img
الرئيسة / حلويات / بقلاوة بالشوكولاتة والبندق وبشكل جديد ملكة الإبداع

بقلاوة بالشوكولاتة والبندق وبشكل جديد ملكة الإبداع

/
/
/
1458 مشاهدات

 

بقلاوة بالشوكولاتة والبندق وبشكل جديد ملكة الإبداع

بقلاوة بالشوكولاتة والبندق وبشكل جديد _ ملكة الإبداع

بقلاوة بالشوكولاتة والبندق وبشكل جديد ملكة الإبداع

بقلاوة بالشوكولاتة والبندق وبشكل جديد ملكة الإبداع , معكم صديقة زاكي الشيف الموهوبة , اشتقتلكم كتير وقلت مو حلوة ارجع وايدي فاضية ههههه مين منا مابحب البقلاوة أو الشوكولاتة طعمتين ساحرتين مامنقدر نقاومهم فقلت ليش لحتى ما نجمعهم بالحلال هههههه هيك بصير عنا أكلة سوبر لذاذة وإدمان
بالنسبة للون ما بخفيكن كنت رح بيت استخارة اذا بدي اسقي بقطر شوندر واحصل على لون مختلف الله أعلم كيف بيطلع ولا ضل عالمضمون واسقي بقطر عادي واخترت المغامرة أكيد ههههه صايرة وصايرة وخابصتها فليش لحتى مانجرب شي مختلف
بالنهاية طلع المنظر بشهي والطعم رح تروحو عالمطبخ تطبقو وتدوقوه وبتقولولي كيف ههههه
كالعادة صرعتكم بقى شربو بندول ولحقوني عالمقادير

المقادير

  • منحتاج عجينة كلاج جاهزة أو معدة منزليا (منزلة الطريقة قبل)
  • زبدة سايحة ((ماقلت سمنة لأنو طعمة الزبدة مع الشوكولا أطيب ومتناسقة أكتر))
  • شوكولا دهن
  • قطعة شوكولا خام
  • بندق مجروش وفيكم تستبدلوه بأي نوع مكسرات تاني بس البندق متناسق مع الشوكولا أكتر
  • أما بالنسبة لقطر الشوندر فمنقشر الشوندر ومنقطعو قطع كبيرة ومنسلقو ومناخد المي تبعو منصفيها ومنعمل فيها القطر متل العادة للبقلاوة:
  • كوب من ماء الشوندر
  • كوبين سكر
  • عصرة ليمون

الخطوات

☆بسم الله الرحمن الرحيم☆

أول شي رح نجهز القطر ونتركو يبرد

وهلأ منجي للمحروسة ههههه

☆مندهن الصينية بالزبدة ومنحط رقايق العجينة ورقة ورقة ومندهنهم بالزبدة كمان

انا حطيت من تحت حوالي 20 ورقة والأمر خياري وبيرجع الكم

☆منحط عليهم شوكولا دهن ومنوزعها بشكل متساوي نوعا ما وبعدين منرش فوقها البندق وبعدا منحط قطع صغيرة من الشوكولاتة الخام ((الخام بعد ماتطلع من الفرن رح ترجع تتماسك شوي لهيك بتعطينا شعور بسيط بالقرمشة لأنها مابتضل سايحة))

☆ بعد الشوكولا رح نرجع نحط طبقات من للعجينة وندهنها بالزبدة

☆ رح نغطي الصينية ونحطها بالبراد شوي لحتى تجمد الزبدة وتخلي الوراق يتثبتو منيح ليسهل علينا تقطيعها وبعدا قطعوها كيف مابتحبو وانا وضحتلكم شوي طريقة التقطيع اللي عملتا

☆ مندخل الصينية على فرن محمى على درجة حرارة 200 ومنحمرها من فوق ومن تحت

من تحت رح تاكل وقت أطول لهيك انتبهو تطفو عليها من فوق لما تشقر كفاية

يارب تكون الفكرة عجبتكم ومامتي بتقلكم طييييييييييييييييييبة وجربوها

وبس ماما تقول طيبة يعني أنا عاملة إنجاز خارق حارق مسيل للدموع هههههههههه

وكمان أوفر من المكسرات وبالنسبة الي أطيب ههههه

لا تنسو اني بحبكم كتيييير وبتمنى تدعولي بالبركة وكل شي حلو متل قلوبكم

109 تعليقاً

  1. وهي اول تعليق لنور النواره
    اول شي عجبتني فكرة جمعتيهم بالحلال….يسعد قلبك يا ام الافكار النيره الشكل بشهي وبفتح النفس واكيد الطعمه اشهى الله يسلم هالايدين الحلوين يلي ما بطلع منهم الا الحلاوه والطعم الطيب تبارك الرحمان
    سلام خاص لولدتك ربنا يحميها ويخليلكم اياها

