img
الرئيسة / حلويات / السابليه الفاخر

السابليه الفاخر

/
/
/
2340 مشاهدات

 

السابليه الفاخر

السابليه الفاااخر

السابليه الفاخر

السابليه الفاخر , معكم صديقة زاكي الشيف الموهوبة ,وبعد زماااااان رجعنااااا من جديييييد أول شي السلام عليكم ورحمة الله وبركاته تاني شي اشتقتلكم كتير كتير كتير ويارب تكونو قضيتو أحلى أوقات بالعيد مع حبايبكم وأكلتو وربربتو اعترفو كل وحدة كم كيلو لحمة أكلت وكم معمولة سفقت ههههه وبعدين صحي قبل كل شي وين عيدياتي ولا مفكرين تمرقوها هيك متل العيد الماضي ترى هالمرة اللي مابتحط المعلوم بإيدي رح طعميها 5 قطع سابليه مع بعض وخليها تتنفس اذا قدرت قبل مانبلش خنق تعالو نعمل سابليه ولا فوراً بتتحمسو عالشر هههههه يلا نشوف المقادير

المقادير

  • مقادير السابليه :
  • حوالي 3 كوب ونصف طحين
  • ٢٥٠ غ زبدة حيوانية يعني ربع كيلو
  • كوب سكر أبيض بودرة أو حسب الرغبة
  • بيضة
  • باكيت فانيليا
  • رشة ملح
  • التزيين اختياري طبعاً مارح الحقكن لهون ههههه

الخطوات

☆بسم الله الرحمن الرحيم☆

شمرولي عن الايدين الحلوين وتعو لقلكن

أول شي الزبدة لازم تكون لينة وبحرارة الغرفة

منخفقها لحالا شوي لتلين وبعدين منخفقها منيح مع السكر البودرة لنبلش نحس انو لون الزبدة صار يفتح والسكر بلش يدوب

بعدا منحط البيضة وظرف الفانيليا ورشة الملح ومنخلط ليمتزجوا ومنضيف الطحين ع ثلاث دفعات ومنحاول مانعجن عجن منجمع تجميع بس

بهالمرحلة قبل ماكمل دفعة الطحين الأخيرة حبيت اقسم العجينة لقسمين لحتى اعمل قسم بالكاكاو

وكملت إضافة على قسم معلقتين طحين وعلى قسم معلقتين كاكاو

وفينا نشتغل فيها دغري

منشكلها ومنحط القطع على ورق زبدة ومنخبز ع درجة حرارة 200 مع المراقبة لأنو بتستوي بسرعة وننتبه مانشقرها لازم تبقى بيضا شوي من فوق وشقرة شي بسيط من تحت

بدكم بنادول شي لا سمح الله ولا كمل ههههههه

المهم لما بدنا نفرد العجينة بالشوبك لازم نفردها بين طبقتين ورق زبدة أو نايلون لأنو غير هيك بتلزق

وإذا بدنا نحطها بالبراد ونشتغل فيها بعدين لازم نطالعها قبل ساعة مشان تلين لأنو بتقسى بالبراد بسبب الزبدة

بس نخلص شوي منتركهم يبردو عالأخير وبعدها فينا نزين ونبدع على كيفنا

ويلا قولو عني بحكي كتير هيك ظلماً وعدوانا هههههه

هو صحي أنا انفتحت عالحكي زيادة بس مشان وضح الوصفة تمام

وبالأخير كلفتة حلوة منكم فيكم تزينو علبة تزيين ناعم وتقدموها الي قصدي لأصدقائكم وحبايبكم

وان شاء الله بتجربوها وبتحبوها وبتدعولي بالبركة يا أحلى وردات بالدنيا

بحبكم كتير وأستودعكم الله♡

صحي جودي مو نسيانتك

يلا ياقلبي بوشك عالمطبخ كررررررفتة عالمجلى بدي شوفو عم يلمع لمع زكاتك هههههه

199 تعليقاً

  1. و عليكم السلام ورحمة الله وبركاته
    يسعدلي مساكي و كل أوقاتك يا حلو 😍💓
    و بعد زمان عنك و عن حكياتك المهضومين و الحلوين 💗💗
    اشتقتلك كثيييررررر 😘😘 كيفك ننوشة قلبي ❤️😙 بسم الله ما شاء الله عليكي حبيبة قلبي وعلى هالتحف الغاليةمن تحت ايديكي الغاليين
    ويعطيكي ألف عافية عالتعب الي تعبتيه ليطلعوا بالجمال و الأناقة و الفخامة هاي
    ربي يحميكي و يحرسك بعينه التي لا تنام
    ويسعدك ويحققلك أمنياتك أضعاف ما تتمني يا رب 👐😘😘❤️
    و على حسابك كل العيديات لعيونك ههههه 😉😊😙

