
تونر تقوية بصيلات الشعر وتكثيفه سلسلة وصفات الجمال 9
السلام عليكم ورحمة الله وبركاته
خلصت مسابقة الابداع بس سلسلتنا ماخلصت وان شاء الله رح استمر بتنزيل وصفات بتجاربي الشخصية ودائماً الوصفات الطبيعة مابتعطي نتيجة سريعة يعني لاتمللي ولاتزهقي لأنه في وصفات بدها فترة حتى تعطيكي نتيجة ولازمها مداومة وفي وصفات ممكن من اول استخدام تحس بفرق ونتيجة حلوة وهذا التونر لازم تستخدميه بشكل يومي الك ولبناتك خصوصا للي بعانو من تساقط الشعر بس لازم نتأكد من انه ماعنا نقص حديد او نقص بڤيتامين د لأنه نقصهم بيعمل على تساقط الشعر بكثرة
بعتذر عالإطاله خلينا نشوف الطريقة
بسم الله نبدأ….
نضع البصل والثوم واوراق السدر واكليل الجبل وعيدان القرفة في طنجرة ونضيف الماء ونغطي الطنجرة ونضعها عالغاز لحد ماتغلي نوطي النار ونتركها تغلي لمدة ثلث ساعة.
بعد مامر ثلث ساعة على غليان التونر بنضيف 3 ملاعق ماء ورد وهون وظيفته حتى يساعد بتخفيف رائحة البصل بنتركه يغلي عشر دقايق ونطفي تحته.
بعد ماطفينا النار وبنترك الخليط مغطى لثاني يوم حتى نستخلص كل الفوائد من المكونات.
ثاني يوم بنصفي الخليط ونضيف زيت الشاي وزيت القرفة
وهون الزيوت عدا عن فوائدها بتقضي تماماً على رائحة البصل والثوم وبتعطي رائحة حلوة للتونر بالاضافة لماء الورد بنضع التونر بعلبة بخاخ ونحفظها بالثلاجة وتستخدم يومياً ترش على الشعر كامل وعلى الجذور ومكان فراغات الشعر ولاتغسلي شعرك بعد وضع التونر واذا ماعندك علبة بخاخ حاولي بللي شعري بالتونر وبقطنه اعملي كمادات ع مكان الفراغات .
للأخوات اللي مابصبغو شعرهم ممكن تضيفي ملعقتين حنا بعد ماتطفي النار على الخليط مباشرة بتضيفي الحنا والحنا غنية عن التعريف وفوائدها رائعة جداً لتقوية الشعر ومع الوقت بتعطي لون خمري للشعر .
بتمنى هالوصفة تنال اعجابكم مع تحياتي أم جيلان
تونر تقوية بصيلات الشعر وتكثيفه سلسلة وصفات الجمال 9
تونر تقوية بصيلات الشعر وتكثيفه سلسلة وصفات الجمال 9
المقادير
الخطوات
ربي يجزيكي كل خير يارب 😍
وأكيد ما راح نمل من هالسلسله إلي أكثر من رااااائعه ربي يبارك بصحتك وعافيتك ويرزقك من واسع فضله بجد روووووووعه💖😙🌹
انتي الاروع الغالية ام مصطفى ربي يسعدك ويرضى عنك ويجزيك الخير
ماشاء الله عليك سلسلتك اكثر من روووعة تسلم ايدك والله يعطيك الصحة والعافية ي رب❤😘
ي حبيبتي اذا عندك خلطة للنمش وصفاء الوجه ي ريت تفيديني وبكون ممنونتك😘😘
ربي يعافي قلبك خيتي وتكرمي رح انزل كريم طبيعي وان شاء الله هو حلو عالبشرة كثير ونتائجه مرضية
وبالنسبة للنمش والتصبغات لسا في كريم بدي اعمله وأجربه بإذن الله واذا اعطاني نتيجة بنزله بعون الله
ماشاء الله عليك وصفاتك ممتازه الله يجزيكِ كل خير ❤❤❤
واياك خيتي دينا
مرحبا.اختي ام جيلان بدي اسالك عن صابون شوفان تشرحيلي كيف طريقه بتفصيل لانه حابه اعمله وخايف ما تزبط معي ارجوكي ردي علي لانه انا شغال ع مشروع .يعني كيف بكون القوام ومتى احط شوفان.وكيف بضمن نجاحها
حبيبتي ام عبود انتي شفتي وصفتي صابون الشوفان ؟؟
