الرئيسة / منوعات / شاورما

شاورما

/
/
/
2069 مشاهدات

 

شاورما

شاورما

شاورما

شاورما , معكم صديقة زاكي الشيف الموهوبة ,

هالقصه اليوم منشان تفرفشو شوي …
منشور للضحك

أنا آخرتي أتطلق

من كتر ما بشووف شغلات عالفيسبووك و بروح أطبقها ع زوجي !

لإنو زوجي من النوع الي ما بتطبق عليه ولا اشي ! لا بتزبط معو طبخة ايطالية، ولا هدية ، ولا حركة رومنسية ، ولا اشي !!

هديك اليوم شفت وحدة متزوجة جديد منزلة بوست انها اجا عبالها شاورما عالساعة تلات الفجر و صحت زوجها و حكتلو ، و فعلاً أخدها بالسيارة و راح يجيبلها ! و أكلوها برا بجو رومنسي شاعري دافئ ! و مصورين الشاورما و ايديهم ، و مبسوطين ،

أول اشي الله يسترهم من عيني ! بحكيها و بكل صراحة ! لإنو الفزاعة الي عندي ما عمرو كلف حالو ينزل يجيبلي فلافل الجمعة عالفطور ! قد ما هو كسول و خم نوم و بليد !

بس مع هيك حكيت ليش ما أجربها الليلة ؟ من مرة بشوف قديش حبو الي ! و من مرة كمان بنجدد الأيام الخوالي أيام ما كان كرشو لسا كيلو و نص بس ،

لما روح من شغلو ما عشيتوو ، عشان بس اصحيه يكون جوعان متلي ، هو ما فرق معو و راح بأواعيه و جرابتو المتحللات رمى حالو عالتخت ، مع العلم تختنا مكسور أصلاً ، فهو كمل عليه ، و بثواني شخيرو وصل للأقمار الصناعية ، أنا تحملت كل هالجفاف و النشافة و البلادة و التياسة ، ع أمل بنص الليل تتعدل كل أمورنا ، حطيت منبه عالتلات و استلقيت عالكنباي ، لإنو ازا نمت جمبو ممكن أصحا بغرفة العمليات ، و همو بطلعو اجرو من داني ، قد ما نومو دفش !

صارت الساعة تلاتة و قمت ، فردت شعراتي و رشرشت عطر “جنون البنات” بلكي حركت مشاعرو ، رحت زي الفراشة بخطوات هادئة قربت عند راسو و صرت أحكيلو ” حبووشي ، حيااتشي ، اسحاا ، دبدووبي ، اسحاا يلا ، حياااتششي ”

هو صار يكش فيني بإيدو ، كل فكرو اني دبانة ! مشان مش متعود ع صوتي بتردد ثابت ! عليت صوتي و ضليت أهز بكتفو مشان يقوم ، الزلمة نومو أثقل من دمو ! يعني لو اكون حامل و جاييني الطلق و اصرخ جمبو ولا بقوم !

اخر اشي معطتلو شعرو مشان يقوم ، هو قام ملخوم و معصب و عينيه حمر” ايييش فيي اييييش شووو بدككك ” !

أنا وطيت صوتي و نزلت راسي و صرت أرمش و ألعب بأصابعي إنو قال كيوت و مستحية ، و حكيتلو ” زووعانة ، بدي نمة ”

زوجي شاف اني مصحيتو مشان هالتفاهة هاي كلها راح انجن ! صار يصرخ و يحكي ” ولك شايفتيني امك يا بقرة ! أقووم أطبخلك يعني ! أطعميكي من مرة !! ولك ألعن شكلك ع ساعة هالليل ؟ ”

انا حكييتلوو ” لاااااء ، انا بس بدي نروح انا و انتا بالسيارة ناكل شاورما مشتهيتها ياا يا دبدوبي دخيل لغاليغك يلاا ”

الزلمة صفن ، مالها هاي ؟ مستهبلتني يعني ؟ حكالي ” بقرتي ، شايفة كم الساعة ؟ ”

أنا صرت أرمش و مع بووز حكيتلو ، ” تلاتة و نس ”

حكالي ” شايفة هاي التلاتة و نس ؟ سجلي عندك ، انها اللحظة الي فقدتي فيها اول طقم سنان الك ”

و بعد هالغزل عينكو ما تشوف شر ! فعلاً صرت أحكي ، ” تلاتة و نث ، و ثاورما ، و يلا اثحا ”

أصلاً الشاورما بتعمل كرش بليل .

71 تعليقاً

  1. هههههه 🤣 يسعد قلبك مش كل شئ بنفع نجربه مع زلمه انا لو احكيلو بدي شاورما ساعه ٣ و نصف ل يحكي نامي خفيفه عشان ما تنصحي احسنلك 😡

  2. تسلمي ما اخف دماتك يا ام علي
    بس صعبه تصحي اي انسان من النوم الساعه 3 وتحكيلو يلى ناكل شورما بالمطعم منيح انك عايشه لهسا ومنيح ما اخذك من ايدك وداك على العصفوريه قلهم المرا جنت في ناس ما بتفهموا لا بعرفوا رومنسيه ولا نيله….بعرف انها القصه منقوله

  3. هههههههههههه ههههاي حلوة.. يسلموا على الفرفشه أم علي
    هالأيام عشان بصوم ذو الحجة بصحى أنا وجوزي ومنشرب قهوتنا عالساعة تلاته ونس 😅.. مع أنه هو ما بصوم الإ الوقفه

  4. هههههه والله ضحكت هلايام ظل رومانسيه انا عملتها وانا حامل بس حرررررام راح جاب بس مستحيل يطلعني بنص الليل بعدين بفكروا الناس اني حبيبتوا مش مرتوا وهون بتبلش العقد ههه

  5. نغم

    السلام عليكم ورحمه الله وبركاته

    بدي تدعو بها لايام الفضيلة ويوم عرفة
    ان الله يشافي ابوي

    عسى أن تكون اقرب من الي الله

  6. ههههههه والله شاورما ابو كرشه عندي مابقاومها
    مابفرق عنده توقيت لمهم شاورما
    بياكلها باي وقت هو وبناته
    اما انا ولا يمكن اكلها ما بحبا

اترك تعليقاً

لن يتم نشر عنوان بريدك الإلكتروني.