    • ومساااااااكي ياعسل😀😍😍
      لك أنا اللي اشتقتلك والله ومبارح كنتي خاطرة ببالي سبحان الله هههههه
      انا تمام الحمد لله ياعمري انتي كيفك شو أخبارك😄
      الله يسعدك ويجزيكي أضعاف هالدعوات الحلوة اللي بتفرح القلب وبتشرح الصدر😍
      الله يخليلي ياكي ومايحرمني طلتك الحلوة عليي ❤

    • صحيح نسيت ابشرك الحمد لله ليث نجح في التوجيهي و أولادي التانيين شهاداتهم ممتازة الحمد لله كما ينبغي لجلال وجهه العظيم
      بتشكرك من كل قلبي لدعواتك يا عمري ♥️❤️😘😘

    • ياعمريييييييي😀😍
      ان شاء الله ألف ألف ألف مبروك
      ماشاء الله تبارك الرحمن والله أحلى فرحة
      ربي يسلملك ياهم ويقر عينك فيهم وتفرحي بتفوقهم الدائم ياعمري ويبشرك بالخير😄😙
      عقبال أخواتو كمان😀

      أم ليث سؤال بالله انتي قديه عمرك😄

    • يسعد قلبك يا ام ليث والله انك عسل😍
      ماشاء الله تبارك الرحمن ان شاء الله العمر كلو ياقلبي😀
      عز الشباب الله يحميكي😌
      والله يعوض عليكي العيدية ويخليلي ياكي😁😙

  2. ما شاء الله تبارك الرحمن حبيبتي نور ربي يباركلك جمال واناقه وترتيب ولا الالوان حكايه عنجد شهيتيني منضر بيفتح النفس ربي يعطيكي الف عافيه ❤

    • فيكي الخير والبركة ياقلبي ان شاء الله رح يطلعو معك أحسن مني😘
      ومشكورة كتير على ثقتك بتجريب الوصفة هاد شرف الي 😍
      ابقي طمنيني كيف طلعو وان شاء الله عوافي سلفاً😄😙

  3. ربي يسلمهم دياااااتك يا احلى نواااره ماشاءالله تبارك الرحمن منظره بشهي ومتقن واحسن من الجاهز ربي يباركلك بدياتك الي بتقلوا بالدهب😘🌹💞
    ماشاءالله كل حبه بتحكي كليني وبعدين اكلتيهم لحالك وما حسبتي حسابي وين حصتي 😡😉😘

    • الله يسلمك ويسعدك طمطومة قلبي عيونك الحلوين بشوفو كل شي حلو😀😘
      ما انحرم منك ومن كلماتك الحلوة😍
      ههههههه انتي تعالي وبيحضرلك احلى سابليه😄
      لحد الآن ضالل عندي منهن 3 حبات 😂😂
      بس مابضمن يضلو هههههه

  4. يسعد صباحك ….انا بقترح عليكي تعملي مشروع في بيتك للاكلات والحلويات مع الوقت مشروعك رح ينجح …ما تستغربي وطولي بالك وفكري انتي فنانه وشاطره وبعدين لبقه مع الناس …ياما ناس طلعو ولا شي من بلدهم وصاروا …ربنا وهبك هاي الموهبه استثمريها …قبل فتره سمعت قصة نجاح لصيدلانيه سوريه في تركيا بتصنع خلطات ناجحه كتييييير …وكيف صبرت وبلشت من الصفر وبمساعدة زوجها …وهلأ بتسوق منتجاتها وماشاء الله عليها ….اتمنى ما اكون ضايقتك وادخلت بامورك الخاصه بس حبيت انورك واقترح عليكي هاي الفكره …دمتي بخير وبحفظ الرحمن دمتي …