  2. ما شاء الله عنك يا رنوشة الرنوشات انتي واللسان دائمآ يعجز عن الكلام و صفك يا رنوش الله يديم عليكي النعيم والانبساط والصحه

  3. ماشاءالله تبارك الله
    يسلم راسك اللي يطلع هذه الأفكار الرهيبة والمبدعة
    فعلاً التغيير مطلوب والتطوير في هذا المجال حاجة ماسة ليوازي حجم السرعة الهائلة التي تقود عالم اليوم
    أختي نور أنتي تحققي حلمي شيئاً فشيئاً عوضتي حسرتي بعدم المشاركة في هذه المسابقة بالتغيير الذي أنشده
    ليرحمك الله وينزل بركاته عليكم بفضله وكرمة اللهم آمين .

  4. ماشاءالله تبارك الرحمن جمعتهم شكلها مباركه لان طعمها مبين انه لذيذ وشهي وبيستحق التجربه😍😂

    يسلملي قلبك ي نواره ع ابداعاتك المتجدده دائمًا
    ماننحرم منك ولاتغيبي كثير😭

  5. له له له يا نور بتجمعيهم بالحلال بدون ما تعزمينا وبدون زيطة وزمبليطة والله هيك احنا كلنا هون حقنا نزعل وما نحكي معك هيك جمع بالحلال لازمو ناس تقوم بواجبو ولا شووووووو صبايا 😂😂😂😂😂😂😂😂😂😂😂

    حبيبت قلبي نور النوارة شكلك مندوبة لشركة بنادول انتي هون بتيجي بتحكي كتير واخر شي خدو بنادول شو مصلحتك من هالشغلة هااااا 🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣🤣

    حبي يا أحلى نور ربي يسعد قلبك شو فرفوشة ونغوشة يسعدها ست الكل الي جابت نوارة متلك سلمي عليها وبوسيها من بين عيونها تستاهل كل خير ع هيك جوهرة 😍😍😍💖💖💖💖💖😙😙😙😙😙😙

    • عملناها عالديق قال مابدهن كترة مشان ما الكل يهجم عليهن بتعرفي يعني بكونو محط أنظار
      وقال حضوري كافي ووافي😂😂😂

      الله يسعدك ويخليلي ياكي ام حسن ياقلبي الله بيعلم بغلاوتك 😍
      ورح وصل كلامك لماما وانفش ريشاتي😂
      الله يحفظلك امك وحبايبك كلهم ياعسل😘

    • اما مشان شركة بنادول لو بيفهمو كانو عينوني مديرة الإعلان والتسويق تبعهم😂😂
      عم حاول سوقلهم بركي بستفدلي بقرشين ماعم ينتبهو😂😂😂
      بس انتو مساكين بتضلو تبلعو بنادول عالفاضي😆
      هي اعترفت بالسر ارتحتي هلأ😁

    • 😂😂😂😂😂 حبيبو لقلبي انتي تسلميلي يا عسل بس تاني مرة وسعيها هاللمة خلينا كلنا نحضر ولا رح ازعل منك ورح اغتالك انتي والزواكي تاعوتك 🤣🤣🤣🤣🤣🤣🤣
      وبالنسة لشركة بنادول اصلآ هية هسا قاعدة تخترع مسكن اقوى لأنو بطل يجيب نتيجي معنا من كتر الرغي لأنو صرنا كلنا رغايات كمان 😂😂😂😂😂😂😂😂😂😂

  6. ماشاء الله ننوشه جمعتيهم بالحلال وطلع معك احلا وصفه 😂 الله يسلمهم إيديك يارب والله يحفظ الوالدة ويحفظكم إلها اللهم آمين،،،،

