صفيحة باللحمة ملكة أطباق اللحوم

المقادير

• مقادير العجين:
• 6 كوب طحين ابيض
• كوب حليب بودرة
• نصف كوب زيت ذرة
• م.ك خميرة
• 2 م.ك سكر
• م.ك ملح
• م.ك بيكينج باودر
• 3 كوب ماء دافئ تقريبا ممكن اقل او اكثر حسب نوع الطحين
• مقادير اللحمة:
• كيلو لحمة مفرومة ناعم وجهين ربعها دهن ضروري
• كيلو بندورة مطحونة
• نصف كيلو بصل مطحون
• قرن فليفلة حارة مطحون او م.ك دبس فليفلة
• 2 م.ك دبس الرمان
• م.ك بهاراتك المفضلة
• م.ص فلفل اسود
• م.ك كزبرة بودرة

الخطوات

السلام عليكم ورحمة الله وبركاته

من اطيب انواع المعجنات الصفيحة باللحمة وكل ست الها طريقتها الخاصة ونكهاتها المميزة حبيت اقدم طريقتي وان شاء الله تعجبكم. وارفقت صور لمناقيش الزعتر وخلية النحل بنفس العجينة القطنية الراااااائعة.

أولاً/ اللحمة

طبعا لحمة الصفيحة لازم تكون مطحونة عالناعمة وجهين عشان تطلع زي العجينة وتستوي وتطلع موزعة صح عالعجين ( انا كانت اللحمة مفرومة خشنة وماعندي ماكنة لحمة فضربتها عالكبّة وما نعمت زي مابدي) وبنخلط معها البندورة والبصل وباقي الخلطة وبنتركها بمصفى لحتى نعمل العجينة بتكون تخلصت من السوائل الزيادة.

ملاااحظة/

كمية الدهن والبندورة والبصل لازم تكون مضبوطة وكثيرة عشان ما تكشّ اللحمة عن الخبزة ونعومة اللحمة عامل مهم كمان.

ثانياً/ العجينة القطنية الرائعة

بنخلط كل المواد مع بعض عدا الماء وبنخلطها لحتى تصير مثل الرمل بسبب الزيت وبنبدأ نضيف الماء لحتى تصير عجينة طرية بتلزق شوي باليد وهاد سر طراوتها وهشاشتها.

—بنتركها تخمر

ثالثاً/ تشكيل وشوي الصفيحة

بنقطع العجين لكرات صغيرة يعني إذا صغرتي الصفيحة بتعمللك الكمية 50 حبة وإذا وسط 40 حبة.

—بنبدأ نفرد كل كرة بشكل بيضوي او دائري كمان بصير ، الصفيحة بتكون رقيقة كثير بس انا ما رققتها كثير بحب اشعر بطعم الخبز مع اللحمة. انتي زي ما بتحبي رققيها.

—بنفرد طبقة رقيقة من اللحمة عالعجين

—شوي الصفيحة بفرن محمي على اعلى حرارة بالرف الوسط لحتى تستوي وتتحمر.

رابعاً/ مناقيش وخلية النحل

زادت معي عجينة عملتها مناقيش وخلية نحل مش محشيه اي شي بس لما استوت وتحمرت دهنت وجهها قطر وطلعت خرافيه.

—بتمنى تكون الوصفة عجبتكم وتجربوها وصحة وهنا