    • لا ياعمري الله يسامحك ليش لتضايقيني
      بالعكس بشكرك من كل قلبي لأنك شايفة انو فيني اعمل هالشي ومقدرة ثقتك كتيييير
      ربي يجزيكي كل خير ويخليلي ياكي😄😘

    • بالنسبة للمشروع سبحان الله دايماً بفكر فيه بس للأسف انو زوجي مو مقتنع بالموضوع
      أولا بقلي إني مو مضطرة للشغل
      تانيا مابتزبط معو اتعامل واتواصل مع أي حدا
      وهاد اللي مخليني ما اقدر اعمل هالشي

      مطبخي صغير كتير كمان ولسا مو متوفر عندي كل الأدوات اللازمة
      يعني شي على قدي😅
      فادعيلي ياقلبي انو الحجي يغير رأيو يوماً ما😘

    • كل شي بإرادة ربنا بصير ….والله الواحد بلغربه لا يركن على دخل واحد لازم ينور الي حواليه الان …انتي وزوجك ..انشالله ربنا يكرمكوا بذريه طيبه …عشان هيك بكون تعبان بأول عمروا لحتى يرتاح ….يا قلبي ربنا يسر امرك ويهديلك زوجك ويجيبلك الي فيه الخير …..

  5. ما شاء الله لا قوة الا بالله ..
    اناقة ورتابة لأبعد حدود اللهم بارك ..
    يعني سابليه مو بتيفور ولا غريبه شو هو بالزبط هيك اسمه سابليه
    .. بتتذكري مسابقة ملكة التنظيم هههههه من يومها شفت كراكيشك المتواضعة وبنفس اللحظة محبتك تربعت بقلبي حسيت لوهلة انه عندي بنت ومتزوجة وانا رايحة عبيتها ازورها واشوفها عاملة ببيتها هيك ومرتبة واشوف حالي فيها .. حسيتك مثل بنتي ههههه فعليا الله أعطاني بنت وحيدة عالشباب عمرها صار 4 شهور إن شاء الله تطلع باخلاقك ورتابتك يا نور ربي يعطيكي بنت امورة ويكرمك ويقر عينك فيها يا رب يا وهاب ..
    خليكي مبسوطة ولا تزعلي على جاراتك الله اختارلهم الخير إن شاء الله
    انا بقطر عندي جارات من الأردن 2 وهنديات 4 ومن سنغافورة 1 ووحدة قطرية بتحكي عربي والله ما بفهم عليها بضل احكيلها شو يعني هاي الكلمة وهي تشرح لسا مو ماخدة عاللهجة ههههه والباقي بحكو انجليزي فاهمة عليهم منيح بعرف احكي انجليزي ولا كان ضعت
    الله يسعدك يا نور لا تخليني اضل قلقانة عليكي اكيد رح ييجو جارات جداد ومناح تحبيهم ويحبوكي ..
    بحكيلك المثل ولا الحكمة والله ما بعرف .. بتحكي .. أسوء عادة أن لا تتعود عادة
    يعني أنه معلش يصير تغير لا تتعودي على شي أو حياة وتصيري تعملي حواليها حدود لا تعودي على عادات جديدة غيري هيك وقع الصدمة أخف ..
    انا بس جيت على قطر ولاني مدمنة قهوة ما حبيت القهوة هون واحكي ييي قهوة الأردن ازكى ومن هالحكي طلع في الف نوع قهوة وصرت اجرب لعجبني نوع وعادي صرت اشربه وانبسط بالقعدة ومعي فنجان قهوة ومع كل رشفة قهوة احكي الله ههههههه مثل عاداتي القديمة بالاردن
    عشان هيك ابتسمي والله يسعد اوقاااتك كلها .. قومي اعملي فنجان قهوة وجربي مع كل جغطة احكي الله هههه الطعم والله بطلع ازكى

    • يسعد قلبك وين ما اروح بلاقي تعليقك قدامي …..ماشاء الله على جاراتك بس نصيحه لاتفهميني غلط. …ديري بالك على حالك انتي بغربه ««ربي يحفظ عليكي غربتك استودعتك الله الذي لا تضيع ودائعه يارب ياكريم انتي وأولادك وزوجك في رعاية الله وحفظه»»مشروب الهنا على القهوه

    • يسعدك يا قمرة ..
      ههههه لا تخافي عليي بعجبك ما حدا بدخل عبيت حدا انا ما بدخل على بيتهم ولا هم بيجو .. عنا جنب البيت نادي وحديقة هيك للأطفال هناك بشوفهم
      بس في وحدة هندية هاي زوجها بشتغل عند زوجي هناك يعني بعرفها اكتر وحدة الباقي بس هيك سلام سلام بس انهم ساكنين حواليي بالزبط ..