  7. ما هذا الجمال أه يا قلبي 😍
    يعني مستحيل مستحيل ما أقرأ كل كلمه كاتبها بالوصفه يسعد ألبك شو بحبك ربي ما يحرمنا من إبداعاتك يا عمري ما شاء الله عليكي مزوقه ومبدعه ودمك خفيف أللهم بارك 🌷
    ربي يحفظلك الوالده ويبارك بعمرها ويجمعكو ربي دايما على خير بحببببببببك أنااااااا❤😙

    • وأنااااااااااااااااااااااااااااااا بحبك أكتراااااات😁
      الله لا يحرمني منك شو بفرح دايماً بكلامك ودعمك وتشجيعك المتواصل
      كتير بستنى شوف رأيك وصدقا بيعنيلي فوق ماتتخيلي لأنك شيف مبدعة وقلبك عسللللللل😍
      الله يباركلي فيكي ويخليلي ياكي ويخليلك مامتك وكل الغاليين عقلبك😘

  8. ما شاء الله لا قوة الا بالله .. اللهم بارك
    بتخيل بالطعم مش قادرة احصله كيف بالزبط
    بس ما دام الماما حكت طيبة خلص معناها طيبة وخارقة للطبيعة
    تسلم ايديكي المعدلة يا نور ويباركلك ويعطيكي كل شي حلو بتتمنيه ياااا رب 💖

    • هههههه حبيبتي نور يسعدك .. آه شفتهحبيبة قلبي وعلقتلك التعليقات مهو هون تعليق وهناك تعليق الواحد بنسى وين معلق ووين لا ويا رب نشبع حكي ههههه مني علي ولا اكتر من حكيي بطبيعتي عندي دايما حكي مع العلم انا بيتوتية مو كتير فرارة بس من وين الحكي والسير بتيجي انا عن نفسي ما بعرف هههههه خواتي واخواني بحكولي أوف شو بتحكي بس كنت بالأردن نروح هيك لمات عند أهلي ننام ليلة نحن واولادنا نقعد نحكي ونسهر بالليل .. ومن جوا صوت بعيد اخوي نايم يا رب صفاء تخلص حكي وقصص ياااا رب هههههه ولا .. مش اسكت اصير ابهدله روح غاد ما ابيخك انت نام شو بدك فينا ههههههه شو بدنا نعمل يا نور
      الله يسعدك يا طيوبة بحبك أوي ههههه

    • 😂😂😂😂 يمااااا وأخيراً لقيت حدا بيشبهني
      تعي تعي صفي جنبي
      هلأ عرفت ليش بحبك بزيادة😂😂
      أنا هيك من صغري كتيييير وهلأ بنت اختي الصغنوتة طالعتلي بهالشغلة وكتير شغلات لهيك انا وياها صحاب كتير وبابا بضل بقلي هي صغرتك
      مابتسكت أبدا😂
      يختي يصحلهن عم نعمللهن كل هالأجواء😌😌
      أنا متأكدة انهم بيستفقدولك دائماً لأني بحس قعدتك حلوة كتير وبتعطي طاقة ايجابية اللهم بارك😍😙
      يارب اجتمع فيكي شي يوم

    • ههههههه يا حبيبتي أجمل ناس هم يلي بضلو يحكو
      تسلمي يا قمرة انتي الحلوة وباين من كلامك قعدتك حلوة واجواااء وهلم جرا ههههه يسعدك يا نور يا رب ان شالله اجتمع فيكي شي يوم ما في شي مستحيل
      حبيبتي 💖💖💖

  9. اخخخخخ يا ويلك من الله ع هالوصفه .. واللون والشوكولاته قلبها انثوي رسمي .ممنوع الرجال يكولو منها 😂😂😂

    هاتيلك قطعتين اذوقهن واعطي رأي عشان اعرف اوكل منها او لا 😲😲😲😲😲

    ههههههههه تسلم ايدك يا نونا المجنونه قصدي المزيونة 😝😝😝😝😝

    لا جد روووعه تبارك الله وباين قرشتها بالف هنا وصحه الك ولماما ياقلبي

  10. يا عيني عليك يا نور.. وصفتك بتشهي.. وبتاخدنا لمكان بعيد وبترجعنا مع خطوات التطبيق يسلموا إيديك يا قلبي وصفتك كلها إبداع وإنجاز.. تسلميلي إنت والماما.. الله يحفظكم لبعض ويحقق مرادكم يارب 💞❤️💞