اذا ماشفتيها ادخلي على ملفي بتلاقيها بالتفصيل وبالصور
واذا مو فاهمة اي خطوة اسأليني ورح اوضحلك بإذن الله
القوام رااااائع جداً لأنه السوائل كميتها مناسبة وخلال 24 ساعة بتكون الصابونة ممتاز للإستعمال بس احنا بنتركها كمان يوم ثاني تنشف قبل التغليف
وبإذن الله بدي اعمل صابونة ورد
وصابونة بابونج وانزلهم لعيونك وكمان صابونة لبان الذكر بمشيئة الله بنزلهم قريبا
شكرا الك ع رد بس انا شفتها ملفك وانا هسع شغاله ع صابون بزيت الزيتون وماء الورد حاولي اعملي بلبابونج لانه مجهز المواد وخايفه صراحه اعمل لانه اول مره بعمل بصابونه جليسرين
من وين انتي حظرتك انا من الاردن اربد
اهلا وسهلا فيكي اختي ام عبود وانا كمان من اربد لواء الرمثا
تكرمي المواد عندي بس مشغولة هاليومين بالامتحانات لإبني ان شاء الله بعملها وبنزلها بأقرب وقت
الشوفان سهل جدا عمل الصابونة واذا التزمتي بالمكونات الموجودة بالوصفة بإذن الله رح تزبط معك ولاتخافي ابدا المقادير مزبوطة مية بالمية والصابونة رااااائعة جدا بتبيض وبتنشف الحبوب وهالحكي عن تجربة ناس كثير ولله الحمد من قبل ومن بعد
الله يحيكي يارب وشكرا الك اختي
العفو حبيبتي ام عبود
يسلم ايديكي رائعة جداااااااا
انتي الاروع جمانة
روووووووعاااااتك ام جيلان يسلم ايديكي وعينيكي يا قلبي ويعطيكي الف عافية يااارب
انتي الاروع ام اصيل 😘
يسلموا إيديك حبيبتى
اذا اتكرمتي اذا في وصفه لشيب
شعري كتير فيه شيب
وايديكي يارب
اختي هاي الوصفة اذا ضفتيلها الحنا بتخفف من الشيب لكن بدها مداومة وان شاالله عندي وصفة لكن بدها تجربة عشان احكم اذا بتفيد او لأ واذا زبطت معي بإذن الله بنزلها
ما شاء الله عليكي ام جيلان وصفاتك الرائعه اغنت زاكي كثير يعطيكي الف عافيه يارب
ربي يعافي قلبك خيتي ام جاسم ويسعدك دنيا وآخرة
ربي يكرمك من فضله يارب ويسعدك بالدارين يحفظك أولادك وتسلم ايدك على الوصفة السحرية رائعه
وايديكي خيتي ام زيد تسلمي
ما شاء الله عليكي .يعطيكي العافيه يارب
يعافي قلبك
صبايا اذا وحده عنده فكره عن زيت الخروع واستعماله تحكيلنا وتكون مجربه .
اختي اشكر مرورك على الوصفة
استخدامات زيت الخروع للشعر للكثافة والطول بتفدري تخلطيه مع زيوت او تخففيه بزيت زيتون حسب ماتحبي
ويستخدم لتطويل الرموش وتكثيف الحواجب وترطيب الشفاه
وايديكي صديقتي ام علي ربي يجزيك الخير
بسم الله ماشاءالله عليكي
وصفتك رووووووعة اللهم بارك
الله يسلم ايديكؤ ويعطيكي العافية😘
وايديكي خيتي هبة ❤
روعه…..زيت الخروع يقوي الشعر…..يعمل علي تنظيف المعده…😊
انتي الاروع 🌹🌹🌹
يا واد يا جامد… صايره خطيره امو لجيلان ههههههههه
هههههههه تسلميلي ام يوسف ربي يسعدك
يسلموا وصفه حلوه بس سؤال للاخوات اللي بحطوا الوصفات ليش ما بتابعوا الردود علشان اذا وحده عندها سؤال تجاوبوها هيك بتخلوا الكل يزعل منكوا
بالعكس اغلب شيفات زاكي يردوا على أي سؤال يطرح عليهم تقبلي مروري اختي لين
أكيد العسل مشغوله ولما تفضا راح ترد 😄
على شو مستعجله 😜
مزبوط كلامك لين وانا رأيي من رأيك
السلام عليكم
كيفكم اخواتي العزيزات