    • حبيبتييييي صفوءة العسل يخليلي ياكيشو مزوقة😍😘
      السابليه نوع من أنواع البيتيفور اللي بيختلفو بشغلات بسيييييطة كتير
      فوتي عملفي بتلاقي وصفة بيتيفور
      قارني مكوناتن سوا وشوفي الفرق😄

    • ياحياتيييي انا هههههه
      طلعتي حاببتيني من زمان وانا مو دريانة 😂
      تحبك العافية والله وانا كمان حبيتك لأنك عفوية كتير وعسولة كمان ماشاء الله عنك😍
      وربي يحميلك بنوتك ويباركلك فيها وتطلع أحسن مني بمية مرة ولذيذة متل أمها😄
      الله يفرح قلبك فيها بكل شي بتتمنيه ياعمري ويسعد قلبك متل مافرحتيني بكلامك الحلو😘

    • اما بالنسبة لجاراتي ممنونتك كتير على اهتمامك ولأنك خففتي عني
      بتعرفي أنا بهالبيت رح يصرلي 4 سنين ماكنت بعرف حدا قريب عليي قبل هدول الجارات
      هون الاتراك اللي بالبناية ماحدا بفوت عند حدا بس اذا التقينا صدفة برا منسلم عبعض
      بقى لما تعرفت عجاراتي كتيييير انبسطت وحبيتن وتونست فيهن
      وانا بطبيعتي بتعلق بسرعة😅 يمكن هاد الشي مو صح بس هيك بصير معي لهيك زعلانة على روحتهن😟
      الحمد لله على كل حال أصلاً مو طالع بالايد شي😁
      وانتي الله يحميكي ويسعدك ويجمعك دايماً بناس يجننو متلك هههههه
      كيف ملاقية الحياة بقطر 😀
      وضحكتيني عالقطرية خرج تحكو انتي وياها انجليزي😂

    • ههههههه ضحكتيني من قلبي والله يا نور
      .. الله يسعدك ويهدي بالك يا رب
      والله عزيمة وعزيمة فعلا صارت رابع يوم العيد عملت البخاري مع جاج مشوي بالفرن وتبولة وسلطة عادية وصينية كباب هندي وكبة مقلية عادية وسمبوسك جبنة عملتها من قبل وفرزتها
      وعملت كب كيك وخليته سخن وقدمته مع آيس كريم
      وما بعرف اعمل الكبة النية يلي حكيتيلي عنها .. وطلع الأكل بشهي الحمد لله طول ما انا بطبخ وانا بستغفر وبسبح بنية الأكل يطلع راكز هههههه والله طلع بشهي ربي لك الحمد
      .. والعيشة بقطر حلوة ويعني فرصة عمل منيحة لزوجي .. هو حدا عنده طموح وبحسه بستاهل
      وما دام زوجي واولادي معي بعيش عالقمر ههههه يا رب رزقة هالاولاد الله يسعد ويعطي كل الناس يارب الخير والرزق والبركة والسعادة

    • آمين ياعمري الله يسمع منك ويفتح عليكم من أوسع أبوابه ويبارك برزقكم ويحميلك ولادك 😀
      وانتي بتستاهلي كل خير كمان والله😍

      حيووووو صفوءة والله مبدعة ههههههه
      بس تكون عزيمة لبيت حماكي بتحسي بالمسؤولية هههههه
      بس مابينخاف عليكي ماشاء الله
      ربي يباركلك ويسلم ايديكي ويعطيكي الف عافية😍

      ماكو صور للعزيمة هههه؟

    • وإياكي يا رب وانتي حدا بستاهل كل خير
      هههههههه ربي يسعدك يا نور
      رح أركز ملفي وما تشوفيني إلا بيوم ولا انا منزلة صور بتسطل عن العزومة إن شاء الله طبعا في صور ..

اترك تعليقاً

لن يتم نشر عنوان بريدك الإلكتروني.