلات بلحظه، خصوصا قبل النوم بتصير معاي بس مو على الكيكات 😂😂

    • عيونك الحلوة حبيبتي دينا بعض ماعندكم 😀😍😍

      اي والله بكون فارطة تعب ونعس وعقلي اه منو مابينعس
      بكونو عيوني عم يحرقوني وهو لسا عم يشتغل ويفكر😢😢

  14. زهرة البيلسان
    ما شاء الله لا قوة الا بالله
    كل وصفه احلى واجمل واهظم من تانيه
    الله يرضى عنك ويعطيكي كل الي بنفسك ويديمك النا ولزاكي

    • ويديمكم الي احلى وأروع اخوات
      انتو نعمة بشكر رب العالمين عليها والله
      ربي يباركلي فيكم ومايحرمني محبتكم وهالثقة والدفا اللي بتمنحوني ياهن❤
      والله يجزيكي أضعاف دعواتك الصادقة ياقلبي كلك رقة وزوق😘😍

  15. اللهم بارك يانوارة شو ظل حكي حلو ينحكى بحقك الوقت متأخر وماقدرت ادخل واشوف هالابداع ومااكتبلك تعليق الله يعطيكي العافية ويسعدك سعادة الدنيا والآخرة ويباركلك ببيتك ومالك وعيلتك واهلك ويرزقك من حيث لاتحتسبي
    بس بدي طريقة الاشي الزاكي الموجود بالصحن حد قطعة الكيك 🙂
    شكلو بسكوت بس منظره كثير زاكي
    ❤❤❤❤❤❤

    • حبيبة قلبي العسل الغالية ربي يجزيكي أضعاف دعواتك الحلوة اللي مابينشبع منها😍😙
      بعض ماعندكم ياقلبي😄

      بالنسبة للبيتيفور هاد جاهز والله هههههههه

  16. روووووووووووووووعة😚😚
    ماشاءالله عنك يانوارتنا الحلوة شكل الكيكة بتشهي الهم بارك 😀
    زتيلك قطعة ندوق ونعطيكي رئينا منيح😋
    الله يسلم ايديكي ياقلبي ويعطيكي الف عافية😍😘
    مهو عقلنا هو سبب في الضياع الي عايشينو بفكر بشغلات بضرنا الله يصلحو هههههه😂

  17. تسلم ايدك يا نوارتنا الحلوه كيكه رووووعه وبتشهي اكيد لانها من تحت دياتك الحلوين ربنا يكرمك ويبعد عنك الهموم وتنورينا على طول بكلامك العسل يا عسل…تبارك الرحمان

  18. ماشاءالله ربي يقويك ويسعدك ع الكيكه اللي ميينه انهاا بجد خرااافيه
    يسلموووو يدينك يارب
    وماننحرم من طلتك الحلوووه

  19. يا عينيييي شووو بدي احكي لاحكي يسعدلي اياكي يا احلى نواره شو بحبك وبحب كل اشي منك 🌹يعطييييكي الف عافيه منظرها بجنن والله اكلك وحلوياتك بتتقدم لملوك ما شاء الله عنك يسلمووو هالايدين الحلوين اللي ما بيطلع منهم إلا الزاكي ربي يعطيكي الصحه والعمر المديد وتضلي منوره زاكي❤
    كيكه بتشهي بدها تجربه 😉بس انا معترضه ع اشي وييين الورد😡😂😂😂😂😂😂هههه ولا اقلك انتي بتكفي احلى ورده فيك يالعالم❤❤

  20. تبارك الرحمن .. جمال وأناقة كما تعودنا
    كيكة رائعة ومكوناتها لذيذة وشهية ومحببة إلى قلوبنا💕😊
    جزاك الله خيرا غاليتي وزادك من فضله🌹

  21. اول تعليق كان لأني شفت الصور بس،،،لكن بعد ماقرات حكياتك الحلوين…لازم ادعيلك الله يباركلك بصحتك وعافيتك..وينولك اللي ببالك يااااكريم

  22. ما شاء الله شو هالابداع والترتيب اشي من الآخر على المفضلة ع طول 👏👏👏👏👍👍👍
    يسلم ايديكي وصحتين وهنا يا رب 💖💖💖💖

  23. ياعيني ياعيني شو هالابداع يانواااره كل يوم يختي طيري النومه من عينك اشوي واخترعيلنا اشياء زاكيه ربي يسلمهم ديااااتك فناااانه ماشاءالله عنك ياعسل 🥰🥰💞🌹

    • واوقاتك ياقلبي😀
      شو هالمفاجئة الحلوة
      كتير فرحت باستفقادتك والله
      ربي يكرمك ويجزيكي كل خير😄
      سبحان الله من يومين نزلت وصفة أعتقد اليوم بتنزل
      انشغلت بالعيد وبعدو شوي زيادة واشتقتلكم كتيييير😍😘

    • يسعد قلبك ياعسل وانتي ملك لطف وزوق والله
      زاكي منور بوجود أخوات متلك😄
      وانا كتير فرحانة انك مشاركة معنا من السعودية😀 تشرفت فيكي وبكل أهل السعودية ياقلبي😙

    • ان شاء الله على طول حبيبتي هاد من طيب أصلك😄
      معليه تعرفيني عليكي قديه عمرك؟
      ولو حبيتي تشاركينا بجروب صبايا الوطن العربي أكيد رح تنورينل حبيبتي😘
      عفكرة زوجي سوري بس مواليد حائل كمان😄

    • يسعدلي ايامك..عمري كبير32

      ماشاءالله حلووو بماانه مواليد حائل ي ليت ويحصل تنورينا انتي فيها والله تشرفينا وتسعدينااا

      القروب كيف..!؟ بتشرف والله اذا عرفت كيف

    • ماشاء الله تبارك الرحمن 😍
      ان شاء الله العمر كلو حبيبتي وين الكبر بالموضوع
      انتي هلأ بزهرة شبابك وأحلى أيام العمر😄😀
      اي والله بتشرف فيكي وبكل أهل السعودية
      منورة بوجودك حبيبتي😘
      نحنا باسطنبول مقيمين حالياً لبينما تفرج ان شاء الله😅

      بالنسبة للجروب روحي عالصفحة الرئيسية وكتبي بالبحث
      جروب صبايا الوطن العربي وبتلاقيه بسهولة ان شاء الله وبتنورينا😀😄

    • تسلمين لي يارب وربي يفرحك ب ايامك ياكريم
      ويطول بعمرك..
      ربي يفرجهااا ياكريم عليكم ويريح بالكم يارب
      اسطنبول جيتها قبل اربع سنين كانت كثير حلووه وحبيتها للامانه..

      ان شاءالله فديتك بتششرف ببحث عنه 😊

اترك تعليقاً

لن يتم نشر عنوان بريدك الإلكتروني.