img
الرئيسة / سلطات و مقبلات / مقدوس صناعة سورية من الأخر

مقدوس صناعة سورية من الأخر

/
/
/
2369 مشاهدات

 

مقدوس صناعة سورية من الأخر

مقدوس صناعة سورية من الأخر

مقدوس صناعة سورية من الأخر

مقدوس صناعة سورية من الأخر , معكم صديقة زاكي الشيف الموهوبة ,

المقادير

  • ١٠ كيلو باذنجان حبه وسط
  • نص كيلو ملح خشن او ملح للمونة
  • ربع كيلو ثوم
  • نص كيلو جوز او عين الجمل
  • زيت ذره او دوار شمس
  • فليفله حلوة او حاره او متوسطه الحرارة حسب الرغبه حمراء اللون حصريا

الخطوات

السلام عليكم ورحمة الله وبركاته كل عام والأمة الإسلامية بألف خير

بلش او يمكن عند البعض خلص موسم المقدوس ومونتو نحن مونه مقدوساتنا ورح نخلص نصهم ههههه حبيت شاركم بطريقتنا نحن السوريين او بالأخص الحوارنة بشغل المقدوس طبعاً الكميات يلي كتبتها بتكفي مرطبان كبير وانتو بتتحكموا بالكميه يلي بتكفيكم

بسم الله بنبلش سوه

اول شي بطنجره كبيره بنحط الباذنجان مع العقب تبعو ما بنشيلو اذا بتحبو توفرو مساحه بالطنجره بس بنشيل العود بالسكين بدون العقب مشان عند السلع ما يسود مكان العقب بضل لونو اشقر حلو بنغمروا مي منيح وبنثقلو بتثقيلة عشان مايطوش الباذنجان ويسود وبنخلي حتى يغلي ٤ دقائق زياده وبنشوف بالضغط ع الباذنجان اذا طيت شوي بكون تمام وبنطلعو فوراً من المي عشان مايذوب اكثر والبذنجان بيختلف من نوع لثاني في أنواع ما بتتحمل طول ع النار وفي شي بيوخذ كم دقيقه زياده وحسب حجم الحبه

بعد ما نطلعو من المي بنتركو يبرد وبنكون نحن فرمنا ع الفرامه البصل الفليفله وبعدين بنصفيها من مي الفليفله مزبوط وبنشيل المي عجنب ما بنكبها وبنفرم الثوم او بندقو وبنفرم الجوز وبنخلط الثوم والفليفله والملح والجوز وبكون برد الباذنجان بنفتح بإيدنا فتحه صغيره بالباذنجان وبنحشي الحشوه الكميه يلي بتحبوها او حسب ما تستوعب لأنو ع قد ما بتعبي بالحبه بعد ما يثقل رح تخف الحشوه وبنسكر الحبه وبنضفها وبنصفهم بوعاء ما يكون معدني بس نخلص الكميه المي يلي طلعت من الحشوه والمي يلي رجعت طلعت انتي وعم تحشي كمان لأنو من الملح رح يرجع يطلع مي بنحط المي كلها فوق المقدوس المحشي وبنخليهم حوالي ١٢ ساعه تقريباً او من الليل للصبح لأنو ميه الفليفله بتخلي حبه المقدوس لونها مائل للزهر او البنفسجي

نور سناولليلي كاسة مي عطشت من الحشي والحكي ههههه

وثاني يوم او بعد مرور ١٢ ساعه بمصفايه كبيره بنمد فيها بقماش رقيق ما بيحبس المي وبنصف حبات المقدوس بترتيب وبنغطيها بنفس القماشه وبنحط فوقها تثقيله ع نفس المساحه عشان الكل يتثقل وينزل المي يلي بالفليفه ويلي بالباذنجان وبنخليهم اربع ايام او حتى يبطل ينزل المي والنصفايه بنرفعها عن الأرض حتى المي ما ترجع ع المقدوس وبعد مايصفه من المي بمرطبان شفاف بنصف المقدوس بعد ما نضفو اذا كان في اي بياض او اي قطع فليفله وبنضيف الزيت مع مراعات ما نعبي الزيت لأخر المرطبات بس نغطي المقدوس عشان ما يعفن لأنو ممكن يرجع يفور من حموضه الفليفله وكل يوم بنشوف اذا ناقص زيت او زايد

وين المي يا نوووووووور وصحة وعافيه احلى صبايا ادعولي بالفرج القريب العاجل

بحبكن كتييييير

ملاحظه رح نزل صورة السله يلي صفيت فيها المقدوس؛)

71 تعليقاً

  1. ما شاء الله شرح مفصل كافي وافي وطريقة مختلفة عن طريقتنا بالاردن انه ننقع المكدوس بماء الفليفلة بس عجبتني تبارك الرحمن. يسلمو اديكي وصحة وهنا يارب ويعطيكي الف عافية.