    • إنجازي بشوفو بتعليقات الطيبات متلك ياقلبي
      ربي يسعدك ويخليلي ياكي ومايحرمني طلتك الحلوة عليي
      غمرتيني بلطفك والله😘😍
      والله يكرمك ويجزيكي أضعاف دعواتك الحلوة❤

  11. ايوة يختي خليكي دغري يحتار عدوك فيكي كلو ولا الحرام
    يابخت من وفق بين علبة نوتيلا وبندق وبقلاوة بالحلال
    😋😋😋😋😋
    السبانخ وقلنا ماشي يكون بدل الفستق
    كمان الشمندر ماسلم منك اللهم بارك عنجد عنجد بحبك انا
    اللهم بارك وصفتك بتجنننننننن الصور بتخلي الواحد يقع من طولوا😵😵😵😵😵😵😵

  12. ياعيني ياعيني على البقلاوه المدلعه والمنظر الشهي والتغير المعاصر اكيد هاي حركات نوارتنا ربي يسلمهم ديااااتك ياعسل وصحتين على 💓ماما والله يخليلك ياها و يعطيها الصحه والعافيه يااارب🤲🏻😘🌷

  13. يسعد قلبك نور كلك إبداع و زوق يسلم ايديكي و عوافي ع قلبك حلو التغيير والاحلى لما يجي في بالك شي اختراع و يزبط معك الواحد بنبسط كثير الله يفتحها علينا وعليكي في جميع نواحي الحياة

  14. لك يسعدلي الي بوفق بين تنين بالحلال ههههه
    وصفة بتجنننننننن 😋😋
    اللهم بارك
    اي شوهاد يانوراتنا لازم كل مرة تبهرينا بوصفة الذ من الي قبلا 😀
    الله يسلم ايديكي ويخليلك الماما يارب ويديمكن لبعض ويجمعك مع حبابك ياقلبي😍😍

  15. شوووووووووووووووووووووووووووووووووو هادا😋😋😋😋😋😋😋😋😋😋😋😋😋😋😋😋😋😋😋دمار شامل شلل نصفي لا والله شلل كلي شو عالشوكلاتة عالبقلاوة عالقطر يا خراشي شو هالوصفة شكلك ناوية تدمرينا حرام عليكي خلطتي كل هالمكونات مع بعض 😭😭😭😭😭😭😭😭😭😭 على شو ناوية بهالوصفة مش عارفة ……….صابني ارق ………بنتي الصغيرة بتقول ذاكي ذاكي ……..عنجد زاكي تسلم ايدك يا مبدعة ……..قررت اخطفك واريح الناس الي عاملة ريجيم من وصفاتك المدمرة 😘😘😘😘😘😘😘😘😘😘😘

    • 😂😂😂 يسعد قلبك يا ام لمى انتي وبنوتك العسل متلك اللهم بارك 😍
      انا برأيي تخطفي الدايت نفسو وتريحينا كلنا منو بتكوني عملتي أحسن شغلة بحياتك وبنوبك بكروشنا ثواب😁😆
      يسعد قلبك شو بحبك انا الله يخليلي ياكي يا صاحبة اللطف والزوء😍😘

  16. ربي يسلم هالديات يا ست الستات ما شاء الله تبارك الرحمن المنظر لا يقاوم ريي يديم عليكم النعم ويخليلنا اياكي يا غالية وتظلك تتحفينا بوصفاتك الي اكتر من روعة حبيبة قلبي نور النوارة

    الوصفة طاااالغة خيالية من تحت دياتك الها رونق ومنظر أخر 😭😭😭😭

    أجا ع بالي بدي منهم 😪😪😪😪

    حبي انتي عم أمزح معك ربي يسلم هالديات الي بيلتفو بالذهب وربي يعطيكي حتى يرضيكي ويرزقك ربي الذرية الصالحة عاجلآ غير اجل ويفرج كربك ويسر أمرك ويجمعني ربي فيكي عن قريب يا بتركيا انا باجي لعندك او بالأردن انتي بتيجي لعندي شوووووووووو رأيك