بعتذر منكم بتعرفو مشاغل ومدارس وبيت ،،،، والحمد لله دايما لما بنزل اي وصفة مابترك تعليق لأي اخت الا واردلها تحته ادخلو على ملفي اخت لين واخت اميرة فلسطينية واتأكدوا بنفسكم من صدق كلامي ومش بس انا اغلب شيفات زاكي هيك وأي استفسار انا جاهزة اختي لين
اخواتي العزيزات ام مصطفى ورذاذ المطر ربي يجزيكن الخير ❤❤❤
ام جيلان دايما بترد سريع
اكيد لين قصدها مش عنك
لانه في كم وحده فعلا مابجاوبو الابعد كم يوم…
بس نفترض حس النيه
احيانا مابكون معهم نت او سبب ثاني
تسلمي خيتي ام علي على راسي انتي والاخت لين والاخت فلسطينية ربي يسعدكم ويرضى عنكم
أم علي انتي انسانة راقية جداً اللهم بارك
ربي يسعدك ع كلامك
اشكرك كثير ام جيلان على هذي الوصفه ونتظر مزيد من ابدعاتك
العفو حبيبتي ربي يسعدك
لازم نسميكِ ملكة وصفات الجمال
اتعديتي وصفات الطبخ للشي الاحسن👍👍👍
شكراً إلك صديقتي ام علي على كلامك الجميل بحقي ويارب دايما أكون عند حسن ظنكم وربي يجزيكي الخير 💖
❣️❣️❣️
ما شاء الله عنك ام جيلان وصفاتك رائعه ومفيده ..يسلم دياتك ويعطيكي العافيه
يعافي قلبك الغالية ام محمد 🌹
ربي يباركلك بصحتك وعافيتك ام جيلان…ياريت اذا في عندك خلطات لشد الصدر تفيدينا والله يجزيكي الخير عن كل وحدة بتستفيد من خلطاتك
وفيك بارك اختي
ان شاء الله اذا ربنا يسّر بنزل قريباً تكرمي 🙂
تسلمي ع الوصفات المفيدة
بدي منك وصفه لتنعيم الشعر للأطفال بنتي عمرها 3 سنين وشعرها ملوي وبيتعبني لما امشطها 😩
ازا بتحبي انا بعمل خلطة زيوت لبنتي شعرها كيرلي وبنفش رهيبه الخلطه بنصحك فيها زيتجنين قمح زيت لوز حلو زيت سمسم زيت حبة البركه زيت جوز الهند كلهم علبه ام الدينار حطيهم مع بعض وضيفي عليه فنجان قهوه زيت زيتون كل يومين والتالت حطيلها وخلي ساعتين تلات قد ما يطَل بكون احسن وحمميها وشوفي النتيجه وادعيلي
ربي يسلمك
شوفي وصفة ام يوسف خلطة الزيوت
وفي كمان طريقة جل بذور الكتان بتلاقيها بملفي وصفة رائعة ومجربة ان شاالله بتفيدك
لولا العنوان كان فكرت رح نسلق جاج ونعمل كبسة😁😄
ربي يجزيك عنا خير الجزاء يا أختي ويا صديقتي الغالية وما يحرمنا هالوصفات الغنية بالفائدة والنفع للجميع..
وحابة أتشكرك شكر خاص على وصفة جل الكتان للبشرة والشعر .. اللهم بارك اللهم بارك لاحظت الفرق لبنتي من أول استخدام وتغير شكل وملمس شعرها فورا .. سبحان الله العظيم
بارك الله فيك ونفع بك وكتب أجرك🌹💚
😂😂😂😂 كبسة للشعر
ولكِ بمثل ياصديقتي…الحمد لله انك استفدتي من الجل اللهم بارك وان شاالله مع كثرة الاستخدام بيعطيكي نتيجة افضل
جزيتي خيراً ريحانة زاكي على كلامك الجميل وربي يكتبلنا الاجر جميعا
السلام عليكم ورحمة الله
شكرا لجميع اخواتي وصديقاتي على كلامكم وتشجيعكم
جزاكن الله خير الجزاء ياغاليات
ملاحظة نسيت اذكرها في بعض الاحيان ممكن هاي الخلطة تحسي انها اعطتك ملمس خشن بعض الشيء
اللي بتحس انه شعرها صار في نوع من الخشونة تستخدم حمام زيت بعد غسل الشعر او تعتمد وتدوام على جل بذور الكتان
يسلمو
تسلم ايدك هاعملها يارب تجيب نتيجة
روووووعة.
يسلمو