    • مرة عملته ذاب عالاخر بالزيت

      ومره صفيته بسله وفوقه قماشه وثقل بس يومين
      ولقيته عفن وخرب وكبيته

      هالحكي قبل العيد

      متمنيه يزبط
      مع انه بمشي ع وصفات يوتيوب😢😢😢😢

    • ام علي اول شي بتصفي بالمصفايه وبتحطي شي عال عن الأرض ويكون تحتها جاط ك اكبر مشان ينزل المي فوراً فيها وانا حطيت رخامه نظيفه عندي خاصه للمقدوس وزنها حوالي ٣٠ كيلو وفوقها قالون المي ٢٠لتر
      ومشان مايذوب خففي سواه شوي وزيدي الملح شوي لأنو رح يخف الملح مع التثقيله والزيت

      ومشان العفن كل يوم شيلي التثقيله وهزيهم بالقماشه ورجعي ثقليهن
      وحتى لو صار عفن ابيض عادي لما تيجي تصفيهم بالمرطبانات بقماشه نظيفه امسحى كل حبه
      وبدهم ٣او ٤ايام بكونو تمام
      ان شاء الله تكونو استفدتي وانا قدرت فيدك

    • بعين الله ع يومين بالسنه تعب مو احسن ما نشتري من السوق لا شكل ولا طعم والله اعلم اذا في نظافه 😉واسأليني شو ما بتحبي يا قلبي شو المشكله يلي بتطلع عندك عشان فيدك ان شاء الله

    • يسعد عينك ما بتقصري وان شاء الله هاليومين رح اجرب نفس طريقتك بالزبط ….المشكلة عندي وقت ما اخلص حشي واحطه بالمطربان واصفي ميته ما بتتصفى منيح ولازم يضل برا والمشكلة الجو عنا حر شوي فمش عارفة وقت ما اصفيه من المي قديش بده وقت بالزبط وكيف اعرفله 🤔🤔🤔

    • حبيبتي شيف محترف لما تحطي حتى يتصفه حطي سدر جاط او اي شي كبير تحت المصفايه منشان اي شي ينزل بيه دغري وبتقدري تحطي بالمطبخ اربع ايام والتثقيله بدك تحطي اي شي عندك انا حطيت رخامة نظيفه وفوقها قالون المي ٢٠ لتر عشان ينزل المي اسرع

  2. 😂😂😂
    شوفي روحي مستعدة ناولك برميل مي بس بتعطيني مرطبان مكدوس وشكلين مابحكي وانا ام شهاب 😂😂
    اي شو هااااد يا ام جودي شي بجنن وبهبل وبخبل ههههه
    والله بتستاهلي الشكر بكل اللغات
    اموت بالمكدوس انا😍😍
    ربي يسلم ايديكي ويباركلك ويعطيكي الف عافية 😙
    بس ستني عليي غير خليكي تجلي كل الجليات بوصفتي الجاية😂😂
    يسعد قلبك ما الذك

  3. يسلملي المعدل ومكدوسات المعدل وكلشي بتعملو ام جودي
    يسلم ايديكي ياقلبي
    ماشاءالله منظرو بيشهي اللهم بارك
    طريقتك حلوة والتوضيح كافي ماشاءالله عليكي حبيبتي😍😍
    عنا بحلب مامنحط فليفلة خضرا منحط دبس فليفلة وان شالله بس اعملو بنزل طريقتنا بحلب😉😄
    الف صحةوهنا عقلبكن ياعسل
    تاكلوه بالهنا والعوافي😘😘

  4. واااااو من الاخر عشقي المكدوس ربي يسلمهم ديااااتك 😋😍😘💞

    بس انا بعمله بنفس طريقتك بس بحشيه بالفليفله الحمره الي بنعملها شطه 😋

اترك تعليقاً

لن يتم نشر عنوان بريدك الإلكتروني.