    لأنو جد صار فيني متل المجنونة كل يزم عم افتح ع شان شوف اسمك واطمن عنك 🤔🤔

    يا خيتي جننتيني ما بعرف ليش حرام عليكي هبك لاااازم نلتقي ونجيب معنا كم وحدة من الصبايا ونلتم وانسى يا كبير قعدة خرااااغية حتكون 😂😂😂😂😂😂😂

    • لك ليش عم تمزحي
      يوم المنى لو اقدر اجتمع فيكي وطعميكي منهم والله قلبي بنغمش عليكي كل ماشفت اسمك😍
      ربي مايحرمني منك ومن قلبك الصافي الرقيق
      انا كل ماشفت كلماتك بتذكر اني بمتلك نعمة كبيييبيييرة رب العالمين مفضل عليي فيها❤
      بحببببببببببببببببببببببببك انا بحبك بحبك بحبك هههههه

    • الله يجزيكي كل خير على دعواتك الصادقة ويكرمك بكل شي بتتمنيه ياقلبي
      عنجد انا محظوظة فيكي وبلشت خاف احسد حالي عليكي هههههه
      اي والله الله يكرمنا ويجمعنا
      بتكون جمعة من العمر😍😍😍

    • وانا بمووووت فيكي يا أغلى وارق شي عرفتو بهالدنيا

      جد انا الي ٣ خوات من امي وابي بس ما بعتبرهم ٣ بعتبرهم ٤ وكل ما حدا يسألني من الرابعة بحكيلهم يا حبيبة القلب ورفيقة الدرب

      ربي يخليلي اياكي يا غالية ♥️♥️♥️♥️♥️

    • اللهم بارك انتي فعلاً مو معقولة😢😢
      يا الله شو نفسي شووووووفك
      يارب لا تحرمني تحقيق هالأمنية بالدنيا والجنة ان شاء الله ❤
      الله يحفظلك اهلك واخواتك ويهنيهم فيكي وبقربك وبشوفتك ومايحرمني منك اختي وصديقتي الصدوقة😍😘

    • تسلميلي يا قلبي انتي وربي ما يحرمني من اللقاء فيكي وعن قررررريب جدآ

      والله بإزن الله اذا فكرت يوم أطلع ع تركيا لأجي وشوفك لأنو جد مشتهية هاللحظة

      ربي يخليلي اياكي يا غالية وما يحرمني منك ومن كلامك الي متل العسل يا عسل إنتي

      صح انتي وين ساكنة بتركيا 🤔🤔

      ع شان ازا فكرت اجي شي يوم 😂😂😂😂
      الي كم يوم عم نق ع راس جوزي بحكيلو مو لازم نطلع ع تركيا نغير جو شو رأيك

      بحكيلي شو القصة لي لهالدرجة حابة الموضوع مسكككككككين مو عارف انو حابة اجي وشوف اختي وحبيبتي نونو ♥️♥️♥️♥️♥️

      ان شاء الله حتيجي اللحظة هاي عن قريب

  17. ياااااااااااااااااااااااااااااااييي
    ولك شو هاد يا مجنونة شو هالاختراااااع والابدااااااع والله ابدعتي واتحفتينااااا متل كل مرة ما في شي غريب وبعيد عنك ربي يباركلك ويعطيكي الصحة والعافية يا قلبي

  18. بصراحة تعجز الكلمات عن وصف هذا المشهد المذهل
    تجاوزت هالوصفة كل معاني اللذاذة والنعومة والرقة
    جمالها ما له وصف عندي بصراحة
    وصفة غير عادية وغير متوقعة
    اللهم بارك
    اللهم بارك
    اللهم بارك

    • انا اللي عاجزة عن الرد على جمالك انتي وكلامك انتي ورقتك انتي😍
      يارب احفظها وباركلي فيها وارزقها سعادة الدارين❤
      بعض ماعندكم يا غالية
      اشتقت لابداعاتك كتييييييييير 😄

  19. شو هذا يا نور انت دائما مصرة تبهرينا بإبداعاتك شو هل جمال ولأناقه والرتابه مزوقه بكل معنى الكلمة يعطيك العافية يا قمرة 🌺🌺🌺♥️

اترك تعليقاً

لن يتم نشر عنوان بريدك الإلكتروني.